Ni koauana, akea te aomata ni boong aikai ae e ataa raoi aron taraani Bauro. Taamnei ao korobanna ake n ara boki, a boni koreaki bwa aongkoa katotongaia, ao tiaki taamnei aika boto mani bwaai ni kakoaua aika kuneaki irouia taan rabakau.

Ma e ngae n anne, iai kabwarabwaraan aron taraani Bauro tabeua. N te katoto, e mwaneweaki n te Zion’s Watch Tower ae bwaini Maati 1, 1902, n te taetae n Ingiriti, ae kangai: “Ni kaineti ma aron taraani Bauro: . . . N te boki ae ‘Acts of Paul and Thecla,’ . . . ae koreaki tao n 150 A. D., iai i nanona kabwarabwaraani Bauro ae tao te kabanea n tamaroa ao e kaotaki raoi iai teina. E kabwarabwaraaki iai bwa ‘e aki abwabwaki, e mara, a bwaoua rangana, e korakora, a boo tutan ana ari, ao kaanga e abwabwaki bwairina.’”

E taekinaki n The Oxford Dictionary of the Christian Church (1997 edition) taekan te koroboki rimoa anne ni kangai: “Tao antai ae ataia bwa tao iai naba n te boki ae te ‘Acts of Paul and Thecla’ bwaai tabeua ibukin rongorongon rimoa aika koaua.” N tienture ake rimoa, e rangi ni kakoauaaki The Acts of Paul and Thecla, ibukina bwa iai katotona aika 80 ngkai n te taetae ni Kuriiti, ao rairai n taetae tabeua. Mangaia are a boraoi ara taamnei ake aongkoa katotongan te abotoro ma taiani kabwarabwara rimoa ibukin aron taraakina.

Ma ururingnga ae iai baika kakawaki riki nakon aron taraani Bauro. Ngke e waakina ana mwakuri ni minita Bauro, a taekinna tabeman taan tiribure bwa ngke “e mena i [buakoia] ao moan te mangori taraana, ao akea manenan ana taeka.” (2Kor. 10:10) Ma ti aki riai ni mwaninga ae e riki bwa te Kristian Bauro ngke e kaoti Iesu nakoina n te kakai. Ti kona naba n iangoa te bwai ae e kakororaoia Bauro ngke e a riki bwa te “bwai ni mwakuri ae rineaki [ibukini Kristo], ae e na kaotiota [aran Iesu] nakoia natannaomata.” (Mwa. 9:3-5, 15; 22:6-8) Ao iangoia bwa mwaitira buokara aika ti kona ni karekei mani bokin te Baibara ake e korei Bauro i aani kairana iroun Iehova.

E aki kamoamoa Bauro ni baike e kakororaoi imwain rikina bwa te Kristian, ao e aki naba kabwarabwaraa aron taraana. (Mwa. 26:4, 5; IBir. 3:4-6) Ma e taku: “Ngai te kabanea ni mangori i buakoia abotoro, ao I aki tau n aranaki bwa te abotoro.” (1Kor. 15:9) Rimwi riki e a korea aei: “I anganaki te akoi ae rianako aei, ngai ae I mangori riki nakon te aomata ae te kabanea ni mangori i buakoia te koraki aika itiaki ni kabane, bwa I aonga n tataekina te rongorongo ae raoiroi nakoia natannaomata aika tiaki I-Iutaia ae taekani kaubwain te Kristo ae rianako.” (IEbe. 3:8) Ni koauana, e kakawaki riki te rongorongo anne nakon tabeaiangara ibukin taraani Bauro.