1-2. (a) Tera ae e noria Iehova ngkana a ikotaki mirion ma mirion aomata ibukin Ana Katairiki te Uea? (Nora te taamnei ni moan te maekatin.) (b) Tera ae ti na maroroakinna n te kaongora aei?

IANGOA te bwai ae e noria Iehova ngkana a botaki mirion ma mirion aomata ni katobibia te aonnaba ibukin Ana Katairiki te Uea. E noriia aomata aika mwaitikurikuri ma e atai aroaroia n tatabemania nako. N te katoto, e noriia aika kakaonimaki n roroko ni katoa ririki. Ao i buakoia nakanne iai aika roko n aki ongea te bwainikirinaki ae korakora. Tabeman a aki katoatai n iririi bobotaki ake tabeua, ma a iangoia bwa kaean te Kauring bon tabeia ae kakawaki ae a riai ni karaoia. E noriia naba Iehova naake ai tibwa aia moantai ni kaea te Kauring, bwa tao a kan ataia bwa tera ae kakaraoaki iai.

² Ni koauana, e kukurei Iehova n noriia aomata aika bati ni kaea te Kauring. (Ruka 22:19) Ma e aki kaatuua riki ana iango i aoni mwaitiia aomata aika roko. E kakawaki riki irouna bukin rokoia. N te kaongora aei, ti na maroroakina te titiraki ae moan te kakawaki aei: E aera bwa ti a aki tii kaea naba te Kauring ae kakaraoaki ni katoa ririki ma ti a manga iririi botaki aika kakaraoaki ni katoa wiki ake e katauraoi Iehova ibukia naake a tangiria?

3-4. (a) E aera ngkai ti kaakaei bobotaki? (b) Tera te aroaro ae kairira bwa ti na kani kaakaei bobotaki? (c) Ni kaineti ma ae taekinaki n 1 I-Korinto 11:​23-26, e aera bwa ti riai ni kaakaei taai ni Kauring ni kabane?

³ E kakawaki kaakaean ara botaki n te ekaretia ibukina bwa bon iteran naba ara taromauri. Ti kaakaei naba ibukina bwa ti reireinaki iai iroun Iehova. A aki kakoauaa aomata aika kainikatonga  bwa a riai n reireinaki bwaai tabeua. (3Ioa. 9) Ma ngaira ti ingainga ni kan reireinaki iroun Iehova ao n ana botaki.​—Ita. 30:20; Ioa. 6:45.

⁴ Ngkana ti kaakaei ara bobotaki e kaotaki iai bwa ti nanorinano, ti tauraoi n reireinaki, ao ti kukurei iai. N te tairiki are karaoaki iai Kauringaani maten Iesu, ti kaea te botaki ae kakawaki aei tiaki tii ibukina bwa ti kabaeaki iai, ma ibukina naba bwa ti nanorinano n ongeaba n ana tua Iesu aei: “Kakaraoa aei bwa kanuringau.” (Wareka 1 I-Korinto 11:​23-26.) E kamatoaaki iai ara kantaninga ibukin taai aika imwaira ao ti kauringaki naba iai korakoran ana tangira Iehova ibukira. Ma e ataia Iehova ae ti kainnanoa kaungaakira ao kakorakoraakira n taai aika bati i nanon te ririki. Ngaia are e katauraoi ibukira bobotaki ni katoa wiki ao e kaumakira bwa ti na kaakaei. Ti kairaki n te nanorinano bwa ti na ongeaba iai. Ti kabanei aoa aika bati ni katoa wiki ni katauraoi ibukini bobotaki akanne ao ni kaakaei.

5. E aera ngkai a butimwaea ana kakao Iehova aomata aika nanorinano?

⁵ Ni katoa ririki, e kaoia aomata aika bati Iehova bwa e na reireinia ao a bati aika nanorinano ni butimwaea ana kakao. (Ita. 50:4) A kukurei ni kaea te Kauring, ao a a moanna ni kaakaei bobotaki riki ake tabeua. (Tek. 8:​20-23) Ti uaia ni kimwareirei ma ngaiia n reireinaki ao ni kairiraki iroun Iehova, ae ‘te tia buokira ao te tia kamaiuira.’ (TaiAre. 40:17) Tera raoi te bwai ae kakukurei riki ke ni kakawaki riki nakoni butimwaean te kakao ae ti na reireinaki iroun Iehova ao Iesu ae Natina are e rangi n tangiria?​—Mat. 17:5; 18:20; 28:20.

6. E kangaa ni buokaki temanna te mwaane man nanorinanona bwa e na kaea te Kauring?

⁶ Ti kakorakoraira ni katoa ririki ni kaoia aomata aika bati bwa a na kaea Kauringaani Maten Iesu. A bati aomata aika nanorinano aika kakabwaiaaki mani butimwaean ara beeba ni kakao. N te katoto, tabeua te ririki n nako, e anganaki te mwaane temanna te beeba ni kakao ibukin te Kauring, ma e karautaeka bwa e aki kona n roko. Ma e ngae n anne n tairikin te Kauring, e mimi te tari are kakao ngke e a nora te mwaane anne n rin n te Tabo n Taromauri. E rangi ni kukurei te mwaane aei ni kamaurana ma tabeakinana irouia taari, ao e a kaakaei ara bobotaki ni katoa wiki. Ni koauana, tii tenua te tai ni bobotaki ake e aki kaei i nanon te ririki are imwina. Tera are e buokia bwa e na kaakaei bobotaki ni kabane? E bon nimamannei ngaia are e a bita ana iango. Imwina riki, e taku te tari are e kaoa: “Bon te mwaane ae nanorinano.” E boni katika teuaei Iehova bwa e na taromauria. E a tia ni bwabetitoaki ao e a riki ngkai bwa te tari.​—2Tam. 22:28; Ioa. 6:44.

7. Ti na kangaa ni buokaki bwa ti na nanorinano mani baike ti reiakin n ara bobotaki ao baike ti wareki n te Baibara?

⁷ Ti buokaki bwa ti na nanorinano ni baika ti reiakin n ara bobotaki ao ni baika ti wareki man te Baibara. Ni wiki ake imwain te Kauring, e kaatuuaki n ara bobotaki taekan ana katoto Iesu ao te nanorinano are e kaotiotia n arona n anga maiuna bwa te kaboomwi. Ao ni boong ake imwain te Kauring, ti a kaumakaki bwa ti na wareki n te Baibara baike a riki ni kaineti ma maten Iesu ao mangautina. E a korakora riki nanora ni kani kakaitau ibukin ana angakarea Iesu ibukira, mani baika ti reiakin n ara bobotaki ao baike ti wareki n te Baibara. Ti a kairaki iai bwa ti na kakairi n aroarona ae te nanorinano ao ni kakaraoa nanon Iehova e ngae naba ngkana e kangaanga iroura.​—Ruka 22:​41, 42.

8. E kangaa Iesu ni kaotiota te ninikoria?

⁸ Ti kataia naba ni katotonga Iesu ni kaotiota te ninikoria. Iangoa te ninikoria are e kaotiotia ni boong ake imwaini matena. E ataia raoi ae taani kairiribai nakoina a na bwainingareia, a na kataerea, ao ni kamatea. (Mat. 20:​17-19) Ma e boni kukurei naba ni mate. Ngke a a kan roko taani kamwanea, e taku nakoia ana abotoro ake a kakaonimaki, ake raona i Ketetemane: “Teirake, ti a nako. Noria! Ae e a kan roko te tia kamwaneai.” (Mat. 26:​36, 46) Ao ngke a a roko aomata ma aia bwai ni buaka n taua, e ninikoria ni kaotia nakoia, ao e tua nakoia tautia bwa a na kanakoia moa abotoro. (Ioa. 18:​3-8) Ai rianakora te ninikoria ae e kaotiotia Iesu! Ni boong aikai, a kakorakoraia Kristian aika kabiraki ao tiibu tabemwaang ni katotonga Iesu ni kaotiota te ninikoria. N te aro raa?

9. (a) E aera bwa ti kainnanoa te ninikoria ngkana ti na katoatai ni kaei bobotaki? (b) Ni kaineti ma taari ake a kabureaki ibukin aia onimaki, tera aron rotakia n ara katoto?

⁹ Ngkana ti na katoatai ni kaei bobotaki, ti bae ni kainnanoa kaotiotan te ninikoria n taai ake ti kaaitara iai ma kangaanga. Tabeman taari a kaei bobotaki e ngae ngke a taonakinako n te nanokawaki, te bwarannano, ke te aoraki. Ake tabeman a ninikoria ni kaei bobotaki n aki ongei kaitaraakia ae korakora mairouia aia utu ke taan tautaeka. Karaua iangoiia tarira ake a kabureaki ibukin aia onimaki, tera aron rotakia n ara katoto? (Ebera 13:3) Ngkana a ongo ae ti teimatoa ni beku ibukin Iehova n aki ongei kataakira, a a kakorakoraaki iai bwa a na kateimatoa aia onimaki, ninikoriaia, ao etin aroia. E riki naba anne nakon te abotoro Bauro. Ngke e kabureaki i Rom, e kaungaaki n taai ake e ongo iai taekaia taari bwa a kakaonimaki ni beku ibukin te Atua. (IBir. 1:​3-5, 12-14) Teutana te tai imwain ke imwin raoi kainaomataana, e a korea ana reta nakoia taian Ebera. E kaumakiia iai Kristian akana kakaonimaki akanne bwa a na “kateimatoa [aia] itangitangiri n tari” ao a na aki kaaki aroia ni bobotaki.​—Ebera 10:​24, 25; 13:1.

10-11. (a)  Antai aika ti riai ni kaoia nakon te Kauring? (b) Tera bukini karaoan anne ae taekinaki n I-Ebeto 1:7?

¹⁰ Ti kaotia bwa ti ninikoria ngkana ti kaoia ara koraki, raora ni mwakuri ao kaain rarikira nakon te Kauring. E aera bwa ti kaoia? Ibukina bwa ti rangi ni kakaitau n te bwai ae a a tia ni karaoia ibukira Iehova ao Iesu, ngaia are ti a kani kaoia aomata nakon te Kauring. Ti tangiria bwa a na ataa te bwai ae a riai ni karaoia ibukini kakabwaiaaia naba man ana “akoi ae rianako” Iehova rinanon te kaboomwi.​—Wareka I-Ebeto 1:7; TeKao. 22:17.

¹¹ Ngkana ti kaotiota te ninikoria n arora ni kaai ni bobotaki, ti a kaotiota naba iai te aroaro ae rangi ni kakawaki, are e kaotiotia te Atua ao Natina n aaro aika rianako.

12. (a) E kangaa ni kakorakoraaki tangiran Iehova ao Iesu iroura man ara bobotaki? (b) Tera ae ti kaungaaki bwa ti na karaoia n 2 I-Korinto 5:​14, 15 bwa ti na kakairi iai iroun Iesu?

¹² Ti kaumakaki bwa ti na kaakaei bobotaki man tangiran Iehova ao Iesu. Ao mani baika ti reiakin n ara bobotaki e a korakora riki iai tangiraia iroura. Ti katoatai ni kauringaki n ara bobotaki baike a karaoi ibukira. (IRom 5:8) Ma ti kauringaki riki n te Kauring korakoran aia tangira ibukira ao ibukia naba naake a tuai n ataa kakawakin te kaboomwi. Kioina ngkai e korakora nanora ni kakaitau, ti kataia ni kakairi iroun Iesu n aroaroni maiura ni katoabong. (Wareka 2 I-Korinto 5:​14, 15.) Irarikin anne, ti kaungaaki mai nanora bwa ti na kamoamoaa Iehova ibukini katauraoan te kaboomwi. Te anga teuana ae ti kona iai ni kamoamoaa te Atua, boni ngkana ti anganga ara kaeka ae nako mai nanora n ara bobotaki.

13. Ti na kangaa ni kaota korakoran tangiran Iehova ao Natina iroura? Kabwarabwaraa.

¹³ Ti kona ni kaota korakoran tangiran Iehova ao Natina ngkana ti kukurei n taon nanora ni kakeai bwaai tabeua ibukia. N angiin te tai, ti karaoa anne n aanga aika bati bwa ti aonga ni kona ni kaakaei ara bobotaki. A bati ekaretia aika karaoa aia botaki ni bwakantaain te bong ni mwakuri i nanon te wiki are ti a bae ni kua iai. Ao are teuana e karaoaki n te wikeen ae ai bon aia tai ni motirawa aomata. E ataia Iehova ae ti kaakaei ara bobotaki e ngae naba ngkana ti kua? E bon ataia! Ngkana ti kakorakoraira riki ni kaakaei ara bobotaki, e na kakaitau riki iai Iehova n ara tangira ae ti kaotiotia ibukina.​—Mareko 12:​41-44.

14. E kangaa Iesu ni katea te banna ni katoto ibukin te tangira ae ko anga boni ngkoe iai?

¹⁴ E katea te katoto ibukira Iesu n arona ni kaotiota te tangira are e anga boni ngaia iai. E kukurei ni mate ibukia taan rimwina ao e katoabong n tabeakin riki aroia nakon arona. N te katoto, e bobotaki ma taan rimwina e ngae naba ngkana e a kua ke e rawawata. (Ruka 22:​39-46) Ao e kaatuua ana iango n te bwai ae kona n angania tabemwaang, ma tiaki n te bwai ae e kona ni karekea mairouia. (Mat. 20:28) Ngkana e korakora tangiran Iehova  ao tarira iroura, ti na kabanea ara konaa ni kaea Ana Katairiki te Uea n ikotaki naba ma bobotaki n te ekaretia ni kabane.

15. Antai aika ko kani buokiia riki?

¹⁵ Ti a riki bwa kaain te botaki n itaritari ni Kristian ae koaua, ao ti kukurei ni kabanea ara tai ni kaoia aomata aika boou bwa a na riki bwa raora. Ma ae moamoa riki, ti kani buokiia naake a “katiteuanaaki ma ngaira n te onimaki,” ake a aikoa manga uarongorongo ke n roroko ni bobotaki. (IKar. 6:10) Ti kaotia bwa ti tangiriia ngkana ti kakaungaia bwa a na kaakaei bobotaki, moarara riki te Kauring. N aron Iehova ao Iesu, ti kimwareirei naba ngkana temanna i buakoia e okira Iehova ae Tamara ae tatangira ao ara tia Kawakintiibu.​—Mat. 18:14.

16. (a) Ti na kangaa ni kaungaira i marenara, ao tera buokara man ara bobotaki? (b) E aera ngkai aei te tai ae raoiroi i nanon te ririki ibukin ururingan ana taeka Iesu n Ioane 3:16?

¹⁶ Ni wiki aika imwaira, kaoia aomata aika bati n aron ami kabanea ni konaa nakon te Kauring n tairikin te Kanimabong, Eberi 19, 2019. (Nora te bwaoki ae, “ Ko Kona ni Kaoia?”) Ti bia kaungaira i marenara n arora ni katoatai ni kaakaei bobotaki ni kabane ake e katauraoi ibukira Iehova, i nanon te ririki aei. Ngkai e a uakaan tokin te waaki ae ngkai, ti na boni buokaki n ara bobotaki bwa ti na teimatoa n nanorinano, n ninikoria, ao n tatangira. (1Tet. 5:​8-11) Ti bia kaota ara kakaitau ma nanora ni kabane nakon Iehova ao Natina n aia tangira ae rianako ibukira!​—Wareka Ioane 3:16.