E aera ngke e taekinna te mwaane are e aranaki bwa “Naewa,” bwa e na “urua” oin tibwangana ngkana e mare ma Ruta? (Ruta 4:1, 6)

N taai ake e koreaki iai te Baibara, ao ngkana e mate te mwaane n akea natina, a a kona n ueke tabeua titiraki, n aron: Tera ae e na riki nakon abana? E nang maunanako aran ana utu? A kaekaaki titiraki akanne n te Tua Rinanoni Mote.

Tera ae e na riki nakon aban te mwaane are mate, ke ae maiu ni kainnano ao e a kaboonakoa abana? E kona tarina ke temanna ana utu ni kaan ni bwaibwai n te aba anne, ke ni kabooa ni kaokia. Ao e na tiku te aba anne n te utu.—NakIbo. 25:23-28; WarIte. 27:8-11.

E na kangaa ni kateimatoaaki aran ana utu teuare mate? Rinanon te katei ae e na mare teuare te eiriki ke te buu ni kaan ma buun tarina are e mate, n aron are e riki nakon Ruta. E na mare te mwaane ma buun tarina are e mate, bwa e aonga ni karika te tia bwaibwai are e na uouota aran teuare mate ao ni bwaibwai n ana bwai. A kawakinaki naba aine aika mate buuia n te babaire aei.—TuaKau. 25:5-7; Mat. 22:23-28.

Iangoa te katoto iroun Naomi. E mare ma te mwaane ae Erimereka. Ngke e mate teuaei ma natiia mwane ake uoman, ao e a tiku neiei n akea te tia tararuaia. (Ruta 1:1-5) Ngke a oki nako Iuta, ao e a tuanga buun natina Naomi are Ruta bwa e na tuanga Boati bwa e na manga kabooa ni kaoka abaia. Teuaei bon ana utu ni kaan Erimereka. (Ruta 2:1, 19, 20; 3:1-4) Ma e ataia Boati bwa iai riki ae kaan ma Erimereka, are e aranaki n te Baibara bwa “Naewa.” E riai n riki bwa te tia manga kabooa ni kaoka te aba.—Ruta 3:9, 12, 13.

N te moantai ao e kan ibuobuoki “Naewa.” (Ruta 4:1-4) E ngae ngke e na kabanemwane teutana, ma e ataia ae e a aki kona Naomi ni karika te teei are e na bwaibwai n aban Erimereka. Ngkanne aban Erimereka a nang riki bwa abana, ngaia are n taraana e nakoraoi te babaire anne ibukina.

Ma e a manga bita ana iango Naewa ngke e a noria bwa e na mare ma Ruta. E taku: “I a aki kona ni manga kabooa, bwa I kaawa n urua oin tibwangau.” (Ruta 4:5, 6) Bukin tera ngke e bita ana iango?

Ngkana e mare Naewa ke temanna riki ma Ruta ao e riki natina te mwaane, e na bwaibwai te nati anne n aban Erimereka. E na kangaa te babaire aei n ‘uruanaki iai tibwangan’ Naewa? E aki kaotaki n te Baibara ma aikai tabeua bukina aika kona n eti.

• Te moan, e na bon aki boo mwin ana kabanemwane, bwa aban Erimereka e nang aki riki bwa abana. E na ababa iai natin Ruta te mwaane.

• Te kauoua, e nang tabena kaamwarakeaia ao tararuaaia Naomi ma Ruta.

• Te katenua, ngkana a riki natin Ruta mairoun Naewa, a na bwaibwai naati akanne i rarikia natin teuaei ngkana iai.

• Te kaaua, ngkana akea natin teuaei, e na kona natin Ruta ni bwaibwai n aban Erimereka ao n aban naba teuaei. E nang anga abana nakon te teei ae uouota aran Erimereka ao tiaki arana. Ngaia are e aki kani buoka Naomi teuaei bwa e kaawa n uruanaki iai tibwangana. E kukurei n anga mwiokoana anne nakon teuare imwina ae Boati. E karaoa anne Boati bwa e “aonga ni manga kaokaki aran teuare mate nakon abana.”—Ruta 4:10.

E tangiria riki Naewa ni kateimatoa oin arana ao tibwangana. E korakora riki te bangaomata n ana iango. Ma n oneani mwin ae e na teimatoa arana, e boni maunanako. E a aikoa naba reke irouna te kakabwaia ae okoro are e a karekea Boati are e riki bwa ana bakatibu te Mesia ae Iesu Kristo. Ai kananokawakira mwin ana bangaomata Naewa ngkai e rawa ni buoka te aomata ae kainnanoa buokana!—Mat. 1:5; Ruka 3:23, 32.