Iangoi kaekaan titiraki akanne n te Baibara.

E taekinaki ni Mwakuri 24:15 bwa a na boni “mangauti akana raoiroi ma akana aki raoiroi.” Te koraki ake a ongeaba nakon te Atua imwaini mateia, bon akana raoiroi, ngaia are iai araia n te boki ni kamaiu. (Maraki 3:16) Ma te koraki ake e aki reke aia tai ae tau ibukin reiakinan taekan Iehova imwaini mateia, bon akana aki raoiroi, ngaia are bon akea araia n te boki ni kamaiu.

A taekinaki naba n Ioane 5:28, 29 koraki aika uoua akana mwaneweaki ni Mwakuri 24:15. E taekinna Iesu bwa te “te koraki ake a karaoi baika raraoi,” a na otinako “nakon te mangauti are te maiu, ao te koraki ake a kakaraoi baika rangi ni buakaka nakon te mangauti are te motikitaeka.” A karaoi baika raraoi akana raoiroi imwaini mateia, ngaia are a na otinako nakon te mangauti are te maiu, ibukina bwa e teimatoa n tiku araia n te boki ni kamaiu. Ma akana aki raoiroi, a kakaraoi baika rangi ni buakaka imwaini mateia, ngaia are a na otinako nakon te mangauti are te motikitaeka. A tuai koreaki araia n te boki ni kamaiu, ngaia are a na rinanon te tai ni motikitaeka ke a na tarataraaki raoi aroaroia. Ao e nang reke aia tai n te tai anne n reiakina taekan Iehova ao ni koreaki araia n te boki ni kamaiu.

E kamatataaki n Te Kaotioti 20:12, 13 bwa naake a kautaki, a riai ni bane n ongeaba ni “baike a koreaki n taian nira ni boki,” ae taekan tuua aika boou ake e na anga te Atua n te aonnaba ae boou. E na boni kamaunaia Iehova te koraki ake a aki ongeaba.—Ita. 65:20.

E a kaman taekinaki n Taniera 12:2 bwa tabeman i buakoia ake a matunako n te mate, a na uti “nakon te maiu are aki toki ao tabemwaang nakon te kabuakakaaki ao te riribaaki ae akea tokina.” E nanonaki n te kibu aei te kabanea ni motikitaeka. A na karekea te “maiu are aki toki” ke te “riribaaki ae akea tokina.” Ngaia are n tokin ririki ake 1,000, a nang karekea te maiu are aki toki tabeman, ma ake tabeman riki a na kamaunaaki n aki toki.—TeKao. 20:15; 21:3, 4.

Aio kamatataana. A kona ni kabotauaki koraki akana uoua ake a kautaki, ma ianena aika kani maeka n te aba teuana. Aomata aika raoiroi titeboo ma aomata ake a reke kariaiakaia ni mwakuri ke n tiku ni maeka n te aba teuana, a kinaaki raoi, ao a inaomata. Ma akana aki raoiroi, titeboo ma ianena ake a karekea kariaiakaia n roko bwa iruwa ke ni maeka n te tai ae uarereke. A riai ianena akanne ni kaotia n aroaroia bwa a a tau ni kariaiakaki n teimatoa ni maeka n te aba anne. N aron naba anne, naake a kautaki ake a aki raoiroi, a riai n ongeaba n ana tua Iehova ao ni kaotia n aroaroia bwa a a tau ni maeka n te Bwaretaiti. N aki ongeia bwa te aekakira te beeba ni kariaia ae moan reke irouia ianena ibukin rokoia ikanne, ma n tokin te tai, a na boni karekea te beeba ni kariaia ibukin rikia bwa kaain te aba, ao tabeman a na boni kanakoaki. E boto kabaneani motikan taekaia ianena akanne, i aon aroaroia ao kateia n te aba ae boou. Ngaia are e boto naba kabaneani motikan taekaia naake a bane ni kautaki, i aon aia onimaki ao aroaroia n te aonnaba ae boou.

Iehova bon te Atua ae tatangira ao nibwan te kaetitaeka ae riai. (TuaKau. 32:4; TaiAre. 33:5) E na kaota ana tangira ni kautakia akana raoiroi ma akana aki raoiroi. E na boni kantaningaiia bwa a na bane n ongeaba n ana kaetieti ibukin ae eti ao ae kairua. Bon tii naake a karikirakea tangirana ao n ongeaba n ana kaetieti, aika a na kariaiakaki ni maiu n aki toki n te aonnaba ae boou.