IMWINI boong ni kakarau ma te ang ao e a kabuebue ma n oti taai n te Moanibong, Tebetembwa 1, 1919. Ni bwakantaain te bong anne, a a ikotaki naake a roko aika e kee mwaitiia i aan 1,000, n te tabo ni botaki ae kona ni kaainaki irouia aomata aika 2,500 ibukin ongoraean te reirei are e na moani kaukaki iai te bwabwaro i Cedar Point, Ohio, U.S.A. Ngke e a bwakantaai, a a manga roko riki 2,000 n te booti, n taiani kaa, ao n turein aika okoro. N te Kauabong, a a rangi ni bati aomata n te aro are a a karaoaki nikirani kanoan te bwabwaro i tinaniku i aani kaai aika totoakaei.

N te tabo ni botaki ae nuunikai aei ao e rin ootan taai ribuakoni baanikai ike a a taraa ni korotaamnei iai aia kooti mwaane. A ukukaki n angin te nama ae Lake Erie buraeniman ake i aoni bwaraia aine. E taku temanna te tari te mwaane: “E rangi n tamaroa ao n rau te tabo are e boo iai te bwabwaro ao a raroanako taari ma karongoaaia kaain te aonnaba, kaanga aron ae a a mena n te bwaretaiti.”

E aki roko tamaroan te tabo ni botaki aei ni kabotauaki ma korakorani kimwareireia naake a roko. E taekinaki n te nuutibeeba teuana n te tabo anne bwa “a bane n taraa n rangi n taua te Aro ma bon aomata aika rangi ni kimwareirei ao ni kakatonga.” A rangi ni kukurei Taan Reirei n te Baibara ni mena i rarikia raoia ni Kristian ai moarara riki imwini kataakia aika kakaiaki tabeua te ririki n nako n aron te kakaaitara n tain te buaka, te iraraure ae korakora n taian ekaretia, kainakin te Betaera i Brooklyn, kabureakia aika bati ibukin te Tautaeka n Uea, n ikotaki naba ma taari ake taani kairiri aika waniman ake a karabuutinaki n te maan ae 20 te ririki. *

A a tia ni katoka aia mwakuri n uarongorongo tabeman Taan Reirei n te Baibara ibukini bwaran nanoia ao aki otaia i nanon ririki ni kangaanga akanne. Ma angiina a karaoa aia kabanea ni konaa n nanomwaaka i aani karawawataaia man te tautaeka. N te katoto, e taekinna te tia kakaae rongorongo temanna bwa n aki ongei kauring aika matoatoa, ma ngke e titirakinia Taan Reirei n te Baibara, ao a nanomatoa n taekinna bwa a na “teimatoa n uarongorongoa ana taeka te Atua ni karokoa te toki.”

N tain te kataaki aei, a a tia Taan Reirei n te Baibara aika kakaonimaki ni “matakuakina ana kairiri te Uea, . . . ni katoatai n tataroa ana kairiri te Tama.” A a katiteuanaaki ngkai n aia runga ae kakukurei i Cedar Point. E taekina te bwai ae a namakinna naba aomata aika bati temanna te tari te aine, bwa tera aroia ni “manga karikirakea aia mwakuri ao aia uarongorongo n te aro ae baireaki  raoi.” Akea riki te bwai ae a kani karaoia ma a a tangiria ni manga waakina aia mwakuri!

I nanon te wiki anne ao a aki ota raoi naake a roko n taeka aika “GA” aika boreetiaki i aoni kaetietin te bwabwaro, beeba ni butimwaei, ao baaba ni kaongora ni katobibia te tabo ni bwabwaro. N te Kanimabong ae aranaki bwa te “Co-Laborers’ Day,” ao Joseph F. Rutherford e a kaota nanon te bwai are raba nakoia kaain te bwabwaro aika 6,000. E tei “GA” ibukin The Golden Age ae te maekatin ae boou ibukin te mwakuri ni minita. *

E taku Brother Rutherford ngke e taekinia raona ni Kristian aika kabiraki: “Ibukina bwa a onimaki, a kona n nora te tai ae moan te kakukurei i aan ana tautaeka ae mimitong te Mesia n aki ongei kangaanga. . . . A iangoia bwa bon tabeia ae moan te kakawaki ao te kakabwaia katanoataan rokon te tai anne nakoia aomata. Boni mwiokoaia naba mairoun te Atua.”

E na kabonganaaki The Golden Age, ae oti i tinanikuna “te Maekatin ae Kaota te Koaua, e Kauekea te Kantaninga ae Raoiroi ao te Onimaki,” bwa te anga ae boou ibukini kabutanakoan te koaua ni karaoan te mwakuri ae okoro ni karekeia aomata ake a kani kakarokoaki aia maekatin man te auti teuana ma teuana. Ngke e tabekaki te titiraki bwa iraman ake a kani karaoa te mwakuri anne, a bane n teirake naake a roko. “Ibukin ingaingaia ao kakatongaia naake a toua mwini mwanekan Iesu” a anenea te kuna ae, “Te Uea, Ko na kanakoa am ota ao am koaua.” E taku J. M. Norris: “I aki kona ni mwanuokina aroia n anene n tatakarua n te aro are a a taraa ni mwaeiei aroka.”

Imwin te kabwarabwara ao a tei n te rain i nanon tabeua te aoa naake a roko, bwa a na karin araia bwa e aonga n roroko te maekatin aei irouia. A bati ake titeboo aia namakin ma Mabel Philbrick are kangai: “Ai kakimwareireira ataakin ae e a manga reke riki ara mwakuri!”

A katauraoiia tao 7,000 Taan Reirei n te Baibara ibukin te mwakuri. E kabwarabwaraaki n te beeba ni kaongora ae Organization Method ao te boki ae uarereke ae atuna Te Koraki Ake A Mwiokoaki n te Mwakuri ni kangai: E na kaira te mwakuri te Aobiti ae boou Ibukin te Mwakuri, ni kautun ara botaki. E riai ni kateaki n te ekaretia te Komete Ibukin te Mwakuri ao n rineaki te tia kairiri bwa e na tibwai kaetieti aika reke. A na tibwatibwaaki aono nakoni mwakoro aika mena iai mwenga aika 150 nakon 200. E na karaoaki te Botaki Ibukin te Uarongorongo ni katoaa tairikin te Kaabong ibukia taari mwaane bwa a na taekin rongorongo ao ni karin ribooti ibukin te mwakuri.

E taku Herman Philbrick: “N okirani mwengara, ti bane n tabetabe n te mwakuri ae okoro ibukini kakarokoan aia maekatin aomata.” A kaitiboo ma aomata aika kan ongora n taabo nako. E taku Beulah Covey: “E taraa n ae imwin te buaka ma te nanokawaki ae korakora, a bane aomata ni butimwaea te iango ae taekan te tai ae moan te kakukurei ike a nangi bane n toki iai kangaanga.” E korea ae kangai Arthur Claus: “A rangi ni mimi kaain te ekaretia ni kabane ni batin te beeba ni bubutii ibukini kakarokoan te maekatin.” I nanon uoua te namwakaina ni moan otinakon te maekatin, e kaania te itera ni mirion katoton The Golden Age ake a anganaki aomata ao 50,000 ake a kani kakarokoaki aia maekatin.

Imwina riki ao A. H Macmillan e taekina te kaongora ae te “Gospel of the Kingdom” n Te Taua-n-Tantani ae bwain Turai 1, 1920 n te taetae n Ingiriti, bwa “te moani katanoata ae baireaki ibukini karaoan te mwakuri n uarongorongo ni katobibia te aonnaba, n aron ae karaoaki ngkai.” A kaumakaki Kristian aika kabiraki n te kaongora aei bwa a na “kaota te bwai ni kakoaua nakoia kaain te aonnaba bwa e a kaan roko te tautaeka n uea ae bwaini karawa.” Ni boong aikai, a raonaki tarini Kristo ake “te koraki ake a mwiokoaki n te mwakuri” irouia mirion ma mirion aika ingainga n uarongorongoa te taeka ao a kariariaa te tai ae moan te kakukurei i aan te Mesia.