KAONGORA IBUKIN TE REIREI 33
A na Kamaiuaki Naake “A Ongo Iroum”
“Teimatoa n tarataraa raoi arom ao aron am angareirei. Teimatoa ni baikai, bwa ngkana ko karaoa aei, ko kamaiuko iai ma ake a ongo iroum.”—1TIM. 4:16.
ANENE 67 ‘Tataekina te Taeka’
KANOANA *
1. Tera ae ti bane n tangiria ibukia ara koraki?
“MAN te tai are I reiakina iai te koaua, I a tangiriia naba kaain au utu ni kabane bwa a na roko n te Bwaretaiti.” Anne ana taeka te tari te aine ae Pauline. * E reitia n taku: “Ai moarara riki buu ae Wayne ao natira te mwaane, I tangiriia bwa a na raonai ni beku ibukin Iehova.” Iai am koraki aika tuai ni kinaa Iehova ao n tangiria? E bae n titeboo am namakin ma Pauline ibukia ana utu.
2. Baikara titiraki ake ti na kaekai n te kaongora aei?
2 Ti aki kona ni kairoroiia ara koraki bwa a na butimwaea te rongorongo ae raoiroi, ma ti kona ni kaungaia bwa a na kauki nanoia ao aia iango nakon te rongorongo man te Baibara. (2Tim. 3:14, 15) E aera bwa ti riai n uarongorongo nakoia ara koraki? E aera bwa ti riai ni kaota te atataiaomata nakoia? Tera ae ti kona ni karaoia bwa ti aonga ni buokiia ara koraki bwa a na tangira Iehova n ai arora? Ao a na kangaa ni buokira kaain ara ekaretia ni kabane?
E AERA BWA TI RIAI N UARONGORONGO NAKOIA ARA KORAKI?
3. Ni kaineti ma 2 Betero 3:9, e aera bwa ti riai n uarongorongo nakoia ara koraki?
3 E a kaan te tai ae e nang kamauna iai te waaki ae ngkai Iehova. A na bon tii kamaiuaki naake “a tauraoi nanoia ni butimwaea te koaua ae kairiia nakon te maiu are aki toki.” (Mwa. 13:48) Ti kabanea korakorara ao ara tai n uarongorongo nakoia aika ti aki kinaia, ngaia are ti boni bae naba n tangiriia ara koraki bwa a na raonira ni beku ibukin Iehova. “E aki tangira kamaunaan temanna [Tamara ae tatangira ae Iehova] ma e tangiriia aomata nako bwa a na rairi nanoia.”—Wareka 2 Betero 3:9.
4. Tera te kairua ae ti kona ni karaoia ngkana ti uarongorongo nakoia ara koraki?
4 Ti riai n ururingnga are iai te anga ae eti ao ae kairua ibukin tataekinan te rongorongo ni kakamaiu. N te katoto, ti kona n taetae ma te akoi ngkana ti uarongorongo nakon te aomata ae ti aki kinaa, ma ti kona n aki wimakiki ngkana ti maroro ma ara koraki.
5. Tera ae ti riai n ururingnga imwain taekinan te koaua nakoia ara koraki?
5 A bati i buakora ake a uringaaba n aroia ngke a moan uarongorongo nakoia aia koraki, ao a iangoia bwa a riai ni kaota riki te akoi ngke a karaoia. E anga te reirei ni kairiri te abotoro Bauro nakoia Kristian, ni kangai: “A na raonaki n taai nako ami taeka n te atataiaomata ao n taoronaki, bwa kam aonga n ataa aromi ni kaeka ae riai nakoia aomata n tatabemania nako.” (IKoro. 4:5, 6) E kakawaki ururingan te taeka n reirei aei ngkana ti maroro ma ara koraki, bwa ti kaawa ni kaunia ao a na aki kani manga ongora iroura.
TERA AE TI KONA NI KARAOIA BWA TI AONGA NI BUOKIIA ARA KORAKI?
6-7. Taekina te katoto ae kaota kakawakini kaotiotan te atataiaomata nakon te rao ae tiaki kaain te onimaki.
6 Kaota te atataiaomata. E taku Pauline are taekinaki mai moa: “N te moantai, I tii kani mamaroroakina taekan te Atua ao te Baibara nakoni buu. Ti aki mamaroroakini baika irekereke ma maiura ni katoabong.” Ma buun Pauline ae Wayne e karako ana
atatai n te Baibara, ao e aki ota ni baike e taekini buuna. Ngaia are irouna, taraan ae neiei e a bon tii iaiangoa naba ana Aro. E raraoma teuaei bwa tao e a kaaina te koraki n Aro ae karuanikai buuna ao e a burebureaki.7 E taekinna Pauline bwa i nanon tabeua te tai e kakabanea ana tai ae bati n te tairiki ao n te wikeen i rarikia taari, n taai n taromauri, n uarongorongo, ao ni botaki ni kaungaunga. E taku Pauline: “N tabetai, e a oki Wayne ao ai akea kaain te auti ao e a namakina te botu.” E tangiria Wayne bwa e nang bane ana tai buuna ma natina i rarikina. E aki kinaia raoraoni buuna ao e taraa n ae a a kakawaki riki naakai nakoina. N tokina ao Wayne e a kakamaaka Pauline bwa a nang buuraure. Ko kona n nori itera ake e kona riki iai Pauline ni kaota te atataiaomata?
8. Ni kaineti ma 1 Betero 3:1, 2, tera ae a kona n rotaki riki iai nanoia ara koraki?
8 Katea te katoto ae tamaroa. N angiin te tai, a rotaki riki nanoia ara koraki n te bwai ae ti karaoia nakon ae ti taekinna. (Wareka 1 Betero 3:1, 2.) E a ataa anne imwina Pauline. E taku: “I ataia ae e tangirira Wayne ao e bon aki kani buuraure. Ma arona ni kakamaakai anne, I a ataia iai bwa I a riai ni karaoi bitaki aika boraoi ma nanon Iehova. N oneani mwin are N na kabatiaa au taetaenikawai, I a riai ni katea te katoto ae tamaroa n aroarou.” E a aki manga kairoroa Wayne neiei bwa a na maroroakina te Baibara, ao e a mamaroro ma ngaia ni kaineti ma baika irekereke ma maiuia. E a noria Wayne bwa e a aki unun buuna ao e nora naba natiia bwa e a ongeaba riki. (TaeRab. 31:18, 27, 28) Ngke e noria Wayne bwa e nakoraoi aroia ana utu man te reirei n te Baibara, e a moanna n iangoa te rongorongo are n Ana Taeka te Atua ao ni butimwaeia.—1Kor. 7:12-14, 16.
9. E aera ngkai ti riai n teimatoa ni kataia ni buokiia ara koraki?
9 Teimatoa ni kataia ni buokiia am koraki. E katea te katoto ibukira Iehova. E “okioki” n angania aomata aia tai bwa a na butimwaea te rongorongo ae raoiroi ao ni karekei maiuia. (Ier. 44:4) Ao e tuanga Timoteo te abotoro Bauro bwa e na teimatoa ni buokiia tabemwaang. Bukin tera? Bwa ngkana e karaoa anne, e na kamaiua iai ma naake a ongo irouna. (1Tim. 4:16) Ti tangiriia ara koraki, ao ti tangiria bwa a na ataa te koaua man Ana Taeka te Atua. Imwin tabeua te tai, e a anaaki nanoia ana utu Pauline n ana taeka ao n ana mwakuri. E kukurei neiei bwa e a beku ngkai ma buuna ibukin Iehova. A uaia ni bwaiania, ao Wayne ai te unimwaane n te ekaretia.
10. E aera ngkai ti riai n taotaon nanora?
10 Bwaina te taotaonakinnano. Ngkana ti kaboraoi maiura ma ana kaetieti te Baibara, e kona ni kangaanga irouia ara koraki bwa a na butimwaei ara koaua aika boou ao aroaroni maiura. N angiin te tai, te moanibwai ae a noria, ti a aikoa iriri ni bukamaru aika irekereke ma te Aro ao ti a aki naba irekereke ma te tautaeka. A kona n un iroura ara koraki tabeman n te moantai. (Mat. 10:35, 36) Ma ti aki riai ni kabwarai nanora irouia. Ngkana ti a aki manga kataia ni buokiia bwa a na ota n ara koaua, ai aron ae ti a motiki taekaia bwa a aki tau ni karekea te maiu are aki toki. E aki mwiokoira Iehova bwa ti na motikitaeka ma e mwiokoa Iesu. (Ioa. 5:22) Ngkana ti taotaon nanora, ane a na kukurei n ongora iroura ara koraki imwina riki.—Nora te bwaoki ae “ Kamanena Ara Atureti n te Intanete n Angareirei Iai.”
11-13. Tera reireiam man aron Alice nakoia ana karo?
11 Bwaina te akoi ma tai bita am babaire. (TaeRab. 15:2) Iangoa ana katoto Alice. E reiakina taekan Iehova ngke e mena n te tabo ae raroanako ma ana karo aika aki kakoauaa te Atua ao a rangi n irekereke ma te tautaeka. E ataia neiei ae e riai ni waekoa ni kaongoia ana karo taekani baika raraoi ake e reiakin. E taku: “Ngkana ko aki waekoa ni kaongoia am utu bitakin am koaua ao aroarom, ane a na un riki.” E korea ana reta nakoia ana karo ao e tuangia bwa tera aia iango n ana taeka te Baibara ni kaineti ma reirei ake e taku bwa a anaaki nanoia iai, n aron te tangira. (1Kor. 13:1-13) E kaitauia ana karo ibukin aroia ni kaikawaia ao n tabeakinna, ao e kanakoi bwaintangira nakoia. Ngkana e kakawariia ana karo ni mwengaia, e kabanea ana konaa ni buoka tinana n te auti. N te moantai, a aki kukurei ana karo Alice ngke e tuangia taekan ana koaua aika boou.
12 Ngkana e mena Alice ni mwengaia ana karo, e teimatoa n ira ana babaire n ana wareware n te Baibara. E taku: “E buokaki iai tinau bwa e na ataia ae e rangi ni kakawaki te Baibara irou.” E a motikia tamana bwa e na reiakina te Baibara bwa e aonga n ataa bukini bitakin natina, ao e kan tiriburea te Baibara. E taku Alice: “I anganna ana Baibara ao I korea i aona au taeka ae uarereke nakoina.” Tera mwina? N oneani mwin are e na tiribure, e rangi n anaaki nanon taman Alice n te baere e warekia n Ana Taeka te Atua.
13 Ti riai ni bwaina te akoi ma ti aki riai ni bita ara babaire, e ngae naba ngkana ti kaaitarai kataaki. (1Kor. 4:12b) N te katoto, e boni kaitaraaki iroun tinana Alice. E taku: “Ngke I a bwabetitoaki, e aranai tinau bwa ‘te nati ae aki ongeaba.’” Ma tera aron Alice? “I waekoa ni maroroakina anne ao I kabwarabwaraa ma te karinerine bwa I a tia ni motikia bwa N na riki bwa kaain Ana Tia Kakoaua Iehova, ao N na aki bita au motinnano. I kataia ni karaua nanon tinau bwa I rangi n tangiria. Ti bon uaia n tang, ao imwina I a kuukana kanana ae kangkang. Man te tai anne, e a moanna ni kakoauaa tinau ae e kanakoraoa riki aroarou te Baibara.”
14. E aera bwa ti aki riai ni bita ara babaire ni kaineti ma ara beku ibukin Iehova?
14 E bae ni kainnanoaki te tai ae maan ibukia ara koraki bwa a na ota raoi ae e kakawaki iroura ara beku ibukin Iehova. N te katoto, ngke e motikia Alice bwa e na bwaiania ao e aki uaiakina te mwakuri are a rineia ana karo ibukina, e a manga tang naba tinana. Ma e aki bita ana babaire Alice. E taku: “Ngkana ko ira nanoia am utu n te bwai teuana, a na bae ni manga kairoroko nakoni bwaai riki tabeua. Ma ngkana ko kaota te akoi nakoia ao ko aki bita am babaire, a kona tabeman n ongora iroum.” Anne te bwai ae riki iroun Alice. A a uaia ni bwaiania ngkai ana karo, ao ai te unimwaane n te ekaretia tamana.
A NA KANGAA NI BANE N IBUOBUOKI KAAIN TE EKARETIA?
15. Ni kaineti ma Mataio 5:14-16 ao 1 Betero 2:12, a na kangaa ni buokaki ara koraki man aia “mwakuri aika raraoi” taari?
15 E katikiia aomata nakoina Iehova, rinanon aia “mwakuri aika raraoi” kaain te ekaretia. (Wareka Mataio 5:14-16; 1 Betero 2:12.) Ngkana tiaki Ana Tia Kakoaua Iehova buum, e a tia ni kaitiboo ma kaain am ekaretia? E kaoia taari nakoni mwengana Pauline are taekinaki mai mwaina, bwa e aonga ni kinaia riki buuna are Wayne. E uringa Wayne aron te tari te mwaane temanna ni buokia bwa e na atai aroia taani Kakoaua, ao e taku: “E anaa ana motirawa man ana mwakuri bwa ti na mataku n te takaakaro teuana. I taku i nanou, ‘Bon te mwaane naba n ai arora!’”
16. E aera bwa ti riai ni kaoia ara koraki bwa a na kaei ara bobotaki?
16 Te anga teuana ae tamaroa ae ti kona ni buokiia iai ara koraki, boni kaoakia bwa a na irira nakoni bobotaki n te ekaretia. (1Kor. 14:24, 25) Te moani botaki are e kaea Wayne bon te Kauring, ibukina bwa e boo imwin te mwakuri ao e aki rangi ni maan. E taku: “I aki ota raoi n te kabwarabwara ma I tii uringia riki aomata. A kawarai ni butimwaeai ao a taua baiu. I kona n ataia ae bon aomata aika raraoi.” Iai te taanga teuana ae a rangi n akoa Pauline ao a buobuokia ma natina n tain te bobotaki ao te uarongorongo. Ngke e a motikia Wayne bwa e a riai ni karekea riki otana n ana koaua Pauline aika boou, e a butiia teuare te mwaane bwa e na reirei ma ngaia n te Baibara.
17. Tera ae ti aki riai ni bukinira iai, ma e aera bwa ti aki riai ni kabwarai nanora irouia ara koraki?
17 Ti kantaningaia bwa a na bane n raonira ni beku ibukin Iehova ara koraki. Ma n aki ongea ara kakorakora ni buokiia bwa a na riki bwa ana toro Iehova, a kona n aki kaaina te koaua. Ngkana e riki anne, ti aki riai ni bukinira ibukin aia motinnano. Ti bon aki kona ni kairoroa temanna bwa e na butimwaei ara koaua. Ma e ngae n anne, tai kakeaa bongan ae a kona n rotaki nanoia am koraki ngkana a nora kukureim n am beku ibukin Iehova. Tataro ibukia, taetae ma te akoi nakoia, ao teimatoa ni kataia ni buokiia! (Mwa. 20:20) Kakoauaa raoi ae e na boni kakabwaiaa am kakorakora Iehova. Ao ngkana a motikia am koraki bwa a na ongora iroum, a na boni kamaiuaki!
ANENE 57 Uarongorongo Nakoia Aeka n Aomata Nako
^ bar. 5 Ti tangiriia ara koraki bwa a na kinaa Iehova, ma a na motinnanoia bwa a na beku irouna ke a na aki. E na maroroakinaki n te kaongora aei te bwai ae ti kona ni karaoia bwa a aonga ni kan ongora riki iroura ara koraki.
^ bar. 1 A a tia ni bitaki aara tabeua. N te kaongora aei, te taeka ae “koraki” e kaineti nakoia kaain te utu ake a tuai ni beku iroun Iehova.
^ bar. 53 KABWARABWARAAN TE TAAMNEI: Te tari te mwaane ae ataei ngke e buoka tamana ae tiaki kaain te onimaki ni karaoa ana kaa. Ngke e a angaraoi, e a kaota te taamnei nakoina man te jw.org®.
^ bar. 55 KABWARABWARAAN TAAMNEI: Te tari te aine ae kakauongo raoi irouni buuna ngke e karakina ana mwakuri n te bong anne. Imwina riki, a uaia ni kaakibotu n aia utu.
^ bar. 57 KABWARABWARAAN TAAMNEI: E kaoia kaain ana ekaretia te tari te aine aei nakoni mwengana. A kataia n ikikina riki ma buuna. Imwina riki, e a ira buuna teuanne nakon te Kauring.