IANGOIA bwa ko mataku n taamnein te aine ae kinaaki, tao te tia katangitang ae tanoata taekana ae ko tatangiria. E oti moa uarerekena, arona n reiakini bwaai ni katangitang, ao ai ana kakataneiai. Imwina ao e a kaotaki ana kamataku, mwanangana nakon taabo aika raroanako, ike e a riki iai bwa te aine ae kinaaki n te aonnaba. Imwina ao e a rikirake ni kara ao ni banen te taamnei, e a oti matena.

Tiaki te karioiango te taamnei aei, ma bon rongorongon temanna ae e a tia ngkai ni mate. N aki ongeia bwa bon te tia katangitang, te tia rabakau ni bwain te aonnaba, te tia takaakaro, ke temanna riki ae rangi ni kinaaki, ma e na bon titeboo tein te karaki. E bae n tia ni karaoi baika bati neienne, ma e na mwaitira riki ae e na karaoia ngke arona bwa ti aki kona ni kara ao ni mate?

E kananokawaki bwa ti na boni bane n rinanon aei. (Te Minita 9:5) N aki ongea ara kakorakora, ma ti bon aki kona n totokoa te kara ao te mate. Irarikin anne, e kona ni karina n toki maiura tao n te kabuanibwai ae karina ke n te aoraki. N aron ae kabwarabwaraaki n te Baibara, ai aron te aoi n te moaningabong ngaira ae “tiku teutana ao e a manga mauna.”​—Iakobo 4:14.

Irouia tabeman, e taraa ni kangaanga aron te maiu aei ao akea uaana, ngaia are a iangoa aei, “ti na amwarake ma ni moi, bwa ti na mate ningabong.” (1 I-Korinto 15:32) Ma a iangoa anne bwa a ataia ae akea ae e kona ni birinako man te mate. Imwina riki ngkana ko a rinanon te maraki, ko kona n titirakiniko aei, ‘Ai bon aroaron naba maiura aei?’ Ti na karekea ia te kaeka?

A bati aika onimakina te rabakau n aonnaba. A a tia taan rabakau ao taokita ni karekei bwainnaoraki ibukini kaananauan riki maiura. Ao iai taan rabakau aika mwakuria naba ngkai aroni kaananauan riki te maiu. E ngae ngke e nakoraoi mwin aia kakaae ke e aki, ma e aki bitaki te titiraki ae kangai: E aera ngkai ti rikirake ni kara ao ni mate? E na kamaunaaki te tia kairiribai ae te mate? Ni kaongora aika imwina ao a na neneraki iai reirei aikai ao kaekaan te titiraki ae kangai, Ai bon aroaron naba maiura aei?