1. Bukin tera ngkai e bubutiia Iehova Iesu bwa e na kawakinia taan rimwina?

N ANA kabanea n tairiki Iesu ni maiuna i aon te aba ao e iaiangoi kangaanga ake a na rinanona taan rimwina. Ibukin tangiraia taan rimwina, e a bubutiia Tamana bwa “e na kawakinia mairoun teuare buakaka.” (Ioa. 17:14, 15) E ataia Iesu bwa ngkana e okira karawa, ao Tatan te Riaboro, e na teimatoa ni buakania te koraki ake a tangiria ni kani beku ibukin Iehova. Ngaia are a boni kainnanoa kamanoaia ana aomata Iehova.

2. Ti na kangaa ni koaua raoi bwa e na boni kaekai ara tataro Iehova?

² E kaekaa Iehova ana tataro Natina ae Iesu ibukina bwa E tangiria. Ngkana ti kabanea ara konaa ni kakukureia Iehova, e na bon tangirira, ao e na bon ongoraei naba ara tataro ni kani buokaki ao ni kani kamanoaki. Ngkai Atun te utu Iehova ae mwamwannano, e na bon teimatoa naba n tabeakinia natina ake e tangiria. Ngkana e aki karaoa anne, e na bon rotaki iai arana ao taekana!

3. Bukin tera ngkai ti kainnanoa ana kamanomano Iehova ni boong aikai?

³ Ti a kainnanoa riki ngkai ana kamanomano Iehova. E a tia Tatan ni karenakoaki mai karawa, “ao e a korakora unna.” (TeKao. 12:12) E a tia ni kairiia tabeman bwa a na iangoia ae ngkana a bwainikirinira, “a a karaoa iai te beku ibukin te Atua.” (Ioa. 16:2) Tabeman ake aki kakoauaa te Atua, a bwainikirinira ibukina bwa ti kaokoro ma aroaroia aomata n te aonnaba aei. Ma n aki ongeia bwa tera ae karaoaki nakoira, ti aki riai ni maaku. Bukin tera? Ibukina bwa e kangai Ana Taeka te Atua: “E kakaonimaki te Uea nakon ana taeka, ao e na kakorakoraingkami ma ni kamanoingkami mairoun teuare buakaka.” (2Tet. 3:3) E  na kangaa Iehova ni kamanoira? Ti na maroroakin ana aanga aika uoua.

4. Ni kaineti ma I-Ebeto 6:13-17, tera ae e a tia ni katauraoia Iehova ibukini kamanoara?

⁴ E a tia Iehova ni katauraoa ara bwai ni buaka ae e na kona ni kamanoira mairoun Tatan. (Wareka I-Ebeto 6:13-17.) Te bwai ni buaka aei are mairoun te Atua, e rangi ni matoatoa man nakoraoi! Ma e kona ni kamanoira tii ngkana ti kabonganai bwaina ni kabane ao n teimatoa ni bwaini. A tei ibukin tera bwaina ni kabane? Ti na maroroakina teuana imwin teuana.

5. Tera kabaean te nuka ae te koaua, ao bukin tera bwa ti riai ni bwainna?

⁵ Kabaean te nuka ae te koaua, e tei ibukini koaua ake n Ana Taeka te Atua ae te Baibara. E aera ngkai ti riai ni kabaea i aora? Ibukina bwa Tatan bon “taman te kewe.” (Ioa. 8:44) E a tia ni kewe i nanon nga ma nga te ririki ao ni burebureiia “kaain te aonnaba ni kabutaa”! (TeKao. 12:9) Ma koaua ake n te Baibara a kamanoira mani mwamwanaakira. Ti na kangaa ni kabaea i aora n te aro ni kaikonakaki te kabaea n nuka aei? Ti karaoa anne ngkana ti reiakina te koaua ibukin Iehova, ti taromauria “n te taamnei ao n te koaua,” ao ti bwabwaina te koaua ni bwaai ni kabane.​—Ioa. 4:24; IEbe. 4:25; Ebera 13:18.

6. Tera te nangoa ni bwabwaa ae bwainan te raoiroi, ao e aera bwa ti riai ni bwainna?

⁶ Nangoan te bwabwaa ae bwainan te raoiroi e tei ibukin ana kaetieti Iehova aika eti. Bukin tera bwa ti riai ni bwaina nangoan te bwabwaa? N aron te nangoa ni bwabwaa ae kamanoa buroon te tautia man ewarakina, ai aron naba nangoan te bwabwaa ae bwainan te raoiroi ae kamanoa nanora n te aro ni kaikonaki mani kariri n te aonnaba aei. (TaeRab. 4:23) E kantaningaira Iehova bwa ti na tangiria ao ni beku irouna ma nanora ni kabane. (Mat. 22:36, 37) Ngaia are e kataia Tatan ni bwenaua nanora bwa ti aonga n tangiri bwain te aonnaba aei ae baike e ribai Iehova. (Iak. 4:4; 1Ioa. 2:15, 16) Ao ngkana e aki mwakuri ana anga anne, e a manga kataia ni karaoa te bwai teuana ae ti na kona n ekaanako iai ana kaetieti Iehova.

7. Ti na kangaa ni bwaina te nangoa ni bwabwaa ae bwainan te raoiroi?

⁷ Ti bwaina te nangoa ni bwabwaa ae bwainan te raoiroi n arora n ataa ae eti ao ae kairua ni kaineti ma ana kaetieti Iehova ao ni maiuakin kaetieti akanne. (TaiAre. 97:10) A bae n iangoia tabeman bwa e matoatoa ana kaetieti Iehova. Ma ngkana ti aki maiuakin ana boto n reirei te Baibara, ti kona n riki n aron te tautia ae kanakoa nangoani bwabwaana n tain te buaka ibukina bwa e iangoia ae e a rangi n tinebu. Ai nanobabara karaoan anne! Ma naake a tangira Iehova, a taraia bwa a “aki rawawata” ana tua, ma a kamaiuaki iai.​—1Ioa. 5:3.

8. Tera ae nanonaki n nangoan waera ae te tauraoi n tataekina te rongorongo ae raoiroi ae taekan te rau?

⁸ E kaumakira naba Bauro bwa ti na nangoi waera ae te tauraoi n tataekina te rongorongo ae raoiroi ae taekan te rau. N taekana riki teuana, ti riai n tatauraoi n taekina rongorongon te Tautaeka n Uea. Ngkana ti maroroakin rongorongo man te Baibara ma tabeman, e a kakorakoraaki riki iai ara onimaki. E rangi ni kaunganano norakia ana aomata Iehova ni katobibia te aonnaba ni kakaaei aanga ibukin tataekinan te rongorongo ae raoiroi n taabo ni mwakuri, n taabo n reirei, n taabo ni bitineti ke man te auti teuana ma teuana, n taabo ni boobwai, ni kawaraia aia koraki aika tiaki taani kakoaua, ni maroroia ma naake a kaitiboo ma ngaiia, ao aika mena naba n aia auti. Ao ngkana ti maaku n te aro are ti a katoka iai ara uarongorongo, ti a kona ni katotonga iai te  tautia are e buti ana kau n tain te buaka ao e na kai waekoa n ikoaki waena. Ao ngkana e riki anne, e na kangaanga irouna bwa e na kamanoa mani kakaitarakina ao e nang aki kona n toua mwin ana kairiri ana mataniwi.

9. E aera bwa ti riai n uouota ara otanga ae bubura ae ara onimaki?

⁹ Te otanga ae bubura ae te onimaki e tei ibukin onimakinan Iehova iroura. Ti onimakinna bwa e na bon kakoroi raoi bukin ana berita ni kabane. Te onimaki anne e na buokira bwa ti na “tiringi kanoan nako ana kainikatebe aika uramwaaka teuare buakaka.” E aera bwa ti riai n uouota te otanga ae bubura aei? Ibukina bwa e na kamanoira man aia reirei taan tannako man te koaua ake a kona ni mwamwanaira, ao n aki kabwarai nanora ngkana a bwainingareira aomata ibukin ara koaua. Ngkana akea ara onimaki, ti na bon aki korakora ni kaaitaraia naake a kataia ni kairoroira bwa ti na aki maiuakin ana kaetieti Iehova. Ma ni kaitaraan anne, n taai ake ti tei iai ibukin ara onimaki n ara tabo ni mwakuri ke n reirei, ti a uouota iai ara otanga. (1Bet. 3:15) N taai ake ti karautaeka iai nakon te mwakuri ae bubura iai te boo are e na kona n rota ara babaire ibukin ara taromauri, ti a uouota iai ara otanga. (Ebera 13:5, 6) Ao n taai ake ti beku iai ibukin Iehova n  aki ongea te kakaaitara, ti a kamanoira iai n ara otanga.​—1Tet. 2:2.

10. Tera te bwara ni buaka ae te kamaiuaki, ao e aera bwa ti riai ni bwainna?

¹⁰ Te bwara ni buaka ae te kamaiuaki bon te kantaninga ae anganira Iehova, are e na kamaiuira man te mate ao e na karekea kaniwangaia naake a karaoa nanona. (1Tet. 5:8; 1Tim. 4:10; Tit. 1:1, 2) N aron te bwara ae kamanoa atun te tautia, e kamanoa arora n iaiango, ara kantaninga ibukin te kamaiuaki. N te aro raa? E kateimatoaira te kantaninga anne ni kaatuui ara iango i aon ana berita Iehova ao e buokira naba bwa ti na aki raraoma n ara kangaanga. Ti na kangaa ni kabongana te bwara aei? Man arora ni iaiangoi baike a boraoi ma ana iango te Atua. N te katoto, ti kabotoi ara kantaninga i aon te Atua ao tiaki te kaubwai.​—TaiAre. 26:2; 104:34; 1Tim. 6:17.

11. Tera ae nanonaki n ana kabaang te taamnei, ao e aera bwa ti riai ni kabongana?

¹¹ Ana kabaang te taamnei bon ana taeka te Atua ae te Baibara. Iai mwaakan te kabaang anne ni kaotaraei aekani kewe nako ao e kona ni kainaomataia aomata man tautoronakia n reirei aika kewe ma aroaro aika aki riai. (2Kor. 10:4, 5; 2Tim. 3:16, 17; Ebera 4:12) Ti reireinira ni kabongana raoi te kabaang anne n arora n ukeuke n reirei i bon iroura ao rinanon te reirei are ti karekea man ana botaki te Atua. (2Tim. 2:15) Irarikin te bwai ni buaka are e anganira Iehova, iai riki te bwai ni kamanomano ae korakora ae e anganira. Ae tera?

12. Tera riki ae ti kainnanoia, ao bukin tera?

¹² Te tautia ae mwaatai, e ataia ae e aki kona n tokanikai ni buakana te taanga n buaka ae korakora n tii ngaia, e kainnanoa buokana mairouia raona n tautia. N aron naba anne, ti aki kona ni kaitaraa Tatan ma taan rimwina i bon iroura; ti kainnanoa aia boutoka tarira ao mwaanera n te onimaki. E a tia Iehova n anganira “tarira nako i nanon te onimaki” ni katobibia te aonnaba bwa a na buokira.​—1Bet. 2:17.

13. Ni kaineti ma Ebera 10:24, 25, baikara buokara mani kaakaeani bobotaki?

¹³ Te anga teuana ae ti karekea iai te boutoka boni mani kaakaean ara bobotaki. (Wareka Ebera 10:24, 25.) Ngkana ti namakina te bwarannano n aron ae ti rinanona n tabetai, a kona ara bobotaki ni kaungaira. Ti rangi ni kaungaaki man aia kaeka tarira ao mwaanera n te onimaki. Aia kabwarabwara ao aia kaotioti ake a boto man te Baibara, a kaungaira bwa ti na kateimatoa ara beku ibukin Iehova. Ao ti rangi ni kaungaaki n ara maroro aika kaungaunga i marenara imwain ao imwin taiani bobotaki. (1Tet. 5:14) Irarikin anne, ti karekei n ara bobotaki aanga ibukini buokaia tabemwaang ao ti kukurei iai. (Mwa. 20:35; IRom 1:11, 12) Ti buokaki n ara bobotaki n aanga aika kakaokoro naba. E a kanakoraoaki riki iai arora n angareirei, ao ni kataubobongaira raoi ibukin ara mwakuri ni minita. N te katoto, ti a rabakau riki ngkai ni kabonganai bwaai ni mwakuri ake n ara Bwai ni Mwakuri Ibukin te Angareirei. Ngaia are katauraoi raoi ibukini bobotaki n te ekaretia. N tain te botaki, kakauongo raoi. Imwin te botaki, maiuakina te reirei ni kataneiai are ko karekea. Mani karaoan akanne, ko a kona n riki iai bwa “ana tautia ae raoiroi Iesu Kristo.”​—2Tim. 2:3.

14. Tera riki te ibuobuoki are katauraoaki ibukira?

¹⁴ Ti karekea naba boutokaara mairouia anera aika mirion ma mirion aika korakora. Iangoa te bwai ae e kona ni karaoia te anera ae tii temanna! (Ita. 37:36) Ao iangoa ngkanne te bwai ae a kona ni kakororaoia taanga n anera aika korakora. Akea te aomata ke te taimonio ae kona n tokanikai ni kaitaraa ana taanga ni  buaka Iehova ae korakora. E taekinaki bwa te tia Kakoaua ae tii temanna ae kakaonimaki, e korakora riki ngkai raona Iehova ni kaaitaraia aiana aika bati. (MotiTae. 6:16) Ai koauara anne! Iaiangoa anne ngkana ko un n te baere e taekinna ke e karaoia raom ni mwakuri, raom n reirei ke am koraki ae tiaki te tia kakoaua. Uringnga are tiaki tii ngkoe n te buaka aei. Ko bon ongeaba n ana kaetieti Iehova ao e na boni boutokaiko.

15. Ni kaineti ma Itaia 54:15, 17, e aera bwa e aki kona ni katokaki aia mwakuri n uarongorongo ana aomata te Atua?

¹⁵ Ngkai e tautaekana te aonnaba Tatan, a bati bukina ngkai ti ribaaki iai irouia aomata. Ti teimatoa n tei i nuka ao n aki ira te buaka. Ti tataekina aran te Atua, ao ana Tautaeka ni Uea ae tii kona ni karekea te rau, ao n ongeaba nakon ana kaetieti aika raraoi. Ti katanoataa ae te tia tautaekana te aonnaba aio bon te tia kewe ae buakaka ao te tia tiritiri. (Ioa. 8:44) Ao ti katanoataa naba bwa i aoni kawaina ni kamaunaaki ana waaki Tatan. Ma e ngae n anne, a aki kona ni katoka ara mwakuri n uarongorongo Tatan ma taan rimwina. Ni kaitaraan anne, ti na teimatoa ni karaoiroa Iehova n aanga nako ake ti kona ni karaoia iai! E ngae ngke e mwaaka Tatan, ma e aki kona n tuka tataekinan te Tautaeka n Uea nakoia aomata ni kabutaa te aonnaba. E riki aei ibukina bwa ti karekea ana kamanomano Iehova.​—Wareka Itaia 54:15, 17.

16. E na kangaa Iehova ni kamaiuia ana aomata n tain te rawawata ae korakora?

¹⁶ Tera ae imwaira? N tain te rawawata ae korakora ao Iehova e na boni kamaiuira n aanga aika uoua n te aro ae kamimi. Te moan, e na boni kamaiuia ana toro aika kakaonimaki n te tai are e a kairiia iai ueea n te aonnaba bwa a na kamauna Baburon ae Kakannato, ae te botaki n aro ae kewe. (TeKao. 17:16-18; 18:2, 4) Imwina, e na kamaiuia ana aomata ngkana e a kamaunai bwain nako te aonnaba aei n Aremaketon.​—TeKao. 7:9, 10; 16:14, 16.

17. Ti na kangaa ni buokaki bwa ti na teimatoa ni kaania Iehova?

¹⁷ Ngkana ti teimatoa ni kaania Iehova, e na aki kona ngkanne Tatan ni karuanikaia maiura. Ma bon ngaia ae e na kamaunaaki n aki toki. (IRom 16:20) Ngaia are karini ami bwai ni buaka nako ao tai buutii! Tai kataia ni boni buaka i bon iroum. Buokiia tarim n te onimaki. Ao kakairi n ana kaetieti Iehova. Ngkana ko karaoa anne, ko na kona ni kakoauaa ae e na boni kakorakorako ao ni kamanoko Tamam are i karawa ae tatangira.​—Ita. 41:10.