E berita te Atua nakon te burabeti are Aberaam bwa e na uotii kakabwaia temanna kanoana nakoia “natannaomata n te aonnaba.” (Karikani Bwaai 22:18) Antai kanoana anne?

E kaania 2,000 te ririki n nako, ao e anga te mwaaka te Atua nakon Iesu are kanoan Aberaam, bwa e na karaoi kakai aika korakora. E oti mani kakai akanne bwa te berita are taekinaki nakon Aberaam, e na bon riki nakon te natannaomata rinanon Iesu.​—I-Karatia 3:14.

Mani kakai ake e karaoi Iesu, e a buoka kinaakina ae boni ngaia are e rineia te Atua bwa e na kakabwaiaia aomata, ao e kaotaki naba iai aron te Atua ni kabongana Iesu ni kakabwaiaia aomata n aki toki. Nori aroaron Iesu tabeua aika anainano, aika oti n ana kakai.

E Mwamwannano​—E kamarurungia aika aoraki Iesu.

N te taina ao e a butiia Iesu te rebera temanna bwa e na kamarurungnga. E ringa teuaei Iesu ao e kangai: “I kani karaoia!” E a toki naba ngkekei reberan teuaei.​—Mareko 1:40-42.

E Tituaraoi​—E kaamwarakeia aika baki Iesu.

E aki tangiriia aomata Iesu bwa a na baki. Tiaki tii te taina ana tai ni kaamwarakeia nga ma nga aomata n te kakai, n arona ni kamwaiti tabeua kariki ao iika tabeua. (Mataio 14:17-21; 15:32-38) Imwin amwarakeia, a a bane n rauaki ao e boni bati naba nikirana.

E Nanoanga​—E kautiia maate Iesu.

Ibukini ‘korakoran ana nanoanga’ Iesu, e a kauta te mwaane temanna ae mate ae ana rikitemanna te aine ae e a tia ni mate buuna. E a rawawata neiei bwa ai akea riki ae e nang tararuaia.​—Ruka 7:12-15.