E kaungaia tibun Iteraera Iehova bwa a na itiaki. Ibukini buokaia n anne, e tuangia aei: “Ko na tai nakonako ni kabutaanako te uarao i buakoia am koraki. Ko na tai teirake n ekaanako maiun raom n aomata. Bon Iehova ngai.”—NakIbo. 19:2, 16.

Te taeka ae “teirake n ekaanako” bon te rairai ae raoiroi ibukin te taeka n Ebera are moan rairaki mai iai. Ma tera ae nanonaki iai? E taekinaki aei n te boki n Iutaia teuana ae kabwarabwaraa Nakoaia Ibonga: “E kangaanga te ota n te taeka anne ibukina bwa e aki ataaki raoi nanon te taetae ni karariki n Ebera ae kamanenaaki ikai, ae ‘tai tei i aona’ ke ‘i rarikina.’”

A kairekerekea te taeka anne taan rabakau tabeman ma te kibu are mai mwaina ae kangai: “Kam na tai ribuaka n ami motikitaeka. Ko na tai inanonano nakoia akana maiu ni kainnano ke n tangiriia riki aomata aika kaubwai. Ko riai ni motika taekan raom n aomata n te kaetitaeka ae riai.” (NakIbo. 19:15) Ngkana ngaia anne, ao te tua are n te kibu 16 are ko na tai “teirake n ekaanako” temanna, e kona n nanona ae a aki riai ana aomata te Atua n ribuaka nakoia raoia n tain te boowi, n aia waaki ni bitineti, ke n aia utu. Ao a aki riai ni kewe ke ni babakanikawai ibukini karekean oin aroia. Ni koauana, ti bon aki riai ni karaoi baikanne, ma iai riki kabwarabwaraan te taeka ane n te kibu 16 ae eti riki.

Iangoa moan iteran te kibu anne. E tua te Atua nakoia ana aomata bwa a na aki nakonako ni kabutaanako te uarao. Uringnga are e riao riki te uarao nakon te winnanti, e ngae ngke a kona naba n reke kangaanga tabeua man te winnanti. (TaeRab. 10:19; TeMin. 10:12-14; 1Tim. 5:11-15; Iak. 3:6) N angiin te tai ao te tia uarao e taekini keewe ibukini kabuakakaan taekan temanna. E kona naba ni kaotioti ni kewe ibukin te aomata temanna, e ngae ngke karaoan anne e na mate iai te aomata anne. Uringia mwaane ake taan uarao ake a kaotioti ni kewe ni kaitaraa Nabota, ao ibukin anne e a karebanaaki n atibu teuaei. (1Uea 21:8-13) Eng, e kona te tia uarao n teirake n ekaanako maiun temanna n aron ae taekinaki ni kauouan iteran Nakoaia Ibonga 19:16.

Irarikin anne, e kona te aomata n uaraoa temanna ibukina bwa e riribaia. N 1 Ioane 3:15, ti wareka aei: “Ane e ribaa tarina ao bon te tia tiriaomata, ao kam bon ataia bwa akea te maiu are aki toki iroun te tia tiriaomata.” E kakawaki ataakin ae imwin taeka ake a oti n te kibu 16, e taekina aei te Atua: “Ko na tai ribaa tarim i nanom.”—NakIbo. 19:17.

Ngaia are te taeka ae okoro are kaotaki n Nakoaia Ibonga 19:16, bon te kauring ae matoatoa nakoia Kristian. Ti riai n rarawa n iangoi baika aki raraoi ibukin temanna ke n uaraoia. Ni kauarerekeana, ngkana ti “teirake n ekaanako” temanna n arora ni kariaia te riribai ke te bakantang bwa ti na kairaki iai bwa ti na uaraoia, anne boni kaotan ae ti kairiribai. A riai n rarawa Kristian nakon anne.—Mat. 12:36, 37.