E Aera Ngkai Ti Kainnanoa Ana Tautaeka n Uea te Atua?
Ni moani karikaia aomata, ao bon te tia Tautaeka ara tia Karikiriki n tii ngaia, ae arana Iehova. E kairiri ma te tangira. E karaoa te mwenga ae tamaroa, ae te onnaroka ae Eten ibukia aomata bwa a na maeka iai, ao e katauraoi amwarake aika bati ibukia. E mwiokoiia naba aomata n te mwakuri ae kakawaki. (Karikani Bwaai 1:28, 29; 2:8, 15) A na bon rau aomata ngke arona bwa a teimatoa ni mena i aan ana kairiri te Atua ae tatangira.
A rawa ara moan aomata n Tautaekanaki iroun te Atua
E kaotia te Baibara bwa e kaitaraa riain te Atua n tautaeka, te anera ae karitei, are e aranaki imwina bwa Tatan te Riaboro. E taku bwa a na kukurei riki aomata ngkana a aki mena i aan ana kairiri te Atua. E kananokawaki bwa a kakairi ara moani karo ake Atam ma Ewa iroun Tatan ao a a karitei nakon te Atua.—Karikani Bwaai 3:1-6; Te Kaotioti 12:9.
Kioina ngke a rawa Atam ma Ewa n Tautaekanaki iroun te Atua, a a kabuaa mwengaia ae te Bwaretaiti ao te kantaninga ae te maiu n aki toki ae kororaoi marurungia iai. (Karikani Bwaai 3:17-19) Aia motinnano anne a a rotaki iai kanoaia. E taku te Baibara bwa ibukin ana bure Atam ao e a ‘roko te bure irouia kaain te aonnaba ao e roko te mate n te bure.’ (I-Rom 5:12) E kairiri te bure nakon te kangaanga ae teuana riki aei: “A tautaeka iai aomata i aoia aomata, ni karekea rawawataia.” (Te Minita 8:9) Ae nanona, a a bati riki kangaanga ngkana a tautaekania i bon irouia aomata.
A A KAIRIRI AOMATA
E karitei Nimrota nakon Iehova
Te moan tia tautaeka n te aonnaba ae taekinaki n te Baibara bon Nimrota. Ao e karitei nakon ana kairiri Iehova. Man ana bong Nimrota n uaa ngkai ao a teimatoa aomata ni kabonganabuaka mwaakaia ni kairiri. Tao 3,000 te ririki n nako ao e korea aei te Uea are Toromon: “I nori rannimataia akana karawawataaki, ao akea temanna ae e na kabebeteia. Iai mwaakaia taani karawawataia, ao akea temanna ae e na kabebeteia.”—Te Minita 4:1.
Akanne naba kangaanga ngkai. N 2009 ao e taekinaki n ana nuutibeeba teuana te United Nations bwa e kakoauaaki ae rikiraken te kairiri ae buakaka “boni ngaia naba wakaan rikini baika bubuaka.”
AEI TE TAI NI BITAKI!
E kainnanoaki n te aonnaba aei taan tautaeka aika raoiroi riki ao te tautaeka naba ae raoiroi riki. Ao bon anne ae e beritanna ara tia Karikiriki!
A boni kabwaka naba ni katoki kangaanga aika kakaiaki ara tautaeka n aomata aika taiani kabanea n raoiroi
E a tia te Atua ni katea te Tautaeka n Uea, ke te tautaeka, ae e na onei mwin aia kairiri aomata ao “e na teimatoa n aki toki.” (Taniera 2:44) Aei te Tautaeka n Uea are a tatataro ibukina mirion ma mirion aomata. (Mataio 6:9, 10) Ma e na aki kairiri n te tautaeka aei te Atua. E a tia n rinea teuare e a tia n riki n aomata bwa te tia Tautaeka iai. Antai ae e rineia te Atua?
Ko Bae Naba n Tangira
TITIRAKI AIKA KAEKAAKI MAN TE BAIBARA
Te Rau n te Aonnaba—E na Kangaa n Reke?
Reiakina aron te Atua ni beritana reken te rau n te aonnaba rinanon Ana Tautaeka n Uea.
TITIRAKI AIKA KAEKAAKI MAN TE BAIBARA
E Koaua ae E Memena Ana Tautaeka n Uea te Atua i Nanom?
Tera ae nanonna te Baibara ngke e mwanewea ae kangai: “e mena uean te Atua i nanomi”?
