E aki, ao akea naba taekan anne n te Baibara ke n rongorongon rimoa.

Ni warekan te kibu aei ni Baibara aika bati, a a kairaki iai tabeman bwa a na iangoia ae te bwabetito n te ran ibukia maate e boni karaoaki n ana tai Bauro. N te katoto: “Ngkana arona ba a bon aki mangauti mate, ao tera bongan aia makuri akana a babetitoaki i bukia?”​—Te Baibara ni Katorika.

Ma nori aia taeka taan rabakau n te Baibara aika uoman. E taekinna Dr.  Gregory Lockwood bwa karaoan taiani bwabetito “ibukia aomata ake a a tia ni mate” bon “te aeka ni bwabetito teuana, n aron ae kona ni kakoauaaki bwa bon akea rongorongona rimoa ke taekana ae koreaki n te Baibara ae a boraoi iai.” Ao e koreia naba Professor Gordon D. Fee ni kangai: “Akea rongorongon te aeka ni bwabetito anne rimoa ke te katoto iai man te Baibara. Akea naba taekana n Te Nu Tetemanti; ao akea te bwai ni kakoaua iai bwa e a tia ni karaoaki irouia Aaro ake tabeua, ke Aaro ni Kristian aika taian Orthodox n tienture ake imwina.”

E taekinaki n te Baibara bwa a nako taan ririmwin Iesu n “reireinia aomata mai buakoia botannaomata nako bwa a na riki bwa taan [rimwin Iesu] ao [ni] bwabetitoiia . . . , ao reireinia bwa a na kakairi ni bwaai ni kabane” ake e tua nakoia. (Mat. 28:​19, 20) Imwain ae e na riki te aomata temanna bwa te tia rimwin Iesu, e riai n reiakina taekan Iehova ao Natina, ni kakoauaia, ao n ongeaba irouia. E aki kona ni karaoa anne te aomata ae e a tia ni mate ao ni mena n te ruanimate; ke e na karaoa anne te Kristian temanna ae maiu ibukina.​—TeMin. 9:5, 10; Ioa. 4:1; 1Kor. 1:14-16.

Ma tera ngkanne are e nanonna Bauro?

A kakewea tabemani kaaini Korinto ae a kona ni manga kautaki maate. (1Kor. 15:12) Ma e kaotia Bauro nakoia bwa e kairua te iango anne. E kabwarabwaraa nakoia bwa e “katoabong ni kaaitara ma te mate.” Ni koauana, e bon teimatoa ni maiu. Ma n aki ongei kangaanga ake e rinanoi, e boni kakoauaa bwa ngkana e mate ao e na manga kautaki bwa te taamnei i karawa n aron Iesu.​—1Kor. 15:30-32, 42-44.

A riai n ataia kaaini Korinto bwa naake a kabiraki n te taamnei boni Kristian aika a na kaaitara ma kataaki ni katoabong ao ni mate bwa a aonga ni kautaki ao ni maiu i karawa. Te “bwabetitoaki ao ni katiteuanaaki ma Kristo Iesu” e nanonaki naba iai te “bwabetitoaki nako nanoni matena.” (IRom 6:3) Bwabetitoaia n te aro ni kaikonaki aei, a na boni kaaitara iai ma kataaki ao ni mate bwa a aonga ni kona ni kautaki nako karawa.

Uoua tabun te ririki imwini bwabetitoan Iesu n te ran, ao e kangai nakoia ana abotoro aika uoman: “Kam na bwabetitoaki n te bwabetito ae I tabe ni bwabetitoaki iai.” (Mareko 10:38, 39) E tuai ni bwabetitoaki n te ran Iesu n te tai anne. Ma e nanonna bwa teimatoana ni kakaonimaki ni koaua nakon te Atua, e boni kairia nakoni matena. E koreia Bauro bwa a na “maraki ma Kristo [taani kabiraki] ao [a kona ni] kamimitongaki naba ma ngaia.” (IRom 8:16, 17; 2Kor. 4:17) Ngaia are a riai naba ni mate bwa a aonga ni manga kautaki ao ni maiu i karawa.

Ngaia are e eti riki ana taeka Bauro ngkana e taekinaki ni kangai: “Ma tera ae a na karaoia te koraki ake a bwabetitoaki bwa a aonga n riki bwa maate? Ngkana ngaia bwa a na bon aki kautaki maate, ao e aera ngkai a bwabetitoaki bwa a aonga n riki bwa maate?”