E A KAMAN taekinna Iesu bwa a na karaoa te mwakuri n tai ae bati n tain te toki aei taan rimwina. (Mat. 9:37; 24:14) Iangoa aroni koauan taeka aikai n te aro ae kaokoro n aonon Transcarpathia i Ukraine. I buakoni kaawa aika tii tenua ake i rarikin te aono anne, iai 50 ekaretia ao taan uarongorongo aika e raka i aon 5,400 mwaitiia. * Ai kamimira aei bwa 1 mai buakoia 4 aomata ni kaawa aikai, bon Ana Tia Kakoaua Iehova!

Tera aroia aomata n te aono aei? E taku te tari te mwaane ae Vasile n te tabo anne: “A karinea te Baibara, e kakawaki irouia te kaetitaeka ae riai, e korakora te reitaki n te utu, ao a kakorakoraia n ibuobuoki i marenaia.” E reitia n taku: “A aki kakoauai ara koaua n taai nako. Ma ngkana ko kaota te bwai teuana man te Baibara, a boni kakauongo raoi.”

Ni koauana, a aitara taari ma kangaanga aika kamimi ngkana a uarongorongo n te aono ae rangi ni bati iai te tia uarongorongo ni kabotauaki ma mwaitiia kaaina. N te katoto, iai n te ekaretia teuana 134 taan uarongorongo ma tii 50 mwenga n te aono anne! A kangaa ni kanakoraoa aia mwakuri taan uarongorongo n te aekaki aei?

A bati taari aika kamanenai korakoraia, aia tai ma aia mwane bwa a aonga n uarongorongo n taabo ake e kainnanoaki riki iai te ibuobuoki. “Mwaitiia taan uarongorongo nakon auti n ara ekaretia n ara aono ni kaineti ma mwaitiia kaaina bon 1 nakon 2 te auti,” aio ana taeka Ionash ae te tari te mwaane ae 90 ana ririki. “I uarongorongo n te kaawa, ma n taai aikai ngkai e a kerikaaki marurungiu I mwamwananga naba tao 100 te maire (160 te kiromita) nakon te aono ae aki bati ni kakawaraki, ao n uarongorongo iai n te taetae n Hungary.” A riai taan uarongorongo n anga ngaiia n ibuobuoki n aono riki tabeua. E taku Ionash: “Ngkana N na kaea te turein, I riai n uti n te aoa 4:00 n te karangaina ao I uarongorongo ni karokoa te aoa 6:00 n te tairiki ae ana tai te turein n okira au tabo. I kakaraoa aei uatai ke tentai n te wiki.” E namakinna bwa e materaoi ana kakorakora? E taku: “I karekea te kimwareirei ae bati n te aeka n uarongorongo anne. I kukurei bwa I buoka te utu teuana ae raroanako n reiakina te koaua.”

E teretere bwa a aki kona ni bane ni mwananga n te kawai ae raroa kaain ekaretia aika n te aono aei. Ma a bane ni kakorakoraia taan uarongorongo ni mwakuria aia aono ni kabutaa n ikotaki naba ma kaara. Ibukin anne, n 2017, a botaki kaawa aika tenua aikai ni karaoa te Kauring, ao mwaitiia aika roko e kaania uoua okiokini mwaitiia taan uarongorongo ke iterani mwaitiia kaain te kaawa ni kabane. Akea te nanououa bwa n taabo nako ake tao ti beku iai ti na teimatoa ni kakorakoraira “n ana mwakuri te Uea ni kamwaiti.”—1Kor. 15:58.