1-2. (a) Tera aron rotakin te tari te aine ae Yoshiko n te rongorongo ane n Itaia 41:10? (b) Antai aika a na kakabwaiaaki n te rongorongo ane e tua Iehova bwa e na kawakinaki anne?

E ROKO te rongorongo ae kananokawaki iroun te tari te aine ae kakaonimaki ae Yoshiko. E kaongoaki iroun ana taokita bwa ai tii tabeua riki te namwakaina ao e na mate. Tera arona iai? E uringa Yoshiko te kibu teuana man te Baibara are e tatangiria ae Itaia 41:10. (Warekia.) Imwina, e tuanga ana taokita ma te bwanaa ae aamarau bwa e aki maaku ibukina bwa e taua baina Iehova. * E buokaki tarira anne n te rongorongo ae kabebetenano n te kibu aei bwa e na onimakina Iehova ma nanona ni kabane. Ti kona ni buokaki n te kibu naba anne bwa ti na teimatoa n rau ngkana ti kaaitarai kataaki aika korakora. Ibukini karekean otara bwa e na kangaa ni buokira te kibu aei, ti na nenera moa bukin anganakin Itaia te rongorongo anne iroun te Atua.

² N te moantai, e tua Iehova nakon Itaia bwa e na korei taeka akanne ni kabebeteia iai I-Iutaia ake a na kairakinako rimwi riki nako Baburon bwa taenikai. Ao e tua naba Iehova bwa e na kawakinaki te rongorongo anne ibukini kakabwaiaaia tiaki tii I-Iutaia ake taenikai ma bon ana aomata ni kabane naba aika maiu ni karokoa ngkai. (Ita. 40:8; IRom 15:4) Ni boong aikai, ti a maeka n “taai aika okoro aika karuanikai,” ao ti kainnanoa riki te kaungaunga ane n Itaia.​—2Tim. 3:1.

3. (a) Taekini berita n Itaia 41:​10, ae te kibu ibukin te ririki 2019. (b) E aera bwa ti kainnanoi berita aikai?

³ N te kaongora aei, ti na kaatuua iangoan ana berita Iehova  aika tenua n Itaia 41:10 aika kona ni buokira ni kakorakorai ara onimaki: (1) E na memena iroura Iehova, (2) boni ngaia Atuara, ao (3) e na boni buokira. Ti kainnanoi taeka ni karaunano * aikai ibukina bwa ti rinanon naba kataaki ni maiura n aron Yoshiko. Ti riai naba ni kekeiaki ribuakoni kangaanga ibukini baika bubuaka n te aonnaba aei. Tabeman i buakora, a nanomwaaka i aani bwainikirinaia irouia tautaeka aika korakora. Ti na rinanoi taeka ni karaunano aika tenua teuana imwin teuana.

4. (a) Tera te moani karaunano ae ti na rinanona? (Nora te kabwarabwara mai nano.) (b) N aaro raa ake e kaota iai ana namakin Iehova ibukira? (c) Tera aron rotakim n ana taeka te Atua?

⁴ E karaui nanora moa Iehova n taeka aikai: “Tai maaku bwa I memena iroum.” * E kaotia Iehova bwa e memena iroura n arona n tabeakinira raoi ao n tangirira. Nora arona ni kaota ana akoi ao korakoran ana tangira ibukira. E taku: “Ko rangi ni kakawaki i matau. Ko karineaki, ao I tangiriko.” (Ita. 43:4) Akea te mwaaka teuana n te iuniweeti ae kona n tuka ana tangira Iehova mairouia naake a beku ibukina ao e aki kona ni kaingingaki ana tangira ae koaua ibukira. (Ita. 54:10) Ti rangi ni kaninikoriaaki n ana tangira ao n reitakira ma ngaia. E na boni kamanoira ni boong aikai n aron naba are e kamanoa Aberam (Aberaam) are raoraona. E taku Iehova nakoina: “Tai maaku Aberam bwa bon otangam ngai.”​—KBwaai 15:1.

5-6. (a) Ti kangaa n ataia bwa e kani buokira Iehova ngkana ti kaaitara ma kataaki? (b) Tera reireiara man ana katoto Yoshiko?

⁵ Ti ataia ae e kani buokira Iehova n ara kangaanga ni maiura, bwa e berita nakoia ana aomata ni kangai: “Ngkana ko rinanon te ran ao N na memena iroum, ao ngkana ko rinanoni karaanga, ao ko na aki iekaki iai. Ngkana ko nakonako rinanon te ai ao ko na aki bue, ao e na aki naba kaurako te ai.” (Ita. 43:2) Tera nanon taeka aikai?

⁶ E aki berita Iehova bwa e na katoki kangaanga ake a na karawawatai maiura, ma e na bon aki kariaia “karaanga” ke kangaanga aika bati bwa ti na bwabwa iai, ao “te ai” ke kataaki aika  korakora bwa a na kammarakira n aki toki. E berita bwa e na memena iroura ao ni buokira ngkana ti “rinanon” kangaanga akanne. Tera ae e na karaoia Iehova? E na buokira ni katoka maakura bwa ti aonga ni kateimatoa etin arora nakoina e ngae naba ngkana ti kaaitara ma te mate. (Ita. 41:13) E nora koauan anne Yoshiko are taekinaki mai moa. E taku natina te aine: “Ti rangi ni mimi n nora te raunnano ae korakora iroun tinara. Ti ataia raoi bwa e anganna Iehova te raunnano. E a bon tataekina naba Iehova ao ana berita nakoia neeti ao aoraki ni karokoa ae e mate.” Tera reireiara man ana katoto Yoshiko? Ngkana ti onimakina ana berita te Atua are ‘e na memena iroura,’ ane ti na ninikoria naba ao ni korakora ni kaaitarai kataaki nako.

7-8. (a) Tera te kauoua ni karaunano ae ti na rinanona, ao tera ae nanonaki iai? (b) E aera Iehova ngke e kangai nakoia I-Iutaia ake a kataenikaiaki: “Tai raraoma”? (c) Baikara taeka n Itaia 46:​3, 4 ake a bae ni buokaki iai ana aomata te Atua bwa a na aki maaku?

⁷ Noria bwa e kangai te kauoua ni karaunano n Itaia: “Tai raraoma bwa bon Atuam ngai.” Tera nanon te taeka ae raraoma n te kibuntaeka aei? N te kibu aei te taeka ae moan rairaki mai iai te taeka ae “raraoma” e irekereke ma te iango ae “te tanrikaaki n taai nako ibukini maakakin te bwai teuana ke te aomata temanna ae kona ni kaikoakiko,” ke “te tarataranako n aron te aomata ae reke n te kangaanga.”

⁸ E aera bwa Iehova e tuangia I-Iutaia ake a na kataenikaiaki i Baburon ni kangai: “Tai raraoma”? Ibukina bwa e ataia ae a na maaku kaain te aba. Tera ae e na karika maakuia? Ngkana e a uakaan tokin aia ka-70 n ririki ni kataenikaiaki I-Iutaia, e na buakanaki Baburon irouia ana taanga ni buaka Miria ma Botia aika korakora. E na kabongana Iehova te taanga ni buaka aei bwa e na kainaomataia ana aomata man tautoronakia i Baburon. (Ita. 41:​2-4) Ngke a ataia kaaini Baburon ao aomata man natannaomata ake tabeua ake a maiu n te tai anne bwa e a kan roko aia kairiribai, a kataia ni kateimatoa ninikoriaia n taekina ae kangai i marenaia: “Ko na korakora.” A karaoi atuaia aika bati riki aika bouannanti ao a kantaningaia bwa a na kamanoaki irouia. (Ita. 41:​5-7) N te tai naba anne ao Iehova e karaui nanoia I-Iutaia ake a kataenikaiaki ngke e kangai: “Bon au toro ngkoe ae Iteraera, [ae ko kaokoro ma akana i rarikim] . . . Tai raraoma bwa bon Atuam ngai.” (Ita. 41:​8-10) Noria bwa e kangai Iehova: “Bon Atuam ngai.” N ana taeka aikai, e a karaui nanoia ana toro aika kakaonimaki ni koaua bwa e bon teimatoa n uringia. E teimatoa n riki bwa Atuaia ao a teimatoa naba n riki bwa ana aomata. E taku: “N na tabetabekingkami . . . ao N na kamaiuingkami.” A boni kakorakoraaki I-Iutaia ake a kataenikaiaki n taeka ni karaunano akanne.​—Wareka Itaia 46:​3, 4.

9-10. E aera bwa ti aki riai ni maaku? Kabwarabwaraa.

⁹ A a rangi n raraoma riki aomata ngkai ibukina bwa a a rikirake ni buakaka riki baika riiriki n te aonnaba. Ti rotaki naba ni kangaanga akanne. Ma ti aki riai ni maaku bwa e tuangira Iehova ni kangai: “Bon [Atuami] ngai.” E aera bwa ti kona n teimatoa n aki maaku man taeka aika kakawaki aikai?

¹⁰ Iangoa aei: A toka n te wanikiba Jim ao Ben n tain te ang ae korakora. Ngke e tabe ni buti ao e a katanoata te bwairati nakoia bwatintia ni kangai: “Teimatoa ni kabaei roomi. Ti na kiba ribuakon te angibuaka i nanon tabeua te tai.” E a rangi n raraoma Jim. Ma e a manga taku te bwairati: “Tai raraoma. Bon ami bwairati ae taetae.” E ioioa atuna Jim ao e taku: “Tera te aeka ni karaunano aei?” Ma e nora Ben bwa e taraa n akea te bwai ae raraoma iai,  ngaia are e a titirakinna: “E aera ngkai ko aki maaku?” E wingare Ben ao e taku: “Ibukina bwa I kinaa raoi te bwairati, bwa bon tamau!” E reitia n taku: “N na tuangko bwaai tabeua ibukin tamau. Ngkana ko kinaa raoi ao n atai ana konabwai, e na rau naba nanom.”

11. Tera reireiara man rongorongoia bwatintia ake uoman?

¹¹ Tera reireiara man te rongorongo aei? N aroni Ben, ti rau ibukina bwa ti kinaa raoi Tamara are i karawa ae Iehova. Ti ataia bwa e na boni buokira n nanomwaaka ngkana ti aitara ma kangaanga aika ai aron te angibuaka ni kabaneani bongin te waaki ae ngkai. (Ita. 35:4) Ti onimakina Iehova ngaia ae ti kona n teimatoa n rau iai, ma kaain te aonnaba a bane n taonakinako n te maaku. (Ita. 30:15) Ti karaoa naba are e karaoia Ben ngkana ti tataekina bukin onimakinan te Atua iroura nakoia aomata nako. Ao ane a na kakoauaa naba bwa e na boni boutokaiia Iehova n aia kangaanga.

12. (a) Tera te katenua ni karaunano ae ti na rinanona? (b) Tera te koaua ae ti kauringaki iai n te taeka ae ‘bain’ Iehova?

¹² Iangoa te katenua ni karaunano n Itaia ae kangai: “N na kakorakorako, eng, N na buokiko.” E a kamani kabwarabwaraa Itaia aron Iehova ni kakorakoraia ana aomata ngke e kangai: “E na roko ma te mwaaka . . . Iehova, ao e na tautaeka baina ibukina.” (Ita. 40:10) N angiin te tai, e kabonganaaki n te Baibara te taeka ae te ‘bai’ ni kaikonakaki iai te mwaaka. Ngaia are taeka aika “e na tautaeka baina,” ti kauringaki iai bwa Iehova bon te Uea ae moan te mwaaka. E kamanena korakorana ae akea kabotauana ni boutokaiia ao ni kamanoia iai ana toro n taai ake rimoa, ao e teimatoa naba ni kakorakoraia ao ni kamanoia naake a onimakinna ni boong aikai.​—TuaKau 1:​30, 31; Ita. 43:10.

13. (a) N ningai te tai ae e na kakororaoa iai ana berita Iehova are e na kakorakoraira? (b) Tera te berita ae karibui angira ao ara onimaki?

 ¹³ Ngkana ti bwainikirinaki irouia taani kairiribai, e na boni kakoroa bukin ana berita aei Iehova: “N na kakorakorako.” Ni boong aikai ao taani kairiribai nakoira man aaba aika bati, a kataia ni katoka ara uarongorongo ke ara botaki. Ma e ngae n anne, ti aki rangi n raraoma ibukin aaro n totoko aikai. E a tia Iehova n anganira te berita ae karibui angira ao ara onimaki. E berita nakoira ni kangai: “Akea te bwai ni buaka ae karaoaki n ekikonako ae e na tokanikai.” (Ita. 54:17) Ti kauringaki n taeka akanne koaua aika tenua aika kakawaki.

14. E aera bwa ti aki mimi ngkai a buakanira taani kairiribai nakoira?

¹⁴ Te moan, ngkai taan rimwini Kristo ngaira, ti ataia bwa ti na riribaaki. (Mat. 10:22) E a kaman taekinna Iesu bwa a na bwainikirinaki n te aro ae korakora taan rimwina ni kabaneani boong. (Mat. 24:9; Ioa. 15:20) Te kauoua, ti a kamani kauringaki n ana taetae ni burabeti Itaia bwa a na karaoa ae bati riki taani kairiribai nakoira nakon tii te riribai. A na kamanenai bwaai ni buaka aika kakaokoro ni kaaitaraira iai. A irekereke bwaai ni buaka akanne ma mwamwanaakira ae aki otara, uaraoakira, ao bwainikirinara ae korakora. (Mat. 5:11) E na aki tukiia taani kairiribai nakoira Iehova mani kamanenaani bwaai ni buaka aikai. (IEbe. 6:12; TeKao. 12:17) Ma ti riai n aki maaku. Bukin tera?

15-16. (a) Tera te katenua ni bwai ae kakawaki ae ti riai n ururingnga, ao e kangaa ni boutokaaki aei n Itaia 25:​4, 5? (b) E kangaa Itaia 41:​11, 12 ni kabwarabwaraa te bwai ae e na riki nakoia naake a buakanira?

¹⁵ Iangoa te katenua ni bwai ae kakawaki ae ti riai n ururingnga. E taekinna Iehova bwa “akea te bwai ni buaka” ae kamanenaaki n ekiranako “ae e na tokanikai.” N aron te oo ae e kamanoira mani korakoran ana urubwai te angibuaka, ao ai arona naba bwa e kamanoira Iehova man “unia taani karawawata.” (Wareka  Itaia 25:​4, 5.) A na bon aki tokanikai taani kairiribai nakoira ni karawawataira n aki toki.​—Ita. 65:17.

¹⁶ E kakorakoraira naba Iehova bwa ti na onimakinna rinanoni kabwarabwaraan raoi te bwai ae e na riki nakoia te koraki ake a “urarake unia” n ekiranako. (Wareka Itaia 41:​11, 12.) N aki ongea korakoran iowawaaia ke buakanakira irouia taani kairiribai ma bon titeboo te bwai ae e na riki imwina: A na bane ni ‘kamaunaaki ao a na mate’ taani kairiribai nakoia ana aomata te Atua.

17-18. (a) E na kangaa ni kakorakoraaki onimakinan te Atua iroura ni warekan te Baibara? Taekina te katoto teuana. (b) Ti na kangaa ni buokaki n iaiangoan te kibu ibukin te ririki 2019 ae rineaki?

¹⁷ E na korakora riki onimakinan Iehova iroura ngkana ti kinaa raoi. Ao te anga ae tii teuana ibukini kinaakin raoi te Atua boni mani warekan te Baibara ao kananoan ara iango iai. Iai n te Baibara rongorongo aika kona n onimakinaki ibukin aron Iehova ni kamanoia ana aomata rimoa. Ti kakoauaa raoi man rongorongo akanne bwa e na bon tabeakinira n taai aikai.

¹⁸ Iangoa te katoto n te kaikonaki ae tamaroa are e kamanena Itaia ni kabwarabwaraa iai aron Iehova ni kamanoira. E kabotaua Iehova ma te tia kawakintiibu ao ana toro te Atua bwa tiibutetei. E taku Itaia ni kaineti ma Iehova: “E na ikotiia ni kabane tiibutetei ni baina, ao e na uouotiia i bwanibwanna.” (Ita. 40:11) Ngkana e bwabwakoira Iehova ni baina ae korakora, ti namakinna iai bwa ti kamanoaki ao ti rau. Ibukini buokara bwa ti na teimatoa n rau n aki ongei kangaanga aika ti kaaitarai, e a tia te toro ae kakaonimaki ma ni wanawana n rinea Itaia 41:10 bwa te kibu ibukin te ririki 2019 ae kangai: “Tai raraoma bwa bon Atuam ngai.” Kananoa am iango i aon taeka ni karaunano akanne. Ane a na kakorakorako ngkana ko aitara ma kangaanga akana imwaim.