1, 2. Tera ae ti riai ni kakoauaa n tatabemanira nako? (Nora te taamnei ni moan te kaongora aei.)

N ARON ae rinanoaki n te kaongora are mai mwaina, e taekinna te Riaboro bwa e kabongana Iehova riaina n tautaeka n te aro ae aki riai, ao a kabwaia riki aomata ngkana a tautaekania i bon irouia. E eti ana taeka Tatan? Iangoia bwa aongkoa a kona ni maiu n aki toki aomata ake a rineia bwa a na tautaekania i bon irouia. A na kabwaia riki ngkana e aki tautaekania te Atua? Ko na kukurei riki ngkana akea tian inaomatam ao ko maiu n aki toki?

² Akea ae e kona ni kaekai titiraki akanne ibukim. A riai aomata n tatabemania nako n iaiangoia raoi. Ni karaoan anne, e na bae n teretere raoi ae e bon riai n tautaeka te Atua. Bon te tautaeka ae te kabanea n tamaroa. Ao ti bon riai ni boutokaia ma nanora ni kabane. E kaotaki n te Baibara bukina ae ti riai ni kakoauaa iai anne. N te katoto, iangoa aron te Baibara n tuangira taekan riain Iehova n tautaeka.

3. E aera ngkai bon tii Iehova ae riai n Tautaeka?

³ E bon riai Iehova n Tautaeka i aoni bwaai ni kabane ibukina bwa bon te Atua ae moan te mwaaka ao te tia Karikiriki. (1Rong. 29:11; Mwa. 4:24) N Te Kaotioti 4:11, a noraki n te miitara raoni Kristo n tautaeka ake 144,000, bwa a kangai: “Ko riai n anganaki  te neboaki ma te karineaki ma te mwaaka, ngkoe ae Iehova ae Atuara, ibukina bwa ko karikii bwaai ni kabane, ao ibukin nanom, ao a a riki baikai bwa ko karikii.” Eng, ibukina bwa e karikii bwaai ni kabane Iehova, e bon riai n tautaeka i aoia aomata aika i aon te aba ao i karawa.

4. E aera ngkai ti aki kamanena raoi inaomatara ngkana ti kaitaraa riain te Atua n tautaeka?

⁴ Bon akea te bwai ae e karikia Tatan. Ngaia are bon akea riaina n tautaeka i aoni bwaai ni kabane. E boni kainikatonga ma te moan taanga, ngke a kaitaraa riain Iehova n tautaeka. (Ier. 10:23) Ibukina bwa a karikaki ma inaomataia n rinea ae a na karaoia, a kona n rinea ae a na aki tautaekanaki iroun te Atua. Ma iai riaia ni karaoa anne kioina ngke a inaomata n rinea ae a na karaoia? Bon akea. A kona aomata ni karaoi aia rinerine aika riai ni katoabong ibukina bwa iai inaomataia n rinea ae a na karaoia. Ma tiaki nanona bwa a kona iai ni karitei nakon aia tia Karikiriki ao te tia Anga te Maiu. E teretere bwa ti kaitaraa Iehova, ngkana ti aki kamanena raoi inaomatara aei. Ngkai aomata ngaira, ti riai ni mena i aan ana tautaeka ae raoiroi Iehova.

5. E aera bwa ti kona ni kakoauaa ae a bon eti ana moti te Atua?

⁵ Iai riki bukina teuana ngkai e bon riai Iehova n Tautaeka. E kabongana mwaakana ni kairiri ma te kaetitaeka ae kororaoi. E taku: “Bon Iehova ngai are Teuare kaotiota te tangira ae koaua, te kaetitaeka ae riai, ao te raoiroi n te aonnaba, bwa boni baikai aika I rangi ni kimwareirei iai.” (Ier. 9:24) E aki kainnanoi aia tua aomata aika aki kororaoi, ibukini bairean te moti ae eti ao ae riai. Ma e katea te kaetieti ibukin te bwai ae eti, ao e anga tuua nakoia aomata aika boto i aon arona ni kaetitaeka n te aro ae kororaoi. “Bon aan [ana] kaintokanuea te raoiroi ao te kaetitaeka ae riai,” ngaia are ti kona ni kakoauaa ae a bane n raoiroi ana tua, ana boto n reirei, ao ana babaire. (TaiAre. 89:14; 119:128) Ni kaitaraan anne, e bukibuki Tatan bwa e kabwaka ana tautaeka Iehova, ma e aki kona Tatan ni karekea te waaki ae e na teimatoa n taabangaki iai te kaetitaeka ae riai.

6. Tera bukina teuana ae e riai n tautaekana te aonnaba Iehova?

⁶ Irarikina, e bon riai n Tautaeka Iehova ibukina bwa iai irouna te atatai ao te wanawana aika kainnanoaki ibukin tabeakinan te iuniweeti. N te katoto, iangoa ae e anga te Atua te konabwai nakon Natina bwa e na kona ni katoki aoraki ake a aki kona ni katoki taokita. (Mat. 4:23, 24; Mareko 5:25-29) N ana taratara Iehova, tiaki anne te kakai. E ataa aroni mwamwakurin te rabwata ao e kona ni kanakoraoa te uruaki are riki iai. Titeboo naba anne ma ana konabwai ni kauta te mate ao n totokoi kabuanibwai aika kona n riki.

7. E kangaa n rianako riki wanawanan Iehova nakoni wanawanaia kaain te aonnaba ae e tautaekanna Tatan?

⁷ E teimatoa te aonnaba ae tautaekanaki iroun Tatan ni kakaaea te anga ae e na katoki iai itabarara i marenaia kaain te aba ke ma aaba tabeua. Bon tii Iehova ae iai wanawanana ni karokoa te rau n te aonnaba. (Ita. 2:3, 4; 54:13) Ngkana ti reiakina ana atatai ao wanawanan Iehova, ti a namakina naba are iroun te abotoro Bauro are korea aei i aani kairana n te taamnei: “Ai batira kaubwain te Atua ma wanawanana ao ana atatai! Ai kangaangara ataakin ana motikitaeka, ao ai kangaangara kuneakini kawaina!”—IRom 11:33.

8. Tera ae rotaki iai nanom n aron ana tautaeka Iehova?

⁸ N aron ae ti a tia n noria, e kateretereaki n te Baibara bwa bon Iehova ae riai n tautaeka.  Ma e kaotaki naba iai bwa e aera ngkai e rianako riki riaina n tautaeka. Teuana bukina bwa e tautaeka ma te tangira. A bon rotaki nanora n arona ni waakina ana tautaeka. E “nanoanga ao e atataiaomata, [e] iremwe n un ao e bati irouna te tangira ae koaua ao e bwabwaina te koaua.” (TeOti. 34:6) A kakawaki iroun te Atua ana toro aika aomata ao e karineia. E tabeakinira riki nakon tabeakinara i bon iroura. Ni kaitaraan ana bukibuki te Riaboro, e bon aki taua Iehova te bwai ae raoiroi mairouia taan taromauria aika kakaonimaki. E anga naba Natina ae moan te tangiraki bwa ti aonga ni karekea te kantaninga ibukin te maiu n aki toki!—Wareka Taian Areru 84:11; I-Rom 8:32.

9. Ti kangaa n ataia ae e tabeakina temanna ma temanna te Atua?

⁹ E aki tii tabe Iehova ma mweraoia ana aomata ni kabaneia, ma e tabeakina naba temanna ma temanna. N te katoto, iangoi tienture ake tenua ake e kateirakeia iai Iehova taani motikitaeka ao ni kakorakoraia bwa a na kamaiua te natannaomata ae Iteraera mairouia taani karawawataia. N taai ni karawawata akanne, e nora naba ana kekeiaki te aine ae tiaki tibun Iteraera ae Ruta. E boni kakeai baika bati neiei ao e rairaki nakon te taromauri ae koaua. E kakabwaiaa Ruta Iehova ni karekea buuna ao natina te mwaane. Ma tiaki tii anne. Ngkana e kautaki neiei, e nang ataia ae natina bon temanna i buakon te kanoa are riki mai iai te Mesia. Ao iangoa aron rotakina ngkana e a ataia ae e kawakinaki rongorongona ni bokin te Baibara ae ingoanaki n arana!—Ruta 4:13; Mat. 1:5, 16.

10. E aera ngkai e karekea te inaomata ana tautaeka Iehova?

¹⁰ E aki karawawata ana waaki n tautaeka Iehova ke ni matoatoa. E karekea te inaomata ao ni karikirakea te kimwareirei. (2Kor. 3:17) E kabwarabwaraa n te aro aei Tawita: “A mena i matana [te Atua] te karineaki ma te mimitong, ao te korakora ma te kimwareirei n ana tabo ni maeka.” (1Rong. 16:7, 27) E korea naba ae aron anne te tia areru ae Etan: “A a kukurei aomata aika takarua ni kimwareirei. A nakonako n ootan ubum, ngkoe ae Iehova. A kakatonga n aram ni kabongnga, ao a karietataaki n am raoiroi.”—TaiAre. 89:15, 16.

11. Ti na kangaa ni kakoauaa riki ae ana tautaeka Iehova bon te kabanea n tamaroa?

¹¹ Ngkana ti katoatai ni kananoi ara iango n raoiroin Iehova, ti kona ni kakoauaa riki iai ae bon te kabanea n tamaroa ana tautaeka. Ti namakina naba are iroun te tia areru are kangai: “E raoiroi riki tebongina i nanon am katawanang nakon tenga n te tabo teuana!” (TaiAre. 84:10) Ngkai te tia Karaoira ao ara tia Karikiriki ae tatangira Iehova, e ataa te bae ti kainnanoia ibukini kukureira ni koaua, ao e anganira ni kabatiaa. Baike e tangiri mairoura bon ibukini kabwaiara ao e na karekea kimwareireira ae bati, e ngae naba ngkana ti riai ni kakeaira iai.—Wareka Itaia 48:17.

12. Tera bukina ae kakawaki ae ti boutokaa iai riain Iehova n tautaeka?

¹² E kaotaki n te Baibara bwa imwin Ana Tautaeka Kristo ae Maanna Tenga te Ririki, iai tabeman ake a na karitei nakon ana tautaeka Iehova. (TeKao. 20:7, 8) Tera ae e na kairiia nakoni karaoan anne? Imwini kaotinakoan te Riaboro mani karabuutinakina, e na manga kariria naba aomata bwa a na iaiangoiia i bon irouia. E a bon tia ni kakaraoa anne. Tao e na kataia n anai nanoia bwa iai riki te anga teuana ibukini karekean te maiu n aki toki, ao tiaki te ongeaba nakon Iehova. Bon akea koauan anne. Ma aei te bwai ae kakawaki riki: E na anaaki nanora n te iango ane kairua anne? Ngkana ti tangira Iehova ao ti toro irouna ibukin raoiroina ao ibukina bwa boni ngaia ae riai n tautaeka i aoni  bwaai ni kabane, ti na boni koro n ribaa ana iango te Riaboro anne. Bon akea riki te maiu ae ti na mataaiakinna i rarikin te mena i aan ana tautaeka Iehova ae bon riai n tautaeka ao e tatangira.

13. Ti na kangaa ni kaotia bwa ti boutokaa riain Iehova n tautaeka?

¹³ Ti bon riai ni boutokaa riain Iehova n tautaeka ma nanora ni kabane. N aron ae ti a tia n noria, bon iai riaina n tautaeka, ao ana tautaeka bon te kabanea n tamaroa. Ti kona ni boutokaa riain Iehova n tautaeka ngkana ti kateimatoa etin arora ao ni kakaonimaki ni beku irouna. Ti na kangaa ni kaota riki ara boutoka? Ngkana ti karaoi bwaai n aroni karaoaia iroun Iehova. Ngkana ti karaoa anne, ti kaotia iai ae ti tangira ana tautaeka ao ni boutokaia.—Wareka I-Ebeto 5:1, 2.

14. A na kangaa unimwaane ao atun utu ni katotonga Iehova?

¹⁴ Ti reiakinna man te Baibara bwa e kabongana mwaakana ni kairiri Iehova n te aro ae tatangira. Ibukin anne, a aki riai ni kairimatoa atun utu ao unimwaane ake a tangira ana tautaeka. Ma a na katotonga Iehova. E kakorakoraa Bauro ni katotonga te Atua ma Natina. (1Kor. 11:1) E aki kamaamaeia tabemwaang Bauro ke n taumatoaiia bwa a na karaoa te bwai ae riai. Ma e bubutiia bwa a na karaoia. (IRom 12:1; IEbe. 4:1; Bire. 8-10) Anne bon aron Iehova ni karaoi bwaai. Ngaia are e riai naba n riki anne bwa aroia naake a tangira ao ni boutokaa ana tautaeka.

15. Ti na kangaa ni kaota tangiran ana tautaeka Iehova ni karinean te mwaaka ni kairiri are e angania tabemwaang?

¹⁵ Tera arora ni butimwaea te mwaaka ni kairiri are e anga te Atua nakoia tabemwaang? Ti kaotia bwa ti boutokaa ana tautaeka Iehova ngkana ti kaota te karinerine ao te  ongeaba. E ngae naba ngkana ti aki ota raoi ke ni boraoi n iango ma te babaire teuana, ma ti boni kani boutokaa naba te babaire mairoun Iehova. E rangi ni kaokoro anne ma aroia kaain te aonnaba, ma bon aei aron te maiu i aan ana tautaeka Iehova. (IEbe. 5:22, 23; 6:1-3; Ebera 13:17) Ti kakabwaiaaki ngkana ti karaoa anne, bwa e tangira te kabanea n tamaroa ibukira te Atua.

16. A kangaa naake a boutokaa riain te Atua n tautaeka ni karaoi aia motinnano?

¹⁶ Ti kona naba ni kaota boutokaan ana tautaeka te Atua n ara motinnano. E aki katauraoi Iehova tuua aika teretere ibukini bwaai nako. Ma e kaota ana iango ibukini kairara. N te katoto, e aki katea te tua ae teretere raoi ibukin aroia Kristian ni kunnikainia. Ma e tangiria bwa ti na kunnikainira ao ni katamaroaira n te aro ae tau ae boraoi ma aroia minita aika Kristian. (1Tim. 2:9, 10) E tangiria naba bwa ti na aki kabwakaia ke ni katabeaiangaia tabemwaang n ara motinnano. (1Kor. 10:31-33) Ngkana ti karaoi ara motinnano tiaki tii i aoni baika ti tangiri, ma a boto riki i aon ana iango Iehova ao baike e tangiri, ti kaotia iai bwa ti tangira ana tautaeka ao ni boutokaia.

17, 18. Baikara aanga tabeua ake a kona iai taanga ni mare ni kaotia ae a boutokaa riain Iehova n tautaeka?

¹⁷ Iangoa te itera teuana ae a kona iai taanga aika Kristian ni boutokaa ao ni karinea ana tautaeka Iehova. Tera ae ko na karaoia ngkana e a rangi ni kangaanga riki te maiu n taanga nakon are kantaningaaki? Iangoia bwa aongkoa e a aki nakoraoi. E aera ko aki iaiangoa moa aron Iehova nakoia tibun Iteraera? E taekinna Iehova bwa kaanga te buu te mwaane ngaia ae buun te natannaomata rimoa aei. (Ita. 54:5; 62:4) Ai kangaangara aron te tekateka ni mare anne! Ma e aki waekoa ni kabwaraa nanona Iehova. E okioki n nanoangaa te natannaomata aei ao ni kakaonimaki ni koaua nakon ana berita ma ngaiia. (Wareka Taian Areru 106:43-45.) Tiaki bwa ti a katikaki riki nakon Iehova ibukin ana tangira ni koaua anne?

¹⁸ Ni kaineti ma anne, a kataia ni katotonga Iehova taanga ni mare ake a tangiria. E ngae ngke iai kangaanga ma a aki kataia ni motika aia mare n te aro ae aki boraoi ma ana taeka te Baibara. A ataia ae e a tia ni kabooia Iehova ao e tangiria bwa a na “nim” ma buuia. Bukina ae tii teuana ae kariaiakaki n te Baibara te buuraure ao te manga mare bon te wene ni bure. (Mat. 19:5, 6, 9) Ni karaoan aia kabanea n tamaroa n aia kangaanga ao ukerani kanakoraoana, a a boutokaa iai ana tautaeka ae raoiroi Iehova.

19. Ngkana ti kabwaka ni boutokaa riain te Atua n tautaeka, tera ae ti riai ni karaoia?

¹⁹ Ibukina bwa ti aki kororaoi, ti kona n tabetai ni kammaraka nanon Iehova. E ataa aei ao e tatangira ni katauraoa ibukira te kaboomwi rinanoni Kristo. Ngaia are ngkana ti kabwaka n itera tabeua, ti riai ni butiia Iehova kabwaraan ara bure. (1Ioa. 2:1, 2) N oneani mwin are ti na tii uringaaba ibukin ara bure, ti riai ni kekeiaki ni karekei reireiara mai iai. Ngkana ti teimatoa ni kaania Iehova, e na boni kabwarai ara bure ma ni buokira ni kamarurungira, ao ni kanakoraoa te kangaanga anne n te tai ae e na roko.—TaiAre. 103:3.

20. E aera bwa ti na boutokaa riain Iehova n tautaeka ngkai?

²⁰ N te waaki ae boou i aon te aba, a nang bane aomata ni mena i aan ana tautaeka Iehova ao n reiakin arona aika raraoi. (Ita. 11:9) Ma ti kona naba ngkai n reiakina ae bati ibukin anne. E boni waaki naba ngkai kaetan te bukibuki ibukin riaina n tautaeka. Ma aei ngkai te tai ni boutokaa riain te Atua n tautaeka n arora ni kateimatoai etin arora, ara beku, ao ara kakorakora ni katotongnga ni bwaai nako aika ti karaoi.