Ko a tia ni wareki raoi kaongora man Te Taua-n-Tantani n taai aika tibwa nako? Noria ngkana ko kona ni kaekai titiraki aikai:

Tera arora ae riai nakoia Kristian aika kabiraki?

Ti riai ni kakaitau n aia onimaki; ma tiaki n te aro ae ti a manga rangi ni kamoamoaia. Ti na rarawa nakoni ‘kamoamoaaia aomata ni karang.’ (Iuta 16.) Ti na aki titirakinia n tatabemania nako bwa tera aia namakin ibukin aia kantaninga.​—w20.01, i. 29.

Tera te bwai ae ko riai ni kakoauaa bwa e mutiakiniko Iehova?

E kaotaki n te Baibara bwa e a kaman noriko Iehova imwaini bungiakim. Ao e ongoraei am tataro. E atai baike ko iaiangoi ao e nora nanom, ao baike ko kakaraoi ake e kona n rotaki iai. (1Rong. 28:9; TaeRab. 27:11) E boni katikiko nakoina.​—w20.02, i. 12.

Baikara katoto ibukin te tai n taetae ao te tai ni kainabwabu?

Ti kukukurei n taekina taekan Iehova. Ti taetae naba ngkana ti nora temanna bwa e a tabe n toua te kawai ae bure. A aanga te reirei ni kairiri unimwaane ngkana e kainnanoaki. Ti na kainabwabu ngkana ti aki kan taekin (ke ni kaotii) rongorongo tabeua ibukin ara mwakuri n aaba ake e katabuakaki iai te mwakuri. Ti na aki kaotii baika a aki riai n ataaki.​—w20.03, i. 20-21.

A kangaa rokati n Ioera mwakoro 2 n iai kaokoroia ma rokati ake n Te Kaotioti mwakoro 9?

E taekinaki n Ioera 2:20-29 bwa e kakionakoia rokati te Atua ao e berita bwa e na karaoa te kaboomwi ibukin aia urubwai. Imwin anne, e a kabwaroa taamneina te Atua. A koro bukini baika riki aikai ngke e a tauaki taekaia tibun Iteraera irouia tautiani Baburon ao imwina riki. E kabwarabwaraaki n Te Kaotioti 9:1-11 taekaia taani kabiraki aika kaanga taian rokati n ara bong aikai, ake a tataekin ana motikitaeka te Atua ibukin te waaki ae buakaka ae ngkai, are e karekea iai te aki rau irouia taani boutokaia.​—w20.04, i. 3-6.

Antai ueani meang ni boong aikai?

Rutia ma taani boutokaia. A kaaitaraia ana aomata te Atua, n aroia ni katoka te mwakuri n uarongorongo ao ni kaotiota te riribai nakoia taani Kakoaua. E a tabe ngkai ueani meang ni kaiangatoa ma ueani maiaki.​—w20.05, i. 13.

Bon tii ruaiwa aroaro ake a taekinaki n I-Karatia 5:22, 23 ao ai akea riki, ake iteran nako “uaan te taamnei”?

Tiaki ngaia anne. E buokira te taamnei ae raoiroi bwa ti na karikirakei riki aroaro ake tabeua aika raraoi, n aroni bwainakin te eti. (IEbe. 5:8, 9)​—w20.06, i. 17.

Tera te kangaanga teuana ngkana ko katokai bwaai i bon ibukim n te intanete?

E kona te baere ko katokaa n te intanete n iangoaki bwa ko kamoamoa iai, ao ko aki nanorinano.​—w20.07, i. 6-7.

Tera reireiaia minita aika Kristian mairouia taan akawa aika mwaatai?

A mwakuri n te tai ao n te tabo are e bae ni waru riki iai te ika. A kataneiaaki bwa a na kabonganai raoi bwaai n akawa aika riai. Ao a ninikoria n akawa n aki ongea bibitakini kanoan te bong. Ti kona naba ni karaoa aei n ara mwakuri ni minita.​—w20.09, i. 5.

Baikara aanga tabeua ibukini buokaia ara reirei n te Baibara bwa a na karikirakea tangiran te Atua i nanoia?

Ti kona ni kaungaia bwa a na wareka te Baibara ni katoabong ao ni kananoa aia iango n te baere a warekia. Ao ti kona n reireinia bwa a na tataro.​—w20.11, i. 4.

Antai riki aika nanonaki n te kibuntaeka aei: “A na bane ni kamaiuaki i nanon te Kristo”?​—1Kor. 15:22.

E aki nanonna te abotoro Bauro n te kibuntaeka anne bwa a na bane aomata ni kautaki. Ma te taeka ae “bane” are e taekinna Bauro, e nanonia naba iai Kristian aika kabiraki, are naake a a tia “ni katabuaki bwa taan rimwini Kristo Iesu.” (1Kor. 1:2; 15:18)​—w20.12, i. 5-6.

Tera ae a na karaoia naake a kabiraki ngkana a a tia n ‘onikaki n tii teuana te tekan n te rubenimata, n tain tangin te kabanea ni buu’?​—1Kor. 15:51-53.

A na uataboa te Kristo ni kairiria ana aomata n aron te tia kawakintiibu ae iai okona ae te biti. (TeKao. 2:26, 27)​—w20.12, i. 12-13.