E a Tia ni Bitaki Ana Taeka te Atua ae Kaira Koreana?
A iangoia tabeman aomata bwa e a tia ni bitaki ana Taeka te Atua ae kaira koreana. E taku te burabeti ae Itaia bwa “e teimatoa n aki toki” ana taeka te Atua. (Itaia 40:8) Ti kangaa ni koaua raoi bwa a boni kateimatoaaki etirurun ana berita nako te Atua?
Iai mwaakan te Atua ni kawakina ana Taeka ao ni kamanoa bwa e na aki bitaki kanoana. N taai ake rimoa, ngkana a kaewea kanoan te koroboki ae tabu taani kaewewe ao a wareki mwaitini manin nako te koroboki ae tabu n te aro ae e na aki raka, e na aki bitaki, ke e na bua. Ma a bon aki kororaoi aomata, ao e bon reke naba aia kairua tabeua taani kaewewe tabeman.
TI KANGAA NI KOAUA RAOI BWA TE KOROBOKI AE TABU NGKAI E BONI KAKANOA N ANA RONGORONGO RAOI TE ATUA?
Iai nga ma nga katoton te nira ni boki nikawai aika kanoan te Koroboki ae Tabu. Ngkana iai te kaokoro teutana n teuana te katoto, e kona ni kabotauaki ma katoto ake tabeua ao ni manga kaetaki. Ibukin reiakinana riki, nora te kaongora ae “Has the Bible Been Changed or Tampered With?” n jw.org.
Iangoa te katoto aei, a kuneaki koroboki nikawai aika aranaki bwa taian Nira ni Boki Man Taari ae Mate, irouia kaain te baronga mai Arabia, n te nangananga teuana i rarikin Taari ae Mate n 1947. Iai ni koroboki nikawai aikai mwakoron te Koroboki ae Tabu, aika koreaki e raka i aon uoua tenga te ririki n nako. A kabotaui koroboki nikawai aikai taan rabakau ma te Koroboki ae Tabu ae iroura ngkai. Tera are a kunea?
A kunea taan rabakau bwa kanoan Ana Taeka te Atua ae iroura ngkai bon titeboo raoi ma kanoan taiani koroboki nikawai. * E kakoauaaki man neneran raoi taiani koroboki nikawai aikai bwa te bae ti warekia ngkai n te Koroboki ae Tabu bon ana rongorongo raoi te Atua. Ti koaua raoi iai bwa e a tia te Atua ni kabanea ana konaa ni kateimatoa etirurun ana Koroboki ae Tabu ibukira ni boong aikai.
Ngaia are ti kona ni wareka ngkai Ana Taeka te Atua ao ni kakoauaa ae e bon etiruru. Ngkai ti a ataa anne, ti na manga nora ngkanne reireiara mairouia ana burabeti te Atua.
^ bar. 7 The Complete Dead Sea Scrolls in English, e koreia Geza Vermes, iteraniba 16.
Ko Bae Naba n Tangira
TE TAUA-N-TANTANI
E Kawakinaki te Baibara Mani Kataani Bitakini Kanoana
A a tia tabeman aomata aika buakaka ni kataia ni bita te rongorongo n te Baibara. E kangaa n noraki aia kakorakora ao ni katokaki?
REIREI AIKA RANGI NI KAKAWAKI N TE BAIBARA
Ti na Kangaa ni Kakoauaa te Baibara Boni Mairoun te Atua?
Ngkana e koreaki te Baibara iroun te Atua, e riai n riki bwa te boki ae akea n ai arona.
