N te kaongora are mai mwaina, ao ti maroroakina iai te kanikina are e anga Iesu ae kaota tein Ana Tautaeka n Uea te Atua i karawa ae e Uea iai Iesu Kristo.

E taekinaki n te Baibara bwa ngke e a tautaeka Iesu ao e a karenakoa naba Tatan ma ana taimonio mai karawa. A a tii kona ngkai ni mwamwakuri n te aonnaba, ao anne naba teuana bukin rikini baika rangi ni bubuaka ni moa man 1914.​—⁠Te Kaotioti 12:​7, 9.

N aki ongea rikirakeni buakakan te waaki n te aonnaba, ma e a tia Iesu are te Uea n Ana Tautaeka n Uea te Atua, ni karaoi bwaai ibukini buokaia aomata. Man te mwakuri n angareirei n te Baibara ae karaoaki ni katobibia te aonnaba are e a kaman taekinna Iesu, a a bati aika reiakin ao ni maiuakini booto n reirei man te Baibara ni katoabong. (Itaia 2:​2-4) Mirion ma mirion ake a ataia ae e aki riai ni moanibwai aia kareketianti, e a nakoraoi riki aia utu, ao a karekei kukureia ni bwaikorakin te maiu aei, ma a aki tautoronaki iai. A a kona aomata aikai ni karekei  kakabwaiaaia ngkai ao a a riki naba bwa aeka n aomata ake e tangiriia te Atua bwa ana aomata.

E ngae ngke e a kaman tautaeka i karawa Iesu, ma a bon tautaekana naba ngkai te aonnaba aomata. Ma e a tia te Atua n tua nakon Iesu ni kangai: “Naako totokanikai i buakoia akana kairiribai nakoim.” (Taian Areru 110:2) E a kaan te tai are e nang kamaunaia iai Iesu taani kakaaitara ni kabane, ao n uota te kabebeteaki nakoia akana kan ongeaba iroun te Atua.

N te tai anne ao Ana Tautaeka n Uea te Atua, e nang:

• Kamaunai Aaro aika kewe. A nang akea Aaro aika karaoi angareirei aika kewe ibukin te Atua ao ni karawawataia. E kaikonakiia Aaro aika kewe te Baibara ma te kabekaau. A na kubanrou aika bati ni kamaunaakina.​—Te Kaotioti 17:15, 16.

• Urui aia tautaeka aomata. E nang waaki Ana Tautaeka n Uea te Atua ao n urui aia tautaeka ni kabane aomata.​—Te Kaotioti 19:15, 17, 18.

• Kamaunaia aomata aika buakaka. Tera aroia aomata aika boni kani kakaraoa ae buakaka, ao n rawa n ongeaba iroun te Atua? “A na boni koreakinako akana buakaka man te aonnaba.”​—Taeka N Rabakau 2:22.

• Kamauna Tatan ma ana taimonio. A nang aki “manga burebureiia riki natannaomata” Tatan ma ana taimonio​—Te Kaotioti 20:3, 10.

Tera nanoni baikai nakoia ake a butimwaea Ana Tautaeka n Uea te Atua?

Ngkana e a Uea Iesu i karawa, ao e nang kakororaoi baika bati riki nakon ae e kona ni kakororaoia te tia tautaeka ae te aomata. E na buokaki irouia raona n tautaeka ake 144,000 ake a rineaki mai buakoia aomata. (Te Kaotioti 5:9, 10; 14:1, 3) E na taraia raoi bwa e na karaoaki nanon te Atua n te aonnaba. Tera ae e na karaoia Ana Tautaeka n Uea te Atua ibukia kaain te aonnaba?

• E na katoka te aoraki ao te mate. “Akea te tia maeka iai ae e na kangai: ‘I aoraki,’” ao “e nang akea riki te mate.”​—Itaia 33:24; Te Kaotioti 21:4.

• E na uota te rau ni koaua ao te mweraoi. “E na bati aia rau natim” ao “ane a na tekateka temanna ma temanna i aan arokana ae te kureebe ao i aan arokana ae te biiku, ao akea temanna ae e na kakamaakuia.”​—Itaia 54:13; Mika 4:4.

• E na katauraoa te mwakuri ae materaoi. “A na bati kimwareireia au aomata aika rineaki n aia mwakuri baia. A na aki korakai ibukin te akea.”​—Itaia 65:22, 23.

• E na katoki kangaanga n te otabwanin. “E na kakatonga te rereua ma te aba ae mwauteretere, ao e na kimwareirei te rereua ae aoraoi ao e na onrake n te uee ae te taberon.”​—Itaia 35:1.

• E na reireinia aomata aroia ni maiu n aki toki. “Ibukini karekean te maiu are aki toki, a riai n ataiko ae tii ngkoe te Atua ae koaua, ao n ataa naba teuare ko kanakomaia ae Iesu Kristo.”​—Ioane 17:3.

E tangiria te Atua bwa ko na karekei kakabwaia aikai. (Itaia 48:18) N te kaongora ae imwina, e na kabwarabwaraaki iai arom ni kona ni karekea te kakabwaia ae tamaroa ae imwaira aei.