Kakabwaiaaia te Koraki Aika Buoka Ane E Kainnanoa te Ibuobuoki
A bati aomata ni katobibia te aonnaba aika kainnanoa kanaia ao mwengaia. Tabeman a bon tii kainnanoa anganakia te kantaninga ae raoiroi ibukin taai aika imwaia. E na kangaa ara kakorakora ni buokiia te koraki aikai ni karekea akoara ma kakabwaiaara iroun te Atua?
AE TAEKINAKI N TE KOROBOKI AE TABU
“Ane e akoiia akana kainnano ao e kataaraua Iehova, ao E na angan te aomata anne booni mwin te bwai ae e karaoia.”—TAEKA N RABAKAU 19:17.
AE NANONAKI NI BUOKAN TEMANNA AE KAINNANOA TE IBUOBUOKI
E taekina te kaikonaki Iesu ae taekan te mwaane ae kamwaruaaki irouia taani kamwarua ao ni katukaki bwa e na mate. (Ruka 10:29-37) E buokaki iroun te ianena temanna ao e bwainnaorakia ikoakina. E karaoa aei teuaei n aki ongea kakaokoron aia reeti.
E aki tii karaoa te moani kakamaiu ao ni karekei bwaai tabeua te ianena ae akoi aei nakon teuaei, ma e kabebetea naba man rawawatana are e rinanona.
Tera reireiara man te kaikonaki aei? E kaotia Iesu bwa ti riai ni buokiia naake a kainnanoa te ibuobuoki n aron ae ti konaa. (Taeka N Rabakau 14:31) E taekinaki n te Koroboki ae Tabu bwa e nang waekoa te Atua ni katoka te maiu ni kainnano ao te rawawata. Ma ti kona n iango ni kangai: “E na kangaa ni karaoa anne te Atua ao n ningai?” A na maroroakinaki n te kaongora ae imwina taiani kakabwaia ake e katauraoi ibukim am tia Karikiriki ae tatangira.