1. Tera ae e a tia ni karaoia Iehova ibukim?

KO KANGAA n riki bwa temanna Ana Tia Kakoaua Iehova? Te moan, ko ongora “te rongorongo ae raoiroi” tao mairouia am karo, raom ni mwakuri, raom n reirei, ke rinanon te mwakuri n uarongorongo man te auti teuana ma teuana. (Mareko 13:10) Imwina, e kabanea ana tai ao korakorana temanna n reirei ma ngkoe n te Baibara. I nanon am tai n reirei, e a rikirake tangiran Iehova ao ko a ataia bwa e bon tangiriko naba. E katikiko Iehova nakon te koaua, ao ko a karekea kantaningaan te maiu are aki toki, ngkai ai te tia rimwin Iesu Kristo ngkoe. (Ioa. 6:44) Ko boni bae ni kaitaua Iehova ngkai e a tia ni kaira temanna bwa e na reireiniko te koaua, ao e a butimwaeiko Iehova bwa ana toro temanna.

2. Tera ae ti na maroroakinna n te kaongora aei?

² Ngkai ti a ataa te koaua, tabera ngkanne bwa ti na buokiia aomata bwa a na raonira n toua te kawai nakon te maiu. E kona ni bebete te uarongorongo man te auti teuana ma teuana, ma e kona ni kangaanga moanakin ao kairan te reirei n te Baibara. Anne naba am namakin? Ngkana ngaia anne, ko na bae ni kunei aanga tabeua n te kaongora aei aika ibuobuoki. Ti na maroroakina te bae e na kairira bwa ti na buoka karekeaia taan rimwini Kristo. Ti na maroroakin naba arora ni kona n tokanikai i aoni kangaanga ake ti kona ni baenikai iai ni kaira te reirei n te Baibara. Ma ti na rinanoni moa bukina ngkai ti riai n riki bwa taan uarongorongo ao taan angareirei ibukin te rongorongo ae raoiroi.

3. Bukin tera bwa ti uarongorongo?

³ Ni menan Iesu i aon te aba, e angania taan rimwina aia mwakuri  ae uoua iterana. Te moan, e tuangia bwa a na uarongorongoa te rongorongo ae raoiroi ae taekan te Tautaeka n Uea, ao e kaota aroni karaoana. (Mat. 10:7; Ruka 8:1) N te katoto, e kataubobongaia taan rimwina Iesu bwa a na ataa te bwai ae a na karaoia ngkana a butimwaea rongorongon te Tautaeka n Uea aomata ke a aki. (Ruka 9:​2-5) E a kaman taekina naba raababanakon aia mwakuri n uarongorongo, ngke e tuangia bwa taan rimwina a na uarongorongo “nakoia botannaomata ni kabane.” (Mat. 24:14; Mwa. 1:8) N aki ongeia bwa a butimwaea aia uarongorongo aomata ke a aki, ma a bon riai taan rimwina n tuangia aomata taekan Ana Tautaeka n Uea te Atua ao te bae e na kakororaoia.

4. Ni kaineti ma Mataio 28:​18-20, tera ae ti riai ni karaoia irarikin uarongorongoan te Tautaeka n Uea?

⁴ Tera kauouan iteran te mwioko are e anga Iesu? E tuangia taan rimwina bwa a na reireinia aomata bwa a na kakairi ni bwaai ni kabane ake e tua. Ma te koaua bwa te mwakuri n uarongorongo ao n angareirei aei, e tii kaineti nakoia Kristian ake n te moan tienture n aron ae a taku tabemwaang? Tiaki ngaia anne. E taekinna Iesu bwa te mwakuri ae kakawaki aei, e na waakinako “ni karokoa tain tokin te waaki ae ngkai i aon te aba.” (Wareka Mataio 28:​18-20.) E bae n anga te mwioko aei Iesu ngke e kaoti nakoia taan rimwina aika 500 tabun. (1Kor. 15:6) Ao n te kaotioti are e angan Ioane Iesu, e kamataataa bwa a kantaningaaki taan rimwina ni kabane bwa a na buokiia aomata n reireinia taekan Iehova.​—TeKao. 22:17.

5. Ni kaineti ma 1 I-Korinto 3:​6-9, e kangaa Bauro ni kaikonaka irekereken te uarongorongo ma te angareirei?

⁵ E kabotaua te abotoro Bauro te mwakuri ni karekeia taan rimwini Kristo ma ribanaakin aroka, ae oti iai bwa ti riai ni karaoa ae bati riki nakon tii unikani koraa. E kauringia kaaini Korinto ni kangai: “I ununiki ngai ao e teboaroka Aboro . . . Ngkami bon ana tawaana te Atua ae tabe n ribanaaki.” (Wareka 1 I-Korinto 3:​6-9.) Ngkai taani mwakuri ngaira n “ana tawaana te Atua,” ti aki tii uniki koraa ma ti teboteboki ao ni katoatai n tuoi rikirakeia. (Ioa. 4:35) Ma ti ataia ae bon te Atua ae karikirakea te koraa.

6. Tera ae irekereke ma ara mwakuri ngkai taan angareirei ngaira?

⁶ Ti ukoukoriia “te koraki nako ake a tauraoi nanoia ni butimwaea te koaua ae kairiia nakon te maiu are aki toki.” (Mwa. 13:48) Ibukini buokaia te koraki akanne bwa a na riki bwa taan rimwini Kristo, ti riai ni buokiia bwa (1) a na ota ni baike a reiakin man te Baibara, (2) a na kakoauai, ao (3) a na maiuakin. (Ioa. 17:3; IKoro. 2:​6, 7; 1Tet. 2:13) A kona kaain te ekaretia ni kabane ni buokiia aomata aika reirei n te Baibara man aia katoto ni kaotiotan tangiraia naaka boou aikai, ao ni butimwaeiia raoi ngkana a kaei bobotaki. (Ioa. 13:35) E riai naba te aomata are kaira te reirei ni kabanea ana tai ae bati ao korakorana ni buoka ana aomata bwa e na urui ana koaua ao ana mwakuri aika “nene wakaaia.” (2Kor. 10:​4, 5) E kona n anaa iraua te namwakaina buokan temanna bwa e na karaoi mwaneka aikai bwa e aonga n roko tiana ae te bwabetito. Ma e boni materaoi te kakorakora iai.

7. Tera ae kairira bwa ti na uataboa te mwakuri n uarongorongo ao karekeaia taan rimwini Kristo?

⁷ E aera ngkai ti uarongorongo ao ni karekeia taan rimwini Kristo? Te moan, ibukina bwa ti tangira Iehova. Ngkana ko karaoa am kabanea n tamaroa n ongeaba nakon te tua ae te uarongorongo ao karekeaia taan rimwini Kristo, ko a kaotiota iai tangiran te Atua. (1Ioa. 5:3) Iangoa aei: E kairiko tangiran Iehova bwa ko na uarongorongo man te auti teuana ma teuana. E bebete te ongeaba nakon te tua anne? E boni bae n aki. N te moantai are ko uarongorongo iai, e nako nanom? E boni bae! Ma ko bon ataia bwa  aei te mwakuri ae e tangiria Iesu bwa ko na karaoia, ao ko ongeaba nako iai. Ao imwin am uarongorongo i nanon tabeua te tai, e a bae ni bebete iroum karaoana. Ma tera am namakin ibukini kairan te reirei n te Baibara? E nanako nanom iai? Tao eng. Ma ngkana ko butiia Iehova bwa e na buokiko n tokanikai i aon te nakonnano ao n anganiko te ninikoria bwa ko na kaira te reirei n te Baibara, e boni kona Iehova ni buokiko ni karikirakea nanom ni kani karekeia taan rimwini Kristo.

8. Ni kaineti ma Mareko 6:​34, tera riki ae kairira bwa ti na reireinia aomata?

⁸ Te kauoua, tangiraia raora n aomata e kairira bwa ti na reireinia te koaua. N te tai teuana, a a rangi ni kua Iesu ma taan rimwina imwin aia mwakuri korakora n uarongorongo. A kainnanoa te tabo teuana ae a na motirawa iai, ma e a manga roko naba te koraki ae uanao ni kawariia. E korakora nanoangaaia iroun Iesu, ngaia are e a reireinia “baika bati.” (Wareka Mareko 6:34.) N te tai anne, e mwakuri korakora Iesu e ngae ngke e a kua. Bukin tera? Ibukina bwa e atai aia namakin Iesu. E kani buokiia ibukina bwa e nora aroni karawawataaia, ao a kainnanoa te kantaninga. Titeboo naba aroia ma aomata ni boong aikai. Tai mwamwanaaki n taraan tinanikuia. Bon ai aroia tiibu aika tiotionako ae akea te tia kawakinia. E kabwarabwaraia aomata aikai te abotoro Bauro bwa akea ataakin te Atua irouia ao akea aia kantaninga. (IEbe. 2:12) A toua “te kawai ae tiki nakon te kamaunanakoaki”! (Mat. 7:13) Ngkana ti iaiangoiia aomata n ara aono bwa a kainnanoa ataakin te Atua, ti kairaki n te tangira ao te nanoanga bwa ti na buokiia. Ao te anga ae te kabanea n tamaroa ae ti kona ni buokiia iai, boni kairan te reirei n te Baibara ma ngaiia.

9. Ni kaineti ma I-Biribi 2:​13, e na kangaa ni buokiko Iehova?

⁹ Tao ko baenikai ni kaira te reirei n te Baibara ibukina bwa ko ataia ae e kainnanoaki kabanean te tai ae bati iai. Ngkana ngaia anne, bunra nanom nakon Iehova. Butiia bwa e na karikirakea nanom ni kani kakaaea temanna ae ko na reirei ma ngaia n te Baibara. (Wareka I-Biribi 2:13.) E karaui nanora te abotoro Ioane bwa te Atua e na boni kaekai tataro ake a boraoi ma nanona. (1Ioa. 5:​14, 15) Ngaia are ko boni kona ni kakoauaa bwa Iehova e na boni buokiko ni karikirakea nanom ni kan uataboa karekeaia taan rimwini Kristo.

10-11. Tera ae kona n tukira mani kairan te reirei n te Baibara?

¹⁰ Ti ataia bwa e rangi ni kakawaki mwiokoara ae te angareirei nakoia aomata e ngae naba ngkana ti kaaitara ma kangaanga aika kona n tukira mani karaoan ae bati riki ni karekeaia taan rimwini Kristo. Ti na rinanoi tabeua mai buakoni kangaanga akanne, ao arora ni kona n tokanikai iai.

¹¹ Ti kona n namakina tiatianakin ara konabwai ibukini baika ti rinanoi. N te katoto, tabeman taan uarongorongo a a boni kara ke iai aorakia. Ko rinanon naba anne? Ngkana ngaia anne, iangoa te reirei teuana ae ti karekea mani butinakon te aoraki ae te COVID-19. Ti a ataia bwa ti kona ni kairi reirei n te Baibara aika uaana rinanon te tareboon ke te tablet! Ngaia are ko kona ni moana ke ni kaira te reirei mani mwengam. Ma iai naba raoiroina teuana. Tabeman a kukurei n reirei n te Baibara, ma a aki rereke n te tai are a a tia ni baireia taari bwa a na uarongorongo iai. Ma a kona n reke n te moaningabong ke n te tairiki. Ko kona n reirei ma ngaiia n taai akanne? E reirei Iesu ma Nikotemo n te bong, ae te tai ae e angaraoi iroun Nikotemo.​—Ioa. 3:​1, 2.

12. Baikara baika a kona ni buokira bwa ti na kakoauaa ae ti kona n riki bwa taan angareirei aika mwaatai?

¹² Ti kona n namakina ae e aki tau ara  konabwai ni kaira te reirei n te Baibara. Ti kona n namakinna ae ti riai ni kabatiaa riki ara atatai ke rabakaura n angareirei imwain ae ti reirei ma temanna. Ngkana ko namakina anne, iangoi baika tenua aika a na buokiko ni kakoauaa ae ko boni kona n reirei ma temanna. Te moan, e iangoiko Iehova bwa ko tau n reireinia aomata. (2Kor. 3:5) Te kauoua, e tua Iesu nakoim bwa ko na reireinia aomata, are teuare e a tia n “anganaki te mwiokoaki i aoni bwaai ni kabane i karawa ao i aonnaba.” (Mat. 28:18) Te katenua, ko kona n onimakinia tabeman bwa a na buokiko. E onimakini Iesu baike e reireinaki iai iroun Tamana. Ko kona naba ni karaoa anne. (Ioa. 8:28; 12:49) Irarikin anne, ko kona ni butiia te mataniwi n am kurubu, te bwaiania, ke te tia uarongorongo ae mwaatai, bwa e na buokiko ni moana ao ni kaira te reirei n te Baibara. Te anga teuana ae ko kona n riki iai bwa te tia reirei ae mwaatai, boni man raonakia taan uarongorongo aikai ngkana a kaira te reirei n te Baibara.

13. E aera bwa ti riai n tauraoi ni karaoi bitaki?

¹³ Ti kona n namakina ae e kangaanga kabonganaan aanga ao bwaai ni mwakuri aika boou. E a bitaki ngkai arora ni kairi reirei n te Baibara. Ara boki n reirei ae Ko Kona ni Kukurei n Aki Toki! e kainnanoaki iai te katauraoi ibukin te reirei ao kairana n te aro ae kaokoro ma are ti kakaraoia rimoa. E a karako riki barakirabe aika ti na wareki, ma e a bati riki ara tai ni maroro ma ara aomata. E a bati riki te taamnei ae ti kamanena ngkana ti angareirei, ao bwaai ni mwakuri n te intanete n aron te JW Library^®. Ngkana ko tuai n rabakau ni kamanenai baikai, tuanga temanna bwa e na reireiniko aroni kamanenaaia. Ngaira aomata ti kani kakaraoa te bwai ae ti taneiai ni kakaraoia. E kangaanga iroura butimwaeani bitaki ibukini karaoani bwaai. Ma n ana ibuobuoki Iehova ao tabemwaang, e na bebete riki iroum karaoani bitaki ao ko na kukurei riki n reirei ma aomata. E taku te bwaiania temanna ni kaineti ma aron te angareirei aei: “E a kaunga riki iai te reirei iroun te aomata ae reirei ao te tia angareirei.”

14. Tera ae ti riai n ururingnga ngkana ti mwakuri n te aono ae a bati iai aika aki kan ongora, ao ti kangaa ni kaungaaki n 1 I-Korinto 3:​6, 7?

¹⁴ Ti kona ni maeka n te aono ae kangaanga iai moanakin reirei n te Baibara. Tao a aki kan ongora aomata n ara rongorongo ao a kaitaraa. Tera ae kona ni buokira bwa ti na kateimatoa te iango ae raoiroi ibukin te aono anne? Uringnga ae e kona ni waekoa ni bitaki maiuia aomata n te aonnaba ae bati te kangaanga iai, ao naake a aki kan ongora ngkoa a a manga ataia ae a kainnanoa te Atua. (Mat. 5:3) A rarawa tabeman ni butimwaei ara boki, ma imwina riki a a butimwaea te reirei n te Baibara. Ti ataia naba bwa Iehova boni Mataniwin te tai. (Mat. 9:38) E tangirira bwa ti na teimatoa n ununiki ao n teboaroka, ma boni Ngaia te tia karikirakei. (1Kor. 3:​6, 7) Ao ai kaungananora ngkai ti kauringaki bwa e ngae ngke ti aki kona ni kaira te reirei n te Baibara ngkai, ma e kakabwaiaira Iehova ibukin ara kakorakora ao tiaki ibukin uaan ara mwakuri! *

15. Tera ana namakin Iehova ngkana e butimwaea te reirei n te Baibara temanna ao ni maiuakinna?

¹⁵ E kimwareirei Iehova ngkana e butimwaea te koaua man te Baibara temanna, ao n taekinna nakoia tabemwaang. (TaeRab. 23:​15, 16) E boni bae ni kimwareirei Iehova n noraia ana aomata aika ingainga n uarongorongo ma n angareirei ni boong aikai. N te katoto, n aki ongea butinakon te aoraki n te ririki ni mwakuri ae 2020, a kairaki reirei n te Baibara aika 7,705,765  ike a a buokaki iai 241,994 aomata bwa a na katabui maiuia nakon Iehova ao ni bwabetitoaki. Ao taan rimwini Kristo aika boou aikai, a na manga kairi reirei n te Baibara ao ni karekeia naba taan rimwini Kristo aika bati riki. (Ruka 6:40) Akea te nanououa bwa ti boni kakukureia Iehova ngkai ti uataboa te mwakuri ni karekeia taan rimwini Kristo.

16. Tera te tia ae tamaroa?

¹⁶ E kainnanoa te kakorakora karekeaia taan rimwini Kristo, ma man ana ibuobuoki Iehova ti kona ni buoka reireinaia aomata aika boou bwa a na tangira Tamara are i karawa. Ti kona ni katea tiara ae e na reke temanna ae ti na reirei ma ngaia n te Baibara? Ti na bae ni mimi n te bwai ae riki ngkana ti kamanenai raoi ara tai n tuangia naake ti kaitiboo ma ngaiia bwa ti na reirei ma ngaiia n te Baibara. Ti kona ni kakoauaa raoi bwa e na kakabwaiaa ara kakorakora Iehova.

17. Tera ara namakin ngkana ti kona ni kaira te reirei n te Baibara ma temanna?

¹⁷ Ai kakabwaiaakira ngaira ngkai ti kona n uarongorongo ao n angareirei nakoia aomata ibukin taekan te koaua! E karekea kimwareireira ni koaua te mwakuri aei. E buokiia aika bati i Tetaronike te abotoro Bauro bwa a na riki bwa taan rimwini Kristo, ao e kaota ana namakin ni kangai: “Tera ara kantaninga ke kimwareireira ke te baunuea ae ti kakatonga iai i matan ara Uea ae Iesu ngkana e a oki ma n tiku? Tiaki boni ngkami? Bon ara bwai ni kamoamoa ngkami ao ara bwai ni kimwareirei.” (1Tet. 2:​19, 20; Mwa. 17:​1-4) A bati aika namakina naba anne ni boong aikai. E taekina ae kangai te tari te aine ae Stéphanie ae kaai ni mwakuri ma buuna ni buokiia aika bati bwa a na roko n tiaia ae te bwabetito: “Akea riki te kimwareirei ae korakora ae kona n reke irarikini buokaia aomata bwa a na katabui maiuia nakon Iehova.”