Ueea Aika Kaiangatoa i Marenaia n Tain te Toki
Tabeua taetae ni burabeti aika kaotaki n te taibora aei a kabwarabwarai baika riki n te tai ae tii teuana. A kaotaki raoi iai bwa ti a maeka n “tain te toki.”—Tan. 12:4.
Kiibu TeKao. 11:7; 12:13, 17; 13:1-8, 12
Taetae ni Burabeti E tautaeka “te man ae tiritiri” i aoia kaain te aonnaba i nanon ririki aika nga ma nga. N tain te toki, e a kaikoakaki atuna are te kaitiua. Imwina riki e a mao ikoakina ao “a bane kaain te aonnaba” n ririmwin te man anne. E kamanena te man anne Tatan ni ‘buakania iai te nikira.’
Kakoroani Bukina Imwin te Ieka, a a kaoti tautaeka n aomata ake a kaitaraa Iehova. Imwin tienture aika bati, n tain te Moani Buaka Are Kabutaa Aonnaba, e a kerikaaki korakoran te Embwaea ni Buritan. E a manga oki korakorana ngke e a raonaki iroun te United States. N tain te toki, e kamanenai tautaeka nako i aon te aba Tatan bwa a na bwainikirinia ana aomata te Atua.
Kiibu Tan. 11:25-45
Taetae ni Burabeti A kaiangatoa i marenaia ueani meang ao ueani maiaki n tain te toki.
Kakoroani Bukina E kaiangatoa Tiaman ni kaitaraa Amerika ma Buritan. N 1945, e a riki bwa ueani meang te Soviet Union ma taani boutokaia. N 1991, e a bwaka te Soviet Union, ao imwina e a riki bwa ueani meang Rutia ma taani boutokaia.
Kiibu Ita. 61:1; Maraki 3:1; Ruka 4:18
Taetae ni Burabeti E kanakoa ana “tia uataeka” Iehova bwa e na “kaitiaka te kawai” imwaini katean te Tautaeka n Uea Iroun te Mesia. Te koraki aei a waakina aia mwakuri n “tataekina te rongorongo ae raoiroi nakoia akana nimamannei.”
Kakoroani Bukina Ni moa man 1870 tabun, e kakorakoraa C. T. Russell ma raona ni kabwarabwarai koaua man te Baibara. N 1880 tabun, a katuruturua kakawakin ae a riai n uarongorongo ana toro te Atua. A boretii kaongora n aron aikai, “A Kainnanoaki Taan Uarongorongo Aika 1,000” ao “Kabirakia Bwa Taan Uarongorongo.”
Kiibu Mat. 13:24-30, 36-43
Taetae ni Burabeti E unika te titania te tia kairiribai i buakon te tawaana ni uita ao a katukaki bwa a na uaia n rikirake ao n taonaanako te uita ni karokoa tain te tai; imwina e a kaokoroaki te titania ma te uita.
Kakoroani Bukina Ni moa man 1870, e a moanna n otara te kaokoro i marenaia Kristian ni koaua ao Kristian ni kewe. N tain te toki, a a ikotaki Kristian ni koaua ao ni kaokoroaki mairouia Kristian ni kewe.
Kiibu Tan. 2:31-33, 41-43
Taetae ni Burabeti Te raurauniwae ae irengan iai te biti ao te bokaboka n te boua are totoa are karaoaki mani biiti aika kakaokoro.
Kakoroani Bukina E tei te bokaboka ibukia aomata aika tautaekanaki iroun Amerika ma Buritan, aika a kaaitarai tautaeka aikai. A kamamaraaki tautaeka aikai irouia aomata aikai, ao a aikoa kona ni waaki ma korakoraia ae ai aron te biti.
Kiibu Mat. 13:30; 24:14, 45; 28:19, 20
Taetae ni Burabeti A ikotaki “uita” nakon te “auti ni kaikobwai” ao e a mwiokoaki “te toro ae kakaonimaki ma ni wanawana” i aoia “tabonibai.” E a moanaki tataekinan te ‘rongorongo ae raoiroi ae taekan te Tautaeka n Uea’ n te “aonnaba ni kabutaa.”
Kakoroani Bukina N 1919, e a mwiokoaki te toro ae kakaonimaki i aoia ana aomata te Atua. Ni moa man te tai anne, e a ririkirake riki aia uarongorongo Taan Reirei n te Baibara. Ni boong aikai, a uarongorongo Ana Tia Kakoaua Iehova n aaba aika raka i aon 200, ao a boretii booki aika boto i aon te Baibara n taetae aika raka i aon 1,000.
Kiibu Tan. 12:11; TeKao. 13:11, 14, 15
Taetae ni Burabeti E tua te man ae tiritiri ae uaai korona bwa e na karaoaki “katotongan te man are tiritiri,” ao e karina “te ikeike irouni katotongan” te man anne.
Kakoroani Bukina Bon te Tautaeka ae Mwaaka Riki n te Aonnaba ae Amerika ma Buritan ae waakina katean te botaki ae te League of Nations. Iai riki aaba tabeua aika kaaina naba te botaki aei. N tokina, e a kaaina naba te botaki anne ueani meang, ma tii man 1926 nakon 1933. A kakoauaa aomata bwa e kona te League ni karekea te rau n te aonnaba ao ai uana naba ma te UN, ma e bon tii kona n reke anne man Ana Tautaeka n Uea te Atua.
Kiibu Tan. 8:23, 24
Taetae ni Burabeti Te uea ae taraa ni kakamaaku ae karokoa “te kamaunaaki n te aro ae rangi ni kamimi.”
Kakoroani Bukina E karekea te urubwai ae korakora Amerika ma Buritan. N te katoto, n te Kauoua ni Buaka Are Kabutaa Aonnaba, e karekea te urubwai ae korakora te United States ngke e kabwakai ana boom aika uoua aika mwaakaroiroi i aon aiaia tautaeka aika uoua aikai.
Kiibu Tan. 11:31; TeKao. 17:3, 7-11
Taetae ni Burabeti E waerake man te kinono te man ae tiritiri ae “uraroo” ae tengauni korona ao bon te kawaniman n uea. E taekina te uea aei te boki ae Taniera bwa “te bwai ae koro n ribaaki are karika te kamaroaeaki.”
Kakoroani Bukina E toki ana mwakuri te League of Nations n te Kauoua ni Buaka Are Kabutaa Aonnaba. Imwin te buaka, e a ‘kateaki’ te UN. N aron te League are mai mwaina, e anganaki naba te UN kamoamoaana ae bon tau n reke iroun Ana Tautaeka n Uea te Atua. E na ekiianako Aaro te UN.
Kiibu 1Tet. 5:3; TeKao. 17:16
Taetae ni Burabeti A katanoataa ae “iai te rau ao iai te mweraoi” natannaomata, ao “kooro ake tengaun” ma “te man ae tiritiri” a ekaanako “te kabekaau” ao ni kamauna. Imwin anne, a a kamaunaaki natannaomata.
Kakoroani Bukina Tao a iangoia natannaomata bwa a karekea te rau ao te mweraoi. Ao a na kamaunai botaki n Aro aika kewe aaba ake a kaaina te UN. Aei are e a moanaki iai te rawawata ae korakora. E na toki te rawawata anne ngkana e a kamaunaaki nikiran ana waaki Tatan i aon te aba n Aremaketon.
Kiibu Etek. 38:11, 14-17; Mat. 24:31
Taetae ni Burabeti E ninia abaia ana aomata te Atua Koka. Ao anera a ikotiia “naake a rineaki.”
Kakoroani Bukina E buakania ana aomata te Atua ueani meang n ikotaki ma tautaeka nako n te aonnaba. Tabeua te tai imwini moanakin anne, a a ikotaki nako karawa nikiraia naake a kabiraki.
Kiibu Etek. 38:18-23; Tan. 2:34, 35, 44, 45; TeKao. 6:2; 16:14, 16; 17:14; 19:20
Taetae ni Burabeti “Teuare toka” i aon te “aoti ae mainaina” e na bon “tokanikai” ni kamauna Koka ma ana taanga ni buaka. E ‘tewenakoaki nako nanon te nama ae te ai ae ura’ “te man are tiritiri” ao e kamantintaki te boua are totoa.
Kakoroani Bukina E nang roko ana kakamaiu Iesu are te Uea n Ana Tautaeka n Uea te Atua. Ao Iesu ma naake 144,000 ao anera, a na kamaunaia natannaomata aika ikotaki aika buakania ana aomata te Atua. E a roko n tokina ana waaki Tatan i aon te aba.
