N te taetae n Ebera ao a nakoraoi rairai aika uoua aikai. Te bitaki aei e boto i aoni baikai:

1. Taekana ake a a manga rinanoaki e boutokaaki n taian rikitinare ao e boraoi ma tuan te taetae. Te bwai ae irekereke iai Taian Areru 144:12-15 ma kiibu ake mai mwaina e boto i aon nanon te moantaeka n te kibu 12, n te taetae n Ebera ae asher. E kona n rairaki asher n aaro aika bati. N te katoto, e kona n ataaki bwa te onea n nauna n aron “antai” ke “naake.” “Antai” bon nanona ngkoa n te rairai are mai mwaina. Ibukin anne, baika raraoi ake a mwaneweaki ni kibuna 12 nakon 14, a kaineti nakoia aomata aika buakaka, ake a taekinaki ni kiibu ake mai mwaina. E ngae n anne, e kona te taeka ae asher n nanonaki iai te bwai ae riki imwin te bwai teuana ke mwina, ao e kona n rairaki bwa “n te aro are,” “bwa e aonga,” ke “ngkanne.” Te taeka ae “ngkanne” bon te rairai ae kamanenaaki ni manga rinanoan Te Baibara ae Tabu—te Rairai ae te Aonnaba ae Boou, n 2013 ao n rairaini Baibara riki tabeua.

2. E tonu raoi taekana ae ngkai ma kanoan te areru ni kabane. Kamanenaan te taeka ae “ngkanne” n te kibu 12, e nanonaki iai bwa kakabwaia aika kaotaki ni kibuna 12 nakon 14 a kaineti nakoia aomata aika raoiroi, ae te koraki ake a bubutii ‘kainaomataaia ao kamaiuaia’ mairouia akana buakaka (kibu 11). E kaotaki naba te bitaki aei n te kibu 15, bwa uoua te tai kamanenaakin te taeka ae “kukurei” ibukini kaotan te bwai ae raoiroi. Ibukin anne, n taai akana uoua akanne e kaineti te kukurei anne nakon te koraki n aomata ae tii teuana, are te koraki “ake Atuaia Iehova!” Ururingnga naba ae te Baibara n te taetae n Ebera bon akea bwaai iai n aron te komwa ao kanikinaean te taetae. Ngaia are a riai taan raitaeka n iangoa raoi ae nanonaki ngkana a rinanon te koroboki n Ebera ae te kario, bwaninin te rongorongo iai, ao kibun te Baibara tabeua aika irekereke iai.

3. E boraoi taekana ae ngkai ma kiibu riki tabeua n te Baibara ake a beritani kakabwaia mairoun te Atua ibukia ana aomata aika kakaonimaki. Ibukini ngkanne bitakin rairan te taeka ae asher, e a kaotaki ngkai n te areru aei ana kantaninga Tawita ae ngkana e tia te Atua ni kamaiuia te natannaomata ae Iteraera mairouia taani kairiribai nakoia, E na boni kakabwaiaia naba ana aomata n angania te kukurei ao te mweraoi. (NakIbo. 26:9, 10; TuaKau. 7:13; TaiAre. 128:1-6) N te katoto, e taku Te Tua-Kaua 28:4: “A na kakabwaiaaki natimi, ao uaan ami tano, ao natiia ami nanai ni man, ami kao aika ataei ma ami tiibu.” Eng, n ana tai n tautaeka natin Tawita ae Toromon, e noraki iai te rau ao te mweraoi ae tuai n nonoraki mai mwaina iroun te natannaomata aei. Ma ae kakawaki riki, baika riki n ana tai n tautaeka Toromon boni bannani baika a na riki n ana tautaeka te Mesia.—1Uea 4:20, 21; TaiAre. 72:1-20.

Ni koauana, e aki rotakibuaka otara n ana reirei te Baibara ni bitakin taeka akana n Taian Areru 144. Ma e a kamatataaki riki iai te kantaninga are a a kaman iaiangoia i nanon te tai ae maan ana toro Iehova, ae a na kamaunaaki akana buakaka iroun te Atua ao e na taorimwiaki n te rau ao te mweraoi ae akea tokina nakoia akana raoiroi.—TaiAre. 37:10, 11.