1. Tera kakabwaiaara ae ti karekea?

AI BONI kakabwaiaakira ngaira ngkai ti kaaina ana ekaretia Iehova! Ti mena n te bwaretaiti n taamnei ae kaainaki irouia aomata aika rau ao ni kukukurei. Tera tibwangam n te ekaretia?

2. Tera te kaikonaki are e kamanena te abotoro Bauro n ana reta ake a kairaki koreaia n te taamnei?

² Ti kona n ataa ae bati riki ibukin tibwangara n te ekaretia man ana kaikonaki te abotoro Bauro n ana reta ake a kairaki koreaia n te taamnei. E kabotaua te ekaretia ma rabwatan te aomata, n ana reta aikai. E kabotauia naba kaain te ekaretia ma bwain te rabwata.​—IRom 12:4-8; 1Kor. 12:12-27; IEbe. 4:16.

3. Baikara reirei aika tenua aika ti na rinanoi n te kaongora aei?

³ N te kaongora aei, ti na nori reireiara aika kakawaki aika tenua man ana kaikonaki Bauro. Te moan, ti na noria ae bon iai tibwangara * n tatabemanira nako n ana ekaretia Iehova. Te kauoua, ti na maroroakina te bwai ae ti kona ni karaoia ngkana e kangaanga iroura kakoauaan ae iai tibwangara n te ekaretia. Ao te katenua, ti na maroroakinna bwa e aera ngkai ti riai ni katabetabeira ni kakororaoa tabera n ana ekaretia te Atua.

4. Tera reireiara n I-Rom 12:4, 5?

⁴ Reireiara ae te moan ae ti kona ni karekea man ana kaikonaki Bauro, bwa bon iai tibwangara n tatabemanira nako ae kakawaki i nanon ana utu Iehova. E moana ana kaikonaki anne Bauro ni kangai: “N aron ae a bati bwain nako te rabwata i nanon te rabwata ae tii teuana, ma a kakaokoro nako aia mwakuri, ao ai arora naba bwa e ngae ngke ti bati, ma bon te rabwata ae tii teuana ngaira i nanoni Kristo, ao bwain te rabwata ngaira aika ti reitaki n tatabemanira nako.” (IRom 12:4, 5) Tera ae e nanonna Bauro? A kakaokoro nako tibwangara n te ekaretia, ma ti boni bane ni kakawaki.

5. Baikara “bwaai n tituaraoi” ake e anga Iehova nakon te ekaretia?

⁵ Ngkana ko iangoiia aomata aika iai tibwangaia n te ekaretia, tao e bae n tei n am iango taani kairiri. (1Tet. 5:12; Ebera 13:17) Ni koauana ao Iehova e anga rinanoni Kristo “mwaane ake a a riki bwa bwaai n tituaraoi” nakon Ana ekaretia. (IEbe. 4:8) Mwaane aikai a kaineti naba nakoia kaain te Rabwata n Tautaeka, taan ibuobuoki n te Rabwata n Tautaeka, kaain te Komete n te Aobiti n Tararua, mataniwi n te aono, taan reirei ni kuura n ara botaki, unimwaane n te ekaretia, ao tabonibai. A mwiokoaki taari aikai rinanon te taamnei ae raoiroi bwa a na tabeakinia ana tiibu Iehova aika kakawaki, ao a na kakorakoraa te ekaretia.​—1Bet. 5:2, 3.

6. Ni kaineti ma 1 I-Tetaronike 2:6-8, tera ae a kakorakoraia ni karaoia taari mwaane aika mwiokoaki rinanon te taamnei?

⁶ A mwiokoaki taari mwaane rinanon te taamnei bwa a na karaoi mwioko aika kakaokoro. A kakaokoro bwain te rabwata n aron te bai ao te wae, ma a mwakuri ibukini katoamauaan te rabwata ae bwanin. N aron anne, a mwakuri korakora naba ibukini kanakoraoan te ekaretia ae bwanin, taari mwaane aika mwiokoaki rinanon te taamnei. A aki ukera kamoamoaaia. Ma a kabanea aia konaa ni kateimatoa te ekaretia ao ni kakorakoraia taari. (Wareka 1 I-Tetaronike 2:6-8.) Ti kaitaua Iehova ibukia mwaane aika tau aikai, aika tatauraoi n anga ngaiia ao a ikawai n te onimaki!

7. Baikara kakabwaia ake a karekei naake a beku ni kabwanina aia tai?

⁷ A kona tabeman n te ekaretia ni mwiokoaki bwa mitinare, bwaiania aika okoro, ke bwaiania aika katoatai. Bon iai taari mwaane ao aine ni kabutaa te aonnaba aika motinnanoia bwa a na kabwanina aia tai n te uarongorongo ao karekeaia taan rimwin Iesu. Ibukin anne, a a tia ni buokiia aika bati bwa a na riki naba bwa taan rimwini Kristo Iesu. E ngae ngke e aki tau aia mwane n angiin te tai taan uarongorongo aika kabwanina aia tai aikai, ma e bon angania Iehova kakabwaia aika bati ni maiuia. (Mareko 10:29, 30) Ti tangiriia taari aikai ao ti kakaitau ngkai a riki bwa kaain te ekaretia!

8. E aera ngkai a bane ni kakawaki iroun Iehova taan tataekina te rongorongo ae raoiroi?

⁸ Ma te koaua bwa tii taari mwaane aika mwiokoaki ao naake a kabwanina aia tai n te mwakuri ni minita aika iai tibwangaia n te ekaretia? Tiaki ngaia anne! A bane ni kakawaki iroun te Atua ao n te ekaretia, taan tataekina te rongorongo ae raoiroi. (IRom 10:15; 1Kor. 3:6-9) Ni koauana, te tia naba ae moan te kakawaki n te ekaretia, boni karekeaia taan rimwin ara Uea ae Iesu Kristo. (Mat. 28:19, 20; 1Tim. 2:4) A  bane ni kakorakoraia ni moanibwaia karaoan te mwakuri aei, kaain te ekaretia ake a a tia ni bwabetitoaki ao taan uarongorongo naba aika tuai ni bwabetitoaki.​—Mat. 24:14.

9. E aera ngkai a kakawaki iroura taari aine?

⁹ E angania naba Iehova taari aine tibwangaia n te ekaretia. A kakawaki irouna buuaine, tiina, aine ake a a tia ni mate buuia, ao taari aine aika akea buuia, ake a kakaonimaki ni beku ibukina. N te Baibara, a bati taekaia aine aika kakukureia te Atua. A kamoamoaaki bwa banna ni katoto aika raraoi ibukin te wanawana, te onimaki, te ingaingannano, te ninikoria, te tituaraoi, ao mwakuri aika raraoi. (Ruka 8:2, 3; Mwa. 16:14, 15; IRom 16:3, 6; IBir. 4:3; Ebera 11:11, 31, 35) Ai kakaitaura ngaira nakon Iehova ibukia taari aine n ara ekaretia aika kaotiotii naba aroaro akana tamaroa akanne!

10. E aera ngkai a kakawaki iroura kaara?

¹⁰ Ti kakabwaiaaki naba ngkai a bati kaara n ara ekaretia. N ekaretia tabeua, iai taari aika kara ake a a tia ni kabanei maiuia ni beku ibukin Iehova. Iai naba kaara ake a a tibwa reiakina te koaua. Ma a boni kabokorakora taari aikai ma aorakin te kara aika kakaokoro. Ibukin anne, e a kona ni karako aia ibuobuoki n te ekaretia ao n te mwakuri n uarongorongo. Ma e ngae anne, a karaoa are a konaa kaara aikai n te mwakuri ni minita, ao a kabanei korakoraia ni kaungaia ao n reireinia ni kataneiaia tabemwaang! Ao ti kakabwaiaaki man aia atatai. A bon tamaroa i matan Iehova ao iroura naba.​—TaeRab. 16:31.

11-12. Ko kangaa ni kaungaaki irouia ataein am ekaretia?

¹¹ Iangoiia naba ataei. A kaaitara ma kangaanga aika bati n aia tai n ikawairake n te aonnaba ae tauaki taekana iroun Tatan te Riaboro, ao ae taabangaki iai ana iango aika bubuaka. (1Ioa. 5:19) Ma ti bane ni kaungaaki ngkana ti noriia ara ataei n anganga aia kaeka ni bobotaki, n uataboa te mwakuri ni minita, ao n ninikoria n tei  ibukin aia koaua. Ataei, bon iai naba tibwangami ae kakawaki n ana ekaretia Iehova!​—TaiAre. 8:2.

¹² Ma e kangaanga irouia taari tabeman kakoauaan ae iai tibwangaia n te ekaretia. Tera ae kona ni buokira n tatabemanira nako bwa ti na kakoauaa ae iai tibwangara n te ekaretia? Ti na noria.

13-14. E aera ngkai a kona n namakinna tabeman bwa akea bongaia n te ekaretia?

¹³ Nora reireiara ae te kauoua man ana kaikonaki Bauro. E kaira ara iango nakon te kangaanga ae a kaitaraa taari aika bati ni boong aikai. E kangaanga irouia kakoauaan ae a kakawaki n te ekaretia. E korea aei Bauro: “Ngkana arona bwa e kangai te wae, ‘Ngkai tiaki te bai ngai, ao tiaki ngai bwain te rabwata,’ tiaki nanona bwa ai tiaki bwain te rabwata ngaia. Ao ngkana arona bwa e kangai te taninga, ‘Ngkai tiaki te mata ngai, ao tiaki ngai bwain te rabwata,’ tiaki nanona bwa ai tiaki bwain te rabwata ngaia.” (1Kor. 12:15, 16) Tera ae e nanonna Bauro?

¹⁴ Ngkana ko kabotauko ma tabemwaang n te ekaretia, ko na moanna n iangoia bwa akea bongam. Tao tabeman n te ekaretia a tarena n te angareirei, ni bairean raoi bwaai, ke bon taani kawakintiibu aika mwaatai. Tao ko kona n namakinna ae akea am tarena n itera akanne. E oti n anne bwa ko nanorinano ao ko ataa tian am konabwai. (IBir. 2:3) Ma taratara raoi. Ngkana ko aki toki ni kabotauko ma naake a konabwai riki, e na boni bwara nanom. Ko kona n namakina naba are e taekinna Bauro, are ai bon akea tibwangam n te ekaretia. Tera ae kona ni buokiko n tokanikai i aon namakin akanne?

15. Ni kaineti ma 1 I-Korinto 12:4-11, tera ae ti riai n ataia ibukini bwaai n tituaraoi ake ti anganaki?

¹⁵ Iangoa te koaua aei: N te moan tienture ao Iehova e angania Kristian bwaai n tituaraoi n te kakai rinanon te taamnei ae raoiroi, ma a aki bane n titeboo baike a anganaki. (Wareka 1 I-Korinto 12:4-11.)  E angania Iehova bwaai n tituaraoi ao aia konabwai aika kakaokoro, ma a bane ni kakawaki irouna n tatabemania nako. Ni boong aikai, ti a aki karekei bwaai n tituaraoi n te kakai rinanon te taamnei. Ma titeboo te boto n reirei ae reke mai iai. A kona ni kakaokoro nako ara tarena, ma ti bane ni kakawaki iroun Iehova.

16. Tera ana reirei ni kairiri te abotoro Bauro ae ti riai ni maiuakinna?

¹⁶ N oneani mwin ae ti na kabotauira ma Kristian ake tabeman, ti riai ni maiuakina ana reirei ni kairiri te abotoro Bauro aei: “Ke e tuoa oin ana mwakuri temanna ma temanna, ao e na karekea iai bukini kimwareireina i bon irouna, ma tiaki n te kabotaua ma temanna.”​—IKar. 6:4.

17. Ti na kangaa ni kakabwaiaaki ngkana ti ongeaba n ana reirei ni kairiri Bauro?

¹⁷ Ngkana ti ongeaba n ana reirei ni kairiri Bauro ao n neneri arora, ti na kona n noria ae bon iai naba ara konabwai aika okoro. N te katoto, e kona te unimwaane temanna n aki tarena n te angareirei mai moa, ma tao e rangi n uaana ana mwakuri ni karekeia taan rimwini Kristo. Ke e aki kona ni bairei raoi bwaai ni kabotauaki ma unimwaane ake tabeman, ma tao e kinaaki bwa te unimwaane ae tatangira ae kai kawaraki irouia taan uarongorongo ibukini karekeani buokaia man te Baibara. Ke tao e ataaki n anuana ae e akoi. (Ebera 13:2, 16) Ngkana ti atai ara konabwai, ti na bon namakina te raunnano ibukin te bwai ae ti kona ni karaoia n te ekaretia. Ao ti na aki bakantang irouia taari aika iai aia konabwai aika kaokoro ma ngaira.

18. Ti na kangaa ni kanakoraoi riki ara konabwai?

¹⁸ N aki ongeia bwa tera tibwangara n te ekaretia, ma ti riai ni bane ni kani kanakoraoi riki ara beku ao ni karikirakei ara konabwai. Ibukini karaoan anne, e katauraoa Iehova te reirei ni kataneiai n ana botaki. N te katoto, n ara botaki n te wiki, ti karerekei reireiara ibukin arora ni kanakoraoa riki ara mwakuri ni minita. Ko kamanena raoi te reirei ni kataneiai anne?

19. Ko na kangaa n roko n tiam ae kaean te Kuura Ibukia Taan Uarongorongoa te Tautaeka n Uea?

¹⁹ E kona naba n reke te reirei ni kataneiai ae tamaroa man te Kuura Ibukia Taan Uarongorongoa te Tautaeka n Uea. E uki te reirei aei nakoia taari mwaane ma aine aika kabwanina aia tai n te mwakuri ni minita, ake a mena aia ririki i marenan 23 ao 65. Tao iroum e taraa ni kangaanga te roko n te tia anne. Ma n oneani mwin ae ko na karinani bukina bwa e aera ngkai ko aki kona ni kaea te reirei anne, korei bukina bwa e aera ngkai ko kani kaea. Imwina, karaoa am babaire ake a na buokiko bwa ko aonga n tau iai. Man ana ibuobuoki Iehova ao am kakorakora, ko kona n roko n tiam are ko iangoia bwa e aki kona n reke iroum.

20. Tera reireiara man I-Rom 12:6-8?

²⁰ Reireiara ae te katenua man ana kaikonaki Bauro, e kaotaki n I-Rom 12:6-8. (Warekia.) E a manga kaotia naba ikai Bauro bwa a kakaokoro bwaai n tituaraoi ake a anganaki kaain te ekaretia. Ma e a katuruturua ngkai ae ti riai ni kamanena te bwaintituaraoi are ti anganaki, ibukini kateimatoaan ao kakorakoraan te ekaretia.

21-22. Tera reireiara mairoun Robert ao Felice?

²¹ Iangoa ana katoto te tari te mwaane ae ti na aranna bwa Robert. Imwin ana beku n te aba ae ianena, e a mwiokoaki bwa e na beku n te Betaera i abana. E ngae ngke e karauaki nanona bwa e aki bitaki  mwiokoana ibukina bwa e kabwaka, ma e taku teuaei: “I nanokawaki i nanon namwakaina aika bati, bwa I iangoia ae I aki karaoa raoi mwiokoau. Iai taai ake I a iangoia iai bwa N nang katoka au beku n te Betaera.” E kangaa n oki kukurein teuaei? E kauringnga raona n unimwaane temanna bwa e kataneiaira Iehova ni mwiokoara ake mai mwaina, bwa ti aonga ni mwaatai riki ni mwiokoara ae ngkai. E a ataia Robert bwa e a riai ni katoka iaiangoan taai aika nako, ao ni kaatuua ana iango n te bwai ae e kona ni karaoia ngkai.

²² E kaaitara naba ma te aekaki anne Brother Felice Episcopo. E angabeeba ma buuna man te Kireata n 1956, ao e beku bwa te mataniwi n te aono i Bolivia. N 1964 ao e a reke natiia. E taku Felice: “E kangaanga iroura bwa ti na kitana mwiokoara. N na kaotia raoi, I boni kabanea tao teuana te ririki ma namakinan te bwarannano. Man ana ibuobuoki Iehova, I a bita au iango ao ni butimwaea tabeu ae boou ae kaikawaan natiu.” Ko namakina naba are iroun Robert ke Felice? E bwara nanom ibukina bwa ai akea mwiokoam ake mai mwaina? Ngkana ngaia anne, ko na boni kukurei riki ngkana ko bita am iango ao ni kaatuua riki iangoan te bwai ae ko kona ni karaoia ngkai ibukin Iehova ao taari. Katabetabeko ni kamanena am konabwai ao te bwaintituaraoi are ko anganaki ni buokiia iai tabemwaang, ao ko na boni kukurei ngkai ko kakorakoraa te ekaretia.

23. Tera ae ti riai ni karekea ara tai ni karaoia, ao tera ae ti na rinanona n te kaongora are imwina?

²³ Ti kakawaki iroun Iehova n tatabemanira nako. E tangirira bwa ti na riki bwa kaain ana utu. Ngkana ti karekea ara tai n iaiangoa raoi te bwai ae ti kona ni karaoia ibukini kateimatoaaia tarira, ao ti kakorakoraira ni karaoa anne, ti na bon aki kona ngkanne n namakina ae akea bongara n te ekaretia! Ma tera arora n iangoiia tabemwaang n te ekaretia? Ti na kangaa ni kaotia bwa a kakawaki iroura? Ti na maroroakina anne n te kaongora are imwina.