“Ngkoe ae te tia Ongo te tataro,a na kawariko aomata n aekaia nako.”​—Taian Areru 65:2.

A taku tabeman bwa a tataro ibukina bwa a bebete iai, e ngae ngke a aki kakoauaa ae iai ae e kakauongo irouia. Ma te tataro bon tiaki te bwai ae ti karaoia tii ibukini katokan ara kangaanga. E karaui nanora te Baibara bwa “e kaan Iehova * nakoia akana weteia ni kabane, ao nakoia akana weteia ni kabane n te koaua. . . . E ongo tangia ni kani buokaki.”​—Taian Areru 145:18, 19.

Ngaia are ti kona ni koaua raoi ae Iehova ae te Atua e bon ongoraei aia tataro taan taromauria. E kaota tangirara ngke e kangai: “Ane kam na weteai ma n roko ao n tataro nakoiu, ao N na ongo iroumi.”​—Ieremia 29:12.

“Botumwaaka n tataro.”​—I-Rom 12:12.

Ti kaungaaki n te Baibara bwa ti na “tatataro” ao n “teimatoa naba n tataro.” E oti raoi bwa e tangiria Iehova ae te Atua bwa ti na tataro nakoina.​—Mataio 26:41; I-Ebeto 6:18.

E aera ngkai e tangiria te Atua bwa ti na tataro nakoina? Iangoa aei: Antai te karo ae e aki tangira natina ae uarereke bwa e na kangai, “Ko kona ni buokai Tamau”? E a kaman ataa kainnanon natina te karo ao ana namakin, ma ngkana e ongo taeka aikai, e a ataia iai bwa e onimakinna natina ao e kaan ma ngaia. N aron anne, ngkana ti tataro nakon Iehova ae te Atua, ti a kaotia nakoina bwa ti onimakinna ao ti kani kaanira ma ngaia.​—Taeka N Rabakau 15:8; Iakobo 4:8.

“Kabanei ami iango n raraoma ni kaaki i aona, ibukina bwa e mumutiakiningkami.”​—1 Betero 5:7.

E tangiria te Atua bwa ti na tataro nakoina ibukina bwa e tangirira ao e mumutiakinira. E atai raoi tabeaiangara ma raraomara nako, ao e kani buokira.

Ngke e maiu te Uea are Tawita ao e tatataro nakon Iehova ae te Atua ibukini buokana, ao e bunrii ana iango ma ana namakin Nakoina. (Taian Areru 23:1-6) Tera ana namakin te Atua ibukin Tawita? E tangira Tawita te Atua, ao e ongoraei ana tataro aika bati. (Mwakuri 13:22) N aron anne, e ongoraei naba ara tataro te Atua bwa e mumutiakinira.

Akanne ana taeka te tia korea te areru teuana ae n te Baibara. E kakoauaa ae e bon ongoraei ana tataro te Atua, ao e rangi ni buokaki n ataakin anne. E a kaan riki ma te Atua iai ao e a kakorakoraaki ni kaaitarai karawawatan te maiu.​—Taian Areru 116:1-9.

Ti na boni botumwaaka n tataro nakon te Atua ngkana ti kakoauaa raoi bwa e ongoraei ara tataro. Iangoa Pedro, ae maeka i meang i Tibein. E mate natina te mwaane ae 19 ana ririki bwa e kurati. E a bunra nanona nakon te Atua ribuakon rawawatana, ao e okioki n tataroa kabebeteana ma boutokaana. Tera ae riki? E taku Pedro: “E kaekai Iehova au tataro rinanon kabebeteara ao boutokaara ngai ma buu, irouia raora ni Kristian.”

E ngae ngke e aki oki maiun natin Pedro imwin ana tatataro, ma e rangi ni buokaki iai ma ana utu. E ururing ni kangai buuna ae María Carmen: “E buokai te tatataro, n nanomwaaka i aan rawawatau. I ataia ae e bon ota irou Iehova ae te Atua, ibukina bwa ngkana I tataro nakoina, ao I a namakina naba te raunnano.”

E oti raoi man te Baibara ao rongorongoia naakai bwa e bon ongoraei tataro te Atua. Ma e teretere naba bwa e aki kaekai tataro ni kabane te Atua. E aera te Atua ngkai e kaekai tataro tabeua ao tabeua e aki?