TI BANE ni kakoauaa ae Iehova e kairiia ana aomata ao ni kateimatoaia n te onimaki ni “kabaneani boong” aikai. (2Tim. 3:1) Ma ti bon riai n ongeaba irouna. Ti kona ni kabotaua arora ma aroia tibun Iteraera ngke a mena n te rereua. A riai n ongeaba nakon tangin te buu.

E tua Iehova nakoni Mote bwa e na karaoi buu aika uoua man te tirewa ae ororeaki n te aama, “ibukini wetean te botaki n aomata ao ibukini kaotan ae e nang reitakinako te mwananga.” (WarIte. 10:2) A riai ibonga ni katangi buu n tangia aika kakaokoro ni kaotia iai bwa tera ae a riai ni karaoia aomata. (WarIte. 10:​3-8) Ni boong aikai, a karekei kaetieti n aanga aika kakaokoro ana aomata te Atua. Iangoi aanga aika tenua aika kauringira taekani katangan taiani buu n taai ake rimoa. A kaoaki ana aomata te Atua ni boong aikai nakoni botaki aika bubura, kataneiaakia mataniwi aika mwiokoaki, ao kaboouan ke bitakin taiani babaire tabeua ibukin ekaretia nako.

Ngkana e tangiria Iehova bwa a na ikotaki “te botaki n aomata” i rarikini mataroan te umwanrianna ae tabu mai mainiku, a riai ibonga ni katangi taiani buu ni kauoua. (WarIte. 10:3) A bane baronga ake a kaembwa ni katobibia te umwanrianna ae tabu n itera aika aua n ongo tangini buu akanne. A na bae ni waekoa n roko naake a kaembwa n uakaan ma mataroan te umwanrianna ae tabu. Naake a raroa tao a kainnanoa riki te tai ao te kakorakora bwa a aonga n roko. N aki ongeia bwa a mena ia, ma e tangiria Iehova bwa a na bane n ikotaki ao n ongoraei ana kaetieti.

Ni boong aikai, ti a aki botaki i rarikin te umwanrianna ae tabu, ma ti kaoaki bwa ti na kaei botaki aika katauraoaki ibukia ana aomata te Atua. E irekereke anne ma bwabwaro ibukin te aono ao botaki riki tabeua, ake ti kakarekei iai kaetieti ao kairiri aika kakawaki. Titeboo baike a karekei ana aomata Iehova ni kabutaa te aonnaba. Ngaia are naake a butimwaea te kakao nakoni botaki aikai, boni kaain te botaki ae bubura ae a kukukurei kaaina. Tabeman a riai ni mwananga n te raroa ae abwabwaki riki ni kabotauaki ma ake tabeman. Ma e ngae n anne, a kakoauaa naake a roko bwa e materaoi aia kakorakora.

Ao tera aroia kaaini kurubu ake a tionako ma taabo ake a karaoaki iai botaki aika bubura aikai? Mani karaobwai aika boou, a bati ake a kona ni kakabwaiaaki ni kanoani botaki akanne, ao a namakinna naba ae a ira buakona. N te katoto, n rokon te tia tei mani kautun ara botaki, ao kaain te aobiti n tararua i Benin a katomaia ao ni kanakoa kanoan te botaki nako Arlit i Niger, ae te kaawa ni keni koora ae mena n te Sahara Desert. A botaki ikanne taari mwaane ao aine ao aomata aika kan ongora.  Botaia bon uangaun ma temanna. E ngae ngke a raroanako, ma a namakina ae a katiteuanaaki ma kaain te botaki are rangi ni bati kaaina aika 44,131. E korea aei te tari te mwaane temanna: “Ti kaitauingkami mai nanora ibukini katomaakira ma kanoan te botaki aei. E oti raoi iai bwa kam rangi n tangirira.”

Ngkana a katanga te buu ae tii teuana ibonga ake tibun Iteraera, bon tii “mataniwi, ake mataniwi i aoia nga ma nga” aika a riai n roko i rarikin te umwa ni botaki. (WarIte. 10:4) A kona ni karekei ikanne kaetieti ao n reireinaki irouni Mote. A na buokaki iai ni kakororaoi mwiokoaia n aia baronga nako. Ngke arona bwa ngkoe temanna i buakoia mataniwi akanne, tiaki bwa ko na kabanea am konaa n roko ao n ongora?

Ni boong aikai ao unimwaane n te ekaretia bon tiaki “mataniwi,” ao a aki naba taui aroia ana tiibu te Atua ake a mena i aan aia tararua. (1Bet. 5:​1-3) Ma a boni karaoa aia kabanea ni konaa ni kawakina te nanai. Ngaia are a waekoa ni butimwaea te kakao ibukini kataneiaakia riki, n aron ae kakaraoaki n te Kuura ni Minita Ibukin te Tautaeka n Uea. N tain te reirei anne, a reiakina unimwaane aroia ni kanakoraoa riki aia tararua ibukin te ekaretia. Ibukin anne, e a korakora riki aia onimaki ma kaain te ekaretia ni kabane. E ngae ngkana ko tuai ni kaea teuana mai buakoni kuura n reirei aikai, ma ko boni bae ni kakabwaiaaki mairouia naake a a tia ni kaea.

N tabetai ao ibonga ake tibun Iteraera a katanga te buu ae bibitaki tangina. E kaotaki n anne bwa e a tangiria Iehova bwa a na mwaing kaain te kaembwa ni kabane. (WarIte. 10:​5, 6) A rangi ni baireaki raoi ngkana a mwaing, ma e boni kainnanoa te kakorakora ae bati. N tabetai, tao a kona tibun Iteraera tabeman n tabwara ni mwaing. Bukin tera?

Tao a namakinna ake tabeman bwa e a okioki katangan te buu ibukin te mwaing ao e riiriki n taai aika karina. “N tabetai ao e tiku te nang tii man te tairiki ni karokoa ae ingabong.” N tabetai “uabong, teuana namwakaina, ke e maan riki,” ao a a manga mwaing. (WarIte. 9:​21, 22) Ao mwaitira raoi aia tai ni mwaing? E taekinaki ni Warekaia Iteraera mwakoro 33 bwa 40 tabun taabo ake a kaembwa iai tibun Iteraera.

N tabetai, tao e a reke nneia tabeman ae nuu. E kona ni kakukurei anne ngkai a mena n “te rereua ae abwabwaki ma ni kakamaaku.” (TuaKau. 1:19) Ngaia are a kona n iangoia bwa tao e nang reke nneia ae e a buakaka riki ni mwaingia are imwina.

N te tai are a a mwananga iai baronga tabeua, e kona ni kangaanga irouia ake tabeman tataningaan aia tai ni mwananga. A bane n ongo tangin te buu ae bibitaki, ma a aki kona ni bane ni mwananga n teuana te tai. Tangin te buu ane bibitaki anne e kaotia bwa a riai ni mwananga baronga ake a kaembwa mai mainiku ake Iuta, Itakara, ao Teburun. (WarIte. 2:​3-7; 10:​5, 6) Imwini mwanangaia nakanne ao ibonga a a manga katanga riki te buu ae bibitaki tangina ibukia baronga ake tenua ake a kaembwa mai maiaki. A teimatoa ni karaoa anne ibonga ni karokoa baneia kaain te kaembwa ni mwananga.

Tao e a tia naba n reke iroum ae e a kangaanga butimwaeani bitaki tabeua n ara botaki. Tao ko namakinna ae ko a taonakinako ni bitaki aika bati aika karina n riki. Ke tao ko a mwengaraoi ni babaire tabeua ao ko a aki tangiria bwa a na bitaki. N aki ongeia bwa tera bukina, ma ko a namakinna bwa e a kataaki am taotaonakinnano ao e a kangaanga karaoan te bitaki. Ma e ngae n anne, ngkana ti kakorakoraira n ongeaba n aron ae ti ataia bwa ti bon riai ni karaoia, ti na bon nora ana kakabwaia te Atua.

N ana bong Mote ao e kaiririia Iehova i nanon te rereua mirion ma mirion mwaane, aine, ao ataei. A na bon aki teimatoa ni maiu ngke arona bwa e aki tabeakinia ao ni kaiririia. Ni boong aikai, ti teimatoa naba n ara onimaki ibukina bwa e kairirira Iehova. E bon ririkirake ara onimaki! Ngaia are ti bia bane ni motinnanoia bwa ti na kakairi irouia tibun Iteraera aika kakaonimaki ake a ongeaba nakon tangin te buu aika kakaokoro!