A UAIA n nakonako aine aika uoman n te tabo ni bitineti n te kaawa teuana ae Baguio City, i Biribin. A nora te kaa ni boki teuana n ana tabo te botannaomata, ma a aki kawaria. E tei i rarikin te kaa ni boki anne te tari te aine ae Helen ao e wingare nakoia. A bon reitaanako kawaia aine aikai, ma a aki kona ni mwaninga wingaren Helen.

Imwina riki, ngke a a toka n te bwati aine aikai nakoni mwengaia, a nora te koroboki ae bubura ae jw.org n teke n te Tabo n Taromauri teuana. A uringnga te koroboki ae aron naba anne are a noria imwaina riki ni mwakoro n te kaa ni boki teuana. A ruo man te bwati ao a tuoi taini bobotaki n ekaretia aika kakaokoro ake a mwakoro n oon te Tabo n Taromauri.

A ira te taromauri are imwina aine aika uoman aikai. Ao antai are a noria ngke a rinnako n te Tabo n Taromauri? Bon Helen! A a boni kinaa naba ngkekei te aomata are e wingare ngkoa nakoia. E taku Helen: “Ngke a nakonako ni kainetai, e bon nako nanou. I taku ngai bwa tao iai te bwai ae I a tia ni karaoia ae kairua.” Ma a kabwarabwaraa nakon Helen bwa a noria mai mwaina n te kaa ni boki.

A rangi ni kukurei aine aikai ni kanoan te botaki ao te itamwaomwao ma taari; ao a namakinna bwa akea aia kangaanga ma taari. Ngke a a manga noriia tabeman ni kaitiaka te tabo n taromauri imwin te taromauri, a tuatua ngkana a kona naba n ibuobuoki. E a tia te aine are temanna ni kitana te aba, ao are temanna e a moanna ni kakaaei bobotaki ao e a tia ni moana te reirei n te Baibara​—tii man te wingare!