N te moan ingabong n te Katenibong n Tianuare 24, 2018, e a ongoraeaki n taian utu ni Betaera n te United States ao Kanata te katanoata ae okoro aei: E a riki Brother Kenneth Cook, Jr., bwa kaain te Rabwata n Tautaeka Ibukia Ana Tia Kakoaua Iehova.

E bungiaki ao ni kaikawaaki Brother Cook i Pennsylvania, i U.S.A. E reiakina te koaua mairoun raona n reirei imwain raoi banen ana reirei n te kauarinan ao e bwabetitoaki n Tun 7, 1980. E moana kabwaninan ana tai ni beku bwa te bwaiania ae katoatai n Tebetembwa 1, 1982. E bwaiania uoua te ririki ao imwina e a kaoaki bwa e na moana ana beku n te Betaera i Wallkill, i New York, n Okitobwa 12, 1984.

E anganaki Brother Cook mwiokoana aika kakaokoro i nanon 25 te ririki n te tabo ni Boreeti ao n Aobitin te Betaera. E mare ma Jamie n 1996, ao a kaai ni mwakuri n te Betaera i Wallkill. N Ritembwa 2009, a a manga kamwaingaki nakon te Watchtower Educational Center i Patterson i New York, ao e a mwiokoaki teuaei bwa e na mwakuri n te Writing Correspondence Department. N Eberi 2016, a oki nako Wallkill teutana te tai, ao a a kamwaingaki nako Brooklyn i New York. Nimaua te namwakaina imwina, a a manga kamwaingaki nakoni kautun ara botaki i Warwick i New York. N Tianuare 2017, e a rineaki Brother Cook bwa te tia ibuobuoki n te Komete Ibukin Rongorongo n te Rabwata n Tautaeka.