1. Tera kakabwaiaara n taekinan rikira bwa taani Kakoaua ibukin Iehova?

 “E KANGAA n reke iroum te koaua?” E a bae ni bati am tai ni kaekaa te titiraki anne. Bon aei teuana mai buakon titiraki ae ti bae n titirakina iai raora n te onimaki ngkana ti kani kinaa raoi. Ti kan ongongora irouia tarira n te onimaki aroia ni moan ataa Iehova ao n tangiria. Ao ti kani kaongoia naba bukini kan rikira bwa Ana Tia Kakoaua Iehova. (IRom 1:11) Ni karaoan aei, ti a kauringaki iai korakoran nanora ni kan riki bwa taani Kakoaua. E a kamatoaaki naba iai nanora ni kan “teimatoa n nakonako i nanon te koaua,” ae nanonaki iai teimatoara ni maiuakina arora ae ti na karekea iai kakabwaiaara ao akoara iroun Iehova.—3Ioa. 4.

2. Tera ae ti na maroroakinna n te kaongora aei?

² N te kaongora aei, ti na maroroakin iai tabeua bukin tangiran ana koaua te Baibara iroura. Imwina, ti na maroroakina arora n teimatoa ni kaota tangiran te bwaintituaraoi ae kakawaki aei. Ni karaoan aei, ti na kani kaitaua riki Iehova ngkai e a tia ni katikira nakon te koaua. (Ioa. 6:44) E na kakorakoraaki naba iai nanora ni kan tibwaanako ana koaua te Baibara nakoia tabemwaang.

3. Tera bukin tangiran te koaua ae moan te kakawaki?

³ A bati bukin tangiran te koaua iroura, ma ae kakawaki riki, ti bon tangira Iehova ae te Atua ae Nibwan te koaua.  Rinanon ana Taeka ae te Baibara, ti a ataia iai bwa bon te tia Karika karawa ma aonnaba ae moan te mwaaka ao bon Tamara naba ae tatangira ae mumutiakinira. (1Bet. 5:7) Ti ataia bwa bon Atuara ae “nanoanga ao e atataiaomata, ae iremwe n un ao e bati irouna te tangira ae koaua ao e bwabwaina te koaua.” (TeOti. 34:6) E tangira te kaetitaeka ae riai Iehova. (Ita. 61:8) E maraki ngkana e norira n rawawata, ao e tatauraoi, eng e ingainga ni kani katoki karawawata nako. (Ier. 29:11) Ai boni kakukureira! Maroaka ae ti a rangi n tangira iai Iehova!

4-5. E aera Bauro ngke e kabotaua ara kantaninga ma te atinro?

⁴ Tera riki bukin tangiran te koaua iroura? Ti karerekei kakabwaia aika bati mai iai. E irekereke te koaua ma ara kantaninga ibukin taai aika imwaira. Ibukini kamatataan kakawakin anne, e korea aei te abotoro Bauro: “Te kantaninga ae iroura aei, kaanga ai aron atinroni maiura ae koaua ao e nene ni matoa.” (Ebera 6:19) E baireaki raoi butin te booti n te atinro ao te kantaninga ae boto man te Baibara, e anganira naba te rau ngkana ti aitara ma kataaki ni maiura.

⁵ E maroroakina ikai Bauro te kantaninga ae te maiu i karawa ae rangi ni kakawaki irouia Kristian aika kabiraki. Ma a kaineti naba ana taeka nakoia Kristian aika kantaningaa te maiu n aki toki n te aonnaba ae bwaretaiti. (Ioa. 3:16) Ni koauana, e rangi ni manena riki reiakinan te kantaninga ibukin te maiu n aki toki.

6-7. E kangaa ni kakabwaiaaki Yvonne n reiakinan te koaua ibukin taai aika imwaira?

⁶ Iangoa rongorongon te tari te aine ae Yvonne. E aki ikawairake i nanon te koaua, ao e mamaaka te mate ngke e uarereke. E uringa te bwai are warekia ao n tiku n ana iango ae kangai: “E nang roko te kabanea ni bong.” E taku: “I aki matu ni kangainaa bwa I iaiangoi taai aika imwaira man taeka akanne. I iango ao I taku, ‘E aera ngkai ti maiu tii i nanon tabeua te ririki ao imwina ti mate,’ I aki ota raoi bwa tera bukini menara ikai. Ao I bon aki kani mate naba!”

⁷ Ngke e a roro n rikirake neiei ao e a kaitiboo ma Ana Tia Kakoaua Iehova. E taku: “I kakoauaa ae I kona ni karekea te kantaninga ae te maiu n aki toki n te aonnaba ae bwaretaiti.” E kangaa ni kakabwaiaaki tarira aei n reiakinan te koaua? E taku riki Yvonne: “I a aikoa manga aki matu ni kangainaa ibukin tabeaiangau ibukin taai aika imwaira ke te mate.” E oti raoi bwa e rangi ni kakawaki te koaua iroun Yvonne, ao e a rangi n rau nanona n tibwaakin ana kantaninga ibukin taai aika i mwaira ma tabemwaang.—1Tim. 4:16.

8-9. (a) Tera aroni kakawakin te bwai are e kunea temanna te mwaane are n ana kaikonaki Iesu? (b) Tera aroni kakawakin te koaua iroum?

⁸ E irekereke naba ana koaua te Baibara ma te rongorongo ae raoiroi ae taekan Ana Tautaeka n Uea te Atua. E kabotaua Iesu te koaua ibukin te Tautaeka n Uea ma te bwai ae kakawaki ae karabaaki. E taku Iesu ni Mataio 13:44: “Te Tautaeka n Uea ae bwaini karawa bon ai aron te bwai ae kakawaki ae karabaaki n te tawaana ae e kunea te aomata ao e karabaa. Ibukini kimwareireina iai, e nako ni kaboonakoi ana bwai ni kabane ao e kabooa iai te tawaana arei.” Noria bwa e aki ukoukora te bwai ae kakawaki te mwaane aei. Ma ngke e a kunea, e a anganako ana bwai ni kabane bwa e aonga ni karekea irouna. Eng, e boni kaboonakoi ana bwai ni kabane.  Bukin tera? E ataia ae e rangi ni kakawaki te bwai are kunea arei. E rangi ni kakawaki riki nakoni baike e kaboonakoi.

⁹ Anne naba am namakin ibukin te koaua? Ni koauana, bon anne am namakin. Ti ataia bwa akea te bwai teuana n te aonnaba aei ae kona ni kabotauaki ma kimwareireira n ara beku ibukin Iehova ngkai, ao te kantaninga ibukin te maiu n aki toki n te tai ae imwaira i aan ana kairiri te Tautaeka n Uea. E rangi ni kakawaki riki te kakabwaia ae ara iraorao ae kaan ma Iehova nakoni baike ti kakeaira n taon nanora iai. Ti rangi ni kimwareirei ngkai ti karekea “kakukureiana ni bwaai ni kabane.”—IKoro. 1:10.

10-11. Tera ae kaungaa Michael bwa e na karaoi bitaki ni maiuna?

¹⁰ A bati i buakora aika a a tia ni kakeai baika bati ni maiuia ibukini karekean akoaia iroun Iehova. Tabeman a kitan nakoaia aika a rangi ni karineaki iai n te aonnaba. Ake tabeman, a a katoka uaiakinan te kani kaubwai. Ao tabeman riki, a bitii raoi aroaroni maiuia imwin reiakinan taekan Iehova. Bon anne ae karaoia Michael. E aki ikawairake i nanon te koaua. Ngke e roro n rikirake ao e kataneiaaki n te iranikai. E taku: “E rangi ni kakawaki irou kateimatoaani marurungin rabwatau. N tabetai, I iangoia bwa I aki kona ni konaaki iroun te aomata temanna.” Ma ngke e a reirei n te Baibara Michael, e a ataa ana iango Iehova ni kaineti ma te iowawa. (TaiAre. 11:5) Aio ana taeka ibukia te taanga teuana aika taani Kakoaua ake a reirei ma ngaia n te Baibara: “A aki tuangai bwa N na katoka au iranikai, ma a bon teimatoa n reireinai ana koaua te Baibara.”

¹¹ Ngke e a kabatiaa riki reiakinan taekan Iehova Michael, e a korakora riki irouna tangiran Atuana. E boni korakora riki ringan nanona n noran ana nanoanga Iehova nakoia taan taromauria. Imwin tabeua te tai, e a ataia Michael ae e riai ni karaoa ana motinnano ibukini bitakini maiuna. E taku: “I ataia ae e na rangi ni kangaanga irou katokan au iranikai, ma I ataia naba ae e na bon aki kukurei iai Iehova, ao I kakoauaa bwa e kakawaki riki te beku ibukina nakon te bwai ae N na kakeaa n taona nanou mai iai.” E ataia Michael bwa e boni kakawaki te koaua are kunea, ao anne bukina ngkai e kukurei ni karaoi bitaki ni maiuna.—Iak. 1:25.

12-13. E kangaa n reke buokan Mayli n ana koaua te Baibara?

¹² Ibukini kaotani kakawakin te koaua, e a kabotauaki te koaua n te Baibara ma te taura ae ura n te rotongitong. (TaiAre. 119:105; IEbe. 5:8) E rangi ni kakaitau Mayli, mai Azerbaijan ni buokana are reke n Ana Taeka te Atua. E ikawairake neiei n te utu ae a kakaokoro aia Aro kaaina. Bon te Muslim tamana ao tinana kaain te Aro n Iutaia. E taku neiei: “E ngae ngke I kakoauaa bwa iai te Atua ma a boni bati au titiraki. I iango ni kangai, ‘E aera te Atua ngkai e karikiia aomata, ao a a manga rawawata ni maiuia ao imwina a a kammarakaki n te ai ni moone?’ Kioina ngkai a taku aomata bwa bon nanon te Atua bwa a na riki baikai ni kabane, I a manga taku, ‘E koaua bwa e karikiia aomata te Atua ao imwina e a manga kukurei n tarataraia ni karawawataaki?’”

¹³ E bon teimatoa Mayli n ukeri kaekaan ana titiraki. Imwina riki, e a kan reirei n te Baibara ao e a riki bwa Ana Tia Kakoaua Iehova. E taku: “I a kukukurei riki n au reirei te Baibara ae kaunganano. E bon reke raun nanou man te kabwarabwara ae  kona n onimakinaki are I kunea n Ana Taeka te Atua.” N aroni Mayli, ti bane ni kamoamoaa naba Iehova, are “Teuare [weteira] man te roo nakon ana oota ae kamimi.”—1Bet. 2:9.

14. Ti na kangaa ni kakorakoraa riki tangiran te koaua iroura? (Nora naba te bwaoki ae “ Kabotau Riki Tabeua.”)

¹⁴ Aikai tabeua katoto ibukini kamatataan kakawakin te koaua. Ko boni kona n iangoi aika bati riki. Karaoa am ukeuke n reirei i bon iroum ao kakaaea bwa e aera ngkai ti riai n tangira te koaua. Ngkana e a korakora tangiran te koaua iroura, ane e na bati riki iai ara aanga ni kaota tangiran te koaua.

15. Tera te anga teuana ae ti kona ni kaota iai tangiran te koaua?

¹⁵ Ti kona ni kaota tangiran te koaua iroura man arora ni katoatai n ukeuke n reirei n te Baibara ao Booki aika aanaki man te Baibara. E ngae naba ngkana ti a rangi ni maan i nanon te koaua, ma a bati riki baika ti riai n reiakin n taai nako. E taekinaki aei n te moan Taua-n-Tantani: “Te koaua ai aron te uee ae tuakarako ae riki ae karibwaaki ao e a kan taonakinako  n titania aika maiureirei, ae taekan reirei aika kairua. Ngkana ko kani karekea, ko riai ni kakaaea. . . . Ngkana ko kani bwainna, ko riai ni baraaki n anaia. E na aki rau nanom n tii teuana te uee ae taekan te koaua. . . . Rikoi riki, kakaaei riki.” Bon te mwakuri ae kangaanga te ukeuke n reirei, ma e materaoi te kakorakora iai.

16. Tera arom n ukeuke n reirei ae rangi n uaana? (Taeka N Rabakau 2:4-6)

¹⁶ Angiina mai buakora ti aki kani wawareka te Baibara ao n ukeuke n reirei iai. Ma e kaungaira Iehova bwa ti na “teimatoa n ukoukoria” ao n “teimatoa ni kakaaea” otara ae nano riki i aon te koaua. (Wareka Taeka N Rabakau 2:4-6.) Ngkana ti kakorakoraira ni karaoa aei, ti na kakabwaiaaki iai n taai nako. E taekina arona Corey ni wareka te Baibara, bwa e kaatuua ana iango i aon te kibu teuana ma teuana. E kabwarabwaraa ni kangai: “I wareki kabwarabwara mai nano, taian toma ni kibu, ao I karaoi au kakaae riki. . . . I buokaki iai n reiakini baika bati riki!” Ni kamanenaan te anga aei ke teuana riki, ti kaotia iai bwa e kakawaki te koaua man arora n anga ara tai ao korakorara ibukin reiakinana.—TaiAre. 1:1-3.

17. Tera ae nanonaki ni maiuakinan te koaua? (Iakobo 1:25)

¹⁷ Ti ataia bwa e aki tau tii reiakinan te koaua. Ngkana ti kani kakabwaiaaki, ti riai ni maiuakina te koaua, n arora ni kaboraoa maiura ma baika ti reiakin. Tii man anne ae ti kona iai ni karekea te kukurei ni koaua. (Wareka Iakobo 1:25.) Ti na kangaa n taraia raoi bwa ti maiuakina te koaua? E taekinna temanna te tari te mwaane bwa ti na tuoi aroarora ao n ataia bwa ti boni maiuakini baike ti reiakin ke ti aki, ike ti a atai iai aroarora aika ti riai ni kanakoraoi riki. E taku te abotoro Bauro: “Ti na nakonako n te aro ae riai n aron ae ti a tia n rikirake iai, ma n teimatoa n te waaki aei.”—IBir. 3:16.

18. E aera ngkai ti karaoa ara kabanea ni konaa n “nakonako i nanon te koaua”?

¹⁸ Iangoi kakabwaia aika ti karekei mani karaoan ara kabanea ni konaa n “nakonako i nanon te koaua”! Ti boni kanakoraoi riki maiura, ao ti kakimwareireia nanon Iehova ao raora n te onimaki naba. (TaeRab. 27:11; 3Ioa. 4) Aikai raoi bukina aika rangi ni kakawaki ngkai ti tangira te koaua ao ni maiuakinna.