E kaokoro aia rongorongo Mataio ma Ruka ibukini baike a riki ni bungiakin Iesu ao maiuna ngke e uarereke, ibukina bwa a karakini baika riki n itera aika kakaokoro taani korei Euangkerio aikai.

E kaatuuaki n ana rongorongo Mataio baika riki ni kaineti ma Ioteba. E taekina aron Ioteba n te moantai ngke e a bikoukou Maria, miina are e kabwarabwaraaki iai rikin anne iroun te anera, ao butimwaean anne irouna. (Mat. 1:​19-25) E reitia Mataio n taekina miin Ioteba ike e kaumakaki iai iroun te anera bwa e na birinako nako Aikubita, birinakona ma ana utu, miina are e tuangnga iai te anera bwa e na okira Iteraera, okina, ao ana babaire are a na maeka ana utu i Natareta. (Mat. 2:​13, 14, 19-23) N taiani moani mwakoro n te Euangkerio ae Mataio, e kaotaki aran Ioteba wanua te tai, ma tii aua arani Maria.

N te itera are teuana, e kaatuua riki Ruka taekani Maria n ana rongorongo. E karakina kawarani Maria iroun te anera are Kabiriera, mwanangana nakon ana koraki are Eritabeta, ao ana taeka n nebonebo nakon Iehova. (Ruka 1:​26-56) E taekin naba Ruka ana taeka Timeon nakoni Maria ni kaineti ma karawawataan Iesu rimwi riki. N rongorongoni mwanangaia ana utu Maria nakon te tembora ngke 12 ana ririki Iesu, e korei Ruka ana taeka neiei ao tiaki ana taeka Ioteba. E koreia naba Ruka bwa e korakora rotakini Maria ni baika riki aikai ni kabane. (Ruka 2:​19, 34, 35, 48, 51) Ni moani mwakoron Ruka ake uoua, e oti arani Maria 12 te tai, ma tii 3 te tai aran Ioteba. Ngaia are e kabwarabwaraa riki Mataio tabeaiangan Ioteba ma ana mwakuri, ao Ruka e kabwarabwaraa riki tabeni Maria ma baike a riki nakoina.

N aron naba anne, a kakaokoro kateiriki ake a kaotii taani korei Euangkerio aikai. Mataio e kateirikia Ioteba mairouia ana bakatibu ao e kaotia bwa bon te tia bwaibwai Iesu n uean Tawita ibukina bwa e natinaki iroun Ioteba. Bukin tera? Ibukina bwa Ioteba boni kanoan te Uea ae Tawita mairoun natin Tawita are Toromon. (Mat. 1:​6, 16) Ma Ruka e kateirikia Maria mairouia ana bakatibu neiei ao e kaotia bwa bon te tia bwaibwai ni koaua Iesu n uean Tawita ngkai kanoan Tawita ngaia. (IRom 1:3) Bukin tera? Ibukina bwa Maria boni kanoan te Uea ae Tawita mairoun natin Tawita are Natan. (Ruka 3:31) Ma e aera Ruka ngke e aki korea arani Maria n ana kateiriki, ni kaotia ae Eri bon taman neiei? Ibukina bwa kateiriki aika kinaaki n te tua, bon tii kateirikiaia mwaane. Ngaia are ngke e korea Ioteba Ruka bwa natin Eri, e nanonna iai bwa Ioteba boni buun natin Eri.​—Ruka 3:23.

A kamatoaaki raoi n aia kateiriki Mataio ao Ruka bwa Iesu bon te Mesia are e a kaman taekinaki. Ni koauana, e rangi n ataaki koauani kateirikian Iesu n te aro are a aki kona ni kakewea naba Baritaio ma Tarukaio. Ni boong aikai, a teimatoa aia kateiriki Mataio ao Ruka n riki naba bwa aan ara onimaki, ao te bwai ni kakoaua ibukin ana berita te Atua aika kokoro bukia.