KAONGORA IBUKIN TE REIREI 40
“Kairiia Aika Bati Nakon te Raoiroi”
“A na oota . . . akana kairiia aika bati nakon te raoiroi n ai aron itoi, n aki totoki.”—TAN. 12:3.
ANENE 151 E na Boni Wewete
KANOANA *
1. Baikara baika kakukurei aika imwaira n te Tai n Tautaeka ae Maanna Tenga te Ririki?
AI KAKUKUREIRA te bong are e nang moanaki iai te kautiuti i aon te aba n Ana Tai n Tautaeka Kristo ae Maanna Tenga te Ririki! A bane aomata n ingainga ni kani manga noriia naake a a tia ni mate ake a tangiraki irouia. Bon anne naba ana namakin Iehova. (Iob 14:15) A na bane ni kimwareirei kaain te aonnaba ngkana a kautaki naake a tangiraki irouia. Ti reiakinna n te kaongora are imwain aei bwa “akana raoiroi,” ake a koreaki araia n te boki ni kamaiu, a na manga karekea “te mangauti are te maiu.” (Mwa. 24:15; Ioa. 5:29) Tao a bati aika tangiraki iroura aika a na mena i buakoia naake a na kautaki nakon te mangauti * i aon te aba. Irarikina, a na kautaki “akana aki raoiroi” ake e aki tau aia tai ni kinaa Iehova, ke ni kakaonimaki ni beku ibukina imwaini mateia, nakon “te mangauti are te motikitaeka.”
2-3. (a) N aron ae taekinaki n Itaia 11:9, 10, tera te waaki n angareirei ae bubura ae tuai man nonoraki ma rimoa? (b) Tera ae ti na rinanona n te kaongora aei?
2 A na bane aomata aika kautaki aikai n reireinaki. (Ita. 26:9; 61:11) Ngaia are e a riai ni karaoaki te waaki n angareirei ae bubura ae tuai man nonoraki mai mwaina. (Wareka Itaia 11:9, 10.) Bukin tera? Bukina teuana, bwa aomata aika aki raoiroi aika kautaki, a riai n reiakina taekan Iesu Kristo, ana babaire te Tautaeka n Uea, te karea ni kaboomwi, kakawakin aran Iehova, ao bukin riain Iehova n tautaeka n tii ngaia. A riai naba akana raoiroi n reiakina te bwai are e a tia Iehova n reiakinia iai ana aomata ae ana kantaninga ni kaineti ma te aonnaba. Tabeman i buakoia aika kakaonimaki aikai, a a kamani mate imwaini bobongan raoi te Baibara. A boni bati baika a riai n reiakin aomata aika aki raoiroi ao aika raoiroi naba.
3 N te kaongora aei, ti na rinanoi iai titiraki aikai: E na kangaa aroni karaoan te mwakuri n angareirei ae bubura aei? E na kangaa aroia aomata ni butimwaea te waaki n angareirei aei n ataaki iai bwa e na teimatoa n tiku araia n te boki ni kamaiu ke e na aki? A kakawaki ibukira titiraki aikai ni boong aikai. N aron ae ti nang noria, tabeua taetae ni burabeti aika kamimi ni booki aika Taniera ao Te Kaotioti, a na boni buokira ni kamataataira n te bwai ae na riki ngkana a a kautaki maate. Te moan, ti na nori baika kakukurei ake a taetae ni burabetinaki n Taniera 12:1, 2.
“A NA UTI . . . AIKA MATU I BUAKONI BUBUN AONTANO”
4-5. Tera ae kaotaki n Taniera 12:1 ni kaineti ma tain te toki?
4 Wareka Taniera 12:1. E taekinaki n te boki ae Taniera baika kakukurei aika a na riki teuana imwin teuana n tain te toki. N te katoto, e kaotaki n Taniera 12:1 bwa e “tei ibukia [ana aomata te Atua]” Mikaere are Iesu Kristo. E kakoroaki nanon iteran te taetae ni burabeti anne n 1914, ngke e a rineaki Iesu bwa te Uea n Ana Tautaeka n Uea te Atua i karawa.
5 E tuangaki naba Taniera bwa e na “teirake” Iesu n “tain te rawawata ae tuai man riiriki mangke e riki te natannaomata ni karokoa te tai anne.” “Tain te rawawata” aei bon, “te rawawata ae korakora” ae taekinaki ni Mataio 24:21. E teirake Iesu ke e kamanoia ana aomata te Atua n tokin tain te rawawata aei n Aremaketon. E taekinia koraki n aomata akanne te boki ae Te Kaotioti bwa te koraki ae uanao aika “nako . . . mai buakon te rawawata ae korakora.”—TeKao. 7:9, 14.
6. Tera ae na riki imwini kamaiuaia te koraki ae uanao man te rawawata ae korakora? Kabwarabwaraa. (Nora “Titiraki Mairouia Taani Wareware” n te kaongora aei, ae kaineti ma te mangauti nakon te maiu n te aonnaba.)
6 Wareka Taniera 12:2. Tera ae riki imwini kamaiuaia te koraki ae uanao n tain te rawawata aei? E aki nanonaki n te taetae ni burabeti aei te mangauti n te aro ni kaikonaki, ae taekani manga kamarurungaia n te aro n taamnei ana toro te Atua ae riki ni kabaneani boong, n aron otara * are mai mwaina. Ma e nanonaki n taeka aikai kautakia maate n te aonnaba ae boou ae e a kaan roko. E aera bwa ti taekina aei? E kamanenaaki naba te taeka ae “te tano” n Iobi 17:16 ae titeboo nanona ma “te Ruanimate.” Ngaia are Taniera 12:2, e bae n nanonaki iai te mangauti are imwin tokini kabaneani boong ao imwin te buaka are Aremaketon.
7. (a) N te aro raa are a na kautaki iai tabeman nakon “te maiu are aki toki”? (b) E aera bwa e “raoiroi riki te mangauti aei”?
7 Ma tera ae nanonaki n Taniera 12:2 ngke e taekinaki iai bwa tabeman a na kautaki nakon “te maiu are aki toki”? E nanonaki iai bwa i nanon 1,000 te ririki, ao naake a kautaki ake a ataa, ke a teimatoa n ataa, Iehova ao n ongeaba Irouna ma Iesu, a na boni karekea te maiu are aki toki. (Ioa. 17:3) Bon aei “te mangauti ae raoiroi riki” nakoni kautakia tabeman rimoa. (Ebera 11:35) Bukin tera? Ibukina bwa a a manga mate aomata akana aki kororaoi akanne.
8. E aera bwa a na kautaki tabeman nakon “te kabuakakaaki ao te riribaaki ae akea tokina”?
8 Ma a na aki bane aomata aika kautaki ni butimwaea reireiaia mairoun Iehova. E taetae ni burabetinna Taniera bwa tabeman a na kautaki nakon “te kabuakakaaki ao te riribaaki ae akea tokina.” Ibukina bwa a kaotiota te nano ni karitei, a na aki koreaki araia n te boki ni kamaiu ao a na aki karekea te maiu are aki toki. Ma a na karekea te “riribaaki ae akea tokina,” ke te kamaunaaki. E nanonaki n Taniera 12:2 bwa e boto te bwai ae na riki nakoia aomata nako aika kautaki, i aoni baike a karaoi imwini kautakia. * (TeKao. 20:12) Iai tabeman aika a na karekea te maiu are aki toki ao ake tabeman a na aki.
“KAIRIIA AIKA BATI NAKON TE RAOIROI”
9-10. Tera ae na riki naba imwin te rawawata ae korakora, ao antai aika “a na oota n ai aron ootani karawa”?
9 Wareka Taniera 12:3. Tera ae na riki naba imwin “tain te rawawata” ae e a kaan roko? Irarikin are taekinaki n Taniera 12:2, e taekinaki ni kibuna 3 te bwai teuana ae na riki imwin te rawawata ae korakora.
10 Antai aika “a na oota n ai aron ootani karawa”? E reke kaekaan aei n ana taeka Iesu ni Mataio 13:43: “N te tai anne, a na raneanea aomata aika raoiroi n aron taai, n ana Tautaeka n Uea Tamaia.” N taeka aikai, ao Iesu e bon taekinia iai “natin te Tautaeka n Uea,” ake tarina aika kabiraki ake a na beku ma ngaia n te Tautaeka n Uea i karawa. (Mat. 13:38) Ngaia are Taniera 12:3 e boni bae n nanonia taani kabiraki ao te mwakuri are a na karaoia n tain te Tautaeka ae Maanna Tenga te Ririki.
A na kaai ni mwakuri naake 144,000 ma Iesu Kristo ni kaira te waaki n angareirei are e na karaoaki i nanon 1,000 te ririki (Nora barakirabe 11)
11-12. Tera ae a na karaoia naake 144,000 i nanon 1,000 te ririki?
11 A na kangaa taani kabiraki ni “kairiia aika bati nakon te raoiroi”? A na boni kaai ni mwakuri ma Iesu Kristo ni kaira te waaki n angareirei i aon te aba i nanon 1,000 te ririki. A na aki tii riki naake 144,000 bwa ueea, ma a na beku naba bwa ibonga. (TeKao. 1:6; 5:10; 20:6) Ngaia are a na ibuobuoki ma “bwainnaoraki nakoia natannaomata” ao ni kairiia aomata nakon te kororaoi teutana imwin teutana. (TeKao. 22:1, 2; Etek. 47:12) Ai boni kukureira taani kabiraki n aei!
12 Antai aika a na mena i buakoia aomata “aika bati” ake a na kairaki nakon te raoiroi? Bon te koraki ake a kautaki ao naake a kamaiuaki n Aremaketon, n ikotaki ma natiia ake a bungiaki n te aonnaba ae boou. N tokin ririki ake 1,000, a nangi bane ni kororaoi kaain te aonnaba. Ngaia are n ningai te tai are a na koreaki iai araia n te ingke n te aro are e aki kona ni mauna ao tiaki n te bentira, n te boki ni kamaiu?
TE KABANEA NI KATAAKI
13-14. Tera ae a riai ni kaotia n aroaroia aomata nako aika kororaoi i aon te aba imwain are a na karekea te maiu are aki toki?
13 Ti riai n uringnga ae te riki ni kororaoi, e aki nanonaki iai bwa te aomata anne e nangi boni karekea naba te maiu are aki toki n akea te bwai ae e na karaoia. Iangoa Atam ma Ewa. A boni kororaoi, ma a riai naba ni kaotia bwa a ongeaba iroun Iehova ae te Atua, imwain reken te maiu are aki toki irouia. Ao e kananokawaki bwa a kabwaka n ongeaba Irouna.—IRom 5:12.
14 Tera aroia naake a maiu i aon te aba n tokin ririki ake 1,000? A a bane ni kororaoi. Te koaua bwa a na bane aomata akana kororaoi akanne ni boutokaa raoi riain Iehova n tautaeka n aki toki? Ke iai tabeman aika a na katotongia Atam ma Ewa, ake a a manga aki kakaonimaki e ngae ngke a a kororaoi? A riai ni kaekaaki titiraki aikai, ma n te aro raa?
15-16. (a) E na reke n ningai aia tai aomata ni kabane ni kaota kakaonimakia ni koaua nakon Iehova? (b) Tera ae na riki imwin te kabanea ni kataaki?
15 E na karabuutinaki Tatan i nanon 1,000 te ririki. N te tai anne, ai akea aomata ake e na mwamwanaiia. Ma n tokin 1,000 te ririki, e na boni kabwaraaki Tatan man te karabuuti. E na boni kataia ni mwamwanaiia aomata aika kororaoi. N tain te kataaki anne, a na bane aomata aika kororaoi i aon te aba, n reke aia tai ni kaotia raoi bwa a karinea aran te Atua ao a boutokaa ana tautaeka ke a aki. (TeKao. 20:7-10) Baike a karaoi n te tai anne, e na ataaki iai bwa e riai ni koreaki araia n te boki ni kamaiu ao n aki kona ni mauna ke e na aki.
16 E taekinaki n te Baibara bwa iai tabeman aika a na katotongia Atam ma Ewa n aki kakaonimaki ao a na rawa nakon ana tautaeka Iehova. Tera ae na riki nakoia? E kangai Te Kaotioti 20:15: “Ane e aki koreaki arana n te boki ni kamaiu, ao e na tewenakoaki nako nanon te nama ae te ai.” Eng, a na kamaunaaki n aki toki taani karitei aikai. Ma angia aomata aika kororaoi, a na boni kamaiuaki imwin te kabanea ni kataaki aei. A na boni koreaki araia n te boki ni kamaiu ao n aki kona ni mauna.
INANON “TAIN TE TOKI”
17. Tera are e tuangaki Taniera ibukin te bwai ae na riki n ara tai aikai? (Taniera 12:4, 8-10)
17 Ai boni kakukureira iaiangoakini baika a na riki n taai aika imwaira! Ma e boni karekei naba Taniera rongorongo tabeua aika kakawaki mairoun te anera ni kaineti ma ara tai aei, ae “tain te toki.” (Wareka Taniera 12:4, 8-10; 2Tim. 3:1-5) E taku te anera nakon Taniera: “E na rangi ni bati te atatai ae koaua.” Eng, a nang ota raoi riki ana aomata te Atua n taian taetae ni burabeti n te boki aei. E reitia riki te anera bwa n te tai aei ao “a na karaoa ae buakaka akana buakaka, ao akea mai buakoia akana buakaka aika a na ota.”
18. Tera ae na waekoa n riki nakoia aomata aika buakaka?
18 Ni boong aikai ao taraan ae a aki katuuaaeaki aomata aika buakaka ibukin aroaroia aika aki raraoi. (Maraki 3:14, 15) Ma e na waekoa Iesu ni motiki taekaia aomata aika ai aroia kooti ao ni kaokoroia mai buakoia aomata aika ai aroia tiibu. (Mat. 25:31-33) A na aki kamaiuaki naaka buakaka aikai n rokon te rawawata ae korakora, ao a na aki naba kautaki nakon te aonnaba ae boou. A na aki naba koreaki araia n te “boki ni kauring” ae taekinaki ni Maraki 3:16.
19. Tera ae ti riai ni karaoia ngkai, ao bukin tera? (Maraki 3:16-18)
19 Aio ngkai ara tai ni kaotiira bwa ti a aki mena i buakoia aomata aika buakaka. (Wareka Maraki 3:16-18.) E a tabe ngkai Iehova ni botiia naake e iangoiia bwa “[ana] aomata aika okoro,” ke aomata aika kakawaki irouna. Ni koauana, ti boni kani mena i buakoia aomata akanne.
Ai boni kakukureira noraia Taniera, naake a tangiraki iroura, ao aika bati riki n “teirake” ibukin tibwangaia n te aonnaba ae boou! (Nora barakirabe 20)
20. Tera te kabanea ni berita are e taekinaki nakon Taniera, ao e aera ngkai ko ingainga ni kan nora kakororaoana?
20 Ti a boni maeka ngkai n taai aika okoro. Ma a rangi ni bati riki baika kamimi aika a na waekoa n riki. Ti nang nora kamaunaan te buakaka ni kabane. Imwina, ti na nora kakororaoan ana berita Iehova nakon Taniera aei: “Ko na teirake ibukin tibwangam n tokini boong.” (Tan. 12:13) Ko ingainga ni kan nora te bong are a na manga “teirake” iai Taniera, ao naake a tangiraki iroum? Ngkana ngaia anne, karaoa am kabanea ni konaa ngkai ni kakaonimaki, ao ane ko na boni kakoauaa raoi bwa e teimatoa n tiku aram n ana boki ni kamaiu Iehova.
ANENE 80 “Katoongnga ao Noria Bwa E Bon Raoiroi”
^ E katauraoaki n te kaongora aei, te bitaki nakon otara ni kaineti ma te waaki n angareirei ae bubura ae taekinaki n Taniera 12:2, 3. Ti na neneria bwa e na riki n ningai aei, ao antai aika a na karaoia. Ti na nora naba aron te waaki n angareirei aei ni katauraoiia kaain te aonnaba imwain te kabanea ni kataaki n tokin Ana Tautaeka Kristo ae Maanna Tenga te Ririki.
^ Tao e na bae ni moanaki te kautiuti mairouia naake a kakaonimaki n uaa mateia ni kabaneani boong, ao imwina naake a mate imwaia, ao ai arona naba nakon te roro teuana ma teuana. Ngkana arona bwa e riki aei, e na reke aia tai kaain te roro teuana ma teuana ni butimwaeia naake a kinaia. N aki ongea te bae e na riki, ma e kaotaki n te Baibara bwa naake a na kautaki nako karawa a na kamaiuaki “n aia karinan nako,” ngaia are ti a kona ni katautaua te mangauti nako aon te aba bwa e na karaoaki naba n te aro ae baireaki raoi.—1Kor. 14:33; 15:23.
^ Te kabwarabwara aei, bon te bitaki nakon otara n te boki ae Pay Attention to Daniel’s Prophecy! mwakoro 17, ao n Te Taua-n-Tantani 1987, Turai 1 i. 21-25.
^ Taeka aika, “akana raoiroi” ao “akana aki raoiroi” ni Mwakuri 24:15, ao taeka aika, “te koraki ake a karaoi baika raraoi” ao “te koraki ake a kakaraoi baika rangi ni buakaka” n Ioane 5:29, a nanonaki iai aroaroia naake a kautaki imwaini mateia.
