E bon tangiriia aomata aika uoman Iehova aika mare bwa a na kukurei ao e na teimatoa ni kaan aia reitaki i marenaia. (Mat. 19:​4-6) Ngkana ko kani mare, ko na kangaa ni karekea buum ae raoiroi aroarona? Ibukina bwa bon ara tia Karikiriki Iehova, e atai baika ti riai ni karaoi bwa e aonga n nakoraoi ara iraorao ni karekenano ao tekatekara n taanga. Ngaia are ngkana ko maiuakin ana boto n reirei, ko kona ni karekea iai te kukurei ni koaua. Iangoi tabeua booto n reirei akanne.

Te moan, ti riai n ota raoi n te bwai ae taekinaki ibukira aei: “E rangi ni kamwamwane riki te nano nakoni bwaai ni kabane, ao e karuanikai.” (Ier. 17:9) Ngkana a kakaitiboo ma ni karekenano aomata aika kani mare, e na waekoa n rikirake te tangira ae korakora i marenaia n te aro are e a kangaanga iai karaoan aia motinnano ma te wanawana. Ngkana a baireia bwa a na mare tii ibukin ae a tangiriia i marenaia, a kona n rotakibuaka imwina. (TaeRab. 28:26) Anne bukina ngkai a aki riai aomata aika uoman ni moantaai ni kaotii aia namakin ao ni berita i marenaia imwain ae a kinaia raoi.

E kangai Taeka N Rabakau 22:3: “E nora te kabuanibwai ane e ataibwai ao e karabaa, ma e teimatoa ane e roo nanona ni waaki nako iai ao e rotakibuaka ni mwina.” Tera te kangaanga ni kamanenaan te intanete ibukini karekean raora? E kananokawaki bwa iai tabeman aika tia ni karenaia ma aomata aika aki kinaia n te intanete, a a iraorao ni karekenano, ao imwina a a kunea bwa a mwamwanaaki iroun te aomata anne. Irarikina, aomata aika taani mwamwanaa te aba a karin rongorongoia aika kewe ni kamwaneia iai aomata bwa a aonga ni kimoai aia mwane. N tabetai a kona n taekinna aomata akanne bwa Ana Tia Kakoaua Iehova ngaiia.

Iangoa riki te kangaanga teuana. Tabeua taabo n te intanete ake ko kona iai ni karekea raom, a kamanena te numera ni katautaua iai te aomata ae tau n riki bwa raom. Ma bon akea koauan ae e na nakoraoi te anga anne. Ko bon aki wanawana ngkana ko onimakina te burokuraem n te kaombiuta ibukini karaoan am motinnano ae kakawaki n aron te mare. Te koaua bwa ko na onimakina te burokuraem n te kaombiuta nakon ana boto n reirei te Baibara?​—TaeRab. 1:7; 3:​5-7.

E kangai te boto n reirei n Taeka N Rabakau 14:15: “E kakoauai taeka nako te aomata ae nanoroo, ma e iaiangoa raoi nakonakona te aomata  ae ataibwai.” Imwain ae ko motikia bwa e na riki te aomata temanna bwa buum, ko riai moa ni kinaa raoi. Ma e kona ni kangaanga karaoan anne ngkana ko iraorao n te intanete. E ngae ngke kam kona n nori rongorongomi ke kam kabanea ami tai ae bati ni mamaroro i aon te intanete, ma te koaua bwa ko kona n taekinna bwa ko boni kinaa raoi te aomata anne? Tabeman ake a iangoia bwa e a reke aia tangira ni koaua, a a rangi n nanokawaki ngke a ataa raoi aron te aomata anne n te tai are a a kaitiboo iai.

E taku te tia areru: “I aki iraorao ma aomata aika mwamwanaa te aba, ao I rarawa nakoia te koraki aika karabai aroia.” (TaiAre. 26:4) A bati aika iangoia bwa akea buren karinan rongorongoia ae kewe n te intanete bwa a aonga n tangiraki riki. A kona ni karabai aroaroia aika buakaka, ke a aki kona n noraki aroia aika buakaka ngkana a kanakoi rongorongoia nakoia tabemwaang n te intanete. E ngae ngke tabeman a kona n taekinna bwa Ana Tia Kakoaua Iehova ngaiia, ma te koaua bwa a a bon tia ni bwabetitoaki? A ikawai n te onimaki? E kaan aia iraorao ma Iehova? A raoiroi taekaia n aia ekaretia? Ke a aki raoiroi aroaroia n te aro are a a kona n atongaki bwa “iraorao aika bubuaka”? (1Kor. 15:33; 2Tim. 2:​20, 21) Ao ni kaineti ma ana boto n reirei te Baibara, a a kona ni manga mare? Ko riai n atai baikai, ma e kona ni kangaanga ataakin aei ngkana akea aia ibuobuoki taani Kakoaua ake a kinaa raoi te aomata anne. (TaeRab. 15:22) Ao ni koauana, ana toro Iehova ae kakaonimaki ni koaua, e na bon aki iangoia bwa e na “reitaki buaka” ma ae tiaki kaain te onimaki.​—2Kor. 6:14; 1Kor. 7:39.

Ibukina bwa e karuanikai kawaran taabo n te intanete ibukini karekean raom, iai aanga aika raoiroi riki ibukini kakaaean ke kinaakin temanna ae kona n riki bwa buum. E na reke ia te aomata ae raoiroi ae kona n reke bwa buum? Ngkana ti a manga kona ni bobotaki, ti kona n ikikina riki ma tabeman n tain ara bobotaki n te ekaretia, ruunga, bwabwaro, ao tabeua riki.

Ngkai ti a aki kona ni manga bobotaki n tain butinakon te COVID-19, ti kamanenai aanga n reitaki aika boou rinanon te intanete ibukini kaakaeani bobotaki, ike ti a kona iai n ikikina ma taani Kakoaua tabeman aika akea buuia. Ko kona naba n ongoraei aia reirei n taai ni bobotaki, ao ngkana a kaotiota aia onimaki n aia kaeka. (1Tim. 6:​11, 12) Ko kona naba ni maroro ma ngaiia imwini bobotaki. Rinanon aanga ni bobotaki aikai ma Ana Tia Kakoaua Iehova, ko kona iai n tataraa te aomata are ko nano irouna bwa tera aron reitakina ma tabemwaang. Anne are e a kona ni kaota iai aroarona ni koaua. (1Bet. 3:4) Imwina riki ngkana ko a kinaa raoi te aomata anne, ko a kona n ataia bwa titeboo tiami ma baika kakawaki iroumi, ao kam tau ni mare ke kam aki.

Ngkana a kakaaeia raoia aika a na mare ma ngaiia naake akea buuia n te aro ae boraoi ma ana boto n reirei te Baibara, a na boni bae n nora koauan te taeka n rabakau aei: “Ane e reke irouna buuna ae te aine [ke te mwaane] ae raoiroi ao e kunea te bwai ae raoiroi, ao e reke akoana iroun Iehova.”​—TaeRab. 18:22.