1-2. Baikara kangaanga ake a kaaitarai taani Kakoaua aika bati?

E KAUNGAA Timoteo te abotoro Bauro ao boni Kristian naba ni kabane, bwa a na kakororaoa raoi aia mwakuri ni minita. (2Tim. 4:5) Ti bane ni mutiakina ana reirei ni kairiri Bauro anne. Ma bon iai naba kangaanga. A bati taari aika e kangaanga irouia uataboan te mwakuri ni minita ao a kainnanoa te ninikoria. (2Tim. 4:2) N te katoto, iangoiia taari ake a maeka n aaba ake e tiatianaki iai ara mwakuri ke ni katabuakaki. A bon uarongorongo e ngae ngke a ataia bwa a na kabureaki iai!

² A kaaitara ana toro Iehova ma kangaanga aika kakaokoro aika kona ni kabwarai nanoia. N te katoto, a bati aika mwakuri i nanon aoa aika bati tii ibukini karekeani baika a kainnanoi kaain aia utu. A kani kabatiaa aia tai n te mwakuri ni minita, ma a rangi ni kua n tokin te wiki imwin aia mwakuri. Ake tabeman e a uarereke ae a kona ni karaoia ibukin aorakia ae wenemaan, a a kara, ke a aikoa kona n otinako man aia auti. Ma ake tabeman a teimatoa ni karawawataaki n namakinan ae ai akea bongaia. E taku Mary * ae tari te aine ae mena n te Middle East: “I riai ni kakorakoraai ibukini kanakoan namakin aika aki raraoi ake a karekea rawawatau. I rawawata iai ibukina bwa e anaa au tai ao korakorau ao I a aki kona ni karaoa te mwakuri ni minita.”

3. Tera ae ti na maroroakinna n te kaongora aei?

³ N aki ongei ara kangaanga ake ti kaaitarai, ma e boni kona ni kakorakoraira Iehova bwa ti na teimatoa ni beku irouna n aron ara konaa. Imwain ae ti maroroakina aron Iehova ni kona ni buokira, ti na nora moa arona ni kakorakoraa  Bauro ao Timoteo bwa a na kakororaoa aia mwakuri ni minita n aki ongei aia kangaanga.

4. Baikara kangaanga ake e kaaitarai Bauro?

⁴ E kaaitara ma kangaanga aika bati Bauro. E a kainnanoa riki te korakora ngke e batiboaki, e karebanaaki n atibu, ao ni kamatawarikaki. (2Kor. 11:​23-25) E kaotia naba Bauro bwa n tabetai e kabokorakora ma namakinan te bwarannano. (IRom 7:​18, 19, 24) E nanomwaaka naba i aan “te bwai ni kateketeke n te rabwata” ao e a rangi n tangiria bwa e na kanakoa te Atua.​—2Kor. 12:​7, 8.

5. Baikara baike e kona ni karaoi Bauro n aki ongei ana kangaanga?

⁵ E kakorakoraa Bauro Iehova bwa e na teimatoa ni karaoa ana mwakuri ni minita n aki ongei ana kangaanga. Iangoa te baere e kakororaoia Bauro. N te katoto, ngke e kabureaki n te auti i Rom, e ingainga ni katea bukin te rongorongo ae raoiroi i mataia taani kairiri aika I-Iutaia ao i mataia naba taan tautaeka. (Mwa. 28:17; IBir. 4:​21, 22) E uarongorongo naba nakoia Ana Tautia te Embera ao nakoia aomata nako ake a kakawaria. (Mwa. 28:​30, 31; IBir. 1:13) N te tai naba anne, e korei reeta Bauro i aani kairana n te taamnei ake a kakabwaiaaki iai Kristian ni karokoa boong aikai. E kakorakoraaki naba te ekaretia i Rom n ana katoto Bauro, ike a a kona iai taari akanne n “ninikoria riki n tataekina ana taeka te Atua n aki maaku.” (IBir. 1:14) N tabetai ao e a aki kona ni karaoa ae bati Bauro, ma e boni karaoa are e konaa ao e riki anne “bwa karikirakean te rongorongo ae raoiroi ao tiaki totokoana.”​—IBir. 1:12.

6. Ni kaineti ma 2 I-Korinto 12:​9, 10, tera are e buoka Bauro ni kakororaoa ana mwakuri ni minita?

⁶ E ataia Bauro ae bwaai ni kabane ake e karaoi n ana beku ibukin Iehova, e aki karaoi n oini korakorana ma rinanon te korakora are e anganna te Atua. E taekinna bwa e ‘kakororaoaki mwaakan te Atua ni mamaarana.’ (Wareka 2 I-Korinto 12:​9, 10.) E kakorakoraa Bauro Iehova rinanon taamneina ae raoiroi bwa e na kakororaoa raoi ana mwakuri ni minita n aki ongea te bwainikirinaki, te kamatawarikaki, ao kangaanga riki tabeua.

7. Baikara kangaanga ake e riai n tokanikai i aoia Timoteo bwa e aonga ni kakororaoa ana mwakuri ni minita?

⁷ E riai naba Timoteo ae te roro n rikirake  ae raoni Bauro ni mwakuri, n onimakina mwaakan Iehova ibukini karaoan ana mwakuri ni minita. E raona Bauro ni mwamwanangana ni mitinare aika abwabwaki. Irarikina, e boni kamwanangaaki naba irouni Bauro bwa e na kakawari ekaretia ao ni kaungaia. (1Kor. 4:17) E bae n namakinna Timoteo bwa e aki tau. Tao anne bukina ngke e kaungaa Bauro ni kangai: “Tai kariaia temanna bwa e na kakeaa bongam ngkai te roro n rikirake ngkoe.” (1Tim. 4:12) Ao n te tai aei, bon iai naba te bwai ni kateketeke n rabwatan Timoteo bwa e okioki n ituaki n aoraki. (1Tim. 5:23) Ma e ataia Timoteo bwa rinanon taamnein Iehova ae mwaaka, e na bon reke korakorana ae e kainnanoia ibukin tataekinan te rongorongo ae raoiroi ao ana beku ibukia taari.​—2Tim. 1:7.

8. E kangaa Iehova ni kakorakoraia ana toro ni boong aikai?

⁸ Ni boong aikai ao Iehova e angania ana toro “te korakora ae riaoni korakoraia aomata,” bwa a aonga n teimatoa ni kakaonimaki ni beku ibukina. (2Kor. 4:7) Ti na nori ngkai baika aua ake e katauraoi Iehova ibukini kakorakoraara ao buokara bwa ti na teimatoa ni kakaonimaki nakoina, ae te tataro, te Baibara, tarira n te onimaki, ao ara mwakuri ni minita.

9. Ti na kangaa ni buokaki n te tataro?

⁹ Ti kakorakoraaki rinanon te tataro. N aron ae kaotaki n I-Ebeto 6:​18, e kaungaira Bauro bwa ti na “teimatoa” n tataro nakon te Atua. E na boni kaekai ara tataro te Atua ni kakorakoraira. E namakina ana ibuobuoki Iehova Jonnie ae maeka i Bolivia ngke e rinanoni kataaki aika kakaokoro. N te tai ae tii teuana, e rotaki n te aoraki ae kakaiaki buuna n ikotaki ma ana karo teuaei ni kauoman. E kakorakoraa teuaei n tabeakini kainnanoia ni kateniman. E mate tinana ao imwin te tai ae maan a a tibwa marurung buuna ao tamana man aorakia. E ururing rikaaki Jonnie ao e taku: “Ngkana I taonaki n te tabeaianga ae korakora, I aki toki ni buokaki ngkana I kaota raoi au namakin n te tataro.” Ao Iehova e angan Jonnie te korakora are e kainnanoia bwa e aonga n nanomwaaka. E a ataia Ronald ae te unimwaane n te ekaretia temanna i Bolivia bwa e a kaentia tinana. E mate neiei teuana te namwakaina imwina. Tera ae buokaki iai Ronald? E taku: “Ngkana I tataro nakon Iehova, I bunra nanou nakoina ao ni kaotii au namakin. I ataia ae e ota riki n au namakin nakon ae a ota iai tabemwaang ao boni ngai naba.” N tabetai, ti kona n taonakinako ke n aki koaua raoi bwa tera ae ti riai n tataroia. Ma e kaungaira Iehova bwa ti na tataro nakoina e ngae ngke ti a aki kona ni kabwarabwaraa raoi ara iango ke ara namakin.​—IRom 8:​26, 27.

10. Ni kaineti ma Ebera 4:​12, e aera bwa e rangi ni kakawaki warekan te Baibara ao kananoan ara iango iai?

¹⁰ Ti kakorakoraaki rinanon te Baibara. N aroni Bauro ae onimakina te Koroboki ae Tabu ibukini kakorakoraana ao kabebeteana, ti riai naba ni karaoa anne. (IRom 15:4) Ngkana ti wareka Ana Taeka te Atua ao ni kananoa ara iango iai, e kona ni buokira taamnein Iehova n ota riki bwa ti na kangaa ni maiuakina ana taeka ni kaineti ma te bae ti rinanona. (Wareka Ebera 4:12.) E taku Ronald are taekinaki mai mwaina: “I kakaitau ngkai I a kamani karikirakea anuau ae warekan te Baibara ni katoa tairiki. I kananoa raoi au iango i aon aroaron Iehova ao arona n tabeakinia ana toro. I buokaki iai ni kakorakoraaki.”

11. E kangaa te tari te aine temanna ae rawawata ni kakorakoraaki man te Baibara ?

¹¹ Ti kona ni karikirakea te iango ae raoiroi ibukin ara kangaanga mani kananoan ara iango  n Ana Taeka te Atua. Iangoa aroni buokan te aine temanna ae e a tia ni mate buuna, man te Baibara. E kaungaaki iroun te unimwaane n te ekaretia temanna bwa e kona ni karekei reireiana aika manena man te boki ae Iobi. Ngke e a warekia, e waekoa ni kabuakakaa Iobi ibukini kairuan ana iango. E iangoia naba i nanona bwa e riai Iobi n aki tii kaatuua ana iango i aon ana kangaanga. Ma e a ataia imwina ae bon titeboo ana iango ma Iobi. E a buokaki iai bwa e na bita ana iango ao ni kakorakoraaki i aan rawawatana ni mateni buuna.

12. E kangaa ni kakorakoraira Iehova rinanoia tarira n te onimaki?

¹² Ti kakorakoraaki rinanoia tarira n te onimaki. Te anga riki teuana ae e kakorakoraia iai Kristian Iehova bon rinanoia taari n te onimaki. E koreia Bauro bwa e ingainga ni kani karekea ‘te ikaungaunga i marenana’ ma tarina n te onimaki. (IRom 1:​11, 12) E kan ikoikotaki naba ma taari Mary are taekinaki mai mwaina. E taku: “E kamanenaia naba taari Iehova ake a aki ataa au kangaanga. A bon taekini baika kaungaunga ke a kanakoa aia reta nakoiu, ae bon te bwai ae I rangi ni kainnanoia. E ibuobuoki naba te maroro ma taari aine ake titeboo au kangaanga ma ngaiia, ao e reke reireiau mani baike a karaoi. Ao a aki toki unimwaane ni karekea irou namakinan ae boni kaain naba ngai te ekaretia ae I rangi ni kakawaki.”

13. Ti na kangaa ni kakorakoraira i marenara n ara bobotaki n te ekaretia?

¹³ Te tabo ae ti kona iai ni kaungaira i marenara bon i nanon taai ni bobotaki n te ekaretia. Ngkana ko kaei bobotaki, e aera bwa ko aki biririmoa ni kakorakoraia tabemwaang n arom ni kaotia nakoia ae ko tangiriia ao ko kakaitau n aia kekeiaki? N te katoto, imwain te taromauri n te tai teuana ao e taku te unimwaane n te ekaretia ae Peter nakon te tari te aine ae kaikawaiia natina ao tiaki kaain te onimaki buuna: “E rangi ni kaunganano rorokom ikai. A a bon tatauraoi naba natim aika onoman ao a tauraoi naba ma aia kaeka.” A ranran matan neiei ngke e kaeka ni kaitaua teuaei ni kangai: “Ko ataia, bon anne raoi te taeka ni kaungaunga ae I kainnanoia n te bong aei.”

14. Tera aron rotakira n te mwakuri ni minita?

¹⁴ Ti kakorakoraaki rinanon te mwakuri ni minita. Ngkana ti taekina te koaua man te Baibara nakoia aomata, ti namakina iai te kabebeteaki ao te kakorakoraaki, e ngae ngke a kan ongora ke a aki. (TaeRab. 11:25) E namakina kakorakoraana te tari te aine ae Stacy n te mwakuri ni minita. Ngke e kabaneaki man te ekaretia kaain ana utu temanna, e bon rawawata iai ao e iaiango ni kangai, ‘E aki tau au ibuobuoki nakoina?’ E a bon iaiangoa naba te kangaanga anne. Ma tera ae buokia n tokanikai? Bon te mwakuri ni minita. Ngkana e uataboa te mwakuri ni minita, e a kaatuua riki iai ana iango i aoia aomata ake a kainnanoa ana ibuobuoki. E taku: “N te tai anne, e anganai Iehova te aomata ae I a reirei ma ngaia n te Baibara, ao e waekoa n rikirake n te onimaki. I rangi ni kaungaaki n anne. Te bwai ae I rangi ni buokaki riki iai bon te mwakuri ni minita.”

15. Tera reireiam man ana taeka Mary?

¹⁵ A kona n namakinna tabeman bwa a aikoa kona ni karaoa ae bati n te mwakuri ni minita ibukin aia kangaanga ni maiuia. Ngkana anne ae ko namakinna, uringnga ae e kukurei Iehova n am kabanea ni konaa. Iangoa riki ana katoto Mary. Ngke e mwaing nakon te aono ae kamanenaaki iai te taetae ae kaokoro, e a namakinna bwa akea bongana. E taku: “I tii kona n anga au kaeka ae kimototo, ni wareka te kibu, ke n anga te turaeki n te mwakuri ni minita.” Aei are e a karekea irouna namakinan ae e aki tau ni kabotauaki ma naake a bon rabakau  te taetae. Ma e bita ana iango ao e a ataia ae e boni kona ni kamanenaaki iroun Iehova e ngae ngke e tuai n rabakau te taetae aei. E taku: “A rangi ni bebete koaua aika kairiri nakon te maiu, ao a kona ni bitii maiuia aomata.”

16. Tera ae kona ni kakorakoraia naake a aikoa kona n otinako man aia auti?

¹⁶ E nora nanora Iehova ni kan uataboa te mwakuri ni minita ao e kakaitau iai, e ngae naba ngkana ti a aki kona n otinako man ara auti. E kona ni karekei aanga ake ti na uarongorongo iai nakoia taan tararuaiia aoraki, ke taokita ma neeti. Ngkana ti kabotaua ara mwakuri ngkai ma are ti karaoia n taai aika nako, e kona ni bwara nanora. Ma ngkana ti nora aron Iehova ni buokira ngkai, ti na boni karekea korakorara ae ti kainnanoia bwa ti aonga n nanomwaaka i aani kataaki nako ma te kimwareirei.

17. Ni kaineti ma Te Minita 11:​6, e aera bwa ti riai n teimatoa n uarongorongo, e ngae ngke ti aki waekoa n nora uaana?

¹⁷ Ti aki ataia bwa e nga iai ae e na wakaa ao n rikirake mai buakoni koraan te koaua ake ti uniki. (Wareka Te Minita 11:6.) N te katoto, e kakaraoa ana uarongorongo Barbara ae te tari te aine ae 80 tabun ana ririki, n te tareboon ao n te kororeta. N ana reta teuana, e karina iai Te Taua-n-Tantani ae bwaini Maati 1, 2014, ae atuna, “Te Bwai ae E a Tia ni Karaoia te Atua Ibukim.” E aki ataia neiei ae e nako ana reta aei nakoia te taanga teuana aika kabaneaki man te ekaretia. A okioki ni wareka te maekatin aei. E namakinna te buu te mwaane aei bwa ai aron ae e a bon taetae Iehova nakoina. A a manga kaakaei bobotaki te taanga aei ao n tokina a a manga riki bwa taani Kakoaua, imwin 27 tabun te ririki ni kitana te koaua. Iangoa aroni kaungaan ao kakorakoraan Barbara n noran te uaa ae raoiroi ae reke man ana reta ane tii teuana anne!

18. Tera ae ti kona ni karaoia bwa ti aonga ni kakorakoraaki mani mwaakan te Atua?

¹⁸ E katauraoi Iehova aanga ake ti kona iai ni karekea korakorara mani mwaakana ae bati. Ngkana ti kamanenai baike e katauraoi n aron te tataro, te Baibara, tarira n te onimaki, ao te mwakuri ni minita, ti kaotia iai bwa ti onimakina Iehova bwa e boni kona ni buokira ao e kani karaoa anne. Ngaia are ti bia teimatoa n onimakina Tamara are i karawa are kukurei ni “kaota korakorana ibukia te koraki ake a tabwanin raoi nanoia nakoina.”​—2Rong. 16:9.