Ko a tia ni wareki raoi kaongora man Te Taua-n-Tantani n taai aika tibwa nako? Noria ngkana ko kona ni kaekai titiraki aikai:

Tera te bwai ni kakoaua n te Baibara ae kaotaki iai bwa e nanoangaira te Atua?

Ngke a tautoronaki tibun Iteraera rimoa i Aikubita, e atai rawawataia ao marakia te Atua. (TeOti. 3:7; Ita. 63:9) Ti karikaki bwa katotongan te Atua, ao ti a kona iai n nanoanga. E nanoangaira e ngae ngke ti iangoia bwa ti aki tau n tangiraki irouna.​—wp18.3, i. 8-9.

A kangaa ni buokaki aomata n ana reirei Iesu bwa a na kataenikaia te kairiribai?

A bati I-Iutaia n ana tai Iesu aika kairiribai. E katuruturua Kristo bwa e riai ni bwainaki te nanorinano ao e kabuakakaa kamoamoaan te reeti. E kaumakiia taan rimwina bwa a na iangoiia bwa taari ngaiia.​—w18.06, i. 9-10.

Tera reireiara ngke e aki katauaki Mote iroun te Atua bwa e na rin n te Aba ni Berita?

E kaan ana iraorao Mote ma Iehova. (TuaKau. 34:10) Ngke e a kaan tokini mwanangaia n te rereua ae maanna 40 te ririki, a a ngurengure aomata n te kauoua n tai ibukin akean te ran. E tuangaki Mote iroun te Atua bwa e na taetae nakon te bwaa. E aki karaoa anne Mote ma e a orea naba te bwaa. E bae n un Iehova irouni Mote ngke e aki toua mwin Ana kaetieti, ke ngke e aki karinea te Atua bwa nibwan te kakai. (WarIte. 20:​6-12) E riai n reke reireiara n aei bwa e kakawaki te ongeaba iroun Iehova ao karineana.​—w18.07, i. 13-14.

Ti na kangaa ni kai karaoa ae bure ngkana ti motikitaeka man taraakin tinanikun te bwai?

Iai itera aika tenua ake a kairaraangaki iai aomata aika bati bwa a na motikitaeka man te bwai ae a noria, n aron te reeti ke te aba, te kaubwai, ao te ririki ni maiu. E kakawaki bwa ti na kataia n taraiia tabemwaang n aron ana taratara te Atua ae aki inanonano! (Mwa. 10:​34, 35)​—w18.08, i. 8-12.

Baikara aanga tabeua ake a kona iai Kristian aika kara ni buokiia tabemwaang?

Te Kristian ae kara ae e a bitaki mwiokoana e teimatoa ni kakawaki iroun te Atua ao e kona ni karaoa ae bati ibukini buokaia tabemwaang. E kona ni kawariia raao ni mare ake tiaki kaain te onimaki, ni buokiia ake a aikoa manga iriri n te uarongorongo ao te taromauri, ni kairi reirei n te Baibara ma aomata, ao ni karababaanako ana mwakuri ni minita.​—w18.09, i. 8-11.

Tera kanoan aia Bwai ni Mwakuri Ibukin te Angareirei Kristian?

Iai beeban ara atureti ao beeba ni kakao. Iai wanua turaeki aika anainano n ikotaki naba ma taiani maekatin aika te Taua-n-Tantani ao te Taratara! Iai naba n te bwai ni mwakuri aei boroutia tabeua ao booki ibukin te reirei aika uoua ao taamnei aika manena aika aua n ikotaki ma te taamnei ae E Aera Ngkai E Raoiroi te Reirei n te Baibara?​—w18.10, i. 16.

E na kangaa te Kristian ni “kabooa te koaua” n aron ae e kaumakaki n Taeka N Rabakau 23:23?

Ti aki kabooa te koaua n te mwane. Ma ti riai ni kabanea ara tai ae bati ao ni kakorakoraira bwa e aonga n reke iroura.​—w18.11, i. 4.

Tera reireiara man aron Otea nakoni buuna ae Komera?

E okioki Komera ni wene ni kimoa, ma e kabwaraa ana bure Otea ao e teimatoa n tekateka n taanga ma neiei. Ngkana e wene ni bure buun te Kristian, e kona te rao are akea ana bure ni kabwaraa ana bure buuna. Ngkana e a manga wene n taanga te rao ae akea ana bure ma buuna are wene ni bure, e a aki riai te buuraure.​—w18.12, i. 13.