I NANON ririki aika bati, a taneiai tibun Iteraera n anga te mwane ibukini boutokaan te taromauri ae koaua. Ma e a mangaongao ao ni karawawata te kabwaka taekiti irouia I-Iutaia n ana bong Iesu.

Ibukini boutokaan te taromauri n te umwanrianna ae tabu, a riai ni bane mwaane aika I-Iutaia aika ikawai ni kabwakaa te itera n tiekera (uoua te turakemwa) ni katoa ririki. N te moan tienture, e kakamanenaaki te taekiti anne ibukini karekean taiani karea ao tabeakinan te tembora are e kateaki iroun Erote. Tabeman I-Iutaia a titirakina Betero bwa tera ana iango Iesu n te taekiti aei, ao e bon aki kaitaraa te kabwaka taekiti Kristo. Ni koauana, e tuanga Betero nnen te mwane are e na reke iai ao e na kabwakaa bwa aia taekiti.​—Mat. 17:​24-27.

A riai naba ana aomata te Atua n taai akekei ni kabwakaa te kabwianibwai man uaan abaia ke man aia karekemwane. (NakIbo. 27:​30-32; WarIte. 18:​26-28) A tua mataniwi n Aaro bwa a riai aomata ni kabwakai aia kabwianibwai man aia uaanikai ni kabane n ikotaki naba ma “te minte ao te aneto ao te kumin.” E aki kabuakakaa Iesu kabwakaan te kabwianibwai, ma e kaotaraei aroia ni mwamwanaa te aba taani koroboki ma Baritaio.​—Mat. 23:23.

Ma n te tai naba anne, a tautaeka kaain Rom i aoia I-Iutaia ao a tua kabwakaan taekiti aika bati. Teuana bon te taekiti ae a riai ni kabwakaa naake iai abaia, ao a kona ni kabwakaa n te mwane ke man uaan abaia. E katautauaki bwa a riai ni kabwakaa 20 nakon 25 te katebubua man uaan abaia. Iai naba te roo n rabwata ibukia I-Iutaia n tatabemania nako. Aei te taekiti are a titirakina iai Iesu Baritaio. E kaota te iango ae riai ibukin te kabwaka taekiti ngke e kangai: “Mangaia ae angani Kaitara akana ana bwai Kaitara, ma angan te Atua akana ana bwai te Atua.”​—Mat. 22:​15-22.

Iai naba te taekiti ae riai ni kabwakaaki ibukini bwaai ake a na kabooakinako, ake a rin n te aba ke ake a otinako. E ririkoaki te taekiti aei n taiani matabaiawa, i aoni buriiti, n tuta ni kawai, ke ni kawai n rin n te kaawa ke mwakete.

E rangi ni karawawata te taekiti irouia aomata ake a tautaekanaki i aan Rom. E taekinna te tia kororongorongo rimoa mai Rom ae Tacitus, bwa n ana tai n tautaeka te Embera ae Tiberiati ngke e mena Iesu i aon te aba, ao “a a bubutii Turia ma Iutaia bwa e na kauarerekeaki riki aia taekiti bwa e a rangi n rawawata irouia.”

E karawawata riki naba anne man aron rikoan te taekiti. E riki bwa te tia rikoa te taekiti te aomata ae anga te mwane ae bati riki ibukini karekean nakoana anne. E kona ni manga kammwakuriia tabeman bwa a na rikoa te taekiti ao a bane ni karekei aia raka mai iai. N taraana ao anne are e karaoia Takaio, ae iai taan rikoa te taekiti aika mwakuri i aana. (Ruka 19:​1, 2) Anne bukina ae a aki kukurei aomata ni kabwakaa te taekiti ao a ribaiia naba taan rikoa te taekiti.