E kangai te Atua nakon Atam: “N te bong are ko amwarake [man te kai] ao ko na boni mate.” (Karikani Bwaai 2:17) E na bae n akea uaan te tua anne ngke arona bwa e boni karikaki Atam bwa e na rikirake ni kara ao ni mate. E ataia Atam ae e na aki mate ngkana e aki amwarake man te kai anne.

Tiaki nanona bwa a riai Atam ao Ewa n amwarake man te kai anne bwa a aonga n teimatoa ni maiu, bwa a bati kainnamwarake n te onnaroka anne. (Karikani Bwaai 2:9) Ngke arona bwa a aki amwarake man te kai aei, a bon ongeaba ngkanne iroun Teuare e angania te maiu. E na bon oti naba iai bwa a ataia ae iai riain te Atua n tuangia te bwai ae a na karaoia.

Ti riai n nenera te maroro are e a tia n rotiira ni kabane, bwa ti aonga n ataa bukini maten Atam ma Ewa. E kabongana te naeta Tatan te Riaboro n taekina te uarao. E kangai te Baibara: “Ao moan te taratara raoi riki te naeta mai buakoia manin nako te tawaana aika moaanti ake e karikiia Iehova ae te Atua. Ngaia are e taku nakon te aine: ‘Te koaua ae e taku te Atua bwa kam na tai amwarake mani kain nako te onnaroka aei?’”​—Karikani Bwaai 3:1.

E kaeka ni kangai Ewa: “Ti kona n amwarake man uaani kain te onnaroka aei. Ma e taku te Atua ibukin uaan te kai are i nukan te onnaroka, ‘Kam na tai amwarake man te kai anne ao tai ringnga naba, bwa kam kaawa ni mate.’” E a manga taku te naeta nakon neiei: “Kam na bon aki mate. Bwa e ataia te Atua bwa n te bong are kam amwarake mai iai, ao a na kaureaki matami ao kam na riki bwa ai aron te Atua n ataa te raoiroi ao te buakaka.” E bukina Iehova Tatan bwa te tia kewe ae taua te bwai ae raoiroi mairouia ara moani karo.​—Karikani Bwaai 3:​2-5.

E kakoauaa te baere e ongo Ewa. E karekea taraan te aroka. E kan taraakina ma ni kamaiumata! Ngaia are e kaenakoa baina, e kinika uaana, ao e kanna. E taku ngkanne te Baibara: “Imwina ao e angan naba buuna ngke e a mena teuaei i rarikina ao e kanna naba.”​—Karikani Bwaai 3:6.

Ai rawawatara nanon te Atua n noraia natina aika tangiraki irouna n aki ongeaba nakoina! Tera are e karaoia? E kangai Iehova nakon Atam: “Ko na . . . [oki] nakon te tano bwa ko bon anaaki mai iai. Bwa bon te tano ngkoe ao ko na manga okira te tano.” (Karikani Bwaai 3:​17-19) Ibukin anne, “ikotan ana bong ni maiu Atam ni kabane, bon 930 te ririki ao e mate.” (Karikani Bwaai 5:5) E aki nako karawa Atam ke ni maiu n te aba n taamnei teuana. Bon akea ngaia imwain ae e karikia Iehova man te tano. Ngaia are ngke e mate, ai akea te maiu irouna n aron te  tano are e karikaki mai iai. Ai bon akea ngaia. Ai kananokawakira!

Ibukin aia aki ongeaba mai nanoia Atam ma Ewa, a a kabuaa kororaoia ao te kona ni maiu n aki toki. E a riki te bitaki nakon rabwataia, a a rotaki n te aki kororaoi ao te bure. Ma a aki tii rotaki n aki ongeabaia. A ituaki naba kanoaia n te bure. E kangai I-Rom 5:12: “Bwa aron rokon te bure irouia kaain te aonnaba mairoun te mwaane ae tii temanna ao rokon te mate n te bure, ao e a ituia aomata ni kabane te mate ibukina bwa a bane ni bure.”

E kabwarabwaraaki te bure ao te mate n te Baibara bwa kaanga “te ninira ae niroaia botannaomata ni kabane, ao te rabuna ae rarangaaki ae a rabunaki iai natannaomata ni kabane.” (Itaia 25:7) A niroaaki iai aomata n aron te kaeti ae boitin ae akea ae e kona ni birinako mai iai. A boni “bane ni mate aomata i nanon Atam.” (1 I-Korinto 15:22) E a ueke iai te titiraki n aron are e tabekia te abotoro Bauro ae kangai: “Antai ae e na kamaiuai man te rabwata ae kairai nakon te mate aei?” Iai ae konaa?​—I-Rom 7:24.