E A RAKA i aon 80 ana ririki Diana. E ituaki buuna n aorakin te kaburoro ae te Alzheimer ao e mena teuaei n te tabo are a tararuaaki iai kaara i nanon tabeua te ririki imwaini matena. E kabokorakora naba neiei ma rawawatana ni mateia natina mwaane aika uoman ao e nanomwaaka ni kaitaraa aorakina ae te kaentia ni mammana. Ma ngkana e roko Diana n te Tabo n Taromauri ke n te mwakuri ni minita, e noraki bwa e mata ni kukurei n taai nako.

John bon te mataniwi ae mwamwananga i nanon 43 tabun te ririki. E tangira te aeka ni mwakuri anne ao e mamate nanona iai! Ma e a aikoa beku iai bwa e a riai n tararuaa kaain ana utu temanna ae aoraki, ao e a beku ngkai n te ekaretia n ana kaawa. Ngkana a kaitiboo ma John n te runga ke n te bwabwaro naake a kinaa ngkoa, e taraa n akea bitakina. E teimatoa ni kimwareirei.

A kangaa n teimatoa ni kimwareirei Diana ma John? E na kangaa ni kimwareirei te aomata ae rawawata nanona ao n aoraki? Ao e na kangaa n teimatoa ni kimwareirei te aomata ae ai akea ana beku ae e tatangiria? Ti ataa kaekaan aei n te Baibara ae kangai: “A na kimwareirei iroun Iehova akana raoiroi.” (TaiAre. 64:10) Ti kona n ota raoi n te koaua ae kakawaki aei ngkana ti ataa te bwai ae karika kimwareirein te nano ao te bwai ae aki.

Ko boni bae n ataia ae e kona n reke te kimwareirei n taai nako mani bwaai tabeua. Iangoia te taanga aika tangiriia i marenaia aika a nangi mare. Ke tera aroni kimwareireim ngkana ko a riki bwa te karo ke ko anganaki mwiokoam n ana botaki te Atua? A karekea te kimwareirei baikanne ao e bon riai n reke anne bwa bon iriani maiura mairoun Iehova. E moani karaoa te mare, te kona ni kariki, ao e anga taiani mwioko n te ekaretia ni Kristian.​—KBwaai 2:​18, 22; TaiAre. 127:3; 1Tim. 3:1.

Ma bwaai tabeua aika karekea te kimwareirei a kona n aki teimaan. E kananokawaki bwa e kona n aki kakaonimaki te rao temanna ke ni mate. (Etek. 24:18; Otea 3:1) A aki ongeaba ataei tabeman irouia aia karo ao iroun te Atua ao a kona ni kabaneaki man te ekaretia. A aki beku n te aro ae boraoi ma nanon Iehova natin  Tamuera. Ao Tawita e karokoa te kabuanibwai nakoina ma kaaini batana man ana mwakuri. (1Tam. 8:​1-3; 2Tam. 12:11) A karekea te nanokawaki ao te rawawata mwakuri akanne. A bon aki karekea nakoira te kimwareirei.

N aron anne, e kona naba n toki aia beku ana aomata te Atua ibukin te aoraki, tabeia n aia utu, ke bitaki i nanon ana botaki te Atua. A bati ake a kaaitara ma bitaki akanne ao a taekinna bwa ai akea kukureia are a karerekea ngkoa n aia beku.

Ti kona ni kai ataia ae baike a karekei kimwareirei akanne a kona n aki teimaan. Ma iai te aeka ni kimwareirei teuana ae kona n teimaan e ngae ngkana a riki kangaanga? E boni bae n iai, bwa a kateimatoa kimwareireia Tamuera, Tawita ao tabeman riki ngke a kataaki.

E ataia Iesu bwa tera raoi te kimwareirei. Ngke e mena i karawa imwain rikina bwa te aomata, e ‘kimwareirei i matan Iehova n taai nako.’ (TaeRab. 8:30) Ma ni menana i aon te aba, n tabetai e kaaitara ma kangaanga aika kakaiaki. Ma e teimatoa n reke kimwareireina ni kakaraoan nanon Tamana. (Ioa. 4:34) Ma tera arona n ana kabanea n tai are e a karawawataaki iai? Ti wareka ae kangai: “E nanomwaaka nakoni matena i aon te kai ni kammaraki ibukin te kimwareirei are kamenaaki imwaina.” (Ebera 12:2) Ngaia are ti bon riai ni karekei reireiara ni baike e taekin Iesu aika uoua ibukin te kimwareirei ni koaua.

N te taina ao a oki taan rimwin Iesu aika 70 man aia uarongorongo. A kimwareirei bwa a karaoi mwakuri aika kamimi ao a kaotinakoia taimonio. Ma e taku Iesu nakoia: “Tai kakatonga ngkai a aantaeka taimonio iroumi, ma kam na kakatonga ngkai a a koreaki arami i karawa.” (Ruka 10:​1-9, 17, 20) Eng, te bwai ae kakawaki riki nakon te kimwareirei n reken te mwioko ae okoro, boni karekean akoara iroun Iehova. E na ururingia Iehova taan rimwini Kristo aika kakaonimaki aikai, ao anne ae karekea te kimwareirei ae bati riki.

N te tai teuana riki ao e maroro Iesu nakoia aomata aika uanao. Ao te aine temanna ae te I-Iutaia e kaota ana namakin bwa e bae n rangi ni kukurei tinan Iesu ae te tia reirei ae rianako. Ma e kaeta ana taeka neiei Iesu ni kangai:  “Tiaki, bwa a a kukurei riki te koraki ake a ongo ana taeka te Atua ma n toua mwina!” (Ruka 11:​27, 28) E kona ni kimwareirei te karo ae kakatonga iroun natina, ma e ngae n anne, te iraorao ma Iehova ae reke man te ongeaba, bon nibwan te kimwareirei ae rianako riki.

Ni koauana, kiingin te kimwareirei ae bati bon ataakin ae ti akoaki iroun Iehova. E ngae ngke akea te kimwareirei n te kataaki, ma ti bon teimatoa naba ni kimwareirei. Ngkana ti nanomwaaka i aani kataaki, ti na bon tokanikai ao ni karekea te kukurei i nanora. (IRom 5:​3-5) Irarikin anne, e anga taamneina Iehova nakoia akana onimakinna, ao te kimwareirei bon uaan naba te taamnei. (IKar. 5:22) Ti buokaki iai bwa ti na ota n ae taekinaki n Taian Areru 64:10 ae kangai: “A na kimwareirei iroun Iehova akana raoiroi.”

E mataata n aei bwa e aera Diana ma John ake a taekinaki mai moa ngkai a kona ni kateimatoa kimwareireia n taai ake a rawawata iai. E taku Diana: “I kamanoai iroun Iehova n aron te teei ae kamanoa irouia ana karo.” E kangaa neiei n namakina akoana iroun te Atua? E taku: “I namakina kakabwaiaau irouna bwa I a kona ni katoatai n uarongorongo ma te wingare.” E katoatai John n uarongorongo imwin tokin ana mwakuri ni mwamwananga are e tatangiria, ao e kabwarabwaraa te bwai ae buokia ni kangai: “Ni moa man 1998 ngke I mwiokoaki bwa te tia reirei n te Kuura Ibukini Kataneiaakia Minita, e a bati riki au tai n ukeuke n reirei i bon irou nakon are mai mwaina.” E reitia n taku ibukina ma buuna: “E bebete iroura butimwaean te bitaki aei ngke ti iaiangoa kakawakin ara beku ibukin Iehova i nanon ririki aika bati. Ti karaoia n aki uringaaba iai.”

A bati naba ake a a tia n nora koauan Taian Areru 64:10. N te katoto, iai te taanga teuana ake a beku i nanon 30 tabun te ririki n te Betaera n te United States. Imwina a a manga mwiokoaki bwa bwaiania aika okoro. A taku: “Te nanokawaki bon te namakin ae rereke ngkana e bua te bwai ae ko tatangiria,” ma a a manga taku: “E aki kona n reitinako te nanokawaki.” A waekoa n uataboa te mwakuri ni minita n aia ekaretia. A kangai naba: “Ti tatataro ni kaotii raoi bwaai tabeua aika ti kainnanoi. Ti kaungaaki ao ni kimwareirei ngke ti noria bwa a kaekaaki ara tataro. E aki maan imwin rokora ikai, a a moana aia bwaiania tabeman n te ekaretia, ao ti kakabwaiaaki bwa iai uoman ara reirei n te Baibara aika rikirake n te onimaki.”

Ni koauana, e aki bebete n taai nako karekean te kimwareirei bwa iai taai aika nakoraoi ao aika nakobuaka naba. Ma e kaungaira Iehova n ana taeka aika karaunano n Taian Areru 64:10. Ngkana a bwara nanora n tabetai, ti kakoauaa raoi bwa a “na kimwareirei iroun Iehova” naake a kaotiia bwa a ‘raoiroi’ n aroia n teimatoa ni kakaonimaki n aki ongei bitaki aika riki nakoia. Irarikin anne, ti kona ni kariariaa kakororaoan ana berita Iehova ni kaineti ma “karawa ae boou ao te aonnaba ae boou.” A nangi bane ni kororaoi aomata. A na bane ana aomata te Atua ni “kakatonga ao [ni] kimwareirei n aki toki” ni baike E karikii ao ni katauraoi.​—Ita. 65:​17, 18.

Iangoa te bwai ae nanonaki n aei: e na kororaoi marurungira ao moanakin ara bong ma te korakora ae bati. E ngae ngke ti rangi n rawawata n taai ake rimoa, ma a nangi bane ni maunanako baika ti nanokawaki iai. A karauaki nanora bwa “a na aki manga rin n te iango bwaai ake rimoa, ao a na aki naba manga rin n te nano.” Ti na manga katiteuanaaki ma naake a tangiraki iroura n te mangauti. Mirion ma mirion aomata aika a na namakina naba are irouia ana karo te teinnaine are 12 ana ririki are e kautia Iesu, ake “tiaki te bwai kukureia.” (Mareko 5:42) N tokina, a nang “raoiroi” aomata n tatabemania nako n te aro ae kororaoi, ao a na “kimwareirei iroun Iehova” n aki toki.