Bon iai riki tabeia tibun Rewi ake tabeman ake tiaki ibonga, bwa a beku naba bwa bureitiman. A mena i aan ana kairiri te mataniwi i aoia taan tararuaa te tembora. E taku te tia kororongorongo ae te I-Iutaia ae Philo ibukin tabeia bureitiman akanne: “Tabeman i buakoia [tibun Rewi] aikai a teiakini mataroa ake a na rin iai aomata ni mwaaken te tembora. Ake tabeman a tei i matan te tabo ae tabu bwa a na tuka te aomata ae aki kariaiakaki i aan te tua bwa e na rin n oin nanona, ke n tiaki nanona. Tabeman a ririaki ni mwaaken te tembora n tararuaia. A uatei iai ni ngaina ao ni bong.”

E kakamanenaaki te taanga ni bureitiman aei iroun te Tanirim. Bon tii te koraki n I-Iutaia aei ae kariaiakaki irouia kaain Rom bwa a na uouotii bwaai ni buaka.

E kabwarabwaraa te tia rabakau n te Baibara ae Joachim Jeremias bwa ngke e katikaki Iesu irouia bureitiman aikai, ao e titirakinia bwa e aera ngke a aki kamani katikia ngke e angareirei n te tembora. E na bon aki titiraki n aron anne Iesu ngke arona bwa tiaki bureitimanin te tembora nakanne. (Mat. 26.55) E kakoauaa naba te tia kororongorongo anne bwa naake a kanakoaki bwa a na katika Iesu imwain anne, boni bureitimanin te tembora. (Ioa. 7:​32, 45, 46) Imwina riki, a kanakoaki bureitiman ma aia mataniwi bwa a na kaira Iesu nako matan te Tanirim, ao tao bon naakai naba ake a katika te abotoro Bauro nako tinanikun te tembora.​—⁠Mwa. 4:​1-3; 5:​17-27; 21:​27-30.