1. E na kangaa 2 I-Korinto 3:1-3 ni buokira n ataa kakawakin mwiokoara, ae kairan te reirei n te Baibara ae kairiri nakon te bwabetito? (Nora te taamnei ni moan te maekatin.)

TERA am namakin ngkana ko nora te aomata ae reirei n te Baibara n am ekaretia bwa e a bwabetitoaki? Ko na bon rangi ni kimwareirei iai! (Mat. 28:19) Ma ngkana arona bwa ngkoe ae ko reirei ma te aomata ane e a tibwa bwabetitoaki anne, ai boni kimwareireira riki ngkoe n noria bwa e a bwabetitoaki! (1Tet. 2:19, 20) Taan rimwini Kristo aika tibwa bwabetitoaki ‘bon reeta ibukini kakoauaani mwioko’ aika raraoi, tiaki tii ibukia naake a reirei ma ngaiia, ma ibukia naba kaain te ekaretia ni kabane.​—Wareka 2 I-Korinto 3:1-3.

2. (a) Tera te titiraki ae kakawaki ae ti riai n rinanona, ao bukin tera? (b) Tera te reirei n te Baibara? (Nora te kabwarabwara mai nano.)

² E rangi ni kakukurei noran te ribooti ni katoa namwakaina ni katobibia te aonnaba, bwa aua te ririki n nako ao iai 10,000,000 aomata aika reirei n te Baibara. * Ao n ririki naba akanne, e raka i aon 280,000 aika bwabetitoaki ni katoa ririki ao n riki bwa Ana Tia Kakoaua Iehova ao taan rimwin Iesu Kristo aika boou. Ti na kangaa ni kona ni buokiia mirion ma mirion riki aomata aika reirei n te Baibara bwa a na bwabetitoaki? E bon teimatoa Iehova n angania aomata aia tai bwa a aonga n riki bwa Ana Tia Kakoaua. Anne bukina ae ti kani karaoa iai ara kabanea ni konaa ni buokiia. E a rangi ni kimototo te tai!​—1Kor. 7:29a; 1Bet. 4:7.

3. Tera ae ti na rinanona n te kaongora aei ibukini kairan taian reirei n te Baibara?

 ³ Ibukina bwa e rangi ni kakawaki karekeaia taan rimwini Kristo n taai aikai, a karaoa te kakaae taian aobiti n tararua bwa tera aroni buokaia riki ara reirei n te Baibara bwa a na rikirake nakon te bwabetito. N te kaongora aei ao are imwina, ti na nora iai arora ni karekei reireiara mairouia bwaiania, mitinare, ao mataniwi aika mwamwananga, aika mwaatai riki. * (TaeRab. 11:14; 15:22) A kabwarabwaraa te bwai ae a kona ni karaoia taan angareirei n te Baibara ao naake a reirei ma ngaiia bwa e aonga n uaana riki te reirei. N te kaongora aei, ti na maroroakini bwaai aika nimaua ake e riai ni karaoi te aomata ae reirei bwa e aonga n rikirake nakon te bwabetito.

4. Tera ae ti riai n ataia ibukini kairan reirei n te Baibara i matan te mataroa?

⁴ A bati taari aika kairi reirei n te Baibara ni mataroan aia auti aomata. E ngae ngke aio te kawai ae raoiroi ibukini karikirakean te kan ongora n te Baibara, ma n angiin te tai, maroro aikai a kimototo ao a kona naba n aki karaoaki ni katoa wiki. Ibukini karikirakean riki te kan ongora, a kona tabeman ni karekea aia tareboon nambwa naake a kan ongora ao imwina a kakimototoa aia rongorongo man te Baibara nakoia rinanon te tareboon ke te text irarikin are a kakawaria ni katoa wiki. A kona n teimatoa ni kakaraoa aei i nanon namwakaina aika bati ao e tuai naba n riki bwa te reirei n te Baibara. E na kona n rikirake te aomata anne nakon te katabu ao te bwabetito ngkana e * aki kabatiaa riki ana tai ao korakorana n reiakina ana taeka te Atua? E na boni bae n aki.

5. Tera are e taekinna Iesu n Ruka 14:27-33 ibukini buokara ni kaineti ma karekeaia taan rimwina?

⁵ N te taina ao e kabwarabwaraa Iesu te bwai ae e riai ni karaoia te aomata ae kan riki bwa te tia rimwina. E bon taekina te aomata ae kani katea te taua ao taekan naba te uea ae mwaati nakon te buaka. E taekinna Iesu bwa te tia kateitei, e riai n “tekateka moa ni warebwaia te kabanemwane” ibukini katiaan te taua, ao e riai te uea n “tekateka moa ni kaai ni maroro ma tabemwaang” bwa e aonga n ataia bwa a kona ana tautia ni kakororaoa te bwai are a riai ni karaoia ke a aki. (Wareka Ruka 14:27-33.) N aron naba anne, e ataia Iesu bwa te aomata ae kan riki bwa te tia rimwina e riai n neneri raoi baika e riai ni karaoi bwa e aonga n riki bwa te tia rimwina. Ibukin anne, ti riai ni  kaungaia ara reirei n te Baibara bwa ti na reirei ma ngaiia ni katoa wiki. Ti na kangaa ni kona ni karaoa anne?

6. Tera ae ti na karaoia ni buoka ara reirei n te Baibara bwa e na mwaatai riki?

⁶ Moanna mani kaabwabwakan am tai n reirei ma kaain te auti i matan te mataroa. Tao ko kona ni maroroakina te kibu teuana ke uoua ni katoaa te tai are ko okiria iai. Ngkana e a taneiai ma abwakin am tai ni maroro, tuangnga ngkana iai te tabo ae kam kona n tekateka iai ao ni waakinaanako te maroro. E na oti n ana kaeka bwa tera aroni kakawakin te reirei n te Baibara. Tao imwina riki ngkana ko buokia bwa e aonga ni waekoa ni mwaatai riki, titirakinna bwa tera ana iango ngkana e kan reirei uatai n te wiki. Ma e bati riki ae kainnanoaki nakon te reirei n tii te taina ke uatai n te wiki.

7. E na kangaa te tia kaira te reirei ni kakatauraoi raoi imwain ana reirei ma ana aomata?

⁷ Ngkai te tia reirei ngkoe, ko riai ni kakatauraoi raoi imwain am reirei ma am aomata. Ko kona ni moanna mani warekan te bwai are kam na reiakinna, ao nori kiibu ni kamataatako n te boto n iango iai. Iaiangoa atun te reirei, atun te mwakoro anne, taian titiraki, kiibu aika a na ‘warekaki,’ te korotaamnei, ao taamnei riki tabeua ake a kona n ibuobuoki ni kabwarabwaraa te reirei anne. Imwina iaiangoa am reirei n te Baibara anne, ao arom ni kabwarabwaraa n te aro ae bebete ma ni mataata te reirei anne bwa e aonga ni kai ota iai ao ni maiuakinna.​—Neem. 8:8; TaeRab. 15:28a.

8. Tera reireiara n ana taeka te abotoro Bauro n I-Korote 1:9, 10 ni kaineti ma te tataro ibukia ara reirei n te Baibara?

⁸ Kanoan naba am katauraoi bon te tataro nakon Iehova ibukin am aomata are ko reirei ma ngaia ao baika e riai n atai. Butiia Iehova bwa e na buokiko n reireina am aomata anne n te aro are e na ringaki nanona iai. (Wareka I-Korote 1:9, 10.) Titirakiniko bwa iai te bwai ae kona ni kangaanga iai otana ke e aki kukurei iai. Kakauringnga bwa tiam iai, boni buokana bwa e na rikirake nakon te bwabetito.

9. E na kangaa te tia kaira te reirei n te Baibara ni buoka ana aomata bwa e na katauraoi imwain ana reirei? Kabwarabwaraa.

⁹ Bon ara kantaninga bwa rinanon te reirei ae katoatai karaoana, e na kairaki iai te aomata anne bwa e na kaitaua Iehova ao Iesu ni baike a a tia ni karaoi ao e na kan reiakina riki ae bati. (Mat. 5:3, 6) Ngkana e na kakabwaiaaki te aomata ane reirei anne man ana reirei, e riai ni  kaatuua ana iango i aon te bwai ae reiakinna. Ibukini buokana iai, kabwarabwaraa nakoina bwa e kakawaki te kakatauraoi imwain ana reirei, n arona ni moantaai ni wareka te reirei anne, ao n iaiangoa arona ni maiuakinna. E na kangaa te tia kaira te reirei ni buokia? E riai ni katauraoi ma ngaia ao ni kaota aroni karaoana. * Kabwarabwaraa aroni kakaaeani kaekaan titiraki, ao kaota nakoina aroni mwaakenakin taeka aika kakawaki ke kibuntaeka aika a na buokia n uringa ana reke. Imwina, tuangnga bwa e na anga ana reke n oin ana taeka. Ngkana e karaoa anne, ko nang ataia iai bwa tera aron otana n te reirei ae kam a tia n rinanona. Ma iai riki te bwai ae ko kona ni kaungaa iai bwa e na karaoia.

10. E aera bwa e rangi ni kakawaki warekan te Baibara ni katoabong, ao tera ae e riai ni karaoia te aomata ae reirei n te Baibara bwa e na kakabwaiaaki riki mai iai?

¹⁰ Irarikin te reirei ma ana tia reirei ni katoa wiki, e na boni kakabwaiaaki te aomata ane reirei anne mani karaoani bwaai riki tabeua ni katoabong i bon irouna. E riai ni mamaroro ma Iehova. N te aro raa? Man arona ni kakauongo ao n taetae nakon Iehova. E kona ni kakauongo nakon te Atua n arona ni wareka te Baibara ni katoabong. (Iot. 1:8; TaiAre. 1:1-3) Kaota nakoina aroni kamanenaan te Kaetieti Ibukini Warekan te Baibara man te jw.org. * Ni koauana, ngkana ko na buoka te aomata anne bwa e na kakabwaiaaki riki man ana wareware n te Baibara, kaungaa bwa e na kananoa ana iango i aon te bwai are e reiakinna ibukin Iehova ao arona ni kona ni maiuakinna.​—Mwa. 17:11; Iak. 1:25.

11. E na kangaa te aomata ae reirei n te Baibara n tataro raoi mai nanona, ao e aera bwa e kakawaki irouna bwa e na tataro n taai nako?

¹¹ Kaungaa am reirei n te Baibara bwa e na mamaroro ma Iehova n arona n tataro ni katoabong. Tataro n te aro ae nako mai nanom ni moan ao ni kabanean am reirei ni kabane, ao mwanewea naba aran am reirei anne n am tataro. Ngkana e kakauongo n am tataro, ane e na rabakau n tataro mai nanona naba. Ao e riai n tataro nakon Iehova ae te Atua i nanon aran Iesu Kristo. (Mat. 6:9; Ioa. 15:16) Iangoa aroni warekan te Baibara ni katoabong (ae te kakauongo nakon Iehova) ao te tataro (ae te taetae nakon Iehova) ni kona ni buoka am aomata anne bwa e na kaania riki te Atua! (Iak. 4:8) Ngkana e kakaraoa anne ni katoabong, e na buokaki iai n rikirake nakoni katabuani maiuna ao bwabetitoana.

12. E na kangaa te tia kaira te reirei n te Baibara ni buoka ana aomata bwa e na karikirakea ana iraorao ma Iehova?

¹² E aki riai n tii iaiangoa te bwai are e reiakinna am reirei n te Baibara, ma e riai naba n rota nanona. Bukin tera? Ibukina bwa ti tangiria bwa e na reiakina taekan Iehova, ma e riai n ringa nanona te baene e reiakinna anne bwa e aonga ni maiuakinna. E reiakinia aomata Iesu baika bati ao a rangi ni kan ongongora irouna. Ma a ririmwina aomata ibukina bwa a ringaki nanoia n ana reirei. (Ruka 24:15, 27, 32) E riai n ataia am aomata anne bwa Iehova bon te Aomata ni koaua, are e kona ni karikirakea ana iraorao ma ngaia, ao n iangoia bwa kaanga Tamana, Atuana ao Raoraona. (TaiAre. 25:4,5) N ara tai ni kaira te reirei n te Baibara, ti riai ni kaotiotii aroaron te Atua nakon ara aomata anne. (TeOti. 34:5,6; 1Bet. 5:6,7) Ni kaineti ma te reirei are ko maroroakinna, kaatuua n taai nako bwa te aeka n Aomata raa Iehova. Buoka am aomata anne bwa e na kakaitau ibukin aroaron Iehova aika raraoi n aron te tangira, te akoi, ao te nanoanga. E taku Iesu bwa ‘te tua ae te kabanea ni kakannato ao te moan tua,’ bon ‘tangiran Iehova ae Atuam.’ (Mat. 22:37, 38) Kataia ni buoka am aomata anne bwa e na tangira Iehova.

13. Taekina te katoto ibukin arom ni buoka am aomata bwa e na atai aroaron Iehova.

¹³ N am maroro ma am aomata, kabwarabwaraa nakoina bukina ngkai ko rangi n tangira Iehova. E kona ni buokaki iai bwa e na ataia ae e riai ni karikirakea oin ana iraorao ma te Atua. (TaiAre. 73:28) N te katoto, iai n ami boki n reirei te kabwarabwara teuana ke te kibu teuana ae kaota iai taekan Iehova, n aron​—ana tangira, wanawanana, ana kaetitaeka ae riai, ke mwaakana​—ae ringa nanom? Taekina aei nakoina bwa e aonga n ataia ae aio naba bukina ngkai ko rangi n tangira Tamara are i karawa. Iai riki te bwai teuana ae a riai ni karaoia naake a reirei n te Baibara bwa a aonga n rikirake nakon te bwabetito.

14. Tera ae taekinaki n Ebera 10:24, 25 ibukini bobotaki n te ekaretia are kona ni buokaki iai ae reirei n te Baibara bwa e na rikirake ana onimaki?

¹⁴ Ti bane n tangiriia ara reirei n te Baibara bwa a na rikirake nakon te bwabetito. Te anga teuana ae ti kona ni buokiia iai, boni kaungaaia bwa a na kaakaei bobotaki n taromauri. A taekinna taani kaira te reirei aika mwaatai bwa aomata aika waekoa n iririi bobotaki, a baitii riki rikirakeia. (TaiAre. 111:1) A kabwarabwaraa tabeman taani kaira te reirei nakoia aia aomata, bwa a riai n irii bobotaki bwa  a bati naba bwaai aika kona n reiakin nakon tii te reirei n te Baibara. Wareka Ebera 10:24, 25 ma am aomata anne, ao taekin nakoina kakabwaia aika e kona ni karekei ngkana e kaakaei bobotaki. Kaota nakoina te taamnei ae Tera ae Riki n te Tabo n Taromauri? * Buoka am aomata anne bwa e na karekea bwa anuana kaakaeani bobotaki n taromauri ni katoa wiki.

15. Tera ae ti kona ni karaoia ni kaungaa iai ara reirei n te Baibara bwa e na katoatai ni kaei bobotaki?

¹⁵ Tera ae ko kona ni karaoia ngkana e tuai man iririi bobotaki n taromauri am aomata ke e tii iriri n tabetai? Ingainga n tibwaa reireiam nakoina ae reke mani kaean te taromauri are ko iria. E na kaungaaki riki bwa e na kakaaei bobotaki ngkana e nora ingaingam n oneani mwin ae ko na tii kaoa. Anganna Te Taua-n-Tantani ao Te Boki n Reirei ae Maiura ao Ara Mwakuri ni Minita are e na rinanoaki n te botaki. Kaota nakoina te reirei ae e na rinanoaki n te wiki are imwina, ao titirakinna bwa te mwakoro raa ae e anaaki riki iai nanona. Te bwai are e na noria ma n ongoraeia ni moan irina n te taromauri, e na rangi n raoiroi riki nakon te bwai are e a tia n nonoria n Aaro riki tabeua. (1Kor. 14:24, 25) E kona ni kaitiboo ma tabeman aika raoiroi aia katoto ake e kona ni kakairi iai, ao ni buokaki bwa e na rikirake nakon te bwabetito.

16. Tera ae kainnanoaki ibukini kairan reirei man te Baibara aika kairiri nakon te bwabetito, ao tera ae ti na reiakinna n te kaongora ae imwina?

¹⁶ Ti na kangaa ni kairi reirei man te Baibara aika kairiri nakon te bwabetito? Ti kona ni buoka ara aomata bwa e na ataa kakawakin te reirei man arora ni kaungaa bwa e riai n reirei ni katoa wiki ao ni kakatauraoi imwain ana reirei. Ti kani kaungaa naba bwa e na mamaroro ma Iehova ni katoabong, ao ni karikirakea oin ana iraorao ma Ngaia. Ti kani kaungaa naba bwa e na kaakaei bobotaki n te ekaretia. (Nora te bwaoki ae “ Baika A Riai ni Karaoi Naake A Reirei n te Baibara Ibukin Rikirakeia Nakon te Bwabetito.”) Ma n te kaongora ae imwina, a na kabwarabwaraaki nimaua riki bwaai aika a kona ni karaoi taani kaira te reirei n te Baibara ibukin rikirakeia aia aomata nakon te bwabetito.