1-2. (a) Tera ae buokira n nanomwaaka n te bong teuana ma teuana? Kabwarabwaraa. (b) Tera ae ti na rinanona n te kaongora aei?

“NGKANA I iangoa te kataaki are I rinanona, I ataia ae I aki kona ni kaitaraa i bon irou.” Ko a tia n taekina naba anne? A bati i buakora aika a tia. Tao ko taekinna imwin iaiangoan arom ni kaitaraa te aoraki ae kakaiaki ke maten ae tangiraki iroum. Ngkana ko ururing rikaaki, ko namakinna ae ko kona n nanomwaaka n te bong teuana ma teuana, tii man ana ibuobuoki te taamnei ae raoiroi are mairoun Iehova are anganiko te “korakora ae riaoni korakoraia aomata.”​—2Kor. 4:​7-9.

² Ti onimakina naba te taamnei ae raoiroi ibukini buokara n rarawa nakon te kariri n te waaki ae buakaka ae ngkai. (1Ioa. 5:19) Irarikina, ti riai ni kabokorakora ni kaaitaraia “taanga n taamnei aika buakaka.” (IEbe. 6:12) Ti na nori ngkai aanga aika uoua ake e kona ni buokira iai te taamnei ae raoiroi ni kaaitarai kangaanga akanne. Imwina ti na maroroakina te bwai ae ti kona ni karaoia bwa ti aonga ni buokaki riki rinanon te taamnei ae raoiroi.

3. Tera te anga teuana ae e buokira iai Iehova ni kaaitarai kataaki?

³ E buokira te taamnei ae raoiroi n anganira te korakora bwa ti aonga ni kakororaoi mwiokoara n aki ongei kataaki. E namakinna te abotoro Bauro bwa e kona n teimatoa ni beku n aki ongei kataakina, ibukina bwa e onimakina “mwaakan te Kristo.” (2Kor. 12:9) Ni kauouani mwanangana ni mitinare, e aki tii mwakuri korakora n uarongorongo, ma e mwakuri ni kareketianti naba ibukini boutokaana. E tiku i Korinto ni mwengaia Akura ma Beritikira aika taani karaoi umwanrianna aika kunnikai. Ngkai titeboo rabakauni Bauro ma ngaiia, e a mwakuri i rarikia i nanon tabebong. (Mwa. 18:​1-4) E reke  korakorani Bauro rinanon te taamnei ae raoiroi ibukin ana mwakuri ni kareketianti ao kakororaoan ana mwakuri ni minita.

4. Ni kaineti ma 2 I-Korinto 12:7b-9, tera ae e kabokorakora ma ngaia Bauro?

⁴ Wareka 2 I-Korinto 12:7b-9. N te kibu aei, tera ae e nanonna Bauro n “te bwai ni kateketeke n te rabwata” are e kabokorakora ma ngaia? Ngkana iai te kateketeke n rabwatam, ko bae n rangi ni maraki iai. Ngaia are e taekinna Bauro bwa e kaaitara ma te kataaki teuana ae kammaraki. E arana te kataaki anne bwa “kaanga ana anera Tatan” ae teimatoa n ‘ororeia.’ Tao a aki karekea ana kangaanga Bauro, Tatan ma ana taimonio, are ai aron te bwai ni kateketeke n rabwatana. Ma ngke a nora te “bwai ni kateketeke” taimonio aikai, tao a ingainga ni karibunakoa riki n te aro ni kaikonaki, ni kakorakoraa riki marakini Bauro. Ma tera aroni Bauro?

5. Tera aron Iehova ni kaekaa ana tataro Bauro?

⁵ N te moantai, e tangiria Bauro bwa e na kanakoaki “te bwai ni kateketeke” anne. E taku: “I katenua au tai ni bubutii nakon te Uea [ae Iehova] ibukin te bwai . . . aei bwa e na nako mairou.” E ngae ngke e tataroia Bauro ma e bon aki nako mai rabwatana. Nanona bwa Iehova e aki kaekaa ana tataro Bauro? Tiaki ngaia anne. E boni kaekaa. E aki kanakoa te kangaanga anne Iehova, ma e angani Bauro te korakora bwa e aonga n nanomwaaka iai. E taku Iehova: “E kakororaoaki mwaakau iroum ni mamaaram.” (2Kor. 12:​8, 9) E kona Bauro ni kateimatoa kimwareireina ao raun nanona man ana ibuobuoki te Atua!​—IBir. 4:​4-7.

6. (a) Tera aron Iehova ni kaekai ara tataro? (b) Baikara berita mani kiibu aika kaotaki ikai aika kakorakorako?

⁶ N aroni Bauro, ko a tia ni bubutiia Iehova bwa e na kanakoa kataakim teuana? Ngkana e teimatoa am kangaanga anne ke e a korakora riki, n aki ongea am kakorakora n tataro ni bubutii, ko raraoma bwa tao e a aki kukurei Iehova iroum? Ngkana ngaia anne, uringa ana katoto Bauro. N aron Iehova ni kaekaa ana tataro, e na boni kaekaa naba am tataro! E kona n aki kanakoa am kangaanga Iehova. Ma rinanon te taamnei ae raoiroi, e na anganiko te korakora ae ko kainnanoia bwa ko aonga n nanomwaaka i aani kataakim anne. (TaiAre. 61:​3, 4) Tao ko a tia ni “kabwakaaki,” ma e na bon aki katikuko Iehova n aki buokiko.​—2Kor. 4:​8, 9; IBir. 4:13.

7-8. (a) N te aro raa ae titeboo iai te taamnei ae raoiroi ma te ang? (b) E kangaa Betero ni kabwarabwaraa mwamwakurin te taamnei ae raoiroi?

⁷ Tera riki te anga teuana ae buokira iai te taamnei ae raoiroi? N aron te ang ae karekare, e kona te taamnei ae raoiroi ni kateimatoaira n ara beku ribuakoni marebun taari ae taekani kataakira, ni karokoa rokora n te aonnaba ae boou are e beritanna te Atua.

⁸ E taneiai ma te boborau te abotoro Betero ngkai te tia akawa ngaia. Ngaia are e kakawaki ataakin ae e kabwarabwaraa mwamwakurin te taamnei ae raoiroi n te taeka ae irekereke ma te boborau. E korea aei: “Akea te taetae ni burabeti ae reke mai nanon te aomata, ma a taetae aomata mairoun te Atua ngke a kairaki n te taamnei ae raoiroi.” Te taetae ni Kuriiti ae rairaki bwa “kairaki,” nanona raoi “kairiraki; uouotaki.”​—2Bet. 1:21; kbn.

9. Tera te taamnei ae e kateia Betero ngke e kabongana te taeka ae “uouotaki”?

⁹ Tera te taamnei ae e kateia Betero n te taeka ae “uouotaki”? E kamanenaaki naba tein te taeka ni Kuriiti anne iroun Ruka are te tia korea Mwakuri, ni kabwarabwaraa iai te kaibuke ae ‘uotakinako’ n te ang. (Mwa. 27:15) Ngaia are ngke e taekinna Betero bwa a “uouotaki” taani korea te Baibara,  e kamanena “te taeka ni karariki ae kakamanenaaki n te boborau,” n aron ae e taekinna te tia rabakau n te Baibara temanna. E taekinna Betero bwa n aron te kaibuke ae uouotaki n te ang ibukini karokoana ni kawaina, ao ai aroia naba burabeti ma taani korea te Baibara bwa a uouotaki n te taamnei ae raoiroi ibukini kakororaoani mwiokoaia. E taku riki te tia rabakau anne: “Ai aron ae a irakea aia ie burabeti.” E karaoa tabena Iehova. E katauraoa te ang ke te taamnei ae raoiroi. A karaoa tabeia taani korea te Baibara. A karaoa ae boraoi ma kairaia rinanon te taamnei anne.

10-11. Baikara baika uoua aika ti riai ni karaoi bwa ti aonga ni kairiraki n te taamnei ae raoiroi? Kabwarabwaraa.

¹⁰ Ni boong aikai e a aki manga kamanena taamneina Iehova ni kairiia iai aomata bwa a na korea te Baibara. Ma e bon teimatoa ni kamanena taamneina ae raoiroi ni kaiririia iai ana toro. E teimatoa ni karaoa tabena Iehova. Ti na kangaa ni kairiraki n taamnein te Atua? Ti riai n taraia raoi bwa ti na karaoa tabera. N te aro raa?

¹¹ Iangoa te kabotau aei. Ngkana e kani buokaki n te ang te tia borau, e riai ni karaoi baika uoua. Te moan, e riai kawain ana booti n ira unin te ang. E na bon aki buti ana booti te tia borau ngkana e tiku n te matabaiawa ao e aki kaea unin te ang. Te kauoua, e riai n irakei raoi ana ie. E ngae ngkana e karekare te ang, ma e na bon tii buti ana booti ngkana a ukaki raoi ana ie n te ang. N aron naba anne, ti na bon nanomwaaka n ara beku ibukin Iehova tii man ana ibuobuoki te taamnei ae raoiroi. Ngkana ti na buokaki iai, ti riai ni karaoi baika uoua. Te moan, ti riai ni karaoi baike e kairira te taamnei ae raoiroi bwa ti na karaoi. Te kauoua, ti riai n irakei raoi ara ie man arora ni kabatiaa ara tai ni kakaraoi baikanne, n aron ara kabanea ni konaa. (TaiAre. 119:32) Ngkana ti karaoi baika uoua aikai, e na buokira te taamnei ae raoiroi ni kateimatoaira n ara beku ribuakoni marebun taari ae taekan te kakaaitara ao  kataaki, ao e na buokira n teimatoa n nanomwaaka ni karokoa rokora n ana aonnaba ae boou te Atua.

12. Tera ae ti na rinanona ngkai?

¹² Ti a tia ni maroroakin aanga aika uoua ake e kona ni buokira iai te taamnei ae raoiroi. E anganira te korakora ao e buokira bwa ti na teimatoa ni kakaonimaki i aani kataaki. E kateimatoaira naba n ara beku ao e buokira bwa ti na teimatoa n toua te kawai ae kairiri nakon te maiu are aki toki. Ti na nori ngkai baika aua aika ti riai ni karaoi bwa ti aonga ni buokaki riki rinanon te taamnei ae raoiroi.

13. Ni kaineti ma 2 Timoteo 3:​16, 17, tera manenan te Baibara ibukira, ma tera ae ti riai ni karaoia?

¹³ Te moan, ukeuke n reirei n Ana Taeka te Atua. (Wareka 2 Timoteo 3:​16, 17.) Te taetae ni Kuriiti ae rairaki bwa ‘kairaki iroun te Atua’ nanona raoi “e nako mai win te Atua.” E kamanena taamneina te Atua ni karina iai ana iango irouia taani korea te Baibara. Ngkana ti wareka te Baibara ao ni kananoa ara iango n te baere ti warekia, e a rin ana kaetieti te Atua n ara iango ao i nanora. A kairira iango akana kairaki koreaia n te taamnei akanne bwa ti na kaboraoa maiura ma nanon te Atua. (Ebera 4:12) Ma ngkana ti na buokaki riki n te taamnei ae raoiroi, ti riai ni karekea ara tai ni kakaraoa ara ukeuke n reirei n te Baibara ao ni kananoa ara iango n te baere ti warekia. N te aro anne e na kairaki iai ara taetaenikawai ao ara mwakuri n Ana Taeka te Atua.

14. (a) E aera bwa ti kona n taekinna bwa ara bobotaki ni Kristian kaanga te tabo are kare te ang nako iai? (b) Ti na kangaa n irakei raoi ara ie ngkana ti kaei bobotaki?

¹⁴ Te kauoua, uaia n taromauria te Atua. (TaiAre. 22:22) Ara bobotaki ni Kristian kaanga te tabo are kare te ang nako iai. E memena taamnein Iehova n ara bobotaki. (TeKao. 2:29) E aera bwa ti kona n taekina anne? Ibukina bwa ngkana ti ikotaki n taromauri ma raora ni Kristian, ti tataroa te taamnei ae raoiroi, ti anenei kunan te Tautaeka n Uea aika boto man Ana Taeka te Atua, ao ti ongoraei reirei man te Baibara mairouia taari mwaane ake a rineaki rinanon te taamnei ae raoiroi. Ao te taamnei ae raoiroi naba anne e buokiia taari aine ni katauraoi ao ni karaoi aia reirei. Ma ngkana ti na buokaki riki n te taamnei ae raoiroi, ti riai ni kamani katauraoi ao n anganga ara kaeka n ara bobotaki. N te aro anne, ai aron ae ti irakei raoi ara ie ngkana ti kaei bobotaki.

15. Ti na kangaa ni kariaia te taamnei ae raoiroi bwa e na buokira n ara uarongorongo?

¹⁵ Te katenua, uataboa te mwakuri n uarongorongo. Ngkana ti kamanena te Baibara n ara mwakuri n uarongorongo ao n angareirei, ti a kariaia te taamnei ae raoiroi bwa e na buokira n ara mwakuri ni minita. (IRom 15:​18, 19) Ma ngkana ko na buokaki riki n taamnein te Atua, ko riai ni katoatai n uataboa te uarongorongo ao ni kamanena te Baibara n taai nako. Te anga teuana ae ko kona iai ni kanakoraoa riki am mwakuri ni minita, boni mani kamanenaan aron te maroro n Te Boki n Reirei ae Maiura ao Ara Mwakuri ni Minita.

16. Tera te anga ae moan te kakawaki ibukini karekean te taamnei ae raoiroi?

¹⁶ Te kaaua, tataro nakon Iehova. (Mat. 7:​7-11; Ruka 11:13) Te anga ae moan te kakawaki ibukini karekean te taamnei ae raoiroi, boni butiiakin Iehova n te tataro. Akea te bwai ae kona n tuka rokon ara tataro iroun Iehova ke n tukira mani karekean te bwaintituaraoi ae taamnein te Atua. E aki kona naba n tukaki n oon te karabuuti ao iroun naba Tatan. (Iak. 1:17) Tera arora n tataro bwa ti aonga ni buokaki riki n te taamnei ae raoiroi? Ibukini kaekaana, ti na nenera  taekan te tataro n te kaikonaki are kaotaki tii n Ana Euangkerio Ruka. *

17. Tera reireiara ibukin te tataro n ana kaikonaki Iesu are n Ruka 11:​5-9, 13?

¹⁷ Wareka Ruka 11:​5-9, 13. E kaotaki n ana kaikonaki Iesu arora ae riai n tataro ibukin te taamnei ae raoiroi. N te kaikonaki aei, e karekea te baere e kainnanoia te mwaane anne “ibukina bwa e nanomwaaka ni bubutii.” E aki maaku ni bubutiia raoraona buokana e ngae ngke e a nukanibong. (Nora study note​—Ruka 11:8 mwbr18 07.) E kangaa Iesu ni kairekerekea te kaikonaki aei ma te tataro? E taku: “Teimatoa ni bubutii ao kam na anganaki, teimatoa n ukeuke ao kam na kunea, teimatoa ni karebwerebwe ao e na kaukaki nakoimi.” Ngaia are tera reireiara iai? Ngkana ti na karekea ana ibuobuoki te taamnei ae raoiroi, ti riai ni botumwaaka n tataroia.

18. Ni kaineti ma ana kaikonaki Iesu, e aera bwa ti kona ni kakoauaa bwa e na bon anganira Iehova taamneina ae raoiroi?

¹⁸ E buokira naba ana kaikonaki Iesu bwa ti na ataa bukin anganakira te taamnei ae raoiroi iroun Iehova. Te mwaane are n te kaikonaki e kani butimwaea raoi ana iruwa. E iangoia bwa e riai ni karekea te amwarake ibukin ana iruwa are roko n te nukanibong, ma ai akea ana nikira nakoina. E taekinna Iesu bwa e karekea te amwarake teuare bubutiiaki, ibukin nanomwaakan teuaei ni bubutii. Tera ae e katereterea Iesu? Ngkana e kukurei te aomata ae aki kororaoi ni buoka raona ae nanomwaaka ni bubutii, ai batira riki iroun Tamara are i karawa ae akoi kani buokaia naake a nanomwaaka ni bubutiia te taamnei ae raoiroi! Ngaia are ti kona ni kakoauaa raoi bwa e na boni kaekaa ara tataro Iehova ngkana ti botumwaaka ni bubutiia taamneina ae raoiroi.​—TaiAre. 10:17; 66:19.

19. E aera bwa ti kona ni kakoauaa bwa ti na bon tokanikai?

¹⁹ Ti kona ni kakoauaa bwa ti na bon tokanikai, n aki ongea ana kakorakora Tatan ni kani kabwakaira. Bukin tera? Ibukina bwa e buokira te taamnei ae raoiroi n aanga aika uoua. Te moan, e anganira te korakora ae ti kainnanoia bwa ti aonga n tokanikai i aoni kataaki. Te kauoua, n aron te ang ae uka ara ie, te taamnei ae raoiroi bon te korakora ae buokira ni kateimatoaira n ara beku ibukin Iehova, ni karokoa rokora n te aonnaba ae boou. Ti bia kamatoai nanora bwa ti na karekea buokara ae bati man ana ibuobuoki te taamnei ae raoiroi!