E aera bwa a kani maiu n aki toki aomata? E taku te Baibara bwa e karina i nanora tangiran anne te Atua. (Te Minita 3:11) E taku naba bwa “te Atua bon te tangira.” (1 Ioane 4:8) E tatangira te Atua, ao e na bon aki karina i nanora te kani maiu n aki toki ngke arona bwa e na bon aki riki anne nakoira.

E teretere bwa bon akea ae kani mate. E boni kabwarabwaraa te mate te Baibara bwa “te tia kairiribai.” (1 I-Korinto 15:26) Tabeman a mate n uarerekeia, ao tabeman ngke a a kara. Ma bon akea ae e kona ni birinako man te mate. A bati aika aki rau n iangoan taekan te mate, ao a maaku iai. E kona ni kamaunaaki te mate? E na bon riki anne?

Ko mimi n ataakin ae bon tiaki ana kantaninga te Atua bwa a na mate aomata? E kakoauaaki ni bokin te Baibara ae Karikani Bwaai, bwa bon ana kantaninga te Atua bwa a na maiu n aki toki aomata n te aonnaba. E karika te aonnaba Iehova ae te Atua ma bwaai nako ibukia aomata bwa a na maekanna. Imwina ao e a karika te moani mwaane are Atam ao e kamaekaa n te bwaretaiti ae te onnaroka are Eten. Imwin anne “e nori bwaai ni kabane te Atua ake e karaoi, ao noria! a rangi n raoiroi.”​—Karikani Bwaai 1:​26, 31.

 E karikaki Atam bwa e na kororaoi, ni katotonga te Atua. (Te Tua-Kaua 32:4) E kororaoi naba buun Atam are Ewa n ana iango ao n rabwatana. E taku Iehova nakoia: “Kam na kabatiaia ami kariki ao kamwaitingkami, kaona te aonnaba ao taua arona, ao taui aroia ikan taari ma manin karawa aika kibakiba ma maan ni kabane n te aonnaba.”​—Karikani Bwaai 1:28.

E na tangira te tai ae maan bwa a na kaona te aonnaba naakai ni kanoaia. E na kariki Ewa, ao natina a na manga kariki, n uaa e a buta raoi te aonnaba aei ni maekanaki n aron are e kantaningaia te Atua. (Itaia 45:18) Ti kona ngkanne n iangoia bwa Iehova e na angania Atam ao Ewa te kantaninga anne, ngkana ngaia bwa a na maiu tii teutana te tai n te aro are a na tii ooia natiia ao tao tibuia, ao n aki nora kakoroani bukin te kantaninga anne?

Iangoa naba te mwioko ae tauan aroia maan. E tuangaki Atam bwa e na arania maan, ao anne e kainnanoa naba te tai ae maan. (Karikani Bwaai 2:19) Ma ngkana a na taui aroia maan, a na kamatebwai moa aroia maan ao n ataa aron tabeakinaia. E bae n rangi ni kainnanoaki riki te tai ibukin anne.

Ngaia are e oti n ana kaetieti te Atua ni kaineti ma kaonan te aonnaba ao tauan aroia maan, bwa a karikaki te moan taanga bwa a na maiu n aki toki. E boni maiu n te tai ae rangi n abwabwaki Atam.

E oti n te Baibara bwa e rangi n abwabwaki maiuia aomata ngkoa nakoni maiura ngkai. E kangai te Baibara: “Ikotan ana bong ni maiu Atam ni kabane, bon 930 te ririki.” E a manga taekinia riki onoman mwaane ake a raka naba aia ririki i aon 900! Nakai bon Teta, Enoti, Kenan, Iareta, Metutera, ao Noa. A bane ni maiu naakai imwain te Ieka are n ana bong Noa, ao Noa e maiu 600 te ririki imwain rokon te Ieka. (Karikani Bwaai 5:​5-27; 7:6; 9:29) E kangaa n reke abwakini maiuia anne?

A maiu naakai n te tai ae uakaan ma are e kororaoi iai te maiu. Tao anne bukina teuana ae rangi n abwabwaki iai maiuia. Ma e kangaa te kororaoi n rota abwakin te maiu? Ao e na kangaa ni kamaunaaki te mate? Ibukini kaekaani baikai, ti riai moa n ataa bukin rikirakera ni kara ao ni mate.