A BATI taari mwaane ao aine rimoa ake a mwaing nakon aaba aika kaubwai riki ake i Maeao, ao a a manga okiri oin abaia. Ibukin tangiran Iehova ao tangiraia aomata irouia, a a kairaki iai bwa a na mwaing nakon taabo ake a kainnanoaki riki iai taan uarongorongoa te Tautaeka n Uea. (Mat. 22:37-39) Baikara baike a kakeaia iai, ao baikara kakabwaiaaia? Ibukin ataakin anne, ti na iangoa rongorongon te aba ae Cameroon i Aberika Maeao.

N 1998 e mwaing te tari te mwaane ae Onésime mai abana ae Cameroon nakon te aba teuana. Ao e maeka n te aba anne i nanon 14 te ririki. N te bong teuana, n tain te taromauri ao e ongo taekan te kaikonaki ibukin te mwakuri n uarongorongo. E kangai te tia kabwarabwara: “Ngkana raao aika uoman a akawa n taabo aika kakaokoro, ao temanna e bati konana nakon are temanna, e na kitana ana tabo n akawa teuare e aki bati konana ao ni mwaing nakon te tabo are e na bati iai konana?”

E a kairaki n te kaikonaki anne Onésime bwa e na iaiangoa te oki rikaaki nako Cameroon are a bati iai aika kan reirei n te Baibara, ni buokiia taan uarongorongo ake iai. Ma iai baike e tabeaianga iai. Ngkai e maeka n te aba teuana, e na kona ni kaangaraoa maiuna n oin abana are e a maan ni kitanna? Ibukin ataakin anne irouna, e oki moa nako Cameroon ao n tiku iai i nanon onoua namwakaina. Imwina n 2012, e a manga okiria ao ni maeka raoi iai.

E taku Onésime: “I riai n rabakau arou ma kabuebuen te aba ao aron te aroaro ni maiu iai. I riai ni manga kataneiaai n tekateka n te Tabo n Taromauri i aoni kaintekateka aika karaoaki mani kaai aika matoatoa. Ma ngkana I kaatuua riki iaiangoani baike a taekinaki n te taromauri,” e wingare ao e taku, “I a mwaninga naba taekan mwengabuakau ni kaintekateka akanne.”

N 2013, e a mare Onésime ma Géraldine, are e oki naba nako Cameroon imwin tikuna ni maeka i Buranti i nanon ruaiwa te ririki. Baikara kakabwaiaaia te taanga aei ngke a a kaatuua riki maiuia i aoni baika a irekereke ma te Tautaeka n Uea? E taku Onésime: “Ti kaoaki taangara nakon te Kuura Ibukia Taan Uarongorongoa te Tautaeka n Uea ao ti beku n te Betaera. N ririki aika tia n nako, a bwabetitoaki n ara ekaretia ara reirei n te Baibara aika 20 mwaitiia. I namakinna ae e a eti raoi ngkai au tabo n ‘akawa.’” (Mareko 1:17, 18) E reitia Géraldine ni kangai: “A bati riki kakabwaiaau aika I karekei ake I aki kantaningai.”

E kani mwaing Judith nakon te United States ma e tangiria naba ni kani karababaanako ana mwakuri ni minita. E taku neiei: “Ni katoaa te tai are I oki iai ni motirawa mairouia au utu i  Cameroon, I bon tang ibukina bwa N nang kitania au reirei n te Baibara.” E ngae n anne, iai te bwai ae e tabwara ni mwaing iai n okira Cameroon. Iai ana mwakuri ni kareketianti ae bubura boona iai, are e a kakabwakaa iai boon ana bwainnaoraki tamana i Cameroon. Ma e bon onimakina Iehova ao e boni mwaing. E taekinna bwa e ururingi baike e mwengaraoi iai n te tabo are e maeka n iruwa iai. E tataroa ana ibuobuoki Iehova ibukini kaangaraoan arona ao e karekea kaungaana iroun temanna te mataniwi n te aono ma buuna.

E ururing rikaaki Judith ao e taku: “I kimwareirei bwa i nanon tenua te ririki, I a tia ni buokiia aomata aika aman n roko n tiaia ae te bwabetito.” E a beku ngkai Judith bwa te bwaiania ae okoro. N te tai aei, e a beku ngaia ma buuna ae Sam-Castel n te mwakuri ni mwamwananga n te aono ae uarereke. Ma tera ae riki nakon taman Judith? E a reke n te aba teuana, te onnaoraki ae kukurei ni kataumwanea boon ana korokoro tamana. E kakukurei bwa e bon nakoraoi te korokoro.

E mwaing nako Kanata te tari temanna ae arana Victor. Imwini warekan te kaongora teuana man Te Taua-n-Tantani ibukin taekan te reirei ae rietata, e a iangoa aron ana reirei. E kaaibibita ana reirei man are rietata anne nakon te reirei are a tii karaoaki iai kooti aika kimototo ibukin te kataneiai n taiani mwakuri. E taku: “I a kona ni karekea imwina riki au mwakuri ni kareketianti man au reirei anne, ao ni karaoa te bwai ae I a kaman iaiangoa kani karaoana, ae te bwaiania.” Imwina riki, e a mare Victor ma Caroline, ao a a mwananga nako Cameroon. Ni menaia ikekei, e reke aia tai ni kawara te aobiti n tararua ao a kaungaaki bwa a na iaiangoa te beku i Cameroon. E taku Victor, “Akea bukina ae ti riai n rawa nako iai, ao ngkai ti a tia ni kabebetea maiura, ti bon riai ni butimwaea te kakao anne.” E ngae ngke iai aorakin Caroline tabeua, ma a boni baireia bwa a na mwaing.

A a beku Victor ma Caroline bwa bwaiania aika katoatai ni buoka kakaaeaia aomata aika kan ongora. A kaikoa aia mwane imwina riki ibukini boutokaaia n aia beku anne. Ngke a a tia ni mwakuri i Kanata i nanon tabeua namwakaina, a a kona n okira Cameroon ao n reitaanako aia bwaiania. Baikara kakabwaiaaia? A ira te Kuura Ibukia Taan Uarongorongoa te Tautaeka n Uea, a beku bwa bwaiania aika okoro, ao a a riki ngkai bwa taan ibuobuoki n te kateitei. E taku Victor: “Ti bon namakina ana boutoka Iehova ngke ti kitani baike ti mwengaraoi iai.”

N 2002, e wareka te turaeki teuana ataein te reirei ae Alain n te kuura ae rietata i Tiaman, ae kangai atuna Rooro n Rikirake​—Tera Tiami ae Kam Uaiakinna? E kaungaaki n te rongorongo are iai bwa e na katei tiana aika boou. N 2006, e a ira te Kuura Ibukini Kataneiaakia Minita ao e mwiokoaki bwa e na beku i Cameroon, ae te aba are bungiaki iai.

Ni menana i Cameroon, e a karekea ana mwakuri ni kareketianti ae e itera n tai iai. Imwina riki, e a manga reke ana mwakuri teuana ae bubura iai boona, ma e raraoma bwa e kona n tukia mani karaoan ae bati riki n te mwakuri ni minita. Ngaia are ngke e a kaoaki bwa e na beku bwa te bwaiania ae okoro, e a butimwaeia naba ngkekei. E kani katokaa riki boona ana tia kammwakuri ma e rawa iai Alain, ao e a beku bwa te bwaiania ae okoro. Imwina riki, e a mare teuaei ma Stéphanie, ae e a maan ni maeka i Buranti. Baikara kangaanga ake e kaaitarai neiei ngke e a mwaing nako Cameroon?

E taku Stéphanie: “Iai aorakiu aika a aki rangi ni kakaiaki ao baika I rabwarabwataki naba iai, ma I kataia ni katoatai ni karerekea au bwainnaoraki iai ao e reke buokau.” A boni kakabwaiaaki taanga aikai ibukin nanomwaakaia. E taekina aei Alain: “Ngke ti nako n uarongorongo n te kaawa teuana ae tionako ae arana Katé, ti kaitiboo ma aomata tabeman aika kan reirei n te Baibara.  Imwina riki, ti a kairi reirei n te Baibara ma ngaiia rinanon te tareboon. A bwabetitoaki uoman mai buakoia ao e a tei te kurubu ae boou.” E reitia Stéphanie ni kangai: “Bon akea riki te kimwareirei ae reke imwini buokaia aomata aika katabui maiuia nakon Iehova. Ti a tia n nora kakimwareirein te beku ikai n taai aika bati.” A a beku ngkai Alain ao Stéphanie n te mwakuri ni mwamwananga n te aono ae uarereke.

E bwabetitoaki Gisèle ngke e reirei n te kuura n taokita teuana i Itare. E rangi n anaaki nanona irouia taanga ake ana tia reirei n te Baibara aika bwaiania, n aroia ni kabebetei maiuia, ao e kani karaoa ae bati riki neiei n te mwakuri ni minita. Ngaia are e a beku bwa te bwaiania ae katoatai ngke e reirei, ni karokoa e bane ana tai man te reirei.

E tangiria Gisèle bwa e na karaoa ae bati riki n ana beku ibukin Iehova i Cameroon, ma iai baike e tabeaianga iai. E taku: “I riai ni kanakoa arau bwa ai tiaki kaain Itare ngai ao ni maenako naba ma raoraou ao au utu ake iai.” Ma e ngae n anne, ni Mei 2016, e a mwaing Gisèle n nako Cameroon. Tabeua te tai imwina, e a mare ma Léonce, ao e roko ana taeka te aobiti n tararua i Cameroon nakoia bwa a na mwaing taangaia nako Ayos, ae te kaawa ae a kainnanoaki riki iai taan uarongorongoa te Tautaeka n Uea.

Ma tera aron te maiu i Ayos? E taku Gisèle: “N angiin te tai, akea te iti i nanon tabeua te wiki, ao ti a aki kona n tiaatini ara mobwaao. E bati te tai ae ti aki mwakuri iai. I reireinai ni kuuka n te ai, ao n te tairiki ngkana e karako kaain te tabo are e anaaki iai te ran, ti nako iai ma te wibwara ao taian tooti.” A kangaa taanga aikai n nanomwaaka? E taku Gisèle: “E ibuobuoki taamnein Iehova, kaainnabau ae te tia boutoka, ao aia kaungaunga ma aia boutoka n aia mwane ara utu ao raoraora.”

E kukurei Gisèle ngke e nang okira are bon oin abana? E taku neiei: “Eng! I boni kukurei. Bon iai n te moantai kangaanga ao namakinan te bwarannano, ma ngke ti a rabakau arora iai, I namakinna ma kaainnabau bwa ti a tia ni karaoa raoi te baere ti riai ni karaoia. Ti onimakina Iehova ao ti a kaaniaki riki ma ngaia.” A kaea te Kuura Ibukia Taan Uarongorongoa te Tautaeka n Uea Léonce ao Gisèle, ao a a beku ngkai bwa bwaiania aika okoro n taai tabetai.

N aroia taan akawa aika ninikoria ni kaei taabo aika kakaokoro ibukin rekeni konaia aika bati, a kukurei naake a okira oin abaia n anga ngaiia ibukini buokaia aika raoiroi nanoia aika butimwaea rongorongon te Tautaeka n Uea. E na bon aki mwanuokin aia mwakuri korakora taan uarongorongo aikai Iehova ma aia tangira are a kaotia ibukin arana. (Neem. 5:19; Ebera 6:10) Ngkana ko maeka n te tabo ae tiaki abam ao iai kainnanoaia taan uarongorongoa te Tautaeka n Uea n oin abam, ko na kona ni manga oki nako iai? Ngkana eng, ao a bati kakabwaia aika mena imwaim.​—TaeRab. 10:22.