E aera Iesu ngke e mwanewea ana taeka Tawita are n Taian Areru 22:​1, imwaini matena?

I buakon ana kabanea n taeka Iesu imwaini matena, e taekin naba taeka aika kaotaki ni Mataio 27:46: “Atuau, Atuau, e aera ngkai ko a kitanai?” Man taekinan aei, e a kakororaoa iai Iesu ana taeka te tia areru are Tawita, are koreaki n Taian Areru 22:1. (Mareko 15:34) E kairua iangoan ae e mwanewei taeka akanne Iesu ibukina bwa e a bwara nanona, ke ai akea ana onimaki n te tai anne. E ataia raoi Iesu bwa e aera ngkai e riai ni mate, ao e kukurei ni karaoa anne. (Mat. 16:21; 20:28) E ataia naba ae ngkana e nangi mate ao Iehova e na bon aki kamanoa. (Iobi 1:10) Ngaia are Iehova e angan Iesu ana tai bwa e na kaotia raoi ae e na bon teimatoa ni kakaonimaki n aki ongea aroni matena are e na kaitaraa.​—Mareko 14:35, 36.

Ma e aera Iesu ngke e mwanewei taekan te areru aei? E ngae ngke ti aki kona ni matoatoa i aon aei, ma tao aikai bukina tabeua. *

Ngke e taekin taeka aikai Iesu, tao e katereterea iai ae Iehova e na bon aki kamanoa man te mate. E bon riai Iesu n anga te kaboomwi n akea ana ibuobuoki Iehova. Bon te aomata ngaia ao e riai ni mate bwa e aonga ni “katoonga te mate ibukia aomata nako.”​—Ebera 2:9.

 Ngke e mwanewei kanoan te areru Iesu, tao e kaira te iango nakon te areru ae bwanin. A taneiai I-Iutaia ni boong akanne ni kamatenikunai kanoan taian areru aika bati. Ngkana e taekinaki nakoia teuana kibun te areru, e na boni bae n ueke n aia iango kanoan te areru ae bwanin. Ngkana anne ae e kani karaoia Iesu, e na boni buokiia ngkanne taan rimwina aika I-Iutaia bwa a na uringi taetae ni burabeti aika bati n te areru aei, ibukini baika a na riki imwaini matena. (TaiAre. 22:7, 8, 15, 16, 18, 24) Ao n raatokin te areru, e karaoiroaki iai Iehova ao ni kabwarabwaraaki bwa bon te Uea i aoia botannaomata nako.​—TaiAre. 22:27-31.

Ngke e mwanewei Iesu ana taeka Tawita aikai, tao e katereterea iai bwa e bon aki karaoa ae bure. Imwaini maten Iesu ao e boowiaki taekana n te kaboowi ae aki eti i aan te tua, ao e reke n te bure bwa e taetae ni bakannatua. (Mat. 26:65, 66) E ienikuriaki ni karaoaki te kaboowi anne n te nukanibong, ao e bon aki boraoi ma te tua. (Mat. 26:59; Mareko 14:56-59) Ngke e tabeka Iesu te titiraki ae “Atuau, Atuau, e aera ngkai ko a kitanai?”, tao e kaira te iango ni kaotia bwa e bon aki karaoa te bure ae e tau ni kamateaki iai.

Ngke e taekin taeka akanne Iesu, tao e kauring iai bwa e ngae ngke e rinanon te rawawata Tawita are korea te areru aei, ma tiaki nanona bwa e a kabuaa akoana iroun Iehova. Tiaki nanona bwa ana titiraki Tawita anne e kaotia bwa ai akea ana onimaki. Imwin tabekan ana titiraki, e a taekinna bwa e onimakina ana kakamaiu Iehova, ao e teimatoa ni kakabwaiaaki iroun Iehova. (TaiAre. 22:23, 24, 27) N aron naba anne, e ngae ngke e karawawataaki “Natin Tawita” ae Iesu i aon te kai ni kammaraki, tiaki nanona bwa e a aki akoaki iroun Iehova.​—Mat. 21:9.

Tao e kaota rawawatana Iesu ngkai e aki kamanoaki iroun Iehova, bwa e aonga ni kaotia raoi ae e boni kateimatoa etin arona. Bon tiaki ana moani kantaninga Iehova bwa e na karawawataaki Natina ao ni mate. E a tibwa kainnanoaki anne imwin aia karitei Atam ma Ewa. Bon akea ana bure Iesu, ma e riai ni karawawataaki ao ni mate bwa e aonga ni kaekai bukibuki ake e tabeki Tatan, ao ni kabwakaa te kaboomwi ibukini kaokan te baere a kabuaa aomata. (Mareko 8:31; 1Bet. 2:21-24) Ma e tii kona n riki anne ngkana e aki kamanoaki Iesu iroun Iehova n te tai anne. Anne te moantai aei ni maiun Iesu ae e a aki kamanoaki iai iroun Iehova.

Tao e kataia Iesu ni buokiia taan rimwina bwa a na iaiangoia bwa e aera ngkai e kariaia Iehova bwa e na mate n aron aei. * E ataia Iesu ae matena bwa te tia kamwarua i aon te kai ni kammaraki, e na riki bwa te bwai ni kabwakabwaka nakoia aika bati. (1Kor. 1:23) Ngkana a kaatuua aia iango taan rimwina i aoni bukin raoi matena, a na bon ota ni kakawakina. (IKar. 3:13, 14) A na bon iangoia ngkanne bwa aia tia Kamaiu, ao tiaki te tia kamwarua.

N aki ongeia bwa e aera Iesu ngke e mwanewei taeka akanne, ma e bon ataia raoi bwa te baere e karaoia e boni karaoa iai nanon Iehova. Teutana te tai imwini mwanewean te areru anne, ao e taku Iesu: “E a tia!” (Ioa. 19:30; Ruka 22:37) Eng, aron Iehova ni kanakoa ana kamanomano mairoun Iesu i nanon tabeua te tai, e a buokaki iai Iesu bwa e na kakororaoi bwaai ni kabane ake e kanakoaki bwa e na karaoi i aon te aba. E a kona naba iai ni kakoroi bukini bwaai ni kabane ake a koreaki ibukina “n te Tua Rinanoni Mote ao n aia koroboki Burabeti ao n Taian Areru.”​—Ruka 24:44.