E taku te burabeti are Mote bwa ngkana ti ongeaba n ana tua nako te Atua, ti na kakabwaiaaki iroun te Atua. (Te Tua-Kaua 10:13; 11:27) Tiaki nanona bwa ti ongeaba iroun te Atua ibukina bwa ti maaka ana katuuaa. Ti kairaki n aroaron te Atua aika raraoi bwa ti na ongeaba irouna ibukina bwa ti tangiria, ao ti aki kani karaoa te bae e na rawawata iai. “Bon aei tangiran te Atua, ae ti na kakairi n ana tua.”​—1 Ioane 5:3.

Ma e na kangaa te ongeaba nakon te Atua ni karekea te kakabwaia? Iangoi aanga aika uoua.

“Bon Iehova ngai ae Atuam, are Teuare reireiniko bwa ko aonga ni kabwaia, are . . . kaiririko n te kawai ae ko riai n nakonako iai.”​—ITAIA 48:17.

E atai raoi arora Iehova ae te Atua ae ara tia Karikiriki, ao e katauraoa te kairiri ae ti kainnanoia. Ngkana ti tangiri ana reirei te Atua bwa a na buokira ni karaoi motinnano aika raraoi, ti riai n reiakina te bae e tangiria bwa ti na karaoia man te Koroboki ae Tabu, ao ni maiuakini reirei akanne.

“A a kukurei riki te koraki ake a ongo ana taeka te Atua ma n toua mwina!”​—RUKA 11:28.

Ni boong aikai ao iai mirion ma mirion aika ongeaba n Ana Taeka te Atua ae a kukurei ni koaua. N te katoto, iangoa te mwaane mai Tibein ae kiunun ao n iowawa nakoia tabemwaang ao nakon naba buuna. N te taina ao e a wareware n ana koroboki te burabeti are Mote ae taekan te mwaane ae nimamannei ae Ioteba are natin Iakoba. E kabooakinako Ioteba bwa te toro ao e kabureaki n akea ana bure. Ma e teimatoa n nimamannei ao n rau, ao ni kabwarai buure. (Karikani Bwaai, mwakoro 37-45) E kangai te mwaane mai Tibein aei: “Iaiangoan ana katoto Ioteba, e kairai bwa N na karikirakea irou te nimamannei, te akoi, ao te taotaonakinnano. Ibukin anne, I a kukurei ngkai ni maiuu.”

A kona n reke n te Koroboki ae Tabu taiani kairiri aika bati riki ni kaineti ma arora ae riai nakoia tabemwaang. Nora kabwarabwaraan riki aei n te kaongora ae imwina.