1-2. (a) N ningai ae ti ururinga riki iai temanna ae tangiraki iroura ae e a tia ni mate? (b)Tera are e moani karaoia Iesu n te tairiki are imwaini matena?

 N AKI ongeia bwa ai maanra n tia ni mate naake ti tangiriia ma ti teimatoa n ururingia. Ti ururingia riki ngkana e a roko kauringaan te bong are a mate iai.

² Ni katoa ririki, ti raonia aomata aika mirion ma mirion ni katobibia te aonnaba, ibukini kauringaani maten temanna ae ti rangi n tangiria ae Iesu Kristo. (1Bet. 1:8) Ti ikotaki bwa ti na uringa teuare anga maiuna bwa te kaboomwi ibukini kamaiuara man te bure ao te mate. (Mat. 20:28) E bon tangiriia taan rimwina Iesu bwa a na ururinga matena. N te tairiki are imwaini matena, e a karaoa te katairiki ae okoro ao n tua aei: “Kakaraoa aei bwa kanuringau.”​—Ruka 22:19.

3. Tera ae e na maroroakinaki n te kaongora aei?

³ Iai i buakoia naake a kaea Kauringaani Mateni Kristo aika kantaningaa te nako karawa ao e karako mwaitiia. Ma a kaea naba aomata aika mirion ma mirion aika kantaningaa te maiu i aon te aba. N te kaongora aei, ti na noria bwa e aera ngkai a ingainga koraki aika uoua aikai ni kaea te Kauring ni katoa ririki. Ti na nora naba arora ni kakabwaiaaki ngkana ti kaea. Ma ti na maroroakinna moa bwa e aera ngkai a kaea te Kauring naake a kabiraki.

4. E aera ngkai a katoong banna n te Kauring naake a kabiraki?

⁴ Ni katoa ririki, ao a kaea te Kauring taani kabiraki bwa taani katoong banna. E aera ngkai a tau ni katoonga te bwerena ma te wain? Ibukini kaekaan anne, nora te baere riki n ana kabanea n tairiki Iesu i aon te aba. Imwini  kanakin amwaraken te Toa ae te Riao, e a moani karaoa te botaki Iesu ae e a ataaki bwa Ana Katairiki te Uea. E kabuta te bwerena ma te wain nakoia ana abotoro aika kakaonimaki ake 11, ao n tuangia bwa a na amwarake ao ni moi. E taekin nakoia berita aika uoua ke taiani boraraoi, ae taekan te berita ae boou ao te berita ibukin te Tautaeka n Uea. * (Ruka 22:​19, 20, 28-30) Berita aikai a kauka te kawai nakoia abotoro ao tabeman riki aika karako mwaitiia bwa a na riki bwa ueea ao ibonga i karawa. (TeKao. 5:10; 14:1) Bon tii nikiraia taani kabiraki * aika kaain te berita aika uoua aikai, ake a kona ni katoong banna n te Kauring.

5. Tera ae a ataia taani kabiraki ibukin te kantaninga are a karekea?

⁵ Aei riki bukina ngkai a ingainga taani kabiraki ni kaea te Kauring: E a reke iai aia tai n iaiangoa aia kantaninga. E a tia Iehova n angania te kantaninga ae rangi n tamaroa ae te aki mamate ao te aki kona ni mka i karawa, te beku i rarikin Iesu Kristo ae mimitong n ikotaki ma nikiraia naake 144,000, ao ae kakawaki riki a na mena i matan Iehova ae te Atua! (1Kor. 15:​51-53; 1Ioa. 3:2) A bon ataia naake a kabiraki ae a kaoaki bwa a na karekei kakabwaia akanne i karawa. Ma a riai n teimatoa ni kakaonimaki ni karokoa mateia bwa a aonga ni kariaiakaki bwa a na nako karawa. (2Tim. 4:​7, 8) E boni karekea kimwareireia ae bati iaiangoan aia kantaninga anne. (Tit. 2:13) Ma tera aroia “tiibu tabemwaang”? (Ioa. 10:16) Bukin tera ngkai a kaea te Kauring?

6. E aera ngkai a kaea te Kauring tiibu tabemwaang ni katoa ririki?

⁶ A aki katoong banna tiibu tabemwaang, ma a ira te Kauring bwa taani mataku. N 1938 ao a a tibwa kaoaki naake a kantaninga te maiu i aon te aba bwa a na ira te Kauring. E taekinaki aei n Te Taua-n-Tantani n te taetae n Ingiriti ae bwaini Maati 1, 1938: “A bon riai [tiibu tabemwaang] n ira te botaki anne ao ni matakuakina te bwai ae karaoaki. . . . Bon te tai naba ae kakukurei irouia.” N aroia iruwa aika kaoaki nakon te mare bwa a na kakoauaa te bong anne, ao ai aroia naba tiibu tabemwaang aika kukurei n roko ni mataku n te Kauring.

7. E aera ngkai a ingainga tiibu tabemwaang nakon te kabwarabwara n te Kauring?

⁷ A iaiangoa naba aia kantaninga tiibu tabemwaang. A ingainga nakon te kabwarabwara n te Kauring, bwa e kaatuuaki iai taekan te bwai ae e na karaoia Kristo ma raona n tautaeka ake 144,000 nakoia aomata aika kakaonimaki, i aan te Tautaeka ae Maanna Tenga te Ririki. I aan ana kairiri aia Uea ae Iesu Kristo, a na ibuobuoki taan tautaeka akanne ni bita te aonnaba nakon te bwaretaiti, ao ni kairiia aomata aika ongeaba nakon te kororaoi. A na boni kukurei taani mataku n te Kauring aika mirion ma mirion mwaitiia, ngkana a kataamneia kakororaoani bukin taetae ni burabeti man  te Baibara, n aron are n Itaia 35:​5, 6; 65:​21-23; ao n Te Kaotioti 21:​3, 4. Ni kataamneian ae a na mena n te aonnaba ae boou ma naake a tangiraki irouia, e a kakorakoraaki riki aia kantaninga ao nanoia bwa a na teimatoa ni beku ibukin Iehova.​—Mat. 24:13; IKar. 6:9.

8. Tera bukina riki teuana ngkai a kaea te Kauring tiibu tabemwaang?

⁸ Iangoa riki bukina teuana ngkai a kaea te Kauring tiibu tabemwaang. A kani kaota aia tangira ao aia boutoka nakoia taani kabiraki. E a kaman taekinaki n Ana Taeka te Atua ae a na karekea te reitaki ae kaan taani kabiraki ma naake a kantaningaa te maiu i aon te aba. N te aro raa? Ti na maroroakini katoto tabeua.

9. Ni kaineti ma te taetae ni burabeti n Tekaria 8:​23, tera aia namakin tiibu tabemwaang ibukia taani kabiraki?

⁹ Wareka Tekaria 8:23. E kaotaki n te taetae ni burabeti aei aia namakin tiibu tabemwaang ibukia tariia ao mwaaneia ake a kabiraki. Te taeka ae “temanna te I-Iutaia” ao “iroumi,” e kaineti nakoia nikiraia taani kabiraki. (IRom 2:​28, 29) “Aomata aika tengaun man aia taetae ni kabane natannaomata” a tei ibukia tiibu tabemwaang. A “taua” ke a kakaonimaki ni koaua n raonia naake a kabiraki n te taromauri ae itiaki. Ngaia are n te tairiki are e boo iai te Kauring, a kaota reitakia ae kaan tiibu tabemwaang ma naake a kabiraki, n aroia n raonia n te tai anne.

10. Tera are e karaoia Iehova ibukini kakororaoan te taetae ni burabeti are n Etekiera 37:​15-19, 24, 25?

¹⁰ Wareka Etekiera 37:​15-19, 24, 25. E kakoroa bukin te taetae ni burabeti anne Iehova, ngke e katiteuanaia naake a kabiraki ma tiibu tabemwaang n te bwai ni kabaebae ae aki kona n uruaki. E taekinaki n te taetae ni burabeti anne kaai aika uaai. Naake a kantaningaa te maiu i karawa, ai aron te kai “ibukin Iuta” (ae te baronga ae a rineaki mai iai uean Iteraera), ao naake a kantaningaa te maiu i aon te aba, ai aron “ana kai Eberaim.” * E na botiia natannaomata aika uoua aikai Iehova bwa a na riki bwa “te kai ae tii teaina.” E nanonaki n aei bwa a na katiteuanaaki ni beku i aan aia Uea ae tii temanna, ae Kristo Iesu. Ni katoa ririki, a ikotaki ni kaea te Kauring naake a kabiraki ma tiibu tabemwaang. A aki kaokoroia, ma a riki bwa tii “tenanaina” i aan “temanna te tia kawakintiibu.”​—Ioa. 10:16.

11. A kangaa “tiibu” ake a taekinaki ni Mataio 25:​31-36, 40, ni kaota boutokaaia tarini Kristo?

¹¹ Wareka Mataio 25:​31-36, 40. “Tiibu” n te kaikonaki aei, a tei ibukia aomata aika raoiroi n tain te toki ake a kantaningaa te maiu i aon te aba. Bon taekaia tiibu tabemwaang. A kakaonimaki ni boutokaiia nikiraia tarini Kristo aika kabiraki, n aroia ni buokiia ni kakororaoa tabeia ae bubura ae te mwakuri n uarongorongo ao ni karekeia taan rimwini Kristo ni kabutaa te aonnaba.​—Mat. 24:14; 28:​19, 20.

12-13. Baikara aanga riki tabeua ake a kaota iai boutokaaia tarini Kristo tiibu tabemwaang?

¹² Ni wiki ake imwain te Kauring ni katoa ririki, a kaota aia boutoka tiibu tabemwaang nakoia tarini Kristo, n aroia ni buoka karaoan te mwakuri ae okoro ae katobibia te aonnaba, ae kaoaia naake a  kan ongora nakon te Kauring. (Nora te bwaoki ae “ Ko a Kamani Karaoa Am Babaire Imwain te Kauring?”) A ibuobuoki naba ni karaoi babaire aika kainnanoaki ibukin te Kauring bwa a aonga ni kona ni karaoaki n ekaretia nako ni katobibia te aonnaba, e ngae ngke akea taani katoong banna n angiin taian ekaretia. A kukurei tiibu tabemwaang ni boutokaiia tarini Kristo n aanga akanne. A ataia tiibu aikai ae e iangoi aia mwakuri Iesu ake a karaoi nakoia tarina, bwa mwakuri aika karaoaki naba nakoina.​—Mat. 25:​37-40.

¹³ Baikara bukina riki tabeua ngkai ti kaea te Kauring n aki ongea ara kantaninga?

14. A kangaa Iehova ao Iesu ni kaota aia tangira ae korakora ibukira?

¹⁴ Ti rangi ni kakaitau n te tangira are a kaotia Iehova ao Iesu nakoira. E kaota ana tangira Iehova ibukira n aanga aika bati, ma ae rianako riki, e kanakoa Natina ae rangi n tangiria bwa e na karawawataaki ao ni mate ibukira. (Ioa. 3:16) Ao ti ataia ae e rangi n tangirira naba Iesu ngke e kukurei n anga maiuna ibukira. (Ioa. 15:13) Ti aki kona ni kabooa mwin aia tangira Iehova ao Iesu are a a tia ni kaotia nakoira. Ma ti kona ni kaota ara kakaitau n aroaroni maiura ni katoabong. (IKoro. 3:15) Ti kaea naba te Kauring bwa ti aonga n uringa aia tangira ao ni kaota naba ara tangira ibukia.

15. E aera ngkai e rangi ni kakawaki te bwaintangira ae te kaboomwi irouia taani kabiraki ao tiibu tabemwaang?

¹⁵ E rangi ni kakawaki iroura te bwaintangira ae te kaboomwi. (Mat. 20:28) E rangi ni kakawaki te kaboomwi irouia taani kabiraki bwa e karekea aia kantaninga ae tamaroa. Ibukina bwa a onimakina ana karea Kristo, e a atongia Iehova bwa a raoiroi ao n natinia. (IRom 5:1; 8:​15-17, 23) A kakaitau naba tiibu tabemwaang n te kaboomwi. Ibukina bwa a onimakina raraani Kristo are kawawaeaki, a a itiaki i matan te Atua, a kona ni beku irouna, ao a kantaningaa ae a na otinako “mai buakon te rawawata ae korakora.” (TeKao. 7:​13-15) Te anga teuana ae a kaota iai aia kakaitau ibukin te kaboomwi taani kabiraki ao tiibu tabemwaang, boni mani kaean te Kauring ni katoa ririki.

16. Tera riki bukina ngkai ti kaea te Kauring?

¹⁶ Bukina riki teuana ngkai ti kaea te kauring, bwa ti kan ongeaba iroun Iesu. N aki ongeia bwa tera ara kantaninga nakon taai aika imwaira, ma ti kan ongeaba n ana tua Iesu are anga n te tairiki are e moani karaoa iai te Kauring, ae kangai: “Kakaraoa aei bwa kanuringau.”​—1Kor. 11:​23, 24.

17. Ti kangaa ni buokaki n te Kauring bwa ti na kaaniaki riki ma Iehova?

¹⁷ Ti a kaaniaki riki ma Iehova. (Iak. 4:8) N aron ae ti a tia n noria, e reke ara tai n tain te Kauring n iaiangoa te kantaninga are e anganira Iehova, ao ni kananoa ara iango n ana tangira ae bati are e kaotia nakoira. (Ier. 29:11; 1Ioa. 4:​8-10) Ngkana ti iaiangoa ara kantaninga ae e na boni koro bukina n taai aika imwaira, ao ana tangira te Atua ibukira ae akea kabwakana, e na korakora riki tangiran Iehova iroura ao ni kaan riki ara iraorao ma ngaia.​—IRom 8:​38, 39.

18. Tera ae ti kairaki bwa ti na karaoia ni kananoan ara iango n ana katoto Iesu?

 ¹⁸ Ti a kairaki bwa ti na kakairi n ana katoto Iesu. (1Bet. 2:21) Ni boong ake imwain te Kauring, ti kaatuua ara iango i aon rongorongon Iesu n te Baibara n ana kabanea ni wiki i aon te aba, matena, ao mangautina. Ao n tairikin te Kauring, ti a kauringaki n te kabwarabwara taekan ana tangira Iesu ibukira. (IEbe. 5:2; 1Ioa. 3:16) Ngkana ti wareka rongorongon Iesu n anga boni ngaia ao ni kananoa ara iango iai, ti a kairaki iai bwa ti na “nakonako naba n aron are e nakonako iai teuaei.”​—1Ioa. 2:6.

19. Ti na kangaa ni kateimatoa tangirakira iroun te Atua?

¹⁹ Ti a kani kateimatoa riki tangirakira iroun te Atua. (Iuta 20, 21) Ti kateimatoa tangirakira iroun te Atua mani karaoan ara kabanea ni konaa n ongeaba irouna, ni katabua arana, ao ni kakimwareireia nanona. (TaeRab. 27:11; Mat. 6:9; 1Ioa. 5:3) E kairira te Kauring bwa ti na kani kakaraoa ni katoabong te aroaro ni maiu ae ti kaotia iai nakon Iehova bwa ti kani kateimatoa tangirakira irouna n aki toki!

20. Baikara bukina aika raoiroi ngkai ti kaea te Kauring?

²⁰ N aki ongeia bwa ti kantaninga te maiu i karawa ke i aon te aba, ma bon iai bukina aika raoiroi bwa ti na kaea te Kauring. Ngkana ti botaki ni katoa ririki n te tai anne, ti a kauringa iai maten temanna ae ti tangiria ae Iesu Kristo. Ao ae kakawaki riki, ti a kauringa iai te mwakuri n tatangira ae moan te rianako, ae ana tangira Iehova ae kaotia nakoira ngke e anga Natina bwa te kaboomwi. N te ririki aei, e na karaoaki te Kauring n tairikin te Kanimabong, Eberi 15, 2022. Ti tangira Iehova ao Natina, ngaia are ni kauringaani maten Iesu, bon akea riki te bwai ae e na kakawaki riki iroura nakoni kaean te Kauring.