N 1910 TABUN, a mwaing au karo mai Tbilisi i Georgia nako Kanata, ao a maeka n te auti ae uarereke n te tabo n ununiki i rarikin Pelly i Saskatchewan, i maeaoni Kanata. I bungiaki n 1928, ngaira onoman ao te bina ngai. E mate tamau onoua te namwakaina imwaini bungiakiu, ao e mate tinau ngke te merimeri ngai. E aki maan imwina ao e mate Lucy ae mwaaneu ae te karimoa, ngke 17 ana ririki. Imwina, e a anaai ai tamau ae Nick ma tariu ao mwaaneu ao e tabeakinira.

N te bong teuana ngke I a tibwa rabakau n nakonako, ao a a norai kaain au utu ni katikitika bukin te aoti n te tabo ni man. A rangi n nako nanoia bwa mwina e a touai naba te aoti, ao a tatakarua bwa N na kaakia, ma akea kubau. I katannako mairouia, ao I aki ongongo tatakaruaia. E kakukurei bwa I aki ikoaki, ma anne te bong are a a kunea iai kaain au utu ae I bonotaninga.

E taku temanna raoraoia kaain ara utu bwa N na kareireiaki i rarikia ataei aika bonotaninga, ngaia are e a karinai ai tamau are Nick n aia reirei bonotaninga i Saskatoon i Saskatchewan. I a mwaing nakon te tabo ae iraua aoan kaeana man au auti, ao kioina ngke ai tibwa nimaua au ririki, I rangi ni maaku. I tii kona ni kawariia au utu n tain te motirawa ae abwabwaki ao ae uarereke. N tokina, I a reiakina te taetae n te bai ao ni kukurei n tatakaakaro ma ataei ake tabeman.

N 1939, e a mare ma Bill Danylchuck mwaaneu ae te karimoa ae maiu ae Marion, ao a anaai ma mwaaneu ae Frances ao n tabeakinira. Boni ngaiia aika moani kaitiboo ma Ana Tia Kakoaua Iehova n au utu. N taai ake I motirawa iai, a kabanea aia konaa n tibwaa nakoiu te baere a reiakinna man te  Baibara. Ni koauana, e aki bebete te reitaki ma ngaiia, bwa a kabi te taetae n te bai. Ma a nora ae iai nanou ni koaua n tangiri bwaai n taamnei. I ota ae iai irekereken te baere a karaoia ma ae taekinaki n te Baibara, ngaia are I a iririia n uarongorongo. E aki maan ao I a kani bwabetitoaki, ao n Tebetembwa 5, 1941, e a bwabetitoai Bill i nanon te turam ae te biti ae bwamiaki kanoana te ran man te mwanibwa. Moan te mwaitorotoro te ran!

N 1946 ngke I oki ni motirawa, ti kaea te bwabwaro i Cleveland i Ohio i U.S.A. Ni moani bongin te bwabwaro, a ikaruoruo mwaaneu ni kokorei kanoan te botaki bwa I aonga ni kona n ira buakon te waaki. Ma n te kauoua ni bong, I rangi ni kukurei ngke I a ataia ae iai te tia raitaeka n te taetae n te bai ibukia ake a bonotaninga. I a tibwa ongora raoi ngkai ni kanoan te botaki, ao I rangi ni kukurei ngkai I a ota raoi n te koaua man te Baibara!

N te tai anne, e a tibwa toki te Kauoua ni Buaka Are Kabutaa Aonnaba, ao e a korakora te nanonnaba. I oki man te bwabwaro ma au motinnano ae N na tei ibukin au onimaki n au tabo n reirei. Ngaia are I a aki manga tiaruuti nakon te buraeki ke n anenea kunan te aba. I a buubai naba mani bukamaruani boong ni motirawa tabeua, ao mani kaean taromauri ake ti kabaeaki iai. A aki kukurei taani mwakuri n te tabo n reirei, ao a karioi aia kewe ao ni kakamaakai bwa I a aonga ni bita au iango. Aei are e a karekea te mangaongao i buakoia raou n reirei, ma e reke iai au tai ae bati n uarongorongo. Tabeman ataein te reirei n aron Larry Androsoff, Norman Dittrick, ao Emil Schneider a butimwaea te koaua imwina riki, ao a kakaonimaki ni beku iroun Iehova ni karokoa te bong aei.

Ngkana I kawari kaawa tabeua, I aki toki ni katea tiau ae N na uarongorongo nakoia bonotaninga. N te katoto, n aia kirabu bonotaninga i Montreal, I uarongorongo nakon Eddie Tager, ae te ataeinimwaane ae kaain naba te kaeng. E kaaina te ekaretia n te taetae n te bai i Laval i Quebec ni karokoa matena n te ririki ae nako. I kaitiboo naba ma te ataeinimwaane ae Juan Ardanez ae ingainga n ukeri koauan ana rongorongo te Baibara, n aroia kaaini Beroia. (Mwa. 17:​10, 11) E kaaina naba te koaua teuaei ao e kakaonimaki ni beku bwa te unimwaane n te ekaretia i Ottawa i Ontario, ni karokoa matena.

N 1950, I a mwaing nako Vancouver. E ngae ngke I kan uauarongorongo nakoia bonotaninga, ma I aki kona ni mwaninga te baere riki ngke I uarongorongo i rarikin te kawai nakon te aine ae aki bonotaninga ae Chris Spicer. E kariaia neiei ae a na roroko irouna ara maekatin, ao e tangirai bwa N na kaitiboo ma buuna ae Gary. Ngaia are I a nakon aia  auti, ao ti maroro n te tai ae maan ni kokorei ara maroro. Tii anne ara tai ni kaitiboo, ma imwin tabeua te ririki, bon te kubanako ngai ngke I reke irouia i buakon te koraki ae bati n te bwabwaro i Toronto i Ontario. E na bwabetitoaki Gary n te bong anne. E kauringai te rongorongo aei kakawakin te teimatoa n uarongorongo, bwa ti aki ataia bwa n ningai ke e na wakaa ia koraan te koaua.

Imwina riki, I a okira Saskatoon. I kaitiboo iai ma te aine temanna ae butiiai bwa N na reirei n te Baibara ma natina aine aika bwebwee aika bonotaninga, aika Jean ao Joan Rothenberger. Bon ataein te reirei ibukia bonotaninga are I reirei naba iai. E aki maan, ao a a tibwaa te baere a reiakinna ataeinnaine aikai nakoia raoia n reirei. Imwina riki, niman raoia n reirei ake a a riki bwa Ana Tia Kakoaua Iehova. Temanna i buakoia bon Eunice Colin. I moani kaitiboo ma Eunice n aia reirei bonotaninga anne ngke e a kani bane au tai. N te tai anne, e anganai au kanre ao n tuangai bwa N na riki bwa raoraona. Rimwi riki, e nang riki neiei bwa raoraou ae kakawaki ni maiuu, e a riki bwa buu!

Ngke e a ataia tinan Eunice bwa e reirei natina n te Baibara, e tuanga te mataniwi n te reirei bwa e na kataia ni katokia. E anai naba teuaei ana boki n reirei Eunice. Ma e kamatoaa nanona Eunice bwa e na moanibwaia Iehova. Ngke e a tangiria ni bwabetitoaki, a taku ana karo nakoina: “Ngkana ko riki bwa Ana Tia Kakoaua Iehova, ko na kitana ara auti!” E kitana mwengana Eunice ngke 17 ana ririki, ao a butimwaeia ma te akoi te utu teuana aika taani Kakoaua. E reitaanako ana reirei ao imwina e a bwabetitoaki. Ngke ti mare n 1960, a aki roko n ara mare ana karo. Ma ni waakinakon te ririki, a a karineira ibukin ara koaua ao arora ni kaikawaiia natira.

Ngkai kaaro ngaira aika ti bonotaninga, ti kaikawaiia itiman natira mwaane aika aki bonotaninga. E kangaanga aei, ma ti taraia raoi bwa a na rabakau te taetae n te bai bwa ti aonga ni kona n reitaki raoi ma ngaiia ao n reireinia te koaua. A rangi n ibuobuoki taari n te ekaretia. N te katoto, temanna te karo e korea nakoira taekan natira temanna ae taetaebuaka n te Tabo n Taromauri. Ti a kona iai n tabeakina te kangaanga anne n te tai naba arei. A kakaonimaki aman natiu ake beku iroun Iehova ma buuia ao aia utu, aika James, Jerry, Nicholas, ao Steven. Bon unimwaane n te ekaretia ni kaaman. E ibuobuoki naba Nicholas ma buuna ae Deborah, n te rairai n te taetae n te bai n te aobiti n tararua i Buritan, ao Steven ma buuna ae Shannan, a kaaina te tiim n rairai n te taetae n te bai n te aobiti n tararua n te United States.

Teuana te namwakaina imwain ara ka-40 n ririki ni mare, ao e a motirawa Eunice imwin ana kakorakora ni buakana te kaentia. E rangi n ninikoria i nanon taai aika kangaanga aikai. E teimatoa ni korakora ibukina bwa e onimakina te mangauti. I ingainga ni kariariaa te tai are N na manga noria iai.

Ni Beberuare 2012, I bwaka ao e mwaoto bebeeu, ike e a teretere iai bwa I a kainnanoa te ibuobuoki. Ngaia are I a maeka i rarikin natiu temanna ma buuna. Ti a kaaina ngkai te ekaretia n te taetae n te bai ae te Calgary Sign-Language Congregation, ike I beku iai bwa te unimwaane. Ni koauana, ai tibwa te moantai aei ae I kaaina iai te ekaretia n te taetae n te bai. Iangoa anne! I kaaina te ekaretia ae kabongana te taetae n Ingiriti man 1946, ma tera aron au onimaki? E boni kakoroa bukin ana berita Iehova are e na tabeakinia ataei aika akea tamaia. (TaiAre. 10:14) I kakaitau ibukin aia kakorakora ni kabane naake a kokorei nakoiu baika taekinaki, a reiakina te taetae n te bai, ao n raitaeka nakoiu n aron aia kabanea ni konaa.

Ni koauana, bon iai taai ake e a maraki nanou iai ao N nang aki manga iri, ibukina bwa I aki ota ni baika taekinaki, ke n taraana irou, e aki ota raoi te aba ni baika a kainnanoi bonotaninga. Ma n taai akanne, I iaiangoa ana taeka Betero nakon Iesu are kangai: “Te Uea, ti na nakon antai? A mena iroum taeka aika kairiri nakon te maiu are aki toki.” (Ioa. 6:​66-68) N aroia bonotaninga aika bati aika kaain au roro, I a rabakau n taotaona nanou. I a ataa arou ni kantaningaa Iehova ma ana botaki, ao I kakabwaiaaki iai! E a bati ngkai kaubwaiu te amwarake n taamnei n oin au taetae, ao I kukurei n iririi bobotaki ao bwabwaro n te taetae n te bai n Amerika. I a bon tia ni karekea maiuu ae kakukurei ao ae uaana n au beku iroun Iehova, ae Atuara ae kakannato.