E reiakin aroaro Iesu aika karikia imwina riki bwa te katoto ae rianako nakoia raao ni mwakuri i aon te aba. Ti na kangaa ni kakabwaiaaki man ana katoto? Ngkana ti iangoa raoi ana katoto, ti a kona ni karekei booto n reirei aika tenua ake a kona ni buokira bwa ti na riki bwa raao ni mwakuri aika raoiroi. A kona booto n reirei aikai ni buokira bwa ti na katiteuanaaki riki iai ma taari.

Te rao ni mwakuri ae raoiroi, e nanorinano n iangoa raona ni mwakuri bwa e kakawaki riki ao e aki kamoamoa. E reiakina te aeka n nanorinano anne Iesu iroun Tamana. E ngae ngke bon tii Iehova ae tau n aranaki bwa te tia Karikiriki, ma e tangiriia aomata bwa a na ataa kakawakin te mwakuri are e karaoia Natina. Ti nora anne n ana taeka te Atua aei: “Ti na karaoa te aomata n ai arora.” (KBwaai 1:26) E bae n rangi ni kakaitau Iesu n nanorinanon Iehova ni kaineti ma anne.—TaiAre. 18:35.

E kaotiota te nanorinano ae aron anne Iesu ni menana i aon te aba. Ngkana e kamoamoaaki ibukini baike e karaoi, e boni kamoamoaa iai te Atua. (Mareko 10:17, 18; Ioa. 7:15, 16) E teimatoa Iesu ni karekea te rau i marenana ma taan rimwina, ao e taraiia bwa raoraona ao tiaki tooro. (Ioa. 15:15) E teboki naba waeia ibukin reireinakia bwainan te nanorinano. (Ioa. 13:5,  12-14) Ti wanawana naba ngkana ti karineia raora ni mwakuri, ni moanibwai kainnanoia nakon nanora. Ti kona ni kakororaoa ae bati ngkana ti “kaotiota te ikarinerine” ao ti aki tangiria bwa ti na kamoamoaaki n taai nako.—IRom 12:10.

E ataia naba te aomata ae nanorinano bwa “a nakoraoi bwaai rinanoia taan angareirei n ibuobuoki aika bati.” (TaeRab. 15:22) N aki ongeia bwa ti mwaatai ke ti konabwai, ma ti riai n uringnga ae akea temanna ae atai bwaai ni kabane. E taekinna naba Iesu ae iai bwaai tabeua aika e aki atai. (Mat. 24:36) E kukurei n ongoraei baike a atai ao n iangoi taan rimwina aika aki kororaoi. (Mat. 16:13-16) Maroaka ae a aki maakinna raona ni mwakuri ni menaia i rarikina! N aron anne, ngkana ti nanorinano n uringnga ae iai tian ara konabwai ao ni butimwaei aia iango tabemwaang, ti a karikirakea te rau iai ma aomata ao a na “nakoraoi bwaai.”

E kakawaki riki irouia unimwaane bwa a na kakairi n nanorinanon Iesu ngkana a kaai ni mwakuri. A riai n uringnga unimwaane ae e kona te taamnei ae raoiroi ni mwamwakuri irouia ni kabane. Ngkana a taraia raoi bwa akea ae e na maaku ni kaota ana iango n aia tai ni boowi, a na boni karaoi mooti ake a na kakabwaiaaki iai te ekaretia ae bwanin.

Te rao ni mwakuri ae raoiroi, e aki imanono ngkana e mwakuri ma tabemwaang. E kai bibitaki ao e nanoraoi. A bati taai ake e nora iai Tamana Iesu ni kaotiota te aroaro anne. N te katoto, e kanakoa Natina Iehova bwa e na kamaiuia aomata man te mate are a bon tau ni karekea.—Ioa. 3:16.

E nanoraoi Iesu ngkana iai bukina ae riai. Uringa arona ni buoka aineni Boinike, e ngae ngke e boni kanakoaki nakoia tibun Iteraera. (Mat. 15:22-28) E nanoraoi naba ni baike e kantaningai mairouia taan rimwina. Imwini kakeaana iroun raoraona are Betero, ao e bon tauraoi ni kabwaraa ana bure. Imwina riki, e a angani Betero mwioko aika kakawaki. (Ruka 22:32; Ioa. 21:17; Mwa. 2:14; 8:14-17; 10:44, 45) E kateretereaki n ana katoto Iesu bwa ti “na aki imanono” ma ti na nanoraoi.—1Tim 3:3.

E na kairira naba te aki imanono bwa ti na bita arora bwa ti aonga ni mwakuri ma  te rau ma aeka n aomata nako. E nakoraoi aron Iesu nakoia raona, ngaia are a a bukinna taan ribaia aika bakantang bwa “e raoraonia taan rikoa te taekiti ma taani bure” ake a butimwaea ana rongorongo. (Mat. 11:19) Ti kona ni kakairi iroun Iesu ae nakoraoi arona ni mwakuri ma tabemwaang? E taku Louis ae te tari te mwaane ae e a tia ni karaoa te mwakuri ni mwamwananga ao ni beku ma taari aika kakaokoro aroia n te Betaera: “Te mwakuri ma aomata aika aki kororaoi, ai aroni katean te oo n atibu aika kakaokoro buburaia. E kainnanoaki te kakorakora ae bati riki iai, ma e kona ni boraoi te oo anne. I kataia naba ni karaoi bitaki bwa I aonga ni mwakuri ma te rau ma taari, ao ni katiaa te mwakuri.” Ai raoiroira te nano anne!

N ningai ae ti kona ni kaotiota iai te nano anne n ara ekaretia? Ti kona ni karaoa anne ngkana ti mwakuri ma taari n ara kurubu n te mwakuri ni minita. Ti kona n uarongorongo ma kaain te utu aika kakaokoro, ke aika kaokoro aia ririki ma ngaira. Ti kona ni karaoi bitaki ni kaineti ma aron ara mwakuri, bwa a aonga ni kukurei riki n te mwakuri ni minita?

Te rao ni mwakuri ae raoiroi e “tauraoi n ibuokanibwai.” (1Tim. 6:18) Ngke e mwakuri Iesu i rarikin Tamana, e noria bwa e aki karabai bwaai nakoina Iehova. “Ngke e katauraoa karawa” Iehova, e “mena naba ikanne” Iesu ao e karekea reireiana mairouna. (TaeRab. 8:27) Imwina riki, e a kukurei Iesu n tibwai ‘baike e ongo’ iroun Tamana nakoia taan rimwina. (Ioa. 15:15) Ti kona ni kakairi n ana katoto Iehova n arora n tibwaa ara atatai ao rabakaura nakoia taari. Te rao ni mwakuri ae raoiroi, e na tuangia tabemwaang baika a riai n atai ke baika a na buokaki iai, bwa a aonga n rabakau aroia. E kukurei n tibwai nakoia tabemwaang baika raraoi ake e a tia n reiakin.

Ti kona naba ni kaungaia raora ni mwakuri. Ngkana iai ae e nora ara kakorakora ao e kaota ana kakaitau, tiaki bwa ti na rangi ni kukurei iai? E karekea ana tai Iesu n tuangia raona ni mwakuri baika raraoi ake e nori irouia. (Kabotaua ma Mataio 25:19-23; Ruka 10:17-20.) E tuangia naba ae a na boni “karaoi mwakuri aika kakannato riki” nakon ana mwakuri. (Ioa. 14:12) N te tairiki are imwaini matena, e kamoamoaia ana abotoro aika kakaonimaki ni kangai: “Boni ngkami aika kam memena ma ngai i buakoni kataakiu.” (Ruka 22:28) Iangoa rotakia n ana taeka ao aroia ni kairaki iai bwa a na karaoa te mwakuri! Ngkana ti kamoamoaia naba raora ni mwakuri, a na rangi ni kukurei ao ni karaoa ae bati riki.

E taku te tari te mwaane ae Kayode: “Te rao ni mwakuri ae raoiroi, tiaki nanona bwa e na kororaoi, ma e kona ni kakukureiia tabemwaang ao e kabebetei mwakuri aika rawawata ibukia raona ni mwakuri.” Te rao ni mwakuri ae raoiroi ngkoe ae aron anne? E aera bwa ko aki titirakinia taari ake raom ni mwakuri, aia iango ibukim n te itera aei? Ngkana a kukurei ni mwakuri ma ngkoe n aroia taan rimwin Iesu ni kukurei ni mwakuri ma ngaia, ko kona n taekina aei n aroni Bauro: “Raao ni mwakuri ngaira ibukini kimwareireimi.”—2Kor. 1:24.