Ko a tia ni wareki raoi kaongora man Te Taua-n-Tantani ibukin te ririki aei? Noria ngkana ko kona ni kaekai titiraki aikai:

E kangaa ni karauaki nanora n Iakobo 5:11 ae taekinaki iai bwa “e rangi n tatangira Iehova ao n nanoanga”?

Ti ataia ae e kani kabwarai ara bure Iehova ibukin ana nanoanga. E karaui nanora Iakobo 5:11 bwa e korakora naba nanona ni kani buokira. Ti wanawana ngkana ti kakairi irouna.—w21.01, i. 21.

E aera ngke e anga Iehova te mwaaka ni kairiri?

E karaoa anne ibukin ana tangira. A kairaki ana utu aika kakaonimaki n te babaire aei bwa a na aki mangaongao ma a na baireaki raoi. Kaain te utu ni kabane aika kakairi n te babaire aei, a ataia bwa antai tabena karaoani babaire ao kakororaoaia.—w21.02, i. 3.

E aera bwa a riai Kristian n taratara raoi ni kaineti ma kamanenaani burokuraem n te intanete ibukini kanakoan ao karekean rongorongo?

Ngkana e rineia temanna bwa e na kamanenai bwaai n reitaki n te intanete, e riai ni beerinoa rineaia raoraona. E kona ni kangaanga anne ngkana ko kaaina te kurubu ae rawata kaaina. (1Tim. 5:13) E boni karuanikai naba kabutinakoan rongorongo aika akea koauaia, ao kairekerekeaia taari ma waaki ni bitineti.—w21.03, i. 31.

Baikara bukina tabeua ngkai e kariaia te Atua bwa e na karawawataaki ao ni mate Iesu?

Te moan, taurakin Iesu i aon te kai e kainaomataia I-Iutaia man te rekenikai n te Tua. (IKar. 3:10, 13) Te kauoua, e kataneiaaki Iesu iroun Iehova ibukini mwiokoana ae e na riki bwa te Ibonga ae Rietata. Te katenua, kakaonimakin Iesu ni karokoa matena e kaotia iai bwa a kona ni kakaonimaki aomata n aki ongei kataakia aika kakaiaki. (Iobi 1:9-11)—w21.04, i. 16-17.

Tera ae ko kona ni karaoia ngkana e kangaanga rekeia aomata n te mwakuri ni minita?

Ko kona ni kataia ni kawariia n te tai are a na bae ni mena iai n aia auti. Ko kona naba ni kataia n uarongorongo n te tabo ae kaokoro. Ao ko kona ni kataa te anga ae kaokoro, n aron te kororeta.—w21.05, i. 15-16.

Tera ae e nanonna Bauro ngke e kangai: “I mate ni kaineti ma te tua rinanon te tua”? (IKar. 2:19)

E kaotaki n te Tua Rinanoni Mote bwa a aki kororaoi aomata, ao e kairiia tibun Iteraera nakon te Kristo. (IKar. 3:19, 24) E kairaki naba iai Bauro bwa e na butimwaea te Kristo. Ni karaoan anne, e a “mate ni kaineti ma te tua.” E a aikoa tauaki arona iai.—w21.06, i. 31.

E kangaa ni katea te katoto Iehova ibukin te nanomwaaka?

E nanomwaaka Iehova i aani kabuakakaan arana, kaitaraan riaini mwaakana n tautaeka, aia karitei natina tabeman, ana kewe Tatan, karawawataaia ana toro, mateia raoraona, karawawataaia aomata, ao uruakan ana karikibwai.—w21.07, i. 9-12.

Tera te katoto ae raoiroi are e kateia Ioteba ibukin te taotaonakinnano?

E nanomwaaka i aan te ribuaka mairouia tarina. Man aia mwakuri anne are e a karekea bukinana ae kewe ao kabureakina i Aikubita i nanon ririki aika bati.—w21.08, i. 12.

Te aeka ni mwaeiei raa are e taetae ni burabetinna Akai 2:6-9, 20-22?

A rawa ni butimwaea rongorongon te Tautaeka n Uea natannaomata, ma a bati aomata aika katikaki nakon te koaua. E a kaan te tai ae a nang kamwaeieieaki iai natannaomata ngkana a a kamaunaaki.—w21.09, i. 15-19.

E aera bwa ti aki riai ni kabwaraa nanora n ara mwakuri ni minita?

E nora ara kakorakora Iehova ao e kukurei iai. Ngkana a aki bwara nanora, ti na boni karekea te maiu are aki toki.—w21.10, i. 25-26.

E kangaa Nakoaia Ibonga 19 ni buokira ni maiuakina te reirei ni kairiri aei: “Kam na itiaki n aroaromi ni kabane”? (1Bet. 1:15)

N taraana ao e mwaneweaki te kibu anne man Nakoaia Ibonga 19:2. A kaotaki katoto aika bati ni mwakoro 19 ibukin arora ni maiuakina 1 Betero 1:15 ni maiura ni katoabong.—w21.12, i. 3-4.