1. N aron te Uea ae Tawita, tera ae a kona tabeman i buakora n titiraki iai?

TI BANE n tangira te maiu ae rau ao ni kakukurei. Akea ae e tangira te tabeaianga. Ma n taai tabetai, ti bae ni kabokorakora ma baika ti tabeaianga iai. Ni koauana, a a tia tabeman ana toro Iehova ni bae n tabeka te titiraki are e tabekia naba te Uea ae Tawita nakon Iehova ae kangai: “Maanra ngai n tabeaianga, n rawawatan nanou ni katoabong?”​—TaiAre. 13:2.

2. Tera ae ti na maroroakinna n te kaongora aei?

² E ngae ngke a aki kona n toki tabeaiangara, ma ti kona ni karaoa ae bati riki ibukini buokan ara namakin aikai. N te kaongora aei, ti na nori moa bwaai tabeua ake a kona ni karika iai tabeaiangara. Imwina, ti na maroroakin aanga aika manena aika onoua ake ti kona iai n teimatoa n rau ngkana ti aitara ma kangaanga.

3. Baikara kangaanga ake ti kaaitarai, ao ti na kangaa n rabakau ni kaaitarai?

³ Ti kona n ae ti rabakau ke ni babanga arora ni kaaitarai bwaai tabeua ake a kona ni karika tabeaiangara. N te katoto, ti aki kona ni katoka keerakeni boon te amwarake, te kunnikai, ao te auti ni katoa ririki, ke arora ae ti na kona iai ni kaaitarai aroaroia raora ni mwakuri ke raora n reirei, ake a okioki ni kataia ni karirira bwa ti na babakanikawai ke ni karaoa te wene ni bure. Ao ti aki kona ni katoki mwakuri n iowawa ake a riki n ara kaawa. Ti aitara ma kangaanga aikai ibukina bwa ti  maeka n te aonnaba ae angiina kaaina, a aki kabotoi aia iango ni booto n reirei man te Baibara. E ataia Tatan, ae atuan te aonnaba aei, bwa iai tabeman aomata aika kariaia “raraomaeakinan te maiu n te waaki ae ngkai i aon te aba” bwa e na katoka aia beku ibukin Iehova. (Mat. 13:22; 1Ioa. 5:19) Maroaka ae te aonnaba aei, e a rangi ni bati iai kangaanga aika e karika te tabeaianga!

4. Tera arora ngkana ti kaatuua riki iangoan ara kangaanga?

⁴ Ti kona n rangi n tabeaianga ngkana ti kaatuua riki iangoan ara kangaanga. N te katoto, ti kona n tabeaianga bwa e aki tau ara karekemwane ibukini baike ti kainnanoi, ke ti kona n aoraki ao n aki mwakuri ke ni boni bua ara mwakuri. Ti kona naba n raraoma bwa ngkana ti urua ana tua te Atua, ti na aranaki iai bwa ti aki kakaonimaki. E a kaan te tai are e na kairiia Tatan naake e tautaekania bwa a na kaaitaraia ana aomata te Atua, ngaia are ti kona n raraoma bwa e na tera arora iai. Ti na bae n iango ni kangai, ‘E bure ngkana I tabeaianga ibukini baikai?’

5. Tera ae e nanonna Iesu ngke e kangai: ‘Katoka te raraoma’?

⁵ Ti ataia bwa Iesu e tuangia taan rimwina ni kangai: ‘Katoka te raraoma.’ (Mat. 6:25) E nanonna bwa ti na aki raraoma ibukin te bwai teuana? E aki! E ngae n anne, iai tabeman ana toro Iehova rimoa aika kakaonimaki ni koaua ake a kabokorakora ma te raraoma, ma a aki kabuaa akoaia iroun Iehova. * (1Uea 19:4; TaiAre. 6:3) E boni karaui nanora Iesu. E aki tangiria bwa ti na rangi n raraoma ibukini karekeani baike ti kainnanoi ni maiura, are ti a kona iai n iangoia bwa e a aki kakawaki ara beku ibukin te Atua. Tera ngkanne aanga ake ti kona ni karaoi ngkana ti raraoma?​—Nora te bwaoki ae “ Aroni Karaoana.”

6. Ni kaineti ma I-Biribi 4:6, 7, tera ae kona ni karekea te rau ngkana ti tabeaianga?

⁶ (1) Katoatai n tataro. A kona Kristian ake iai aia kangaanga ni karekea kabebeteaia ngkana a tataroa ana ibuobuoki Iehova. (1Bet. 5:7) Ngkana e a kaekaaki am tataro, ko a kona ni karekea “te rau are mairoun te Atua ae riaon aia iango aomata.” (Wareka I-Biribi 4:6, 7.) E anganira raun tabeaiangan ara iango Iehova rinanon taamneina ae raoiroi ae mwaaka.​—IKar. 5:22.

7. Tera ae ti riai n ururingnga ngkana ti tataro nakon te Atua?

⁷ Ngkana ko tataro nakon Iehova, bunra nanom nakoina. Kamataataa raoi. Taekinna bwa tera am kangaanga, ao kabwarabwaraa nakoina am namakin iai. Ngkana iai te anga ae e kona ni kanakoraoaki iai, butiia te wanawana are mairouna bwa tera ae ko na karaoia ao te korakora ibukini karaoana. Ngkana e a riaon am konaa am kangaanga anne, butiia Iehova buokam bwa ko na aki rangi ni kaatuua raraomam iai. Ngkana ko kamataataa raoi am kangaanga n am tataro, ko na kona n nora aron Iehova ni kaekaa n taina ae riai. Ngkana ko a tia n tataro ma e aki kaekaaki naba ngkekei, tai kabwaraa nanom. E tangiria Iehova bwa ko na aki tii kamataataa raoi am kangaanga, ma ko na kateimatoa naba te tataro ni bubutii.​—Ruka 11:8-10.

8. Tera ae ti riai naba n taekin n ara tataro?

⁸ Ngkana ko taekin tabeaiangam nakon Iehova rinanon te tataro, tai mwaninga n taekin taeka ni kakaitau. E rangi n raoiroi bwa ti na ururingi kakabwaiaara, e ngae naba ngkana a  bati ara kangaanga. Ngkana ko aki kona n taekin taeka ake a kaotii raoi am namakin, uringnga are Iehova e kaekai tataro aika uarereke naba, n aron ‘Taiaoka buokai!’​—2Rong. 18:31; IRom 8:26.

9. E na kangaa n reke te rau ni koaua?

⁹ (2) Onimakina wanawanan Iehova, ao tiaki wanawanam. Rimoa ngkoa n te kawanua n tienture B.C.E., a maaka buakanakia I-Iutaia irouia kaain Aturia. Ibukin nanoia n rawa n tautaekanaki irouia kaain Aturia, a a karekea buokaia mairouia kaain Aikubita ake taiani beekan. (Ita. 30:1, 2) E anga te kauring Iehova nakoia bwa aroia n onimakinia kaain Aikubita e na bon uotiia nakon te kabuanibwai. (Ita. 30:7, 12, 13) Rinanon te burabeti ae Itaia, e a tuangia aomata Iehova aroia ae a na kona iai ni karekea te rau ni koaua. E taku: “E na reke korakorami ngkana kam teimatoa n rau ao n [onimakina]” Iehova.​—Ita. 30:15b.

10. N ningai taai ake ti kona ni kaota iai onimakinan Iehova?

¹⁰ N ningai ae ti kona iai ni kaota onimakinan Iehova? Iangoi katoto tabeua aikai. Tao e a reke am mwakuri ni kareketianti ae bubura iai te boo, are e na kainnanoa anaakin am tai ae bati ao e nang kaangabuakaa am babaire n am beku ibukin Iehova. Ke tao iai temanna n am tabo ni mwakuri ae iai nanona iroum, ma te aomata anne, e tuai n riki bwa ana toro te Atua ae e a tia ni bwabetitoaki. Ke aongkoa iai kaain am utu temanna ae kairoroko ni kangai: “Rineia bwa ngai ke Atuam.” E na bae ni kangaanga karaoan am motinnano ibukini katoto aikai, ma e kona Iehova n anganiko te kaetieti ae ko kainnanoia ibukin te kangaanga teuana ma teuana. (Mat. 6:33; 10:37; 1Kor. 7:39) Ma e kangai ngkanne te titiraki, Ko na onimakina te kaetieti anne ao ni maiuakinna?

11. Te rongorongo raa man te Baibara ae ti kona n ukeuke n reirei iai bwa ti aonga n teimatoa n rau ngkana ti rinanon te kakaaitara?

¹¹ (3) Karekea reireiam mani katoto aika raraoi ao aika bubuaka. A bati rongorongo n te Baibara ake a katuruturua kakawakin teimatoan te rau ao onimakinan Iehova. Ngkana ko rinanon rongorongo aikai, noria bwa tera ae a buokaki iai ana toro te Atua n teimatoa n rau, n aki ongea te kakaaitara ae korakora. N te katoto, ngke e motikaki te tua n aia boowi ae rietata I-Iutaia bwa a na katoka te uarongorongo abotoro, a bon aki maaku abotoro. N oneani mwin anne, a ninikoria n taekina aei: “E riai riki bwa ti na ongeaba iroun te Atua bwa te tia tautaeka, nakon ae ti na ongeaba irouia aomata.” (Mwa. 5:29) Ngke a a tia naba n oreaki abotoro, a bon aki roko n te maaku. Bukin tera? Ibukina bwa a ataia ae e mena Iehova n aia itera. Ao e kukurei Iehova irouia. Ngaia are, a bon teimatoa n tataekina te rongorongo ae raoiroi. (Mwa. 5:40-42) N aron naba anne, ngke e a kuri ni mate te tia rimwin Kristo ae Tetebano, e bon teimatoa n rau ao e noraki ubuna bwa “kaanga ai aron ubun te anera.” (Mwa. 6:12-15) Bukin tera? Ibukina bwa e ataia ae e a reke akoana iroun Iehova.

12. Ni kaineti ma 1 Betero 3:14 ao 4:14, e aera bwa ti na kukurei ngkana ti bwainikirinaki?

¹² A karekea abotoro te bwai ni kakoaua ae mataata bwa e boni memena Iehova irouia. E a tia n angania te mwaaka bwa a na karaoi kakai. (Mwa. 5:12-16; 6:8) Ma e a aki kona n riki aei nakoira ni boong aikai. Ma rinanon ana Taeka, e a karaui nanora Iehova bwa ngkana ti kammarakaki ibukin te raoiroi, e boni kukurei iroura ao e memena taamneina i aora. (Wareka 1 Betero 3:14; 4:14.) Ngaia are n oneani mwin are ti na tabeaianga bwa tera arora ngkana ti bwainikirinaki n te tai ae e na roko, ti riai ni kaatuua iangoan te bwai ae ti  kona ni karaoia ngkai, ibukini karikirakean onimakinan Iehova are e na boni boutokaira ao ni kamaiuira. N aron are a karaoia taan rimwin Kristo rimoa, ti riai n onimakina ana berita Iesu aei: “N na anganingkami ami taeka ma te wanawana, are a na aki kona n tukia taani kaaitaraingkami ke ni kakewea.” E berita Iesu nakoira ni kangai: “Bwa ane kam na kamaiuaki ibukin nanomwaakami.” (Ruka 21:12-19) Ao tai mwaninga are e bon uringi raoi Iehova aroia ni kabane ana toro ake a teimatoa ni kakaonimaki n uaa mateia. N ataakin anne, ao e na boni kautiia.

13. Ti na kangaa ni kona ni kakabwaiaaki man iaiangoan rongorongoia naake a aki teimatoa n rau ao n onimakina Iehova?

¹³ Ti kona naba ni karekea reireiara mairouia naake a aki teimatoa n rau ao n onimakina Iehova. Ti na buokaki man reiakinan aia katoto aika aki raoiroi bwa ti na aki karaoi kairua ake a a tia ni karaoi. N te katoto, n ana tai n tautaeka te Uea ae Ata ae kaain Iuta ao e bon onimakina Iehova ngke e a kaitaraaki n te taanga ni buaka ae korakora, ao e kakabwaiaa Iehova n anganna te tokanikai. (2Rong. 14:9-12) Ma imwina riki ngke a a manga kaitaraaki n ana taanga ni buaka te Uea ae Baata mai Iteraera ae karako mwaitiia, e a kabooia Ata kaain Aturia ibukini buokana n aia taanga ni buaka, n oneani mwin are e na karekea buokana mairoun Iehova, n aron are e karaoia rimoa. (2Rong. 16:1-3) Ao ngke e a kara ao n rotakibuaka n aorakini waena, e bon aki rairaki nakon Iehova ibukini buokana.​—2Rong. 16:12.

14. Tera reireiara ni baika a kairua ake e karaoi Ata?

¹⁴ N te moantai ao e rairaki Ata nakon Iehova ngkana e kaaitara ma kangaanga. Ma imwina riki, e a aki okira Atuana ibukini buokana, ma e boni kani kanakoraoia i bon irouna. Ana iango Ata are e na karekea buokana mairouia kaain Aturia ibukini kamanoaia tibun Iteraera, e bon taara n nakoraoi. Ma e aki teimatoa te rau are a karekea tibun Iteraera. E tuangaki aei iroun Iehova rinanon te burabeti temanna: “Ibukina bwa ko onimakina uean Turia ao ko aki onimakina Iehova ae Atuam, ao e a birinako mai nanoni baim ana taanga ni buaka uean Turia.” (2Rong. 16:7) Ti riai n taratara raoi bwa ti na aki iangoia ae ti kona ni kanakoraoi bwaai ni kabane i bon iroura, n te aro are ti a aki nakon Iehova ibukin te kaetieti rinanon ana Taeka. E ngae naba ngkana ti aitara ma te kangaanga ae karina, ma ti riai n teimatoa n rau ao n onimakina raoi Iehova, ao e na boni buokira ni karaoan ara motinnano ae eti.

15. Tera ae ti kona ni karaoia ngkana ti wareware n te Baibara?

¹⁵ (4) Kamatenikunai kiibu man te Baibara. Ngkana ko boo ma kiibu n te Baibara aika kaota kakawakin teimatoan te rau ao onimakinan Iehova, kataia ni kamatenikunai. E kona n ibuobuoki ngkana ko wareki ni kabaibati ke ni korei ao n okiokirii ni kananoa am iango iai. E tuangaki Iotua bwa e na wareka bokin te Tua ni katoabong ni karauraua bwanaana bwa e aonga ni bwaina te wanawana. E buokaki naba ni kauring aikai bwa e na aki katokanikaia te maaku ni mwiokoana are e anganaki. (Iot. 1:8, 9) A bati kiibu n te Baibara ake a kona n anganiko raun am iango ao nanom, n taai ake ko na namakina iai te tabeaianga ke te maaku.​—TaiAre. 27:1-3; TaeRab. 3:25, 26.

16. E kangaa Iehova ni kabongana te ekaretia ibukini buokara bwa ti na teimatoa n rau ao n onimakinna?

¹⁶ (5) Ikoikotaki ma ana aomata te Atua. E kabonganaia Iehova taari n te onimaki ibukini buokara bwa ti na teimatoa n rau ao n onimakinna. N ara tai ni bobotaki, ti kakabwaiaaki n reirei ake a taekinaki mai moa, aia  kaeka kaain te ekaretia, ao ai maroro ni kaungaunga mairouia taari. (Ebera 10:24, 25) Ti kona naba n rangi ni kaungaaki ngkana ti taekin ara namakin nakoia raoraora ni kaan n te ekaretia. “Te taeka ae raoiroi” mairoun te rao temanna e kona ni buokira bwa ti na aki kabatiaa te raraoma.​—TaeRab. 12:25.

17. Ni kaineti ma Ebera 6:19, e na kaanga ara kantaninga ibukin te Tautaeka n Uea ni kaungaira bwa ti na tei n nene, n aki ongei kangaanga?

¹⁷ (6) Kateimatoa am kantaninga ae nene. Ara kantaninga ibukin te Tautaeka n Uea e riki bwa “kaanga ai aron atinroni maiura,” are ti na tei n nene iai n aki ongei kangaanga ake ti kaaitarai ke tabeaiangan ara iango. (Wareka Ebera 6:19.) Kananoa am iango n ana berita Iehova ibukin te tai ae e na roko, are a nang a akea iai iango aika aki raraoi. (Ita. 65:17) Kataamneia bwa aongkoa ko a mena n te aonnaba ae boou ae rau, are a akea iai te rawawata. (Mika 4:4) E na kakorakoraaki naba am kantaninga ngkana ko tataekinna nakoia tabemwaang. Kabanea am konaa n uarongorongo ao ni karaoa te mwakuri ae karekeaia taan rimwini Kristo. Ngkana ko karaoi baikai, ko a kona iai “n aki nanokokoraki teutana n te kantaninga, ni karokoa te toki.”​—Ebera 6:11.

18. Baikara kangaanga ake ti na kantaningai n te tai ae e na roko, ao tera arora iai?

¹⁸ Ngkai e a kaan roko n tokina te waaki aei, ti na bon rinanon kangaanga aika bati riki ake a na kona ni karika tabeaiangan ara iango. E kona ara kibu ibukin te ririki 2021 ni buokira bwa ti na kaaitarai kangaanga akanne ao n teimatoa n rau, tiaki n oini korakorara ma boni man onimakinan Iehova. I nanon te ririki aei, ao ti bia kaotia n ara mwakuri bwa ti onimakina ana berita Iehova aei: “E na reke korakorami ngkana kam teimatoa n rau ao n onimaki.”​—Ita. 30:15.