Antai Aran te Atua? E kangai te Atua: “Bon Iehova ngai. Bon aei arau.” (Itaia 42:8) E oti n te Baibara aran te Atua 7,000 tabun te tai. Ma a bati rairai ni Baibara ake a onea mwin te ara aei n te nakoa, n aron “te Uea.” E kan raoraoniko te Atua, ngaia are e kaungako bwa ko na “taboa arana.”​—Taian Areru 105:1.

Nakoan Nako Iehova. E tataekinaki Iehova n te Baibara n nakoa aika “te Atua,” “Moan te Mwaaka,” “te tia Karikiriki,” “te Tama,” ao “te Uea.” A bati tataro aika koreaki taekaia n te Baibara ake e taekinaki iai Iehova n nakoana ae karineaki ao ni bon arana ae Iehova.​—Taniera 9:4.

 Rabwatan te Atua. Te Atua bon te taamnei ae aki nonoraki. (Ioane 4:24) E kamatoaa te Baibara bwa “akea te aomata ae e a tia n nora te Atua.” (Ioane 1:18) A kaotaki ana namakin n te Baibara. A kona aomata ni kananokawakia ke ni “kakukureia.”​—Taeka N Rabakau 11:20; Taian Areru 78:40, 41.

Aroaron te Atua Aika Kamimi. E aki inanonano te Atua nakoia aomata man natannaomata ao aaba nako. (Mwakuri 10:​34, 35) E ‘nanoanga naba ao e atataiaomata, e iremwe n un ao e bati irouna te tangira ae koaua ao e bwabwaina te koaua.’ (Te Otinako 34:6, 7) Ma iai aua aroaron te Atua aika anainano riki.

Te Mwaaka. Kioina ngkai ‘te Atua ngaia ae Moan te Mwaaka’ bon akea tiani mwaakana ni kakororaoani baike e beritani.​—Karikani Bwaai 17:1.

Te Wanawana. E riao riki wanawanan te Atua. Ibukin anne, e taekinaki n te Baibara bwa e “wanawana n tii ngaia.”​—I-Rom 16:27.

Te Kaetitaeka ae Riai. E karaoa ae eti n taai nako te Atua. A “kororaoi” ana mwakuri ao e “aki kona n ribuaka.”​—Te Tua-Kaua 32:4.

Te Tangira. E taku te Baibara bwa “te Atua bon te tangira.” (1 Ioane 4:8) E aki tii kaokaota te tangira te Atua, ma boni ngaia te tangira. E karaoi bwaai ni kabane ibukin ana tangira ae rianako, ao ti a kakabwaiaaki iai n aanga aika bati.

Ana Iraorao te Atua ma Aomata. Te Atua bon Tamara are i karawa ae tatangira. (Mataio 6:9) Ti kona n riki bwa raoraona ngkana ti onimakinna. (Taian Areru 25:14) E boni kaoingkami te Atua bwa kam na kaania n te tataro ao ni “kabanei ami iango n raraoma ni kaaki i aona, ibukina bwa e mumutiakiningkami.”​—1 Betero 5:7; Iakobo 4:8.

Iesu Bon Tiaki te Atua. E okoro Iesu kioina ngkai tii ngaia ni karikaki iroun te Atua. Anne bukina ae e aranaki n te Baibara bwa Natin te Atua. (Ioane 20:31) Imwini karikan Iesu iroun Iehova e a kabongana ana moanibung aei bwa “te tia mwakuri ae mwaatai” ni karikii bwaai ni kabane ao aomata ma anera.​—Taeka N Rabakau 8:​30, 31; I-Korote 1:15, 16.

 E aki taekinna Iesu Kristo bwa te Atua ngaia. Ma e kabwarabwaraa ni kangai: “I tei [ibukin te Atua], ao boni Ngaia ae kanakomaiai.” (Ioane 7:29) Ngke e taetae Iesu nakon te tia rimwina temanna ao e taekina Iehova ni kangai, “Tamau ao Tamami” ao “Atuau ao Atuami.” (Ioane 20:17) Imwini maten Iesu, ao e a kautia Iehova nakon te maiu i karawa ao e anganna te mwioko ae korakora i Angaataina.​—Mataio 28:18; Mwakuri 2:32, 33.

E Kona ni Buokiko Iesu Kristo Bwa Ko na Kaania te Atua

E ruo Iesu nakon te aonnaba bwa e na reireinira taekan Tamana. Bon Iehova ae taekina Iesu ni kangai: “Natiu ae I tangiria teuaei, kam na ongo irouna.” (Mareko 9:7) E ataa riki te Atua Iesu nakon ataakina irouia aomata nako. E taku: “Akea ae e ataa te Tama ma tii te Nati, n ikotaki ma ane e kukurei te Nati ni kaotia nakoina.”​—Ruka 10:22.

E kororaoi kaotiotan aroaron te Atua iroun Iesu. E kakairi raoi Iesu n aroaron Tamana n te aro are e a kona ni kangai: “Ane e a tia n norai ao e a tia naba n nora te Tama.” (Ioane 14:9) E katikiia aomata Iesu nakon te Atua n arona ni kaotiota ana tangira Tamana, rinanon ana taetaenikawai ao ana mwakuri. E taku: “Boni ngai te kawai ao te koaua ao te maiu. Akea ae e na nakon te Tama ma tii ane e rirou.” (Ioane 14:6) E taku naba: “A nang taromauria iai te Tama n te taamnei ao n te koaua, taan taromauri ni koaua, bwa e bon ukoukoriia aekaki n aomata aikai te Tama bwa a na taromauria.” (Ioane 4:23) Iangoa anne! E ukoukoriia aomata n ai arom Iehova ake a kan ataa te koaua ibukina.