NI KATOA ririki, a bati tiibu aika kakawaki ake a kaokaki nakon te ekaretia. Iangoa te “kimwareirei [ae bati] i karawa” n okin temanna nakon te ekaretia! (Ruka 15:​7, 10) Ngkana ko a oki nakon te ekaretia, ko kona ni kakoauaa ae e kukurei ni butimwaeiko Iesu, anera, ao Iehova, ngkai ko a manga kaaina te ekaretia. Ma e ngae n anne, ngkai ko a tabe ni kaokioka am iraorao ma Iehova, ko na bae ni kaaitara ma kangaanga. Baikara kangaanga akanne, ao tera ae kona ni buokiko?

A bati taari aika teimatoa n namakina te bwarannano imwin okia nakon te ekaretia. Ko bae n ota n ana namakin te Uea ae Tawita. E ngae ngke e a tia ni kabwaraaki ana bure, ma e taku: ‘A taonainako au kairua.’ (TaiAre. 40:12; 65:3) Imwin okiran Iehova iroun temanna, e bae n teimatoa n uringaaba n ana bure ke ni maamaa, i nanon ririki aika bati. E taku Isabelle * are kabaneaki i nanon 20 tabun te ririki: “I noria bwa e rangi ni kangaanga irou butimwaean ae e kona Iehova ni kabwaraa au bure.” Ngkana ko namakina te bwarannano, e kona ni manga mamaara am onimaki. (TaeRab. 24:10) Tai kariaia bwa e na riki anne nakoim.

A tabeaianga tabeman bwa a aikoa kona ni karaoi baika irekereke ma kaokan aia iraorao ma Iehova. E taku Antoine imwini kaokana: “I a mwaninga taekani baika bati ake I kakaraoi ngkoa ngke te Kristian ngai.” Ibukina bwa a namakina aron anne tabeman, a aikoa karaoa aia kabanea ni konaa ibukin Iehova.

N te katoto, ngkana e korakora uruakin mwengan temanna imwin te angibuaka, e kona n  taonakinako n iangoan te tai ae bati ma te mwakuri korakora ibukini manga kateana. N aron anne, ngkana e uruaki am iraorao ma Iehova ibukin am bure ae kakaiaki, ko kona n namakinna bwa e kainnanoaki te kakorakora ae bati ibukini kaokan am iraorao ma Iehova. Ma iai te ibuobuoki ae ko kona ni karekea.

E kaoira Iehova ni kangai: “Nakomai ngkai, ao ti na kaetii bwaai i marenara.” (Ita. 1:18) Ko a tia ni mwakuri korakora ni “kaetii bwaai.” E tangiriko Iehova ibukin am kakorakora anne. Iangoa aei: Ibukina bwa ko a okira Iehova, e a kona ni kamanenako bwa te katoto ibukini kakoauaan ae bon te tia kewe Tatan!​—TaeRab. 27:11.

Ni karaoan anne, ko a kaaniaki riki iai ma Iehova ao e berita bwa e na manga kaaniko. (Iak. 4:8) Ma e ngae n anne, e raoiroi ataakin ae ko a okira te ekaretia, ma ko riai ni karaoa ae bati riki. Ko riai ni kateimatoa korakoran tangiran Tamam ao Raoraom ae Iehova. Ko na kangaa ni karaoa anne?

Kataia ni katei tiia aika ko kona n roko iai. Ko bae n uringi baika kakawaki ake ko reiakini ngkoa ibukin Iehova ao ana berita ibukin te bwaretaiti. Ma ko a riai ngkai ni manga irira am babaire ae raoiroi n aron te katoatai n uarongorongo, kaakaeani bobotaki, ao kabanean am tai ma taari. Iangoi tiia aikai.

Katoatai ni maroro ma Iehova. E ota Tamam ngkai e a kangaanga iroum kawarana n te tataro, ibukina bwa ko teimatoa n uringaaba n am bure. (IRom 8:26) E ngae n anne, “botumwaaka n tataro,” tuanga Iehova ae ko rangi n tangiria ni kaoka am iraorao ma ngaia. (IRom 12:12) E uringa aei Andrej: “I rawawata ibukin au bure ao I maamaa iai. Ma I kabebeteaki man namakin akanne ni katoaa te tai are I tataro iai. I namakina naba te raunnano.” Ngkana ko aki ataia bwa tera ae ko na tataroia, iangoa ana tataro n rairannano te Uea ae Tawita ae koreaki n Taian Areru 51 ao 65.

Katoatai n ukeuke n reirei n te Baibara. E na buokiko aei ni kakorakoraa am onimaki, ao ni karikirakea tangiran Iehova. (TaiAre. 19:​7-11) E taku Felipe: “I tabe ni mamaara ao imwina I a karawawataa Iehova ibukina bwa I aki irira au babaire ni bwaai n taamnei. I aki tangiria bwa N na manga karaoa te bure, ngaia are I a taraia raoi bwa N na katoatai ni karaoa au ukeuke n reirei i bon irou.” Ko kona naba ni karaoa anne. Ngkana ko kani buokaki n atai reirei aika kaineti nakoim ibukin am ukeuke n reirei, e aera bwa ko aki butiia raoraom ae ikawai n te onimaki?

Kaoka am reitaki ma taari. A tabeaianga tabeman ake a a tia ni kaokaki, bwa mwina a un taari irouia. E taku Larissa: “I rangi ni maamaa. I namakinna bwa I a tia ni kaunia taari. I namakina anne i nanon te tai ae maan.” Karaua nanom bwa a tangiria unimwaane ao naake a ikawai n te onimaki ni buokiko bwa ko na kaoka am iraorao ma Iehova. (Nora te bwaoki ae “ Tera ae A Kona ni Karaoia Unimwaane n te Ekaretia?”) A rangi ni kukurei ngkai ko okira Iehova, ao a tangiria bwa ko na kukurei!​—TaeRab. 17:17.

Tera ae kona ni kaaniko riki ma kaain te ekaretia? Kabanea am tai ma taari ni kaakaei bobotaki ao ni katoatai n raonia n te mwakuri ni minita. E na kangaa ni buokiko anne? E taku Felix: “A ingainga kaain te ekaretia ni kariariaa okiu. I namakina iai tangirakiu. A bane ni buokai bwa N na manga namakinna ae kaain naba te ekaretia ngai, e a tia ni kabwaraaki au bure, ao I kona ni manga beku ibukin Iehova.”​—Nora te bwaoki ae “ Tera ae Ko Kona ni Karaoia?”

E na teimatoa Tatan ni karikii kangaanga aika ai aron te angibuaka, ake a na kataia ni kamamaarako ngkai ko a tabe ni kaoka am iraorao ma Iehova. (Ruka 4:13) Bwaina te tauraoi mangkai ni kamatoaa am auti ae taekan am iraorao ma Iehova.

E beritana aei Iehova ibukia ana tiibu: “N na kakaaea ane e bua, N na kaoka ane e tiotionako, N na bauta ane e ikoaki, ao N na kakorakoraa ane e mamaara.” (Etek. 34:16) E a tia Iehova ni buokiia aika bati bwa a na kaoka aia iraorao ma ngaia. Karaua nanom bwa e kani buokiko Iehova ni karikirakea am iraorao ma ngaia ae e a korakora riki.